Kua Autu i “te Tavini Akono Meitaki” te Timata Anga!

“Kua tae oki ki te tuatau e tupu ei te mate i te ngutuare o te Atua nei.” ​—1 PETERO 4:17.

1. Eaa ta Iesu i aro atu i tona tutaka anga i te “tavini”?

I TE Penetekote 33 T.N., kua iki a Iesu i tetai “tavini” kia tua i te kai i te ora mou no tona “ngutuare.” I te 1914, kua akakoronaia a Iesu ei Ariki, e kare i roa ana kua tae mai te tuatau i te tutaka i taua “tavini.” No te tuanga maata, kua kiteaia e ia e kua riro te “tavini” uaorai ei “akono meitaki e te pakari.” No reira, kua iki aia i te reira ki “te au apinga ravarai nana ra.” (Mataio 24:45-47) Inara, te vai katoa ra tetai tavini kino, kare e akono meitaki ana e kare e pakari ana.

“Te Tavini Kino”

2, 3. Noea mai “te tavini kino,” e akapeea te reira i te tupu anga?

² Kua tuatua a Iesu no te tavini kino i muri ake tikai i te uriuri anga i “te tavini akono meitaki e te pakari.” Kua karanga aia e: “Kareka te tavini kino e tuatua ua i roto i tona uaorai ngakau, Kare taku pu e tae vave mai; Kua timata atura i te pāpā i te aronga taeake tavini nona ra, e kai iora i te kai, inu ora i te kava, koia e te aronga katoa e akakona ra; Kia tae ki te rā manako koreia e ia, e te ora kitea koreia e ia ra, e tae mai ei te pu o taua tavini ra, [“e ka akautunga iaia ma te mamae maata rava,” NW], ka tuku atu ei i tana tuanga i roto i te aronga pikikaa katoa ra, tei reira te aue e te pakati anga nio.” (Mataio 24:48-51) Te tuatua “te tavini kino” te akavaitata ra i to tatou manako ki te au tuatua a Iesu i mua akenei no runga i te tavini akono meitaki e te pakari. Ae, kua aere mai te “tavini kino” mei roto i te pupu o te tavini akono meitaki. * Akapeea ra?

³ I mua ake i te 1914, e manganui te au mema o te pupu tavini akono meitaki e au manakonakoanga maata no te aravei anga i te Tane Akaipoipo Ou i te rangi i taua mataiti ra, inara kare i akatupuia to ratou au manakonako anga. Tei tupu no teia e tetai atu au tupuanga ra, e manganui tei maromaroa e e tokoiti ua tei akariri. Ko etai o teia aronga nei kua uri atu i te ‘pāpā anga’ i to ratou au taeake o mua ana ma te tuatua e te piri atu anga ki te “aronga katoa e akakona ra,” te pupu akonoanga o Kerititome.​—Isaia 28:1-3; 32:6.

4. Akapeea a Iesu i te akono atu anga i te “tavini kino” e te katoatoa tei akaari mai i taua tu ra?

⁴ Kua akatakaia mai te au Kerititiano o mua ana ei “tavini kino,” e kua akautunga a Iesu ia ratou ma “te mamae maata rava.” Akapeea ra? Kua kopae ke atu aia ia ratou, e kua ngaro ke atu ia ratou to ratou manakonako anga i te rangi. Inara, kare ratou i takore vivikiia atu. Ka na mua ratou i te akakoromaki i tetai tuatau no te aue anga e te pakati anga i te nio “i te poiri ki vao ra” i te putuputuanga Kerititiano. (Mataio 8:12) Mei taua au tuatau akamata anga, e tokoiti ua te aronga tataki tai akatainuia tei akaari mai i tetai tu kino mei te reira rai, i te akataka anga mai ia ratou uaorai ma te “tavini kino.” Ko etai o te “mamoe ke atu” kua aru i to ratou tu akarongo kore. (Ioane 10:16) Pouroa taua au enemi o Karaiti ra ka kite i taua tu ra i “te poiri ki vao” i te pae vaerua.

