Te Kaikai Anga Aiai a te Atu—Akapeea me Akamaaraia?
Te Kaikai Anga Aiai a te Atu—Akapeea me Akamaaraia?
TE AKATAKA mai anga no runga i te akamaara anga no te Kaikai Anga Aiai a te Atu, kua tata te apotetoro Kerititiano ko Paulo e: “No te mea i rauka mai mei te Atu ra koia oki taku i oronga katoa ra kia kotou, e ko te Atu ko Iesu i te po ka orongaia atu ei aia kua rave i tetai varaoa e i muri ake i te orongaanga i te akameitakianga, kua aati aia i te reira e kua tuatua: ‘Te aiteanga teia o toku kopapa ra no kotou na. E pera ua rai kotou ei akamaaraanga iaku.’ Kua pera katoa aia i te akangateitei katoa anga i te kapu, i muri ake i tona akono anga i te kaikai anga aiai, te karangaanga: ‘Te aite anga o teia kapu ko te koreromotu ou na roto i te meitaki o toku nei toto ra. E pera ua rai, me putuputu ta kotou ka inu i te reira ra, ei akamaaraanga iaku.’ Me putuputu ta kotou kai anga i teia varaoa e te inu i teia kapu, e tamou kotou i te akakitekite i te matenga o te Atu, e tae ua atu ki tona taenga mai.”—1 Korinetia 11:23-26, NW.
Mei ta Paulo e karanga ra, kua akanoo a Iesu i te Kaikai Anga Aiai a te Atu “i te po ka orongaia atu ei [a Iesu]” e Iuda Ikariota ki te au arataki akonoanga ngati Iuda tei maro i te au tangata Roma kia tamate ia Karaiti. Kua raveia taua kaikai anga i te aiai Paraparau tikai, ia Mati 31, 33 T.N. Kua mate a Iesu i runga i te rakau tamamae anga i te avatea Varaire, ia Aperira 1. No te mea kua akamata mai te au ra no te karena ngati Iuda mei te aiai o tetai ra ki tera mai ra, kua raveia te Kaikai Anga Aiai a te Atu e te matenga o Iesu Karaiti i taua ra rai—ia Nisana 14, 33 T.N.
Te aronga ka kai i te varaoa e te uaina kia “pera ua rai” i te akamaara anga ia Iesu. Kia tau ki tetai tataanga, te karanga ra a Iesu e: “E akapera ei akamanakoanga iaku.” (1 Korinetia 11:24, The Jerusalem Bible) Te Kaikai Anga Aiai a te Atu kua kapiki katoaia ko te Akamaaraanga i to Karaiti matenga.
Eaa ka Akamaaraia ai to Iesu Matenga?
Te vaira te pau anga i te marama anga i te aite anga o taua matenga ra. Kua mate a Iesu ei tangata mou mua maata i te tu ngateitei o Iehova. No reira kua akapapu mai aia ia Satani ei pikikaa no te taumaro anga e te tavini ua ra te au tangata i te Atua no te au manako noinoi. (Iobu 2:1-5; Maseli 27:11) Na roto i tona matenga ei tangata tiama, kua ‘oronga [katoa a Iesu] i tona ora ei oko no te manganui.’ (Mataio 20:28) I te ara anga a Adamu i te Atua, kua ngaro iaia te oraanga tangata tiama e tona manakonako anga. Inara kua “aroa mai te Atua i to te ao nei [o te tangata], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) E tikai, “e utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”—Roma 6:23.
Kua kapitiia atu te matenga o Iesu Karaiti ki nga akakiteanga maata roa atu o te aroa—te aroa maata ta Iehova i akaari no te au tangata ravarai i te oronga anga i tana Tamaiti e te aroa akaatinga uaorai ta Iesu i akaari no te au tangata katoa na te oronga puareinga ua anga i tona oraanga tangata. Te akangateitei ra te Akamaaraanga o to Iesu matenga i teia nga akakiteanga e rua o te aroa. I te mea kua orongaia mai teia aroa kia tatou nei, kare ainei tatou e akaari i to tatou mareka anga no te reira? Okotai mataara e raveia ai te reira koia oki na te aere mai anga ki te akamaara anga i te Kaikai Anga Aiai a te Atu.
