“E Rave Akaope Takiri i to Taoonga Na”

“E rave akaope takiri i to taoonga na.”​—2 TIMOTEO 4:5.

1, 2. Noatu oki e e aronga apii evangeria pouroa te au Kerititiano, eaa te anoanoia ra kia tau i te Tuatua Tapu no te aronga pakari?

E TANGATA tutu aere ainei koe i te Patireia? Me koia ia, e akameitaki i te Atua ko Iehova no teia tikaanga umere tikai. E tangata pakari ainei koe i roto i te putuputuanga? E tikaanga kapiti akaouia mai te reira mei ko ia Iehova. Inara auraka rava tatou e akangaropoina e kare na te apiianga tei matauia e kare na te kite i te tuatua kiro e akataka i tetai ua atu ia tatou kia tau no te angaanga orometua me kore no te akaaere i roto i te putuputuanga. Na Iehova tatou i akatika kia tau no te angaanga orometua, e no te mea kua rauka i tetai papaki i roto ia tatou i te akono i te au turanga Tuatua Tapu i akameitakiia ai ratou kia tavini ei au akaaere.​—2 Korinetia 3:5, 6; 1 Timoteo 3:1-7.

² Pouroa te au Kerititiano akatapuia te rave nei i te angaanga a te aronga apii evangeria, inara ka anoanoia te au akaaere tikai, me kore te aronga pakari, kia tuku i tetai akaraanga meitaki i roto i te angaanga orometua. Te aronga pakari e ‘angaanga maata ra i te ako e te apii’ te kite maira te Atua e Karaiti, pera katoa te au oa Kite o Iehova. (1 Timoteo 5:17; Ephesia 5:23; Ebera 6:10-12) I raro ake i te au turanga katoatoa, kia akatupu ua rai ta te tangata pakari apiianga i te oraanga meitaki i te pae vaerua, no te mea kua akakite te apotetoro ko Paulo ki te akaaere ko Timoteo e: “Te vai atura oki te tuatau e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro; e ariu ke oki to ratou taringa i te tuatua-mou, e anga atu ei ki te tuatua taeke ua. E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope takiri i to taoonga na.”​—2 Timoteo 4:3-5.

3. Eaa te ka anoanoia i te rave kia kore te au apiianga pikikaa e tamataku i te turanga pae vaerua o te putuputuanga?

³ Ei akapapu e kia kore te au apiianga pikikaa e tamataku i te turanga pae vaerua o te putuputuanga, e aru te akaaere ki te ako a Paulo: “E akamaroiroi ra koe i te au mea katoa ra, . . . e rave akaope takiri i to taoonga na.” (2 Timoteo 4:5) Ae, ka anoanoia te tangata pakari kia ‘akaope takiri i tona taoonga.’ E rave akaope takiri aia, na roto i tetai mataara tano meitaki tikai, me kore ki te katoaanga tikai. Ko tetai tangata pakari e rave ra i te katoaanga tikai o tana angaanga orometua ka akamanako meitaki tikai i te katoatoa rava o tana au apainga, kare e akaruke i tetai apinga kia kore e raveia me kore kare e akaoti takiriia. Ko taua tangata ra te akono katoa ra i te au apinga meangiti ra.​—Luka 12:48; 16:10.

4. Eaa te ka tauturu ia tatou kia rave akaope takiri i te angaanga orometua?

⁴ Ko te rave akaope takiri anga i te angaanga orometua kare tikai e anoanoia kia maata atu te taime, ka inangaroia ra kia akapuapinga meitakiia te taime ka pou. Ka riro te rave putuputu ua rai i te tauturu te raveanga putuputu i te au Kerititiano katoatoa i te rave akaope i te au apinga ravarai i roto i te angaanga orometua. Kia rauka ai iaia i te akapou maata atu i te taime ki roto i te tavini anga koro, ka anoano tetai tangata pakari i te akaaerenga meitaki uaorai i te akaaite anga kia tau tana papaanga e kia kite e eaa te ka oronga atu e ka akapeea i te rave anga i te reira. (Ebera 13:17) Tei matauia, ka rave katoa rai tetai tangata pakari akangateiteiia i tana uaorai tuanga, mei ia Nehemia, ko tei piri uaorai ki te patuanga i te au patu o Ierusalema. (Nehemia 6:15) E e tau rai to Iehova au tavini pouroa kia piri putuputu ki roto i te angaanga tutu aere anga o te Patireia.​—1 Korinetia 9:16-18.

