Tetai Akamaara Anga te Akakeu ra ia Koe
Tetai Akamaara Anga te Akakeu ra ia Koe
IAIA i runga i te enua nei, kua akanoo a Iesu Karaiti i tetai akamaara anga te akangateitei ra i te Atua. Ko teia anake ua te oroa akonoanga tana i akaue tika mai i tana au pipi kia akono. Ko te Kaikai Anga Aiai a te Atu, tei kite katoaia e ko te Kaingamanga Openga.
E akamanako ana e ko koe tetai kite mata kitea koreia o te au tupuanga te taki atura ki taua atianga. Kua akaputuputu mai a Iesu ma tana au apotetoro ki roto i tetai pia i runga ia Ierusalema i te akono i te Pasa ngati Iuda. Kua oti ta ratou kai anga i te manga no te Pasa tei matauia, te kapiti maira te mamoe tunutunu, te au kai raurau kavangu, te varaoa opue kore, e te uaina muramura. Kua akaunga keia atu te apotetoro tiratiratu kore ko Iuda Ikariota e kare e roa atu ka pikikaa mai i tona Pu. (Mataio 26:17-25; Ioane 13:21, 26-30) Ko Iesu koia anake ua ma tana 11 apotetoro tiratiratu. Ko Mataio tetai i roto ia ratou.
Kia tau ki te papaanga kite mata a Mataio, i akapenei a Iesu i te akanoo anga i te Kaikai Anga Aiai a te Atu: “Kua rave iorā Iesu i te manga [te varaoa opue kore], e kua akameitaki atura, vavaʼi iora, tuku atura ki te au pipi, na ko atura, Ka rave, ka kai; ko toku kopapa teia. Kua rave iora aia i te kapu [o te uaina], akameitaki atura, tuku atura kia ratou ra, na ko atura, Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.”—Mataio 26:26-28.
Eaa ra a Iesu i akanoo ei i te Kaikai Anga Aiai a te Atu? I te rave anga i te reira, eaa aia i taangaanga ai i te varaoa opue kore e te uaina muramura? Ka kai pouroa ainei te au pipi a Karaiti i teia oroa? Mei teaa te putuputu me akamaaraia teia kaikai anga? E e aite anga tikai ainei te reira noou?