Aiteanga no te Varaoa e te Uaina
I te akanoo anga i te Kaikai Anga Aiai a te Atu, kua taangaanga a Iesu i tetai varaoa e tetai kapu no te uaina muramura ei au oroa, me kore ei akatutu anga. Kua rave a Iesu i tetai varaoa, e “i muri ake i te orongaanga i te akameitakianga, kua aati aia i te reira e kua tuatua: ‘Te aiteanga teia [te varaoa] o toku kopapa ra no kotou na. E pera ua rai kotou ei akamaaraanga iaku.’” (1 Korinetia 11:24, NW) Kua aatiia te varaoa e kua tuaia e kua kaingaia no te mea e varaoa atiati ua tei maaniia ki te varaoa mata e te vai kare i akaopueia, me kore kare e iiti. I roto i te au Tuatua Tapu, te akatutu maira te opue i te ara. (Mataio 16:11, 12; 1 Korinetia 5:6, 7) Kare a Iesu i te tangata ara. Te oronga maira i reira tona kopapa tangata tiama ei atinga oko ma te tau no te au tangata ravarai. (1 Ioane 2:1, 2) Mei teaa ra i tau ei kia taangaangaia te varaoa ei akatutu anga i te kopapa tangata ara kore o Karaiti kia riro mai ei opue kore ra!
Kua akameitaki katoa a Iesu i te kapu no te uaina muramura akakino koreia e kua karanga atura e: “Te aite anga o teia kapu ko te koreromotu ou na roto i te meitaki o toku nei toto ra.” (1 Korinetia 11:25, NW) Te uaina muramura i roto i te kapu te akatutu maira i to Iesu toto. Mei te toto o te au puakatoro e te au puakanio akaatingaia i te akapapu mai anga i te Ture koreromotu i rotopu i te Atua e te iti tangata o Iseraela i te 1513 M.T.N., no reira kua riro to Iesu toto akamaringiia i roto i te mate kia akapapu mai i te koreromotu ou.
Koai Ma te ka Kai?
Kia akataka mai e koai ma te ka tau i te kai i te au oroa no te Akamaaraanga, te anoanoia ra tatou kia marama e no runga i te aa te koreromotu ou e koai ma te ka o atu ki roto i te reira. Te karanga ra te Pipiria e: “I na, e tae maira te au rā, te tuatua mairā Iehova, e papau ei au i te ngutuare o Iseraela, e i te ngutuare o Iuda, i tetai koreromotu ou . . . E tuku au i taku ture ki roto ia ratou, e tataia e au ki runga i to ratou ngakau; e e riro au ei Atua no ratou, e riro oki ratou ei tangata noku. . . . e akakore oki au i ta ratou ara, e kare au e manako akaou i to ratou kino.”—Ieremia 31:31-34.
Te rauka ra i te koreromotu ou i te akariro i tetai pirianga tu takake ma te Atua ko Iehova. Na roto i teia koreromotu, kua riro mai tetai pupu o te aronga tataki tai ei au tangata nana e kua riro mai aia ei Atua no ratou. Kua tataia te ture a Iehova ki roto ia ratou, i roto i to ratou ngakau, e ko te aronga katoa i vao ake i te koro o te ngati Iuda tei peritome kopapaia ka aere katoa mai ki roto i te pirianga koreromotu ou ma te Atua. (Roma 2:29) Kua tata te tangata tata Pipiria ko Luka i to te Atua akakoroanga kia ‘akara mai Aia i te etene e rave i tetai papaki tangata i roto ia ratou ra no tona ingoa.’ (Angaanga 15:14) Kia tau kia 1 Petero 2:10, ko ratou “kare te tangata no te Atua i muatangana, i teianei ra e tangata ïa no te Atua.” Te taiku maira te au Tuatua Tapu ia ratou e ko “te Iseraela o te Atua,” koia oki, te Iseraela vaerua. (Galatia 6:16; 2 Korinetia 1:21) Te koreromotu ou, i reira, ko te koreromotu i rotopu i te Atua ko Iehova e te Iseraela vaerua.
