E Patoi Atu i te Vaerua o Tetai Ao e Taui Nei
E Patoi Atu i te Vaerua o Tetai Ao e Taui Nei
‘Te vaerua i rauka ia tatou nei, kare ïa to teianei ao, ko te vaerua ra no ko mai i te Atua ra.’—1 KORINETIA 2:12.
1. Na roto i teea au tu i akavareia ai a Eva?
“I PIKIKAA mai te ovi iaku.” (Genese 3:13) Ma taua au tuatua tokoiti ua, kua tauta te vaine mua, ko Eva, i te akataka atu e eaa aia i aru atu ei i tetai mataara no te meameaau i te patoi anga i te Atua ko Iehova. E tika tana e karanga ra, inara kare te reira i kotoe ana i tana ravenga kino. Kua akauruia te apotetoro ko Paulo kia tata i muri mai e: “Ko [Eva] ra tei vavare.” (1 Timoteo 2:14) Kua akavareia aia na te irinaki anga e te rave anga i te akarongo kore—te kai anga i te ua araiia—e ka puapingaia aia, i te akariro anga iaia mei te Atua ra. Kua akavare katoaia aia no runga i te akatakaanga o tei arataki ke iaia. Kare aia i kite ana e ko te ovi e vaa tuatua ua na Satani te Tiaporo.—Genese 3:1-6.
2. (a) Akapeea a Satani i te arataki ke anga i te au tangata i teia tuatau? (e) Eaa ‘te vaerua o teianei ao,’ e eaa te au uianga ka akamanako tatou i teianei?
2 Mei te tuatau o Adamu raua ko Eva, kua rave ua atu a Satani i te akavare i te au tangata. Ko te tika, koia oki, “te arataki ke ra i te katoa anga o te au tangata i te enua nei.” (Apokalupo 12:9, NW) Kare tana au ravenga kikite i taui. Noatu e kare aia e taangaanga akaou ana i tetai ovi tika tikai, te rave ua atura aia i te uuna e koai aia. Na roto i te au tuanga a te tamataora, te akakitekiteanga nuti, e tetai au ravenga, te arataki ke ra a Satani i te au tangata na te irinaki anga e kare e anoanoia e ratou me kore e puapingaia mei te arataki anga aroa a te Atua. Ta te Tiaporo oroanga no te akavareanga kua akatupu ki roto i te au tangata i te au ngai ravarai i tetai vaerua no te meameaau i te patoi anga i te au ture e te au kaveinga a te Pipiria. Te kapiki ra te Pipiria i teia ko ‘te vaerua o teianei ao.’ (1 Korinetia 2:12) Te akakeu ririnui ra teia vaerua i te au irinaki, te au tu, e te tu akono o te aronga kare i kite i te Atua. Akapeea taua vaerua i te akaariia anga, e akapeea e rauka ai ia tatou i te patoi atu i tana akakeu anga kino? Ka akara ana tatou.
Kino ua Atura te Au Tu Puapinga o te Tu Akono Tau
3. Eaa ra te vaerua o teianei ao i tupu maata ai i teia tuatau?
3 I teia tuatau, kua akaari maataia mai ‘te vaerua o teianei ao.’ (2 Timoteo 3:1-5) Penei kua kite ana koe e te kino ua atura te au tu puapinga o te tu akono tau. Te akamarama maira te au Tuatua Tapu e eaa teia i akapera ai. Aru mai i te akanooia anga te Patireia o te Atua i te mataiti 1914, kua tupu mai te tamaki i te rangi. Kua autu kore a Satani e tana au angera temoni e kua uriia mai ki te enua nei. Ma te riri, kua akapakari mai a Satani i tana oroanga no te akavareanga i te ao katoa. (Apokalupo 12:1-9, 12, 17) I roto i te au tu ravarai te rauka ra iaia, kua tauta aia i “te [“arataki ke,” NW] i te aronga i ikiia ra, naringa e tika.” (Mataio 24:24) Ei au tangata na te Atua, ko tatou tana takete maata. Te aruaru ra aia i te takore i to tatou tu i te pae vaerua kia ngere oki ia tatou i to Iehova mareka anga e te manakonako anga no te ora mutu kore.
