666​—Kare i te Piri Umere Ua

“Auraka rava tetai tangata e oko atu i te apinga e kia oko mai oki mari ra ko te tangata tei iaia taua akairo ra, e te ingoa o te puaka taae ra, e te numero o taua ingoa nona ra. Tei ko nei te pakari. E kite tona ra ka tatau aia i te numero i taua puaka taae nei: tei te tangata te ariteanga o teianei numero; teia oki tona numero, e ono anere e ono ngauru e ono ara.”​—Apokalupo 13:17, 18.

E TOKOITI ua te au tumu manako Pipiria tei akakeu maata i te inangaro e te manako mei te totou no runga i te akairo muna ra, me kare te ingoa, o “te puaka taae”​—ko te numero 666. I runga i te tivi e te Internet, pera katoa i roto i te au teata, te au puka, e te au makatini, kua riro te akairo o te puaka ei tumuanga manako ope kore.

Te irinaki ra etai e ko taua 666 e akairoia no tei patoi ia Karaiti o te Pipiria. Te karanga ra tetai e te akatutu ra te reira i etai tu o te akatakaanga tei akanooia, mei tetai tatatau me kore i te tuku anga i te microchip ma te digital code i te akataka anga i te tangata ei tavini no te puaka. Noatu rai te mou irinaki ra etai e ko te 666 e akairoia no te opati pope o te Katorika. Te mono anga i te au numero Roma no te au reta i roto i tetai tu no te taoonga tikai o te pope, te Vicarius Filii Dei (Orometua na te Tamaiti a te Atua), e te taui meangiti anga i te au numero, kua taopenga mai ratou ki te 666. Kua karanga katoa te reira e ko taua numero ra ka rauka i te tareia mei te ingoa Ratini o te Emepera Roma ko Diocletian e mei te tataanga Epera o te ingoa o Nero Kaisarea. *

Inara, ko teia au akatakaanga manako ua e te maani ua, e tuke tikai mei ta te Pipiria uaorai i karanga ana no runga i te akairo o te puaka, mei ta tatou ka akara i roto i te atikara te aru mai nei. Te akaari maira te Pipiria e ko te aronga e akairo tetai ka kite i to te Atua riri me apai mai aia i teia akatereanga o te au mea nei ki te openga. (Apokalupo 14:9-11; 19:20) No reira, te marama anga i te aite anga o te 666, e maata ua atu i to te pau anga i tetai piri umere ua. Ma te mataora, ko te Atua ko Iehova, te tu tikai o te aroa e te Tumu no te marama i te pae vaerua, kare i akaruke ana i tona au tavini ki roto i te poiri no runga i teia tumu puapinga maata.​—2 Timoteo 3:16; 1 Ioane 1:5; 4:8.

[Tataanga Rikiriki i Raro]