5. Akapeea te tavini akono meitaki e te pakari i te ariu mai anga, ei tuke anga ki te “tavini kino” ra?

⁵ Noatu rai, ko te tavini akono meitaki e te pakari kua aere atu na roto i te au timata anga aiteite mei “te tavini kino” ra. Inara, kare i akariri ana, kua akatikatikaia ratou. (2 Korinetia 13:11) Kua akaketaketaia to ratou aroa no Iehova e no  to ratou au taeake. Tei tupu, kua riro mai ratou ei “pou e te rangorango o te tuatua-mou” i teia tuatau ngata i te “tuatau openga.”​—1 Timoteo 3:15; 2 Timoteo 3:1.

Te Paretenia Pakari e te Neneva

6. (a) Akapeea a Iesu i te akatutu mai anga i te kite tau no tana pupu tavini akono meitaki ra? (e) I mua ake i te 1914, eaa te karere ta te au Kerititiano akatainuia i akakite?

⁶ I muri ake i te tuatua anga no “te tavini kino,” kua oronga mai a Iesu e rua parapore i te akaari mai anga e eaa ra etai au Kerititiano akatainuia i riro mai ei ei akono meitaki e te pakari ko tetai ra kare. * Kia akatutu i te kite tau, kua karanga aia e: “E tau oki te basileia o te ao i nga paretenia tino ngauru, ko tei rave i ta ratou au lamepa, e aere atura kia aravei i te tane akaipoipo ou ra. E aronga pakari e toko rima, e neneva oki e toko rima. Ko te aronga neneva ra, kua apai atura i ta ratou au lamepa, kare ra i apai katoa i te mori: Kareka te aronga pakari ra, kua apai ratou i ta ratou au lamepa ma te mori katoa ki roto i ta ratou āriki.” (Mataio 25:1-4) Te akamaara maira te nga paretenia tino ngauru kia tatou no te au Kerititiano akatainuia i mua ake i te 1914. Kua tare ratou e kua vaitata te tane akaipoipo ou, ko Iesu Karaiti, i te mama mai. No reira, kua “aere atura” ratou i te aravei iaia, i te tutu mataku kore anga e ka ope “to te etene tuatau” i te 1914.​—Luka 21:24.

7. I naea e eaa ra te au Kerititiano akatainuia ‘i varea ai e te moe,’ mei tera te tu?

⁷ Kua tano ta ratou. Kua ope to te etene tuatau i te 1914, e kua akamata te Patireia o te Atua i raro ake ia Iesu Karaiti i te angaanga. Inara tei te rangi kitea koreia te reira. I runga i te enua, kua akamata te au tangata i te mamae i te “aue” tei totouia mai. (Apokalupo 12:10, 12) Kua akamata mai tetai tuatau no te timata anga. Kare oki i marama meitaki ana no te au mea ra, kua manako te au Kerititiano akatainuia e kua “roa ra taua tane akaipoipo ou ra.” Kua oripu ua e te aro atura i te tu kino mei te ao ra, kua akamarie mai ratou e kua vaitata i te akamutu i te angaanga akapapaia no te tutu anga ki te tangata. Mei te au paretenia i roto i te parapore, na te tuatua anga i te pae vaerua “kua varea iora [ratou] ravarai e te moe,” mei te au Kerititiano akatutu akarongo kore ra i muri ake i te mate anga te au apotetoro a Iesu.​—Mataio 25:5; Apokalupo 11:7, 8; 12:17.

8. Eaa tei taki atura ki te kapiki anga e: “Te aere mai nei te tane akaipoipo ou!” e e tuatau ia no te au Kerititiano akatainuia ra kia rave i te aa?