4. Akapeea te manako anga o te au tavini o Iehova i te Pipiria, e akapeea te manako anga o teianei ao no te reira?
4 Kua tauta a Satani i te akakino i te Pipiria, te puka okomaata te apii maira ia tatou no runga i Tei Anga aroa mai ia tatou. Te inangaro ra e te akaperepere ra te au tavini o Iehova i te Pipiria. Kua kite tatou i te reira e e Tuatua akauruia na te Atua, kare e e tuatua na te tangata. (1 Tesalonia 2:13; 2 Timoteo 3:16) Inara, te inangaro ra to Satani ao, e kia manako tuke rai tatou. Ei akaraanga, te tuatua akamata anga o tetai puka te patoi ra i te Pipiria i te tuatua anga e: “Kare e apinga ‘tapu’ no runga i te Pipiria, kare katoa te reira i te ‘tuatua na te Atua.’ Kare te reira i tataia e te au tainiti akauruia e te Atua, mari ra na te kau taunga kimi mana ra.” Ko te aronga tei aratakiia kia irinaki i taua au tuatua penei ka topa ngoie ki roto i te manako tarevake e ka rauka ua ia ratou i te akamori i te Atua na roto i tetai ua atu mataara ta ratou e inangaro ra—me kore kare rava e akamori atu iaia.—Maseli 14:12.
5. (a) Eaa ta tetai tangata tata i karanga ana no runga i te au akonoanga te taokotai ra ki te Pipiria? (e) Akapeea etai au manako matauia i teianei ao i te akaaiteia anga ki ta te Pipiria e karanga ra? (Kapiti mai te pia i te kapi e aru mai nei.)
5 Te au patoi anga te aere tika maira e te tika kore ra ki runga i te Pipiria, kapiti mai te pikikaa anga akonoanga na te aronga te karanga ra e te turu ra i te reira, kua tupu mai tetai mareka kore anga maata no te akonoanga, te kapiti mai anga i te akonoanga te taokotai ra ki te Pipiria. I roto i te au akakitekiteanga nuti e te aronga kite, te patoiia nei te akonoanga. Te akakite maira tetai tangata tata e: “Te manako no te Akonoanga ngati Iuda e te Akonoanga Kerititiano te tupu ra i roto i te peu mareka anga e mea papu kore. Ko te meitaki te kiteaia ra e ratou e ei mea taito; ko tei kino ra, e au manako taito te tapupu ra i te pakari no te kite e te arairai ra i te tere anga ki mua i te pae taineti. I te au mataiti i topa akenei kua tupu mai te aviri anga ki roto i te taitoito anga e te takinokino anga.” Kua akamata mai teia takinokino anga ma te aronga tei pikikaa i te vai anga o te Atua e tei riro atura “ta ratou eumiumianga ei mea puapinga kore.”—Roma 1:20-22.
6. Eaa te manako o teianei ao no runga i te au ravenga ainga tei akaapaia e te Atua?
6 Kare i te mea poitirere, i reira, e te aere mamao ke atura te au tangata mei te au turanga a te Atua no te tu akono. Ei akaraanga, te akataka maira te Pipiria i te au pirianga totoma e e “mea akama ra.” (Roma 1:26, 27) Te akakite katoa maira te reira e ko te kanga e te akaturi kare ratou e noo i te Patireia o te Atua. (1 Korinetia 6:9) Inara, i roto i te au enua e manganui kare e ko taua au ravenga ainga anake ra te ariki manakoia ra mari ra kua akataka maneaia mai ratou i roto i te au puka, te au makatini, te au imene, te au teata, e te au akaariari anga tivi. Te aronga tei tuatua patoi ana i taua au ravenga ra te manakoia ra ei manako papaki tai, akakino anga, e kare i rauka ana te manako akamarama anga. Kare i akara ana i te au turanga a te Atua ei akakiteanga i te manako aroa, te manako ra teianei ao i te reira ei arairai anga i toou uaorai tu rangatira e te tupu anga.—Maseli 17:15; Iuda 4.
