Kua Raveia Ainei to te Atua ra Anoano?

“Kia tupu toou anoano mei to te rangi ra, ki runga katoa i te enua nei.”​—Mataio 6:10, NW.

KUA akara vinivini atu a Julio raua ko Christina i ta raua au tamariki toko a e ka ra i te ai. Kua akauia mai e tetai tangata kona kava to ratou motoka e paka ua ra, e kua ka i te ai. Ko te rima o te tamariki, ko Marcos, kua akaoraia mai mei te ai ka, inara kua pakapaka tona kopapa i te ai, i te takino takiri anga iaia. E iva ona mataiti. Kua ati te ngakau o tona metua tane. Kua akapumaana aia iaia uaorai e tona ngutuare tangata ma te au tuatua e: “To te Atua anoano teia, kia kite oki tatou i te reira, te meitaki, te kino, noatu etai atu.”

I te aro atu anga i te tupuanga tumatetenga mei teia rai, e manganui te ariu maira mei te reira rai. ‘Me e mana ririnui katoatoa to te Atua e te manako maira ia tatou,’ ta ratou e manako ra, ‘ko tei tupu ra penei e mea meitakiia no tatou i roto i etai tu, noatu e e ngata tikai te reira i te marama.’ Te akatika ra ainei koe?

Te manako e noatu eaa te ka tupu, te meitaki me kare te kino, te akakite maira i to te Atua anoano tei akatumu putuputuia ki runga i te au tuatua a Iesu ko tei kapikiia e ko te Pure a te Atu, tei taikuia i runga akenei. Kua raveia to te Atua anoano i te rangi, kare aina? I te pure anga e ‘Kia raveia toou anoano i te enua nei,’ kare ainei tatou i ariki ana e ko tei tupu i runga i te enua nei e ko to te Atua ia anoano?

E manganui te manako kore ra i teia manako. Kia ratou, te akatutu maira te reira i te Atua e kare e manako maira i te au manako ngakau o tana au tangata i angaia. ‘Akapeea ra tetai Atua aroa i inangaro ei i te mea rikarika ra no te au tangata apa kore ra?’ i ui ei ratou. ‘Me te inangaroia ra kia kite i tetai apiianga, eaa oki te reira apiianga?’ Penei te manako akapera ra koe.

No teia tu nei, kua tata mai to Iesu apa teina, ko te pipi ko Iakobo, e: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Kare ko te Atua te tumu no te kino. No reira, tei kiteaia, ko te au mea katoatoa te tupu ra i runga i te enua i teia tuatau kare e ko to te Atua ia anoano. Te tuatua katoa maira te au Tuatua Tapu i to te tangata anoano, te anoano o te pa enua, e pera katoa te anoano o te Tiaporo. (Ioane 1:13; 2 Timoteo 2:26; 1 Petero 4:3) Te akatika ra ainei koe e ko tei tupu ki te ngutuare o Julio raua ko Christina kare e ko te anoanoia o tetai Metua aroa i te rangi ra?

No reira, eaa i reira ta Iesu e akakite maira i te apii anga aia i tana au pipi kia pure e: ‘Kia raveia toou anoano’? E pati anga ainei ua te reira kia o mai te Atua i roto tikai i te au turanga, me kare te apii maira a Iesu ia tatou kia pure no tetai ua atu apinga puapinga maata e te meitaki, e taui anga ta te katoatoa e manakonako ra? Ka akara matatio ana tatou e eaa ta te Pipiria e karanga ra.

[Au Akameitakianga no te Tutu i te kapi 3]

Car: Dominique Faget-STF/AFP/Getty Images; child: FAO photo/B. Imevbore