Te Tupu Maata Nei te Akonoanga Kerititiano Mou

KUA tupu viviki mai ta Iesu Karaiti angaanga orometua ki roto i teianei ao i te anere mataiti mua. E karere akamaroiroi anga tana, te akamarama anga, e te akauru anga na roto mai i tetai tu i va ua ai te tangata ra. Te manganui ia ratou tei akarongo ana i te tuatua anga aia kua akakeu oonuia e tana au tuatua.​—Mataio 7:28, 29.

Kua kopae mataku kore a Iesu i te pirianga ki roto i te au akatereanga ekaretia e te poritiki akateimaa o taua tuatau inara kua rave iaia uaorai kia ngoie ua i te araveiia atu e te tangata noa ra. (Mataio 11:25-30) Kua akakite pu ua mai aia i te akakeu anga totoa ua a te au vaerua kino ki runga i te enua e kua akaari mai i te mana orongaia mai e te Atua ki runga ake ia ratou. (Mataio 4:2-11, 24; Ioane 14:30) Kua akamarama karape mai a Iesu i te pirianga maata i rotopu i te mamae e te ara, e kua tou aroa mai aia ki te Patireia o te Atua no te akaora anga ope kore. (Mareko 2:1-12; Luka 11:2, 17-23) Okotai taime, kua akaatea aia i te arai no te poiri tei arai roa ana i te turanga mou o tona Metua, i te akakite anga i te ingoa o te Atua ki te au tangata katoatoa te inangaro maira i tetai pirianga no ratou uaorai Kiaia.​—Ioane 17:6, 26.

No reira, kare i te mea poitirere e, noatu te takinga kino pakari a te akonoanga e te poritiki, kua akatotoa viviki atu ta Iesu pipi i tana karere ririnui. I roto ua i te 30 mataiti me kare e vaitata atu, kua akatupuia mai te au putuputuanga Kerititiano maroiroi i roto ia Aperika, Asia, e i Europa. (Kolosa 1:23) Te au tuatua mou mama ua ta Iesu i apii mai kua akamaramaia te au ngakau akaaka, te ngakau tika o te tangata i roto i te Patireia o Roma.​—Ephesia 1:17, 18.

Inara, ka akapeea teia au pipi ou katoatoa nei mei taua au turanga tuke no te puapinga, te iti tangata, te reo, e te akonoanga e akaputu taokotai tikai mai ei e “okotai akarongo,” mei ta te apotetoro ko Paulo i kapiki ra i te reira? (Ephesia 4:5) Eaa te ka mou mai ia ratou kia “tuatua okotai” kia kore e topa ke atu? (1 Korinetia 1:10) I te manako anga i te pakari o te taokotai kore anga i rotopu i te au Kerititiano akatutu ua i teia tuatau, e mea meitaki kia akara matatio tatou e eaa ta Iesu uaorai e apii maira.

Te Tumu Anga no te Taokotai Anga Kerititiano

Te timataia anga i mua ia Ponotio Pilato, kua akataka mai a Iesu i te tumu anga no te taokotai anga Kerititiano. Kua tuatua mai aia e: “I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.” (Ioane 18:37) No reira, i te ariki anga i ta Iesu apiianga e te toenga o te Tuatua akauruia a te Atua, te Pipiria, e  taokotai anga akakeu anga ririnui ki runga i te au pipi mou a Iesu.​—1 Korinetia 4:6; 2 Timoteo 3:16, 17.