7. Eaa te au uianga ka tau kia ui tatou kia tatou uaorai?
7 I roto i tetai ao te tuku maata maira i tana patoi anga i te Atua, e mea meitaki no tatou kia akara i to tatou uaorai tu e te au tu puapinga. I etai ua atu tuatau, e mea tau kia pure e kia akara matatio tika tikai tatou ia tatou uaorai i te akapapu anga e kare tatou e aere ke atu mei te manako e te au turanga o Iehova. Penei, ei akaraanga, ka ui tatou kia tatou uaorai e: ‘Te akarekareka ra ainei au iaku uaorai ki te tumu manako taku i kopae ke atu i te au mataiti i topa akenei? Te ariki maata ra ainei au i te au ravenga ta te Atua e akaapa ra? Te inangaro ra ainei au i te akara i te au mea pae vaerua kare i manako pakariia ana i taku i rave ana i te tuatau i topa? Te akaari ra ainei toku tu oraanga e te tuku ra au i te au manako o te Patireia ei mea mua i roto i toku oraanga?’ (Mataio 6:33) Ka tauturu mai taua au akamaara anga ia tatou kia patoi atu i te vaerua o teianei ao.
“Ko te Topa ua Aea”
8. Akapeea tetai e topa ke atu mei ia Iehova ra?
8 Ki te au taeake Kerititiano, kua tata te apotetoro ko Paulo e: “E teianei, e tau ia tatou kia akamaata tikai i te akono i te au tuatua ta tatou i akarongo akenei, ko te topa ua aea ia tatou a muri ake.” (Ebera 2:1) Ko tetai pai te panu ke atura kare e taenaia tona ngai e aere ra. Me kare te rangatira pai e akarakara atu i te matangi e te au moana, penei ka panu ke atu tona pai mei tetai uapu e ka iri atu ki runga i tetai tapataatai tokatoka. Mei tei reira katoa, me kare tatou e akara atu ki te au tuatua mou okomaata o te Tuatua a te Atua ra, penei ka panu ke atu tatou mei ia Iehova e te mamae anga i te ngaa pai i te pae vaerua. Kia mamae i taua ngere anga, kare tatou e kopae takiri atu i te tuatua mou. Ko te tika, kare te manganui i akakoro viviki i te kopae ia Iehova. I te maata anga o te taime, ka piri marie atu ratou ki roto i tetai apinga te tamanata ra ia ratou i te akarongo anga ki ta te Atua Tuatua. Vaitata rai ma te kitea koreia, kua topa atu ratou ki roto i te ara. Mei tetai rangatira pai te moe ra, kare taua au tangata tataki tai ra i ara mai e tae roa kia tureiti.
9. Na roto i teea au tu i akameitaki ei a Iehova ia Solomona?
9 E akamanako ana i te tu oraanga o Solomona. Kua oronga a Iehova kiaia i te taoonga ariki ki rungao ia Iseraela. Kua akatika te Atua kia patu a Solomona i te iero e kua akaue atu kia tata aia i te au tuanga o te Pipiria. Kua tuatua atu a Iehova kiaia i nga atianga e rua e kua oronga atu i te apinganui, te rongonui, e tetai tutara anga ponuiaau kiaia. Tei runga ravao, kua akameitaki a Iehova ia Solomona ma te pakari maata. Te karanga ra te Pipiria e: “Kua oronga mai te Atua i te karape, e te kite, kia Solomona, e mea maata roa, e te maoraora maata o te ngakau, mei te one taatai ra. Maata rava atura to Solomona karape i to te aronga katoa i te itinga o te rā ra, e to Aiphiti katoa ra.” (1 Ariki 4:21, 29, 30; 11:9) E mea tika, penei ka manako tetai e, me ka vai tiratiratu ua atu tetai tangata ki te Atua ra, ko Solomona te reira. Inara, kua topa atu a Solomona ki roto i te apoteiti. I akapeea te reira i tupu ei?