⁸ E oti i te 1919 kua tupu mai tetai apinga kare i tapapaia ana. Ka tatau tatou: “E tae akera ki te turuaipo, ko te kapiki maira, I na, te aere mai nei te tane akaipoipo ou nei; ka aere kotou kia aravei atu iaia. Kua tu akera te aronga paretenia katoa ki runga, e kua akateateamamao i ta ratou au lamepa.” (Mataio 25:6, 7) Te taime tikai te akara puapinga kore ua ra te au mea, kua tae mai tetai kapiki anga kia akamaroiroi i te angaanga! I te 1918, kua aere mai a Iesu, “te karere a te koreromotu,” ki te iero pae vaerua o Iehova i te tutaka e te tama i te putuputuanga a te Atua. (Malaki 3:1) E teianei, te anoanoia ra te au Kerititiano akatainuia kia aere atu ki vao e kia aravei iaia i roto i te au paepae enua o taua iero ra. Ko te taime te reira no ratou i te ‘akaiti mai i te mārama.’​—Isaia 60:1; Philipi 2:14, 15.

9, 10. I te 1919, eaa ra etai o te au Kerititiano i “pakari” ei e ko etai e “neneva”?

⁹ Ariana ra! I roto i te parapore ra, e manamanata to tetai papaki o te au vaine ou. Kua akakite mai a Iesu e: “Kua karanga atura te aronga neneva ki te aronga pakari, Ka o mai i tetai manga [“inu,” NW] i ta kotou mori; te matemate nei oki ta matou au lamepa.” (Mataio 25:8) Me kare e inu, kare te au ramepa e oronga mai i te marama. Te akamaara maira i reira te inu o te ramepa kia tatou i te Tuatua a te Atua no te tuatua  mou e tona vaerua tapu, te akamaroiroi maira i te aronga akamori mou kia riro mai ei aronga apai i te marama. (Salamo 119:130; Daniela 5:14) I mua ake i te 1919, kua kimi meitaki te au Kerititiano pakari akatainuia kia kite i to te Atua ra anoano no ratou, noatu to ratou turanga paruparu poto ua te tuatau. No reira, te tae mai anga te kapiki anga kia akaiti i te marama, kua papa ratou.​—2 Timoteo 4:2; Ebera 10:24, 25.

¹⁰ Inara, ko tetai aronga akatainuia, kare i papa ana i te maani i te au atinga me kore i te oronga atu i te tauta anga uaorai​—noatu e te inangaro ngakau tae ra ratou kia tae atu ki te Tane Akaipoipo Ou. No reira te tae mai anga te tuatau kia akamaroiroi i roto i te tutu anga i te tuatua meitaki, kare ratou i papa ake. (Mataio 24:14) Kua tauta katoa ratou i te akamarie i to ratou au oa maroiroi, i te pati anga, i roto i tetai tu, no etai o ta ratou manga inu. I roto i ta Iesu parapore, akapeea te au paretenia pakari i te ariu atu anga? Kua karanga atura ratou e: “Eiaa; ko te kore aea e rava na tatou katoa: e aere ra kotou ki te aronga e oko, ka oko ei i ta kotou uaorai.” (Mataio 25:9) Ma te reira rai, kua patoi te au Kerititiano tiratiratu akatainuia i te 1919 i te rave i tetai apinga te ka akameangiti mai i to ratou uaorai tu kia apai i te marama. No reira, kua autu ratou i te tutakaanga.

11. Eaa tei tupu ki te au paretenia neneva ra?

¹¹ Kua taopenga mai a Iesu e: “E te aere atura [te au paretenia neneva] e oko ra, tae maira taua tane akaipoipo ou ra; e te aronga i vave ra, kua aere atura ratou ma ia katoa ki roto i te oroa akaipoipoanga ra; topiriia iora te pa. E muri ake, kua aere maira tetai pae paretenia ra, na ko maira, E te Atu, e te Atu, ka eeu ana ia matou. Kua karanga atura aia, na ko atura, Koia mou taku e karanga atu kia kotou nei, kare au i kite ia kotou.” (Mataio 25:10-12) Ae, kare etai i papa no te taenga mai te Tane Akaipoipo Ou. No reira, kua poka ia ratou te tutaka e kua ngaro ke te tuatau kia aere atu ki te oroa akaipoipoanga i te rangi ra. Mei teaa ra te tumatetenga!

