Te Au Tavini o te Atua Mei te Au Tumu Rakau Rai Roto i Teea Au Tu?

TE TUATUA anga no runga i tetai tangata tei mataora i te taangaanga anga i te au kaveinga Pipiria i roto i tona oraanga, kua akakite te tata taramo: “E tau aia ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa i mae tona rau; ko tana katoa e rave ra, te meitaki ra ïa.” (Salamo 1:1-3) Eaa teia akatutu anga i tau tikai ei?

Ka roa te oraanga o teia au tumu rakau nei. Ei akaraanga, tetai au tumu rakau orive i roto i te tuanga Metiterenia tei tuatuaia mei te okotai ki te rua tauatini mataiti i te pakari. Mei te reira rai, te rakau baobab o Aperika rotopu tei rauka te maata o te au mataiti, e te pu paina taratara i California tei manakoia e mei tetai 4,600 mataiti te pakari. I roto i te vaorakau, te au tumu rakau pakari meitaki e mea puapinga ki to ratou au ngai tei takapini mai. Ei akatauanga, teia au tumu rakau roroa ka riro ratou i te paruru e te akamarumaru i te au uri ou, e te au rau tei pururu mai mei teia au tumu rakau nei e akameitaki i te one i raro ake.

Te au tumu rakau roroa i roto i teianei ao e kiteaia ana te reira e tupu kapipiti ra i roto i te au vaorakau, ei reira te au tumu rakau tataki tai e turuturu atu ei i tetai e tetai. I te mea te taviriviri ra to ratou aka, e manganui te au tumu rakau ei katoatoaanga ka rauka i te paruru atu i te uriia e e maata atu to ratou puapinga i to te au rakau te tupu tataki tai ua ra i roto i te ngai atea. Na te aka mamaata katoa e tauturu i tetai tumu rakau i te apai mai kia rava te vai e te au kai meitaki no roto mai i te one. I tetai atu tuanga, e oonu atu te aka ki raro i te enua i to te teitei o te tumu rakau, me kare ka toro tika ki vao roa ake i te au rara o te tumu rakau.

Penei te akaaite atura te apotetoro ko Paulo ki te tumu rakau i tana akamarama anga e e tau te au Kerititiano ‘kia akono i tana [Karaiti]: kia akaia ki roto iaia, e kia patuia ki rungao iaia, e kia akatinamouia i te akarongo.’ (Kolosa 2:6, 7) I reira, te au Kerititiano e tu ei ki runga i to ratou turanga ketaketa me te tupu pakari ra te aka ki roto i te Mesia.​—1 Petero 2:21.

I roto i teea atu au tu ke ka akaaiteia ai te au tavini o te Atua ki te au tumu rakau? I na, i te au tumu rakau i roto i teia vaorakau nei e ariki ra i te turuturuanga a te au tumu rakau i tepae mai, no reira pouroa tei noo piri vaitata atu ki te putuputuanga Kerititiano ka ariki i te turuturuanga mei to ratou au taeake irinaki. (Galatia 6:2) Te au Kerititiano tiratiratu, pakari tei toro atea i te au aka i te pae vaerua, e tauturu atu i te aronga irinaki ou kia noo tinamou ki roto i te akarongo, noatu te akara atura ratou i te patoianga rikarika. (Roma 1:11, 12) Ka rauka i te au Kerititiano ou kia mataora i roto i te marumaru o te au tavini karape o te Atua. (Roma 15:1) Pouroa te au mema o te putuputuanga Kerititiano o te ao e pini ua ake te puapinga ra mei te akaketaketaanga i te pae vaerua mei ko mai i te “au rakau tuatua tika,” ko te toenga akatainuia.​—Isaia 61:3.

Mei teaa ra te mataora o te katoatoa o te au tavini o te Atua tei rauka te tikaanga kia kite i te akatupu angaia o te taputou tei kiteaia ia Isaia 65:22, tei karanga e: “Mei te au rā o te rakau nei te au rā o toku ra iti-tangata.”

[Akameitakianga no te Tutu i te kapi 28]

Godo-Foto