E tikai, e au uianga ngakau tae ta te au pipi a Iesu me kare e au maroanga i rotopu ia ratou uaorai i tetai taime. Ka akapeea i reira? Kua akamarama mai a Iesu e: ‘Kia tae maira aia, ko te vaerua tuatua-mou ra, nana ïa e arataki ia kotou ki te tuatua-mou katoatoa: kare oki tana tuatua e riro nana uaorai; ko tana ra e akarongo ra, ko tana ïa e tuatua mai: e nana oki e akakite mai kia kotou i te au mea e tupu a muri akera.’ (Ioane 16:12, 13) No reira, ka rauka i te vaerua tapu o te Atua i te akamarama ki te au pipi mou a Iesu i te tuatua mou tei akaari marieia mai e te Atua. Pera katoa, ka akatupu taua vaerua i te ua, mei te inangaro, te rekareka, e te au, aru mai i reira te akamaata anga i te taokotai anga i rotopu ia ratou.​—Angaanga 15:28; Galatia 5:22, 23.

Kare a Iesu i akatika mai ana i tetai ngai no te taumaroanga me kore te taka ke anga i rotopu i tana au pipi; kare rai aia i akamana ana ia ratou kia uri akaou i te au tuatua mou tu-Atua kia ariki atu i te peu me kore i te au apiianga akonoanga a te aronga ta ratou ka aravei atu. Kareka ra, i tona po openga kia ratou, kua pure akatenga atu aia e: “Kare oki au i pure ia ratou anake ua, i te aronga katoa ra te ka akarongo mai iaku i ta ratou apii anga; Kia riro ratou katoa ei okotai; mei ia koe, e taku Metua, i roto iaku nei, e mei iaku oki i roto ia koe na, kia okotai katoa ratou ki roto ia taua: kia akarongo to te ao nei e naau au i tono mai.” (Ioane 17:20, 21) Kua riro te taokotai anga tika tikai, i reira, i roto i te vaerua e te tuatua mou ei akairo akataka anga i te au pipi a Karaiti mei te akamata anga mai e tae ua mai ki to tatou tuatau nei. (Ioane 4:23, 24) Noatu rai, kare te au ekaretia o teia tuatau e taokotai ana, i na kua akataka keia ra. Eaa ra i pera ai?

Eaa te Au Ekaretia i Taka Ke Ei

Te akamaramaanga tika no te au irinaki anga e te au ravenga tukeke maata i rotopu i te au Kerititiano akatutu ua i teia tuatau koia oki kare ratou i akarongo ana ki te au apiianga a Iesu. Kua akara tetai tangata tata e: “Mei te tuatau i topa, te au Kerititiano ou o teia tuatau te ariki ra mei te Pipiria kia tano ki to ratou au anoano​—e te kopae anga i te au tuatua tapu kare e rotai ana ki ta ratou uaorai au apiianga akonoanga enua.” Ko teia tikai ta Iesu e tana au pipi i totou mai ana e ka tupu.

Ei akatauanga, i raro ake i te akauruanga kua tata te apotetoro ko Paulo ki tona taeake akaaere ko Timoteo: “Te vai atura oki te tuatau e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro; E ariu ke oki to ratou taringa i te tuatua-mou, e anga atu ei ki te tuatua taeke ua.” Ka akavare pouroaia ainei te au Kerititiano? Kare. Kua akakite mai a Paulo e: “E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope takiri i to taoonga na.” (2 Timoteo 4:3-5; Luka 21:8; Angaanga 20:29, 30; 2 Petero 2:1-3) Kua akono a Timoteo e tetai au Kerititiano tiratiratu i taua ako anga akauruia.

Te Vai Taokotai Nei Rai te Au Kerititiano Mou

Mei ia Timoteo rai, te akono nei te au Kerititiano mou i teia tuatau i to ratou au manako na te kopae anga i te au manako tangata e te ariki ua anga i te mana Tuatua Tapu no to ratou au irinaki anga apii anga. (Kolosa 2:8; 1 Ioane 4:1) I te aruanga i te Au Kerititiano o te anere mataiti mua, te akatupu ra te Au Kite o Iehova i ta ratou au angaanga orometua ki roto i te au enua e tere atu ki te 230, i te apai mai anga i ta Iesu karere mua, te tuatua meitaki o te Patireia, ki te tangata i te au ngai ravarai. E tamanako ana i te au mataara puapinga maata e a i tei rauka ia ratou i te aru taokotai ia Iesu e te rave anga i te au Akonoanga Kerititiano mou noatu e teiea te ngai e noo ra ratou.