I tona po openga ma tana au pipi, kua rave katoa a Iesu uaorai i tetai koreromotu ke kia ratou. “Mei toku metua i akono i tetai basileia noku ra,” tana i akakite kia ratou, “kua akono katoa au ia kotou.” (Luka 22:29) E koreromotu teia no te Patireia. Te numero o te au tangata apa tei apainaia ki roto i te koreromotu o te Patireia e 144,000. I muri ake i te akatuia mai anga ki te rangi ra, ka tutara ratou ma Karaiti ei ui ariki e te kau taunga. (Apokalupo 5:9, 10; 14:1-4) No reira, te aronga i roto i te koreromotu ou ma te Atua ko Iehova tei roto katoa i te koreromotu o te Patireia ma Iesu Karaiti. Ko ratou anake ua te aronga tei tika i te kai i te au oroa no te Kaikai Anga Aiai a te Atu.
Akapeea te aronga te tau ra i te kai i te au oroa Akamaaraanga e e pirianga takake to ratou ma te Atua e ei aronga tuangaia ma Karaiti ra? Kua akataka mai a Paulo e: ‘Te vaerua [tapu] uaorai oki, e to tatou katoa nei oki vaerua [to tatou tu manako], tei akakite ïa e, e tamariki tatou na te Atua: E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia; te mate kapipiti nei oki tatou ma ia katoa, kia akakakā kapipitiia ma ia katoa oki.’—Roma 8:16, 17.
Na roto i tona vaerua tapu, me kore i te mana ririnui, kua akatainu te Atua i te aronga akatuangaia no Karaiti. Te akapapu maira teia kia ratou e ko ratou te aronga akatuangaia no te Patireia. Te akatupu ra te reira i roto i te au Kerititiano akatainuia i tetai manakonako anga i te rangi. Te manako ra ratou na te akono anga ratou i te au mea katoatoa ta te Pipiria e karanga ra no runga i te oraanga i te rangi ra. Tei runga ravao, te puareinga ua nei ratou i te akaatinga i te au pirianga katoatoa i te enua nei, kapiti anga te oraanga i runga i te enua e te au pirianga tangata katoatoa. Noatu e kua kite te au Kerititiano vaerua akatainuia e e mataora te oraanga i roto i te Parataito i te enua nei, kare ra teia manakonako anga no ratou. (Luka 23:43) Kare e no te au manako akonoanga pikikaa mari ra no te angaanga anga te vaerua o te Atua, e manakonako anga taui kore to ratou i te rangi e no reira e tika anga kia kai i te au oroa Akamaaraanga.
Penei e kare tetai tangata e papu roa ana e koia tetai i roto i te koreromotu ou e te koreromotu o te Patireia. Akapeea me te ngere ra iaia te kite i te vaerua o te Atua e koia tetai o te aronga akatuangaia ma Karaiti? E mea tarevake i reira iaia ra i te kai i te au oroa o te Akamaaraanga. E tikai, kare te Atua e mareka mai me komono akakoro tetai tangata iaia uaorai e ko tetai tei kapikiia kia riro mai ei ariki e te kau taunga i te rangi ra me kare tikai aia no taua kapiki anga ra.—Roma 9:16; Apokalupo 22:5.
Eaa te Putuputu i te Akamaara Anga i te Reira?
Ka tau ainei kia akamaaraia to Iesu matenga i te au epetoma me kare penei i te au ra ravarai? I na, kua akanoo a Karaiti i te Kaikai Anga Aiai a te Atu e kua tamate tau koreia i te Ra Pasa. Kua raveia e okotai ua taime i te mataiti ia Nisana 14, kua akamaara te Pasa i te akaoraia anga te Iseraela mei te tuikaa i Aiphiti. (Exodo 12:6, 14; Levitiku 23:5) No reira ko te matenga o te ‘Mesia o ta tatou pasa’ e mea tau kia akamaaraia e okotai ua taime i te mataiti, kare i te au epetoma me kore i te au ra ravarai. (1 Korinetia 5:7) I te akamaara anga i te Kaikai Anga Aiai a te Atu, te aru ra te au Kerititiano i taua ravenga mei ta Iesu rai i rave i tona akanoo anga i te reira.
Eaa, i reira, te aite anga o ta Paulo au tuatua: “Me putuputu ta kotou kai anga i teia varaoa e te inu i teia kapu, e tamou kotou i te akakitekite i te matenga o te Atu, e tae ua atu ki tona taenga mai”? (1 Korinetia 11:26, NW) I roto i teia irava kua taangaanga a Paulo i te tuatua te aite anga “i te au taime ravarai,” me kore “aea ua atu.” No reira, te karanga nei aia e aea ua atu te au Kerititiano akatainuia e kai ei te au oroa, ka akakite ratou i to ratou akarongo i roto i te atinga oko o Iesu.