5. Mei teaa ra to tatou manako ngakau no runga i te angaanga orometua?

⁵ Mei teaa tikai ra te mataora o ta tatou angaanga ei aronga tutu aere i te Patireia tei akanooia i te rangi! Papu e te akaperepere nei tatou i to tatou  tikaanga ngateitei o te piri ki te tutu aere anga i te tuatua meitaki e kako rava ake te ao katoa i mua ake ka tae mai ei te openga. (Mataio 24:14) Noatu oki e e aronga apa ua tatou, ka rauka ra ia tatou i te akono i te akamaroiroianga mei ta Paulo au tuatua e: “Te āriki nei ra matou i taua apinga nei i te āriki karakaraea nei, kia riro te mana maata meitaki nei ki te Atua, auraka ia matou.” (2 Korinethia 4:7) Ae, ka rauka ia tatou i te oronga i te angaanga tau​—inara ma te maroiroi e te pakari anake ua i orongaia mai e te Atua.​—1 Korinetia 1:26-31.

Akaataanga i to te Atua Kaka

6. Eaa te akaaiteanga tei tupu i rotopu i te Iseraela natura e te Iseraela vaerua?

⁶ I te taiku anga i te au Kerititiano akatainuia, kua karanga a Paulo e na te Atua i “akatau ia matou ei taunga i te koreromotu ou nei.” Kua akaaite te apotetoro i te koreromotu ou tei raveia ma te Iseraela vaerua na roto ia Iesu Karaiti ki te Ture koreromotu taito tei raveia ma te Iseraela natura na roto ia Mose. Kua kapiti atu a Paulo e i te aerenga mai o Mose ki raro mei runga i te Maunga i Sinai ma nga papa o te Ture Ngauru, e kaka tikai oki tona mata e kare atura i rauka i to Iseraela kia akara tamou atu ki te reira. I muri ake, ra, kua tupu tetai apinga kino pakari atu no te mea “kua akapoiriia ra to ratou ngakau” e kua vai iora tetai arai ki rungao i to ratou au ngakau. Inara, kia ariu atu kia Iehova na te akonoanga ma te ngakau katoa, e kiriti keia atu te arai. Aru mai i te taiku anga i te angaanga orometua tei orongaia ki te aronga i roto i te koreromotu ou, kua karanga a Paulo e: ‘Tatou katoa nei, . . . te akara ra ma te mata arai kore ra, mei te mea e tei roto i te io ra te kakā o Iehova.’ (2 Korinetia 3:6-8, 14-18; Exodo 34:29-35) E tikaanga ngateitei katoa to te “mamoe ke atu” a Iesu i teia tuatau nei i te akaata i to Iehova kaka.—Ioane 10:16.

7. Ka akapeea te tangata nei i te akaata anga i to te Atua kaka?

⁷ Ka akapeea te tangata ara nei i te akaata anga i to te Atua kaka, i na e kare e tangata e tika kia akara i tona mata e ka ora atu ei? (Exodo 33:20) Kia marama tatou e, i te pae mai i to Iehova uaorai kaka, tera katoa oki tona akakoroanga kaka ei akatika papu i tona ngateitei na roto i tona Patireia. Te au tuatua mou tei akapiriia ki te Patireia te akanoo ra i tetai tuanga o “te peu taka ke a te Atua” tei akamataia i te tutu aereia e te aronga tei riringiia te vaerua tapu ki runga i te Penetekote 33 T.N. (Angaanga 2:11) Ma te aratakianga a te vaerua, ka rauka ia ratou i reira i te rave akaope takiri i te angaanga orometua tei irinakiia ratou i te rave.​—Angaanga 1:8.

