Riperia—Tupuanga Patireia Noatu te Tamakianga
Riperia—Tupuanga Patireia Noatu te Tamakianga
KUA tupu te tamaki a te tangata i Riperia tere atu ki te ngauru mataiti. Kia tae ki rotopu i te 2003, kua tamaki atu te aronga meameaau i to ratou aereanga i roto i te oire maata, ko Monrovia. E manganui o te Au Kite o Iehova kua maroia kia oro mei to ratou kainga, kua rave putuputuia i etai au taime. E putuputu te taime, kua keia ia te au apinga.
E mea tangi, i te tuatau o te tamakianga i roto i te oire maata, e tauatini ua atu au tangata tei tamateia. I rotopu ia ratou e nga Kite e rua, e tai e taeake e tetai e tuaine. Akapeea tetai o te au taeake i te akonoanga i teia turanga kino, e eaa tei raveia i te tauturu ia ratou?
Tauturu no te Aronga Tei Anoano Ra
I te tuatau o te manamanata, kua akapapa te opati manga o te Au Kite o Iehova i tetai tauturuanga no te aronga tei anoano ra. Kua orongaia te kai, te au apinga tei inangaroia no te are, e te au apinga rapakauanga. I te tuatau e akatere ra te aronga meameaau i te ngai o te uapu, kare e rava ana te kai. Kua kite takere te manga i teia tupuanga e kua vai papa ua te au apinga no te rua tauatini Au Kite tei oro ki te au Are Uipaanga Patireia takapini i te oire maata. Kua akarava te au taeake i te kai e kia taeria ki te tuatau e ngaa akaou mai ei te uapu. Kua tuku mai te nga manga o Peretiumu e Tiera Reone na runga i te pairere i te au apinga no te rapakauanga, e kua tuku mai te nga manga o Peritane e Varani te kakau na runga i te pai.
Noatu te turanga ngata, kua vai papu e te rekareka ra rai to tatou au taeake. Ko te tuatua a tetai tei oro mai mei tona kainga e toru taime e tu matauia e te manganui. Kua karanga aia: “Ko teia taua turanga ra ta tatou e akakitekite nei, te noo nei tatou i te tuatau openga.”
Ariuanga ki te Tuatua Meitaki
Noatu te tu oripu takapini i te ao, kua rave tamou ua atu te Au Kite i te au tupuanga manea tikai i roto i te angaanga koro. Kua taeria tetai take maata e 3,879 papuritia o te Patireia i roto ia Tianuare 2003, e i roto ia Peperuare kua rave ratou e 15,227 apii Pipiria ki te kainga.
E viviki te au tangata i te ariu mai ki te tuatua meitaki. Kua aere mai te akaraanga no teia mei tetai oire i te tuanga o te itinga apatonga o te enua. Kua parani tetai putuputuanga i te akono i te Akamaaraanga o te mate o Karaiti i roto i te vira maata o Bewahn, tei kiteaia mei tetai rima ora te aaereanga mei te ngai e matauia ra e ratou i te aravei. I mua ake ka aere atu ei te au taeake i te pati i te au tangata ki te Akamaaraanga, kua tukuna ia atu tetai patianga ki te akaaere maata o Bewahn. I te rauka anga iaia i te reira, kua apai aia i tana Pipiria, kua aere atu aia ki te au tangata o te vira, e kua tatau atu i te irava tei akaariia i runga i te patianga, te akamaroiroianga ia ratou kia aere atu ki te Akamaaraanga. E no reira i te tae atu anga te au papuritia, kua kitea mai e ratou e kua rave takereia ta ratou angaanga! Kua aere mai te akaaere maata, e tana tamariki katoa e te nga vaine e rua, ki te Akamaaraanga. I te katoatoa anga, e 27 tangata tei aere mai. Mei te reira taime mai, kua akaruke te akaaere maata i te Ekaretia