10. Eaa te akauenga kare a Solomona i akarongo atu ana, e eaa tei tupu mai?
10 Kua kite e kua marama meitaki a Solomona i ta te Atua Ture. Kare e ekoko anga kua rave aia i tetai manako anga takake i te au ikuikuanga tei akanooia no te aronga tei riro mai ei au ariki i Iseraela. I roto i taua au ikuikuanga ko tei karanga ra e: “Auraka oki [te ariki] e akamaata i te vaine nana, kia kore e tatipake tona ngakau.” (Deuteronomi 17:14, 17) Noatu taua akauenga taka marama, kua rave mai a Solomona e itu anere vaine e e toru anere vaine tavini. Ko te manganui o teia au vaine nei te akamori ra i te au atua ke. Kare tatou i kite e eaa ra a Solomona i rave ei i te au vaine e manganui, kare katoa tatou i kite e i akapeea aia i te akatika anga i te reira. Ko ta tatou ra i kite ei e kare i rauka ana iaia i te akarongo ki te akauenga taka marama a te Atua. E tika tikai te tupu anga ta Iehova i akamatakite mai e ka tupu mai. Ka tatau tatou: ‘[Ta Solomona] au vaine ra . . . kua akaanga keia iora tona ngakau ki te au atua ke.’ (1 Ariki 11:3, 4) Ma te marie’—inara ma te tika anga—kua ngaro ke atu tona pakari tau i te Atua. Kua topa ke atu aia. Kare i roa ana, no to Solomona inangaro i te akamareka i tana au vaine peikani kua akaruke aia i te inangaro i te akarongo e te akamareka i te Atua. Mei teaa ra te tumatetenga, no te mea ko Solomona tei tata mai i mua ana i te au tuatua e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei”!—Maseli 27:11.
E Ririnui te Vaerua o Teianei Ao
11. Ta tatou e tuku ra ki roto i to tatou manako i akapeea ra i te akatuke anga i ta tatou e manako ra?
11 Te apii maira to Solomona akaraanga kia tatou e e kino tikai kia manako e kua kite tatou i te tuatua mou, e kare te au akakeu anga o teianei ao e akatuke i ta tatou e manako ra. Mei te kai kopapa e akatuke ra i to tatou kopapa, te akatuke ra te kai i te pae manako i ta tatou e manako ra. Ta tatou e angai ra i to tatou manako te akakeu ra i to tatou manako e te tu akono tau. Te kite anga i teia, kua akapou te au taokotaianga e pirioni ua atu tara i te mataiti tataki tai i te akakitekite anga i ta ratou au apinga. Kua taangaanga te au akakitekiteanga puapinga i te au tuatua kikite e te au tutu kia mareka atu ki te au inangaro e te au anoano o te aronga okooko ra. Kua kite katoa te aronga akakitekite e te kite anga i tetai akakitekite anga kare e akakeu roa ana i te au tangata e tai me kore e rua taime kia aere viviki atu i te oko mai i te au apinga. Inara, i taua taime ra, na te akara anga ripiti putuputu ra i akariro i te aronga okooko kia manako mareka atu i tetai apinga. Puapingaia te akakitekite anga—naringa kare, kare tetai tangata e tuku i te moni ki roto i te reira. Te tuku ra te reira i tetai akakeu anga ririnui ki runga i te manako e te au tu akono tau o te au tangata.
12. (a) Akapeea a Satani i te akakeu anga i te manako o te au tangata? (e) Eaa te akaari maira e ka rauka te au Kerititiano i te akakeuia?
12 Mei tetai tangata akakitekite ra, te akakite ra a Satani i tona au manako na te tuku anga i te reira ki roto i te au akanooanga manea, na te kite anga e i roto i te tuatau tau ka rauka iaia i te akapiri mai i te au tangata ki tana tu e manako ra. Na roto i te tamataora anga e tetai atu au ravenga, kua akavare a Satani i te au tangata kia irinaki e e meitaki te kino e e kino te meitaki. (Isaia 5:20) Kua topa katoa atu te au Kerititiano mou ki ta Satani oroanga no te tuatua tarevake. Te akamatakite maira te Pipiria e: ‘Te tuatua pu ua maira te vaerua, e kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra; No te pikikaa ra; ko te aronga i tungia to ratou akavangakau ki te auri vera.’—1 Timoteo 4:1, 2; Ieremia 6:15.