8. No runga i te angaanga orometua, eaa ta Paulo i akakoro tikai i te rave?

⁸ Kua akakoro tikai a Paulo auraka roa kia akatika i tetai apinga kia arai iaia mei te rave akaope takiri anga i tana angaanga orometua. Kua tata aia e: “Tei ia matou mai nei teianei taoonga, e ko matou oki i aroaia mai, kare atura matou i roiroi. Kua akaruke ra matou i te au peu munangaro akama ra, e kare oki to matou i te aerenga pakari, kare oki i pikikaa i te rave anga i te tuatua a te Atua, te akameitaki nei ra matou ia matou uaorai i te akava-ngakau o te tangata ravarai, i te akakite anga atu i te tuatua-mou i mua i te aroaro o te Atua.” (2 Korinetia 4:1, 2) Kua riro ta Paulo tuatua anga e ko “teianei taoonga,” i te akakite pu ua i te tuatua mou e te akatotoa i te marama i te pae vaerua ki te mamao.

9, 10. Akapeea ra e rauka ai i te akaata i to Iehova kaka?

⁹ No runga i te Tumu o te marama pae kopapa e te pae vaerua, kua tata a Paulo e: “Ko te Atua  oki, Ko tei akaue i te mārama kia kakā mai no roto i te poiri ra, ko tei kakā mai ïa i roto i to tatou ngakau, kia rauka te mārama ra o te kite i te kakā o te Atua i te mata o Iesu Mesia ra.” (2 Korinetia 4:6; Genese 1:2-5) I na e kua orongaia mai no tatou te tikaanga ngateitei akaaite koreia o te riro anga ei au orometua na te Atua, e akono marie tatou kia ma tatou uaorai kia rauka ai ia tatou i te akaata i to Iehova kaka mei te io.

¹⁰ Kare te aronga tei roto i te poiri i te pae vaerua e kite i to Iehova kaka me kore i to te reira akaataanga mei ko ia Iesu Karaiti, te Mose Maata atu. Inara ei au tavini no Iehova, te rauka ra ia tatou te marama kaka mei te au Tuatua Tapu e te akaata atura i te reira ki etai ke. No te aronga tei roto i te poiri pae vaerua kia ora atu i te akapouanga, ka anoano ratou i te marama mei ko mai i te Atua. Ma te pereperekavana maata e te maroiroi, i reira, e akarongo tatou i te akauenga tu-Atua kia tuku i te marama kia kaka atu mei te poiri ki to Iehova kaka.

Kia Kaka Toou Marama i ko i te Au Apiianga Pipiria i te Kainga

11. Eaa ta Iesu i tuatua no runga i te akakaka anga i to tatou marama, e eaa tetai mataara no te rave i teia i roto i ta tatou angaanga orometua?

¹¹ Kua akakite a Iesu ki tana au pipi e: “Ko kotou te mārama o te ao nei. Te oire i akatuia ki runga i te maunga ra, kare ïa e ngaro. Kare oki te tangata e tutungi i te lamepa, ka tuku atu ei ki raro ake i te aite, ei runga ra i te vairanga, kia mārama to te are katoa. Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.” (Mataio 5:14-16) Ka rauka i to tatou tu tau i te akakeu i etai ke atu kia akakaka i te Atua. (1 Petero 2:12) E te oronga maira te au tuanga tuke ke o ta tatou angaanga evangeria i te au tuatau e manganui i te akakaka i to tatou marama. Tetai o to tatou au akakoroanga koia oki ko te akaata i te marama pae vaerua mei te Tuatua a te Atua na te rave anga kia puapingaia te au apiianga Pipiria i te kainga. E mataara puapinga tikai teia i te rave akaope takiri anga i ta tatou angaanga orometua. Eaa te au tamanakoanga te ka tauturu ia tatou i te rave i te au apiianga Pipiria te ka akatukia i te au ngakau o te aronga e kimi ra i te tuatua mou?

12. Akapeea te pure i te piri anga atu ki te angaanga o te rave anga i te au apiianga Pipiria i te kainga?

¹² Ko te pure kia Iehova no runga i teia te akatutu maira i to tatou anoano pakari i te rave i te au apiianga Pipiira. Te akaari katoa maira te reira e te kite ra tatou i te puapinga o te tauturu anga i etai ke kia rauka te kite i te Atua. (Ezekiela 33:7-9) E mea papu roa e ka pau mai a Iehova i ta tatou au pure e ka akameitaki mai i ta tatou au tautaanga kia rauka te akava ngakau meitaki i roto i te angaanga orometua. (1 Ioane 5:14, 15) Inara kare tatou e pure ua ana e kia kiteaia tetai tangata no te rave atu i tetai apiianga Pipiria i te kainga. I muri ake i te akanoo anga tatou i tetai apiianga, ka riro te pure e te manakonako anga no runga i te au anoano tikai o te tangata apiipii Pipiria i te tauturu ia tatou kia rave i te apiianga tataki tai na roto i te mataara ka puapingaia.​—Roma 12:12.