Te Parapore o te Au Tareni

12. (a) Eaa ta Iesu i taangaanga mai i te akatutu mai anga i te akarongo ra? (e) Koai te tangata tei “aere atura”?

¹² I muri ake i te akatutu anga i te kite tau, kua akatutu mai a Iesu i te tu akarongo. Kua karanga aia e: “E tau oki i tetai tangata e aere ki tetai enua mamao, e kua karanga ki tona aronga tavini, e kua tuku atura i tana apinga ia ratou. Tuku atura i ta tetai e rima taleni, e rua ta tetai, okotai ua ta tetai; i tei tau katoa i aua nga tangata ra; aere atura aia i tona aerenga.” (Mataio 25:14, 15) Te tangata i roto i te parapore ko Iesu uaorai, tei “aere atura” i tona kake anga ki te rangi i te mataiti 33 T.N. Inara i mua ake i tona kake anga, kua tuku atu a Iesu “i tana apinga” ki tana au pipi akarongo. Akapeea ra?

13. Akapeea a Iesu i te akapapa anga i tetai kainga maata no te angaanga e te akamana anga i tona “aronga tavini” kia rave i te oko aere?

¹³ I tona tuatau angaanga orometua i te enua nei, kua akamata a Iesu i te akapapa i tetai kainga maata no te angaanga anga na te tutu anga i te tuatua meitaki o te Patireia i roto i te enua o Iseraela. (Mataio 9:35-38) I mua ake ka “aere atura” aia, kua oronga aia i taua kainga ra ki tana au pipi akarongo, i te na ko anga e: ‘E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou.’ (Mataio 28:18-20) Ma teia au tuatua, kua akamana atura  a Iesu i tona “aronga tavini” kia rave i te oko aere e oki ua mai ei aia, “i tei tau katoa i aua nga tangata ra.”

14. Eaa ra te katoatoa kare i tapapaia kia rave aiteite i te oko aere?

¹⁴ Te akaari maira taua tuatua e ko te au Kerititiano katoatoa o te anere mataiti mua ra kare i aite te au turanga me kore te au mea ka rauka. Ko etai, mei ia Paulo raua ko Timoteo, kua va mai kia piri tikai atu ki roto i te angaanga tutu anga e te apiianga. Te au turanga o tetai ke penei kua kotinga pakariia to ratou tu rangatira no te angaanga. Ei akaraanga, ko etai au Kerititiano e au tavini, e ko tetai e makimaki, e ruaine, me kore e au apainga ngutuare. E tikai, ko tetai au akameitaki anga putuputuanga ra kare i orongaia mai ki te au pipi katoatoa. Kare te au vaine akatainuia e etai au tane akatainuia e apii ana i roto i te putuputuanga. (1 Korinetia 14:34; 1 Timoteo 3:1; Iakobo 3:1) Noatu, e eaa ua atu rai to ratou uaorai turanga, pouroa te au pipi akatainuia na Karaiti​—te au tane e te au vaine​—kua tukunaia mai kia piri atu ki roto i te angaanga, i te taangaanga meitaki anga i to ratou au tuatau e te au turanga i roto i te angaanga orometua Kerititiano. Kua rave to ratou au taeake i teia tuatau nei i te reira.

Akamata te Tuatau no te Tutakaanga!

15, 16. (a) I naea i akatikatikaia ai te tuatua ra? (e) Eaa te au tuatau ou kia “oko aere” tei orongaia ki te aronga akarongo ra?