Methodist, kua akamata i tetai apii ki te Au Kite, e kua oronga i tetai potonga enua i akatu i tetai Are Uipaanga Patireia.Tetai Taui Anga o te Ngakau
Kua riro katoa te tu akono o to tatou au taeake ei puapinga no te taui anga i te akaraanga o te tuatua mou o etai o te aronga patoi. E akamanako ana i te akaraanga o tetai tangata e ko Opoku tona ingoa. Kua aravei atu tetai orometua painia takake iaia i roto i te angaanga koro e kua oronga atu i te makatini te Punanga Tiaki. E inangaro to Opoku i te kite no runga i tetai atikara i roto i te makatini inara kare ana moni. I te akatakaanga e kare e tiatiia, kua akaruke mai te painia i te makatini kiaia e kua akanoo e ka oki akaou mai. I te oki akaou mai anga i te atoro, kua ui atu a Opoku ki te painia: “Kua kite koe e koai au? Kua kite te maataanga o to kotou au tangata iaku i roto i te taoni o Harper. I tuaru ana au i ta kotou tamariki ki vao mei te apii!” Kua akataka mai i reira aia e i puapii maata ana aia no tetai apii teitei i roto i te taoni e kua takinokino ana aia i te tamariki a te Au Kite o Iehova no tei kore i taaki te rima ki te reva.
Inara, kua akatupu te au akaraanga e toru o te aroa Kerititiano tei akaariia e te Au Kite o Iehova i te makitoro marie akaou i tona tu. Te mea mua, kua kite aia i te Au Kite i te akonoanga i tetai taeake pae vaerua e kua maki kinoia. Kua akanoo katoa ratou kia rauka iaia i tetai rapakauanga i roto i tetai enua i te pae mai. Kua manako a Opoku e e “tangata maata” teia taeake tei makiia i rotopu i te Au Kite inara kua kite mai aia e e Kite noa ua aia. Te rua, i te au tuatau i te 1990, e tangata oro-kimiora a Opoku i roto ia Kotivua. I tetai ra kua kaki vai aia, e kua aere atu aia i te oko mai i te vai mei tetai tangata mapu. E tai ua a Opoku pepa moni maata e kare a te tangata mapu tieni nana ra, e no reira kua akatika ua aia ia Opoku i te apai i te vai e kare e tiati. Iaia e oake ra i te vai kia Opoku, kua ui atu te tangata mapu: “I toou manako e ka kite ainei tatou i tetai tuatau e me oronga te tangata mei ia koe e au i te apinga na tetai ki tetai e kare e patianga no te moni?” Kua tarotokaka mai a Opoku e koia tetai o te Au Kite o Iehova, e kua akapapu mai te tangata mapu e koia oki tetai. Kua umere tikai aia i te tu oronga ua e te takinga meitaki o teia taeake. I te openga iora, to te painia takake inangaro i te akatikaanga iaia kia apai i te makatini e kare e tiati kua akapapu a Opoku e kua tarevake tona manako i te Au Kite e te inangaroia ra aia kia taui. Kua teretere aia ki mua i te pae vaerua e i teia taime nei e papuritia kare i papetitoia ake.
Noatu e te aro tamou ua atu nei rai te au taeake i Riperia i te au turanga ngata tikai, te irinaki ra ratou ki te Atua e te akakitekite tiratiratu ra i te tuatua meitaki i tetai tuatau meitaki atu i raro ake i te tutara anga tika o to te Atua Patireia. Kare roa a Iehova e akangaropoina i ta ratou angaanga pakari e te aroa tei akaariia e ratou no tona ra ingoa.—Ebera 6:10.
[Au Mapu i te kapi 30]
(No runga i teia, akara i te puka)
MONROVIA
[Au Tutu i te kapi 31]
I te au tuatau o te turanga kino, kua oronga te iti tangata o Iehova i te tauturu i te pae vaerua e te pae kopapa ki te aronga tei anoano ra