13. Eaa te ka tauturu ia tatou penei i te rave kia puapingaia te au apiianga Pipiria i te kainga?

¹³ Ko te rave kia puapingaia te au apiianga Pipiria, e akapapa meitaki tatou no te tuanga tataki tai. Mei te mea e kare tatou e manako papu roa ana, penei ka tauturu maata kia akara e akapeea te Akaaere Apii Puka o te Putuputuanga i te rave anga i te au apii i te epetoma tataki tai. I tetai taime, penei ka rauka ia tatou kia aru i te au papuritia o te Patireia tei rauka ana te au tupuanga meitaki i te rave anga i te au apiianga Pipiria. E tika rava e, ko te tu e te au mataara o ta Iesu Karaiti apiianga e mea tau tikai kia akamanako tatou.

14. Akapeea e rauka ai ia tatou te itae i te ngakau o tetai tangata apiipii Pipiria?

¹⁴ E mea rekareka roa na Iesu te rave i te anoano o tona Metua i te rangi e i te tuatua anga ki etai ke no runga i te Atua. (Salamo 40:8) E ngakau akaaka tikai tona e e puapinga ua ana rai i te itae anga i te au ngakau o te aronga tei akarongo kiaia. (Mataio 11:28-30) E tauta pakari tikai i reira tatou i te itae i te au ngakau o ta tatou aronga apiipii Pipiria. Kia rauka ai ia tatou i te rave, ka anoanoia tatou kia akapapa no te apiianga tataki tai ma te au turanga tikai o te tangata apiipii kia vai ki roto i te manako. Ei akatauanga, me tei roto aia i tetai peu akonoanga kare i kite i te Pipiria, penei ka inangaro tatou i te akapapu kiaia e e tika tikai te Pipiria. I reira te taka ua ra e e maata te au irava ta tatou ka tatau e ka akamarama atu i te reira.

 Tauturu i te Aronga Apiipii kia Marama i te Au Akatutuanga

15, 16. (a) Akapeea tatou me tauturu i tetai tangata apiipii kare e marama ana i tetai akatutuanga tei taangaaangaia i roto i te Pipiria? (e) Eaa ta tatou ka rave me taangaanga tetai o ta tatou au puka i tetai akatutuanga te ngata ra i tetai tangata apiipii Pipiria kia marama?

¹⁵ Penei kare tetai tangata apiipii Pipiria i kite i tetai akatutuanga tei taangaangaia i roto i te au Tuatua Tapu. Ei akaraanga, penei kare aia e marama ana e eaa te aiteanga o ta Iesu e tuatua ra no runga i te tuku anga i tetai ramepa ki runga i te vairanga. (Mareko 4:21, 22) Te tuatua ra a Iesu no runga i tetai ramepa inu taito ma te viki e ka ua ra. Kua tukuia taua ramepa ra ki runga i tetai vairanga takake e rauka ai i reira i te turama i tetai ngai o te are. Penei ka anoanoia te kimikimi no runga i te au tumu tuatua no te “Ramepa” e te “Vairanga” i roto i te au puka mei te Insight on the Scriptures i te akataka tikai i ta Iesu akatutuanga. * Mei teaa tikai ra te akameitakianga maata tikai kia aere ki te apiianga Pipiria ma tetai akamaramaanga te ka maramaia e te ka ariki rekarekaia e te tangata apiipii!

¹⁶ Penei ka taangaanga tetai puka tauturu apii Pipiria i tetai akatutuanga tei ngata i tetai tangata apiipii kia marama. Akataka i tetai taime i te akamarama i te reira, me kore e taangaanga i tetai akatutuanga ke tei aiteite ki taua manako rai. Penei te akaketaketa ra tetai puka e e mea puapinga tikai te tokorua tau meitaki e te tautaanga taokotai i roto i tetai akaipoipoanga. Ei akatutuanga i teia, penei e tuatua no runga i tetai tangata e rere maira mei runga i te moari, tei tuku i te reira, e kua irinaki ki runga i tetai ao mai tangata rere kaka kia kapo mai iaia. Tetai ikianga ke mai, penei ka rauka te anoano no tetai tokorua meitaki e te tautaanga taokotai kia akatutuia na roto i te mataara e taokotai ra te aronga angaanga i te tukutuku anga atu i te au pia mei tetai ki tetai i te tari anga i te apinga mei runga mai i tetai pai.

