Ripoti a te Aronga Tutu Patireia

Kiteanga i te Tangata i ta Ratou Ngai Angaanga

EAA te tu aiteite i te au apotetoro ko Mataio, Petero, Anederea e Ioane? Kua kapiki a Iesu ia ratou katoatoa ia ratou i ta ratou ngai angaanga. Te angaanga maroiroi ra a Petero, Anederea e Ioane ma ta ratou pitiniti tautai i patiia atu ei ratou e Iesu, na te tuatuaanga: “Ka aru mai iaku.” Tei te opati tero a Mataio i te patiia anga mai ki riro ei pipi na Iesu.​—Mataio 4:18-21; 9:9.

Ko te akakitekiteanga ki te tangata i ta ratou ngai angaanga ka riroia ei akameitakianga. I te kiteanga i teia, kua tauta pakari te Au Kite o Iehova i Tiapani no teia taime ua nei i te piri atu ki roto i teia tuanga o te angaanga orometua. Eaa te au tupuanga? I roto ua i nga marama, kua raveia e tauatini ua atu au atoro akaou anga, e kua akamataia etai 250 apii Pipiria. E akamanako i te au tupu anga tei aru mai.

Kua aravei atu tetai orometua tavini tamou i Tokyo i tetai manitia o tetai ngai kaikai anga e kua tuatua ana ki tetai Kite i te apii i etai 30 mataiti iaia e tamaiti aere apii ra. Noatu e kare te manitia i marama maata i tei akakiteia mai i taua taime ra, kua akamata mai aia i te inangaro no runga i te Pipiria. I teia taime nei kua akaka akaouia tona inangaro, kua ariki ngoie ua aia i te apii Pipiria na te taangaanga anga i te puka Te Kite te ka Arataki ki te Ora Mutu Kore. * Pera katoa, kua akamata aia i tetai porokaramu uaorai i te tatau anga i te Pipiria i te au aiai pouroa i mua ake ka moe ei.

Kua atoro atu tetai orometua painia takake ki tetai opati. Noatu e kare te manitia i reira, kua ui mai te vaine mapu tei pau mai i te terepaoni a te manitia e, “Ka inangaro ainei koe i te tuatua kiaku?” I muri ake i tetai tuatua anga poto ua i runga i te terepaoni, kua aere mai te vaine ki vao e kua karanga mai e te inangaro ra aia i te tatau i te Pipiria. Kua akanoo te painia takake kia oki akaou atu ma tetai Pipiria e kua akamata i tetai apii Pipiria kiaia, tei raveia i te popongi roa ki roto i tetai paka i te pae ua mai i mua ake ka angaanga ai.

I tetai opati ke mai, kua kite atu tetai tangata i tetai taeake angaanga i te ariki anga i nga makatini te Punanga Tiaki e te Awake! inara kua titiri viviki atu i te reira i muri ake i te akarukeanga te Kite. I te tae anga teia tangata ki te kainga, kua akakite atu aia ki tana vaine e Kite aia no runga i te tupuanga e kua akakite e ka akarongo ua ake aia no tetai manga ua. Tana tamaine, tei rongo mai i tana au akakiteanga, kua akakite atu i teia ki te Kite tei angaanga i taua ngai pitiniti ra. Kua atoro viviki atu te Kite i te tane i te opati e kua akamata i tetai apii Pipiria kiaia. Kare i roa ana kua akamata te tane i te aere putuputu ki te au uipaanga i te Tapati.

Kua apai mai te akakitekiteanga ki te tangata i te ngai angaanga i tetai au akameitakianga ke atu. E manganui te au papuritia i Tiapani tei rauka i te tu karape i te oki akaouanga i te au ngai okooko, te au vakatori, e te au opati. Pera katoa, na roto i teia au ravenga no te akakitekiteanga, e manganui te aronga paruparu e kua araveiia atu e kua akamataia te au apii kia ratou. E takake roa te au tupuanga. E tai putuputuanga i roto i te rotopu o Tokyo no teia taime ua nei kua ripoti e e 108 apii Pipiria ki te kainga, e taki rua te maata i te numero tei ripotiia i te mataiti i topa akenei.

[Tataanga Rikiriki i Raro]