¹⁵ Te karanga ra te parapore e: “E roa akera, oki maira te pu o taua aronga tavini ra, akatikatika maira i te tuatua ia ratou.” (Mataio 25:19) I te 1914​—kua roa tikai te tuatau i muri ake i te 33 T.N.​—kua akamata a Iesu Karaiti i tona parutia ei ariki. E toru e te apa mataiti i muri mai, i te 1918, kua aere mai aia ki te iero pae vaerua o te Atua e kua akatupu i te au tuatua a Petero: “Kua tae oki ki te tuatau e tupu ei te mate i te ngutuare o te Atua nei.” (1 Petero 4:17; Malaki 3:1) Kua tae mai te tuatau no te akatikatika i te tuatua ra.

¹⁶ Eaa ta te aronga tavini, te au taeake akatainuia a Iesu, i rave ki te “taleni” a te Ariki ra? Mei te 33 T.N. e aere ua atu, te kapiti anga i te au mataiti te taki atura ki te 1914, kua angaanga pakari te manganui i te “oko aere” na Iesu. (Mataio 25:16) Noatu i te tuatau o te tamaki  anga mua o te ao, kua akaari mai ratou i te inangaro ketaketa i te tavini i te Pu. E teianei e mea tau kia oronga ki te aronga akarongo i te au tuatau ou kia “oko aere.” Kua tae mai te tuatau openga o teia akatereanga o te au mea nei. Kia raveia te tutu anga i te tuatua meitaki i te ao katoa. “Kua mou pakari rava oki te enua nei” kia kokotiia. (Apokalupo 14:6, 7, 14-16) Kia kiteaia mai te au mema openga o te pupu titona ra e kia akaputuia mai te “aronga maata rava” o te mamoe ke atu ki roto ra.​—Apokalupo 7:9; Mataio 13:24-30.

17. Akapeea te au Kerititiano akarongo akatainuia i te ‘aere anga ki roto i te rekarekaanga o to ratou pu’?

¹⁷ E tuatau rekareka te tuatau kokoti anga. (Salamo 126:6) E mea tau, i reira, e i te 1919, kua oronga atu a Iesu ki tona au taeake akarongo akatainuia ra te au apainga akamaataia, kua tuatua aia e: “Ko koe i akono i te reira apinga mea ngiti ua, e tuku au ia koe ki rungao i te mea maata; aere koe ki roto i te rekarekaanga o toou pu.” (Mataio 25:21, 23) Tei runga ravao, te rekareka o te Pu ei Ariki akakorona ouia no te Patireia o te Atua e mea taea koreia e to tatou manakoanga. (Salamo 45:1, 2, 6, 7) Te kite ra te pupu tavini akono meitaki i taua rekareka na te komono anga i te Ariki e te akamaata anga i tana au mea i runga i te enua nei. (2 Korinetia 5:20) Kua kiteaia to ratou rekareka i roto i te au tuatua totou a Isaia 61:10: “E rekareka maata au ia Iehova; e rere ua taku vaerua i te rekareka i taku Atua; kua akakakau mai oki aia iaku i te kakau ra i te ora.”

18. Eaa ra etai kare i autu ana i te tutaka anga, e ma teea tupu anga?

¹⁸ Ma te mii ra, kare etai i autu ana i te tutakaanga. Ka tatau tatou: “Kua aere maira oki tei rave i te taleni okotai, na ko maira, E taku pu, kua kite takere ana au e, e tangata rotoriri koe, e kare taau i tanu ra, e kokotiia e koe, e kare taau i ruru ra, e akaputuputuia e koe: Mataku akera au, uuna io nei au i te taleni naau ki raro i te one: e teianei, i akaoki mai nei au i taau uaorai.” (Mataio 25:24, 25) Ma te reira katoa, kare etai o te au Kerititiano akatainuia i piri atu ana ki roto i te “oko aere.” I mua ake i te 1914 kare ratou i tua maroiroi ana i to ratou manakonako anga ki tetai ke, e kare ratou i inangaro ana i te akamata i te 1919. I akapeea a Iesu i te ariu atu anga ki to ratou ngakau akateitei? Kua rave mai aia i ta ratou au akameitaki anga katoatoa. Ko ratou kua ‘uriia atu ki vao i te poiri ra; tei reira te aue anga ratou e te pakati anga i to ratou nio.’​—Mataio 25:28, 30.