Kua akatumuia to ratou au irinaki anga ki runga i te Tuatua a te Atua. (Ioane 17:17) Kua tata mai tetai orometua i Peretiumu no runga ia ratou: “Okotai apinga ka rauka ia tatou kia kite mei ia ratou [te Au Kite o Iehova] koia oki to ratou tu puareinga i te akarongo anga ki te Tuatua a te Atua e to ratou mataku kore kia akakitekite no runga i te reira.”

Te akara ra ratou ki te Patireia o te Atua no te akaora anga mei te au manamanata i te ao katoa nei. (Luka 8:1) I Barranquilla, Koromopia,  kua tuatua atu tetai Kite kia Antonio, e tangata turu ketaketa no tetai pupu poritiki. Kare te Kite i turu atu ana iaia, kare katoa aia i akakite ana i etai ua atu manako poritiki. Mari ra, kua oronga atu aia i te apii i te Pipiria kia Antonio e tona nga tuaine ma te kore e tutaki anga. Kare i roa ana kua kite a Antonio e tika tikai te Patireia o te Atua e ko te manakonako anakeia no te au tangata putaua i Koromopia e i te toenga o teianei ao.

Te akangateitei ra ratou i te ingoa o te Atua. (Mataio 6:9) I te aravei mua anga te Au Kite o Iehova ia Maria, e Katorika ngakau tae te noo ra i Autireria, kua akatika mai aia i nga Kite kia akaari atu kiaia i te ingoa o te Atua i roto i te Pipiria. Akapeea aia i te ariu mai anga? “I toku kite mua anga i te ingoa o te Atua i roto i te Pipiria, kua aue au. Kua akakeu tikaiia au i te kite anga e ka rauka tikai iaku i te kite e te taangaanga i to te Atua uaorai ingoa.” Kua rave ua atu a Maria i te apii i te Pipiria, e no te taime mua i roto i tona oraanga, kua kite aia ia Iehova ei peretana e kua rauka i te patu i tetai pirianga ope kore kiaia.

Kua taokotaiia ratou e te aroa. (Ioane 13:34, 35) Kua tuatua mai tetai tataanga i roto i The Ladysmith-Chemainus Chronicle, i Kanata, e: “Noatu eaa taau akakeuanga akonoanga, me kore te ngere ra i te reira, kia akameitaki tatou i te 4,500 Au Kite o Iehova tei angaanga ana i te ra e te po katoa i te epetoma e te apa i topa akenei i te patu anga i tetai Are Uipaanga Akaputuputuanga e 2,300 kuea mita i Cassidy . . . I te rave anga i teia ma te mataora kare te karo anga, te taumaroanga me kore te kimi anga i te kaka nona uaorai e akairoia no te au Akonoanga Kerititiano mou.”

No reira e akamanako i te akapapu anga. I to Kerititome aronga apiipii, te au mitinari, e te aronga te aere ra ki te pure e rave ra i te putoto anga ma te manamanata tupu viviki maira no te taumaroanga i roto i to ratou au ekaretia, te tupu maata nei te au Akonoanga Kerititiano mou takapini i te ao katoa. E tikai, te rave ua ra te au Kerititiano mou i ta ratou angaanga orometua orongaia mai no te tutu anga e te apiianga i te Tuatua a te Atua. (Mataio 24:14; 28:19, 20) Me ko koe tetai i rotopu i te aronga “i aue ua, e kua kapiki ua” no teia au mea viivii i raveia i teianei e te manamanata anga no te taokotai kore anga i rotopu i te au akonoanga o Kerititome, te pati atu nei matou ia koe kia taokotai mai ma te Au Kite o Iehova ki roto i te akamori taokotai anga Kerititiano o te Atua mou anake ra, ko Iehova.​—Ezekiela 9:4; Isaia 2:2-4.