Ka akamaara te au Kerititiano akatainuia i te matenga o Karaiti “e tae ua atu ki tona taenga mai.” Ka rave uaia atu teia akamaara anga e tae ua mai a Iesu i te rave mai i tana au pipi akatainuia ki te rangi na roto i tetai akatuanga ki roto i te oraanga pae vaerua i tona tuatau “parutia.” (1 Tesalonia 4:14-17, NW) Te rotai ra teia ki ta Karaiti au tuatua ki te 11 apotetoro tiratiratu: “E kua oti anake i te akamaneaia e au ra, ka oki mai au, e arataki ia kotou ki oku ra; ei reira katoa kotou, i te ngai e nooia e au ra.”—Ioane 14:3.
Eaa te Aiteanga Noou?
E mea tau ainei kia kai i te au oroa Akamaaraanga e rauka ai te akameitaki anga na roto i te atinga o Iesu e kia rauka mai te oraanga mutu kore i runga i te enua nei? Kare. Kare e apinga i roto i te Pipiria e akakite maira e i muri ake i to ratou akatuia mai anga ki te enua nei, mei te au tangata mataku i te Atua mei ia Noa, Aberahama, Sara, Isaaka, Rebeka, Iosepha, Mose, e Davida e ka kai i teia au oroa nei. Inara, ko ratou e tetai papaki katoatoa tei inangaro i te oraanga ope kore i runga i te enua nei kia akono i te akarongo i roto i te Atua e ia Karaiti e i roto i ta Iehova apinga no te atinga oko o Iesu. (Ioane 3:36; 14:1) Kia rauka te oraanga mutu kore, e mea tau kia akono katoa koe i taua akarongo. Toou tae mai anga ki te akamaara anga mataiti o to Karaiti matenga te akamaara maira i taua atinga maata roa atu e e mea tau ka akaoonuia toou akameitaki anga no te reira.
Kua akakite maata mai te apotetoro ko Ioane i te puapinga maata o to Iesu atinga i te karanga anga aia e: “Te tata nei au i teianei au tuatua kia kotou [aronga taeake akatainuia], kia kore kotou e rave i te ara. Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra: Koia oki te tarangaara i ta tatou nei ara; kare oki i ta tatou anake ra, i ta to te ao katoa nei ra.” (1 Ioane 2:1, 2) Ka rauka i te aronga akatainuia i te karanga e ko to Iesu atinga e tapokianga ara no ta ratou au ara. Inara e atinga katoa ia no te au ara o te ao katoa, te akariro anga kia rauka te oraanga mutu kore no te au tangata akarongo ra!
Ko koe ainei tetai ka tae mai ia Aperira 4, 2004, i te akamaara i to Iesu matenga? Ka raveia teia akamaaraanga i te ao katoa e te Au Kite o Iehova i ko i to ratou au ngai uipaanga. Me tae mai koe, ka puapingaia koe i te akarongo anga ki tetai tuatua puapinga maata tikai o te Pipiria. Ka akamaaraia mai kia koe e mei teaa te maata ta te Atua ko Iehova e ta Iesu Karaiti i rave ana no tatou. E tutaki anga pae vaerua katoa te reira i te akaputu mai ma te aronga tei ariki oonu i te Atua e ia Karaiti e no to Iesu atinga oko. Ka akaketaketa meitaki mai te atianga i toou inangaro kia riro mai ei tangata ariki i te takinga meitaki o te Atua, te taki atura ki te ora mutu kore. Auraka e tuku i tetai apinga i te arai ia koe. Kia tae mai no teia akamaara anga ngakau pumaana no te akangateitei anga e te akamareka anga i to tatou Metua i te rangi ra, i te Atua ko Iehova.
[Tutu i te kapi 5]
Kua kapitiia to Iesu matenga ki nga akakiteanga maata roa atu e rua o te aroa
[Tutu i te kapi 6]
Te varaoa opue kore e te uaina e nga akatutu anga tau no to Iesu kopapa ara kore e no tona toto akamaringiia