Rave Uaia Atu te Tutakaanga

19. Na roto i teea mataara e rave ua atu ei te ravenga tutakaanga, e eaa ta te au Kerititiano katoatoa akatainuia ra i tauta i te rave?

¹⁹ E tikai, te maata anga o te aronga tei riro mai ei au tavini akatainuia na Karaiti i te tuatau openga kare i tavini ake ia Iehova i te akamata anga a Iesu i tana tutakaanga i te 1918. Kua ngere ainei ia ratou te tuatau no te tutakaanga? Kare rava. Koi akamata ua akenei te ravenga no te tutakaanga i te 1918/19 i te autu anga te tavini akono meitaki e te pakari ei pupu i te timata anga. Te au Kerititiano tataki tai akatainuia ra tei raro ake rai i te tutakaanga e e ope akera to ratou akairo anga i te akatinamouia. (Apokalupo 7:1-3) I te kite anga i teia, kua tauta te au taeake akatainuia a Karaiti i te tamou ua atu i te tu akarongo na te ‘oko aere anga.’ Kua tauta ratou ma te pakari, na te akono maata anga i tetai manga inu kia rauka oki i taua marama ra i te kaka maramaia. Kua kite ratou e me taenaia e te tangata taki tai te openga o tona oraanga i roto i te tu akarongo, ka rave atu a Iesu iaia ki te ngai nooanga i te rangi ra.​—Mataio 24:13; Ioane 14:2-4; 1 Korinetia 15:50, 51.

20. (a) Eaa ta te mamoe ke atu i tauta i te rave i teia tuatau? (e) Eaa ta te au Kerititiano akatainuia ra i kite?

 ²⁰ Te aru ra te aronga maata rava o te mamoe ke atu i to ratou au taeake akatainuia. Kua kite ratou e to ratou kite no te au akakoroanga a te Atua te apai maira i te apainga maata roa atu. (Ezekiela 3:17-21) No reira, ma te tauturu anga o te Tuatua a Iehova e te vaerua tapu, kua akono maata katoa ratou i ta ratou manga inu na roto i te apiianga e te taokotaianga. E kua tuku ratou i to ratou marama kia kaka, na te piri atu anga ki roto i te angaanga tutu anga e te apiianga e no reira kua “oko aere atura” i te pae i to ratou au taeake akatainuia. Inara, kua kite meitaki te au Kerititiano akatainuia e kua tukunaia mai te au tareni ki roto i to ratou au rima. E mea tau kia oronga ratou i te tutaki anga na te mataara i akaaereia ai te au apinga a te Atu i runga i te enua nei. Noatu e tokoiti ua to ratou numero, kare e rauka ia ratou i te akaruke i ta ratou apainga ki te aronga maata rava. Te akamanako anga i teia, te rave ua atura te tavini akono meitaki e te pakari i te arataki anga i te akono anga i ta te Ariki oko anga, te mareka anga no te turu anga a te au mema akamori o te aronga maata rava. Te kite nei teia aronga i te apainga a to ratou au taeake akatainuia e te manako akameitakiia ra i te angaanga anga i raro ake i ta ratou akaaere anga.

21. Eaa te akoanga te akatanoia ra ki te au Kerititiano katoatoa mei mua ake i te 1919 e tae ua mai ki to tatou tuatau nei?

