Ka Tau Ainei Tatou kia Kapiki i te Tauturu mei te Au Angera?

E MEA tau ainei kia kapiki tatou i te au angera i roto i te au tuatau apiapi? E manganui te au tangata e manako akapera ra. Ko te tika ia, te karanga ra te New Catholic Encyclopedia e: “E pure ana tetai ki . . . te au angera . . . inara na roto ua i te tu e kia riro ratou ei rotopu no tatou i mua i te Atua.” Ka kapiki ainei tatou ki runga i te au angera kia riro ei rotopu no tatou?

Te oronga maira te Tuatua a te Atua i nga ingoa e rua ua o ta te Atua au angera tiratiratu, ko Mikaela e Gaberiela. (Daniela 8:16; 12:1; Luka 1:26; Iuda 9) No te mea e kua taikuia teia nga ingoa ki roto i te Pipiria, kua kite mai tatou e takitai i teia nga angera e e peretana vaerua takake roa ma te ingoa, kare e ko tetai ririnui me kare e mana tangata ua nei. Inara, ko tetai atu au angera, kare i akakite mai ana i to ratou ingoa. I tetai akaraanga, i te patianga a Iakoba i tetai angera tei atoro mai iaia i te akakite mai i tona ingoa, kua kopae aia i te rave i te reira. (Genese 32:29; Akava 13:17, 18) Kare tetai papaanga o te au ingoa o te au angera i orongaia mai ana i roto i te Pipiria, i reira i te kopaeanga te au tangata i te oronga anga kia ratou i te manako maata roa atu.

I roto i te au angaanga a te au angera e ko te akakitekiteanga i te au karere mei te Atua ki te au tangata. Ko te tika ia, ko te au tuatua mua i te Epera e te Ereni tei uriia e “angera” ko te aiteanga tikai e e “karere.” Inara, kare te au angera e tavini ana ei au rotopu e te apai ra te pure a te tangata ki te terono o Tei Teitei Rava. Kua akapapuia e te Atua e kia tuatuaia te au pure kiaia na roto i te ingoa o tana Tamaiti, ko Iesu Karaiti, tei karanga e: “Kia oronga mai te Metua kia kotou i ta kotou e pati atu ma toku nei ingoa.”​—Ioane 15:16; 1 Timoteo 2:5.

Kare e pou ana to te Atua ko Iehova taime i te akarongo kia tatou me tuatua meitaki tatou kiaia. Te oronga maira te Pipiria i teia akapapuanga: “Tei vaitatao rai Iehova i te aronga katoa tei kapiki atu iaia ra, ki te aronga katoa tei kapiki atu iaia ra ma te tuatua tika.”​—Salamo 145:18.