17. Eaa ta tatou ka kite mai mei ia Iesu no runga i te au akatutuanga?

¹⁷ Te taangaanga anga i tetai akatutuanga ke ka anoanoia te akapapaanga na mua ake. E oti akera, ko te mataara tera i te akaari i to tatou uaorai inangaro i roto i tetai tangata apiipii Pipiria. E taangaanga ana a Iesu i te au akatutuanga mama ua i te akataka i tetai au tumu tuatua ngata. Te oronga maira tana Tuatua i te Maunga i te au akaraanga no teia e te akaari mai e e au tupuanga meitaki tikai ta tana au apiianga ki runga i tana aronga e akarongo maira. (Mataio 5:1–​7:29) E akakoromaki tikai to Iesu i te akamarama anga i te au apinga no te mea e inangaro pakari tikai tona i etai ke atu.​—Mataio 16:5-12.

18. Eaa te akamaroiroiia maira no runga i te au irava tei taikuia i roto i ta tatou au puka?

¹⁸ Na to tatou inangaro i roto i etai ke e akakeu ia tatou kia ‘akamarama atu mei te au Tuatua Tapu.’ (Angaanga 17:2, 3, NW) No teia ka anoanoia te apii ma te pure ngakau tae e te karape i te taangaanga i te au puka e rauka maira na roto i “te akaaere pikikaa kore e te pakari.” (Luka 12:42-44) Ei akatauanga, tetai puka meangiti ua mei Te Kite te ka Arataki ki te Ora Mutu Kore e maata te au irava e taikuia ra. * No te iti ua ra i te ngai, kua taiku uaia tetai papaki. I te taime o te apiianga Pipiria, e mea puapinga kia tatau e kia akamarama i tetai papaki o teia au irava tei taikuia. E oti akera, kua akanooia ta tatou apiianga ki runga i te Tuatua a te Atua, e e ririnui maata to te reira. (Ebera 4:12) E taiku ua rai i te Pipiria i roto i te au apiianga tataki tai, i te taangaanga putuputu anga i te au irava e kiteaia ra i roto i te au parakarapa. Tauturu i te tangata apiipii kia kite e eaa ta te Pipiria e tuatua ra no runga i tetai tumu tuatua me kore i tetai angaanga tei raveia. Tauta pakari i te akaari kiaia e akapeea aia e  puapingaia ai mei te akarongoanga ki te Atua.​—Isaia 48:17, 18.

Ui i te Au Uianga te ka Akakeu i te Manako

19, 20. (a) Eaa ka taangaanga ai i te au uianga no te aerenga manako me rave i tetai apiianga Pipiria i te kainga? (e) Eaa te ka rauka kia rave me anoanoia te akamanako ua atu rai i tetai tumu manako?

¹⁹ To Iesu kite i te taangaanga i te au uianga kua riro ei tauturu i te tangata i te uriuri. (Mataio 17:24-27) Me ui tatou i te au uianga no te aerenga manako te kare e taakama i te tangata apiipii Pipiria, penei ka akaari mai tana au pauanga e eaa tikai tona manako no runga i tetai tumu tuatua. Penei ka kite tatou e te vai ra rai tona au manako kare i tau i te au irava. Ei akatauanga, penei te irinaki ra aia i te Toru Tai. I roto i te pene 3, te tou maira te puka Kite e ko te tuatua “Toru Tai” kare te reira i roto i te Pipiria. Te tuatua ra e te taiku ra te puka i te au irava e akaari maira e e takake a Iehova mei ia Iesu e ko te vaerua tapu ko to te Atua mana ririnui ia, kare i te tangata. Penei ka rava ua te tatau e te uriuri i teia au irava Pipiria nei. Inara ka akapeea i reira me e maata atu te ka anoanoia? Penei paa i muri ake i te raveanga apii putuputu ka aru mai, kia akapou i tetai taime ki roto i tetai uriurianga puapinga tikai o teia tumu tuatua nei mei tei akamaramaia i roto i tetai puka ke a te Au Kite o Iehova, mei te poroutia Should You Believe in the Trinity? * A muri ake i reira, ka rave akaou ei tatou i te apii na te taangaanga anga i te puka Kite.