²¹ No reira, noatu e te akamarama maira teia nga parapore e rua i te marama no runga i te au tupuanga i te 1919 me kare te vaitata ra ki te reira tuatau, te tau ra te reira kia akonoia te kaveinga ki te au Kerititiano mou katoatoa i te tuatau openga. Na roto i teia tu nei, te akatanoia maira te akoanga ta Iesu i oronga i te openga o te parapore no te nga paretenia tino ngauru ki te ngai mua ki te au Kerititiano akatainuia i mua ake i te 1919, i roto i te kaveinga ra te akatanoia atura te reira ki te Kerititiano ravarai. Kia akarongo tatou katoatoa, i reira, i te au tuatua a Iesu e: “Kia matakite ia kotou, kare kotou i kite i te rā, e te ora, e tae mai ei te Tamaiti a te tangata.”​—Mataio 25:13.

[Au Tataanga Rikiriki i Raro]

Ka Rauka Ainei ia Koe te Akataka?

• I naea a Iesu i tutaka ai i tana au pipi, e eaa tana i kite?

• Eaa ra etai au Kerititiano akatainuia i akatupu ei i te tu o “te tavini kino” ra?

• Akapeea tatou i te akaari anga ia tatou uaorai ei pakari i te pae vaerua?

• I te aru anga i te au taeake akarongo akatainuia a Iesu, na roto i teea mataara e rauka ai ia tatou i te akono i te “oko aere”?

[Au Uianga Apii]

[Pia i te kapi 16]

AEA A IESU E TAE MAI EI?

I roto ia Mataio pene 24 e te 25, te karangaia ra e kua “tae mai” a Iesu i roto i te au manako tukeke. Kare aia e anoanoia kia taui i tona ngai noo anga e tau ei kia “tae mai.” Mari ra, kua “tae mai” aia i roto i te manako i te akamanako mai anga aia i te au tangata me kore i tana au pipi, e maata te taime no te akavaanga. No reira, i te 1914 kua “tae mai” aia i te akamata i tona parutia ei Ariki akakoronaia. (Mataio 16:28; 17:1; Angaanga 1:11) I te 1918 kua “tae mai” aia ei karere no te koreromotu e kua akamata i te akava i te aronga te karanga ra e te tavini ra ia Iehova. (Malaki 3:1-3; 1 Petero 4:17) I Aramakito, ka “tae mai” aia i te rave i te akavaanga ki runga i to Iehova au enemi.​—Apokalupo 19:11-16.

Te tae mai anga (me kore, te aere mai anga) te maata anga o te taime te taikuia maira i roto ia Mataio 24:29-44 e te 25:31-46 e ko “te mate maata.” (Apokalupo 7:14) I tetai tua, e maata te taime te taikuia maira te tae mai anga i roto ia Mataio 24:45 ki te 25:30 te piri atura i tona akava anga i te au pipi akatutu ua mei te 1918 e aere ua atu. Kare i te mea tau kia karangaia, ei akaraanga, e te tutaki anga i te tavini akono meitaki, te akavaanga i te au paretenia neneva, e te akavaanga i te tavini akatau, tei uuna i te tareni a te Pu, ka tupu me “tae mai” a Iesu i te tuatau o te mate maata. Te akataka maira te reira e e manganui tei akatainuia ka kitea mai e e akarongo kore i taua tuatau ra e no reira ka monoia atu. Inara, te akakite maira a Apokalupo 7:3 e ko te au tavini katoatoa a Karaiti tei akatainuia ka “akairo” tinamouia i mua ake ka tae mai ei taua tuatau ra.

[Tutu i te kapi 14]

Kare i rauka ana i te “tavini kino” te au akameitaki anga i te 1919

[Tutu i te kapi 15]

Kua papa te au paretenia pakari me tae mai te tane akaipoipo ou

[Tutu i te kapi 17]

Kua piri atu te au tavini akono meitaki ki roto te “oko aere”

Kare a te tavini akatau

[Au Tutu i te kapi 18]

Kua rave ua atu te aronga akatainu e te “aronga maata rava” i te akaiti i to ratou marama