13. Eaa te au kapiti anga kikino, e i akapeea ta tatou au kapiti anga i te akatuke anga ia tatou?
13 Kare tetai o tatou i paruruia mei te vaerua o teianei ao. E ririnui te au matangi e te au-moana o ta Satani akatereanga. Te ako pakari maira te Pipiria ia tatou e: “Auraka e vavare; e kino te tuatua meitaki i te kapiti anga kikino ra.” (1 Korinetia 15:33) Te au kapiti anga kikino ka akapiri mai i tetai apinga me kare i tetai tangata—i roto katoa i te putuputuanga—i te akaata anga i te vaerua o teianei ao. Me uriuri manako tatou e kare te au kapiti anga kikino e tamamae mai ia tatou, kare katoa ainei tatou e taopenga ana i te manako e kare te au kapiti anga meitaki e tauturu mai ia tatou? Mei teaa ra te tarevake i te reira! Kua tuku taka marama mai te Pipiria i te tumu i te karanga anga te reira e: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.”—Maseli 13:20.
14. Na roto i teea au tu e rauka ai ia tatou i te patoi atu i te vaerua o teianei ao?
14 Kia patoi atu i te vaerua o teianei ao, e mea tau kia kapiti atu tatou ki te au tangata pakari—te aronga tei akamori ia Iehova. E mea tau kia akaki tatou i to tatou manako ki te au mea te akamaroiroi ra i to tatou akarongo. Kua tata te apotetoro ko Paulo e: “Eaa ua atu te au mea mou ra, eaa ua atu te au mea manako maataia ra, eaa ua atu te au mea tuatua tika ra, eaa ua atu te au mea viivii kore ra, eaa ua atu te au mea inangaroia ra, eaa ua atu te au mea tuatua meitakiia ra, eaa ua atu te tu tika meitaki ra e eaa ua atu tetai mea akapaapaaia e vaira, e tamou ua atu ra i te akamanako i teia au mea.” (Philipi 4:8, NW) Ei aronga rima rave rangatira tau, ka rauka ia tatou i te iki i te au mea ta tatou i akamanako ana. Kia iki ua atu rai tatou i te akamanako anga i teia au mea te ka akavaitata atu ia tatou kia Iehova.
E Ririnui Maata Atu to te Atua Vaerua
15. Akapeea i tuke ei te au Kerititiano i Korinetia taito ra mei tetai aronga e noo ra i roto i taua oire ra?
15 Kare mei te aronga tei arataki keia e te vaerua o teianei ao, na te vaerua tapu o te Atua e arataki ra i te au Kerititiano mou. Ki te putuputuanga i Korinetia i tata atu ei a Paulo e: ‘Te vaerua i rauka ia tatou nei, kare ïa to teianei ao, ko te vaerua ra no ko mai i te Atua ra: kia kite tatou i te au mea i oronga uaia mai e te Atua no tatou nei.’ (1 Korinetia 2:12) Kua koropiniia te oire taito o Korinetia e te vaerua o teianei ao. No te tau kore i te maata anga o tona au tangata i riro mai ei te tuatua “kia akaarite atu ki to Korinetia” ko te aite anga “kia rave i te ainga tau kore.” Kua akapoiriia e Satani te au manako o te au tangata. Tei tupu mai, kare ratou i marama ana me kore i kite i tetai apinga no runga i te Atua mou. (2 Korinetia 4:4) Inara, na roto i tona vaerua tapu, kua akatuera a Iehova i te au mata o etai papaki o to Korinetia, i te tauturu anga ia ratou kia rauka te kite o te tuatua mou. Kua akakeu e kua arataki tona vaerua ia ratou kia maani i te au tauianga maata i roto i to ratou au oraanga kia rauka mai ia ratou tona mareka anga e te akameitaki anga. (1 Korinetia 6:9-11) Noatu e e ketaketa te vaerua o teianei ao, e ketaketa roa atu to Iehova vaerua.
16. Akapeea e rauka mai ei e te akono ra tatou i to te Atua vaerua?
16 Te tika ra te reira i teia tuatau. Ko te vaerua tapu o Iehova te mana ririnui roa atu i roto i te ao e pini ua ake, e te oronga ua maira aia i te reira ma te puareinga e te meitaki ki te katoatoa tei pati i te reira na roto i te akarongo. (Luka 11:13) Inara, kia rauka to te Atua ra vaerua, e mea tau kia rave maata atu tatou i te patoi i te vaerua o teianei ao. E mea tau katoa kia apii putuputu e kia taangaanga tatou i te Tuatua a te Atua i roto i to tatou oraanga kia tano oki to tatou vaerua—to tatou turanga i te pae manako—ki tona ra manako. Me rave tatou i te reira, ka akamaroiroi mai a Iehova ia tatou kia akakoromaki i tetai ravenga ta Satani ka taangaanga i te takore atu i to tatou tu i te pae vaerua.