²⁰ Akapeea mei te mea e e poitirere me kore e taitaia te pauanga ki te uianga no te manako. Me te o maira tetai tumu tuatua ka ririia mei te kai avaava te tu, penei paa e akmaroiroi tatou kia rave atu rai i te apii e ka uriuri ei i te reira a tetai taime i muri mai. Na te kite e te kai avaava ra rai te tangata apiipii e tauturu ia tatou kia kimi i te akakiteanga tei neneiia penei te ka tauturu iaia kia tupu i te pae vaerua. Ia tatou e tauta pakari ra i te itae te ngakau o te tangata apiipii, ka rauka ia tatou i te pure kia Iehova kia tauturu mai iaia kia tupu i te pae vaerua.

21. Eaa te ka tupu me akatano tatou i ta tatou au mataara o te apiianga ki te au anoano o te tangata apiipii Pipiria?

²¹ Ma te akapapaanga meitaki e ta Iehova tauturu, kare e ekoko e ka rauka ia tatou i te akatano i ta tatou au mataara no te apiianga kia tau ki te au anoano takake o te tangata apiipii Pipiria. I te tuatau ka aereia, penei ka rauka ia tatou i te tauturu iaia i te akatupu i te aroa oonu no te Atua. Penei ka puapinga katoaia tatou i te patu anga i te akangateiteianga e te arikianga rekareka no ta Iehova akaaerenga. E mei teaa ra te perepereanga kavana me ariki te aronga apiipii o te Pipiria e ‘tei rotopu tikai te Atua ia tatou’! (1 Korinetia 14:24, 25) No reira kia puapingaia ta tatou rave anga i te au apiianga Pipiria e te rave pouroa anga i ta tatou ka rauka i te tauturu i etai ke kia riro mai ei au pipi na Iesu.

E Apinga Puapinga Maata kia Akaperepereia

22, 23. Kia rave akaope takiri ei i ta tatou angaanga orometua eaa te ka inangaroia?

²² Ei akaope takiri i ta tatou angaanga orometua, e irinaki tatou ki runga i te maroiroi no ko i te Atua. I te tuatua anga no runga i te angaanga orometua, kua tata a Paulo ki te au oa Kerititiano akatainuia: “Te āriki nei ra matou i taua apinga nei i te āriki karakaraea nei, kia riro te mana maata meitaki nei ki te Atua, auraka ia matou.”​—2 Korinetia 4:7.

²³ Noatu me kua akatainuia tatou me kore me no te pupu “mamoe ke atu,” mei te au ariki paruparu rai tatou. (Ioane 10:16) Inara, ka rauka ia Iehova i te oronga mai i te maroiroi tei anoanoia i te akatupu i ta tatou au tukuanga angaanga noatu te au taomianga ka apainaia mai ki runga ia tatou. (Ioane 16:13; Philipi 4:13) No reira e irinaki pu tikai tatou kia Iehova, e akaperepere i ta tatou apinga puapinga maata o te tavinianga, e te rave akaope takiri i ta tatou angaanga orometua.

[Au Tataanga Rikiriki i Raro]

Akapeea Koe me Pau?

• Eaa ta te aronga pakari ka rave i te rave akaope takiri anga i ta ratou angaanga orometua?

• Akapeea e rauka ai ia tatou te akameitaki atu i te tu puapinga o ta tatou au apiianga Pipiria i te kainga?

• Eaa taau ka rave me kare tetai tangata apiipii Pipiria e marama ana i tetai akatutuanga me kore me ka anoanoia te akakiteanga ke atu no runga i tetai tumu tuatua?

[Au Uianga Apii]

[Tutu i te kapi 16]

Te apii nei te aronga pakari i roto i te putuputuanga e te tereni nei i te au oa akarongo i roto i te angaanga orometua

[Tutu i te kapi 18]

Te rave anga kia puapingaia te au apiianga Pipiria i te kainga ko tetai mataara ia i te akakaka i to tatou marama