Te Mekameka o Ta Iehova Au Apinga i Angaia

‘E Manea Maata Toou i to te Au Maunga’

I TE akara atu anga i te iti anga mai te ra mei te take o te Maunga Fuji e akakiteanga te kare roa e ngaropoina. E ai ka te kara o te ra i te iti anga ki rungao i te ionga o te rangi, tei turama i te kiona teatea e te au toka reu ka. I te akamata anga akaou o tetai ra, kua totoa viviki atu te ata o te maunga no te manganui ua atu o te au maire ki rungao te au tuaivi e te au o.

Mei te Maunga Fuji rai​—tei tata muaia i roto i te au tu tataanga te aiteanga “kare e rauka i te akaaite ia atu”​—kare roa te au maunga manea e poka i te umeremereia e tatou. Eaa nei, penei kua taakaaka ia tatou e te tu maatamaata o te reira! Koi atu ei te manea o te au maunga e e manganui te au tangata tei irinaki e ko te take teitei roa atu, tei putuputu i te tapokiia ki roto i te kou e te au tiao, e ko te ngai noo anga ia no te au atua.

Ko te Atua anake tei akapaapaa tika ia e te au take o te maunga koia oki to ratou Tei Anga mai ma te karape, ko Iehova. Koia anake “tei anga i te au maunga.” (Amosa 4:13) E vaitata rai e tai tuanga a o te enua e au maunga ua ia, e i te anga mai anga te Atua i to tatou paraneta, kua akanoo aia te au reva ririnui tei akatupu i te openga iora i te au take umeremere e te au pa maunga teitei. (Salamo 95:4) Ei akatauanga, kua irinakiia e kua akamataia mai te au maunga o te Himalayas e te Andes e te au tauianga maatamaata i roto roa i te oonuanga o te enua e na te nekeanga o te au potonga o te papa o te enua.

Kare tatou te tangata nei e marama pu tikai ana e akapeea e no teaa ra i vai ei te au maunga. E tikai e, kare e rauka ia tatou i te pau i teia au uianga tei tukunaia atu ki te tangata tuatua tika ko Iobu: “Iea koe iaku [Iehova] i akatumu i te enua nei? . . . I akamouia tona au tango ki runga i te aa?”​—Iobu 38:4-6.

Inara, kua kite tatou, e ko to tatou oraanga tei runga ua ia i te au maunga. Kua kapikiia te reira e ko te ngai vairanga vai, i te mea e pouroa te au kauvai mamaata te akakiia maira mei te au puna o te maunga e te irinaki ra te apa anga o te tangata i runga i te enua nei ki runga i te au maunga no te vai. (Salamo 104:13) Tei akakiteia i roto i te makatini New Scientist, “e ono i roto i te 20 au ngai maatamaata no te maani anga kai i teianei ao kua akamata mai mei te au maunga ra.” I raro i te au turanga tau no te au apinga o te enua nei i roto i to te Atua ao ou i koreromotuia, “Ka maata te titona ki runga i te enua; I te take o te au maunga ra ka ki maringiringi.”​—Salamo 72:16; 2 Petero 3:13.

No te manganui, ko te taiku anga i te au maunga te akamaara maira ia ratou i te au Maunga Europa. Teia au take, tei kapitiia mai te Maunga Civetta tei akaariia i konei, te akaari maira i te akakiteanga mareka tikai ki Tei Anga mai i te reira. (Salamo 98:8) Te akapaapaa ra ratou ia Iehova, ko tei “akamou i te au maunga ra i tona ra ririnui.”​—Salamo 65:6. *

Ka tau kia mataku e mea umeremere tikai te mekameka o te au Maunga, to te reira au take e te au tuaivi tei tapokiia e te aiti, to te reira au tiketike tei tapokiia e te kiona, to te reira au o e te au kauvai, e to te reira au ngai matie. Kua akataka mai te ariki ko Davida ia Iehova e “ko tei akatupu i te ngangaere ki runga i te au maunga.”​—Salamo 147:8.

Te au pa puku maunga​—mei teia au puku maunga rai i Guilin, i Tinito—​penei i te akaraanga e meangiti mai tona  manea i to te au Maunga, kareka ra e manea takake tikai to ratou. Tei kiteaia i te pae mai i te Kauvai Li, e manganui te au pa punga keokeo tei akareka tikai i te au turoto ki tona manea. I te akara atu anga i te au vai manea i te tae ua anga na roto i teia au tuaivi ki i te kou ka akaoki mai te manako ki te au tuatua a te tata taramo e: “Kua tuku mai koe i te au vai pupui ei vai peka, ko tei tae aere na roto i te va o te au maunga ra.”​—Salamo 104:10.

Ka tano rai tatou kia akamarekaia e te au maunga no te mea kua kite tatou i te reira ei tuanga manea tikai o ta Tei Anga mai i te au apinga aroa no te oraanga e te tu rekareka o te tangata katoatoa. Inara, noatu te umereanga o te reira, kare te au maunga e aite atu ki to Iehova ra teitei. ‘E manea maata i to te au maunga’ tikai aia.​—Salamo 76:4.

[Tataanga Rikiriki i Raro]

[Pia/Tutu i te kapi 9]

E tai ngauru patene o te tangata o te ao nei te noo ra ki te au ngai maunga ra. Kare ra te reira e riro ei araianga maata ki te aronga e akakite ra i te tuatua meitaki o te Patireia o te Atua. E angaanga maroiroi tikai ta teia au orometua Kerititiano i te au ngai teitei e manganui. E “te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai i te tuatua meitaki ra, o tei tutu aere i te ora ra!”​—Isaia 52:7.

“Te au maunga teitei ra, no te puaka-nio momoavao ïa,” i imene ei te tata taramo. (Salamo 104:18) Te puaka nio momoavao, mei te tara Nubian ibex te manea, ko ratou katoa tetai o te au manu vaevae ngaueue kore e noo ana ki te maunga. E aaere ana ratou na runga i te tapa kokota ua tei akaraanga kare e taeria ia. Kua papa meitaki te ibex i te nooanga i te au ngai kare e rauka i te itaeia. Tetai tumu no teia ko te maaniia anga o tona vaevae. Ka rauka ua te va i rotopu i te akamaataia i raro i te teiaa o te puakanio, kia ngaueue kore te takaianga a te manu me kore te aaere anga na runga i te au tapa toka oiti. E tika tikai e, e apinga maata te ibex te paranianga ia!

[Tutu i te kapi 9]

Te Maunga Fuji, i Honshu, i Tiapani