17. Na roto i teea au tu i rauka ai to Lota kiteanga kia riro mai ei akapumaana ia tatou?
17 Noatu e kare te au Kerititiano i to teianei ao, tei roto ra ratou i teianei ao. (Ioane 17:11, 16) Kare tetai ia tatou e rauka i te kopae ke atu i te vaerua o teianei ao, penei e te angaanga ra tatou me kore te noo ra ma te aronga kare e inangaro ana i te Atua me kore i tona au tu. Te manako ra ainei tatou mei ia Lota rai, “ko tei mamae,” e kua tamamaeia, e te au angaanga tika kore a te au tangata o Sodoma, i tona noo anga i rotopu ia ratou? (2 Petero 2:7, 8) Me koia ia, ka rauka ia tatou te pumaana. Kua paruru e kua akaora a Iehova ia Lota, e ka rave rai aia i te reira no tatou. Te akara maira e te kite maira to tatou Metua aroa i to tatou au turanga, e ka rauka iaia i te oronga mai kia tatou i te tauturu e te maroiroi ta tatou e anoano ra kia rauka i te tamou i to tatou tu pae vaerua. (Salamo 33:18, 19) Me uri atu tatou kiaia, te irinaki kiaia, e te kapiki kiaia, ka tauturu mai aia ia tatou kia patoi atu i te vaerua o teianei ao, noatu e mei teaa te ngata to tatou turanga.—Isaia 41:10.
18. Eaa ra ka akaperepere ei tatou i to tatou pirianga kia Iehova?
18 I roto i tetai ao te takake ra mei te Atua e tei akavareia e Satani, ko tatou ei au tangata no Iehova kua akameitakiia ma te kite i te tuatua mou. I kite ei i reira tatou i tetai rekareka e te au kare i rauka ana i teianei ao. (Isaia 57:20, 21; Galatia 5:22) Te akaperepere nei tatou i te manakonako anga umere no te ora mutu kore i roto i te Parataito, ko te vaerua o teia ao e mate atura ka kore takiri. E akaperepere tatou i reira i to tatou pirianga okomaata ma te Atua e kia matakite i te akatika anga i tetai tu te topa atura i te pae vaerua. E akavaitata ua atu tatou kia Iehova, e nana e tauturu mai ia tatou kia patoi i te vaerua o teianei ao.—Iakobo 4:7, 8.
Ka Rauka Ainei ia Koe te Akataka?
• Na roto i teea au tu te akavare anga e te arataki ke anga a Satani i te au tangata ra?
• Akapeea e rauka ai ia tatou kia kore e topa ke atu mei ia Iehova ra?
• Eaa te akaari maira e te pakari ua atura te vaerua o teianei ao?
• Akapeea e rauka mai ei e te akono ra tatou i te vaerua no ko mai i te Atua?
[Au Uianga Apii]
[Tutu i te kapi 11]
KUA PATOI TE PAKARI O TEIANEI AO I TE PAKARI AKONO TAU I TE ATUA
Ko te tuatua mou kare i te katoa anga—te maani ra te au tangata i ta ratou uaorai tuatua mou.
“Ko te tuatua [a te Atua] te tuatua-mou.”—Ioane 17:17.
Kia kite i te tika mei te tarevake, e irinaki i toou au manako ngakau.
“E pikikaa maata to te ngakau i te au mea katoa nei, e kua kino takiri.”—Ieremia 17:9.
E rave i taau uaorai e inangaro ra.
“Kare tei te tangata e aere nei, i te akono i tona uaorai takainga tapuae.”—Ieremia 10:23.
Ko te apinganui te taviri ki te tu mataora.
“Te anoano maata oki i te moni te tumu o te au kino katoa nei.”—1 Timoteo 6:10.
[Tutu i te kapi 10]
Kua topa ke atu a Solomona mei te akamori anga mou e kua anga atu ki te au atua pikikaa
[Tutu i te kapi 12]
Mei tetai tangata akakitekite ra, te akakite ra a Satani i te vaerua o teianei ao. Te patoi ra ainei koe i te reira?