Me Raveia to te Atua Anoano i te Enua Nei

I TE apii anga a Iesu i tana au pipi kia pure, “Kia tupu toou anoano mei to te rangi ra, ki runga katoa i te enua nei,” te tuatua ra aia mei tetai rai tei noo ana i te rangi ma te Metua. (Mataio 6:10, NW; Ioane 1:18; 3:13; 8:42) I mua ake i to Iesu riro anga mai ei tangata, kua kite aia i te tuatau te tupu mai anga te au mea ravarai i te rangi e i runga i te enua nei e te rotai ra ia ki to te Atua anoano. E tuatau mareka anga te reira no te akatupuanga e te akamerengoanga.​—Maseli 8:27-31.

Ko ta te Atua au mea anga muaia ko te au mea ora vaerua, “te au angela nana e, ko tei maata i te ririnui, e kua akono i tana akauenga.” Ko ratou e “au tavini nona ra, ko tei rave i tana i inangaro ra.” (Salamo 103:20, 21) E anoano ainei to ratou tataki tai no ratou uaorai? Ae, i mua ake ka angaia ai te enua, “kua maeva ua te au tamariki a te Atua i te rekareka.” (Iobu 38:7) Te akaata maira ta ratou maeva anga i to ratou uaorai rekareka i ta te Atua e akakoro ra, e kua akatika atu ratou i to ratou anoano ki tona.

I muri ake i te angaia anga te enua, kua akateateamamao te Atua i te reira ei ngai noo anga no te au tangata e i te openga iora kua angaia te tangata e te vaine mua. (Genese, pene 1) Ka tau katoa ainei teia no te rekareka? Te akakite maira te papaanga akauruia e: “Akara akera te Atua i te au mea katoa tana i anga, e i na, te meitaki roa ra,” ae, e apa kore, e tiama.​—Genese 1:31.

Eaa ra to te Atua anoano no to tatou nga metua mua e no ta raua anau? Kia tau kia Genese 1:28, e meitaki katoa tikai te reira: “E kua akameitaki atura te Atua ia raua, e kua tuatua maira te Atua kia raua, Kia anau korua, e kia maata roa, e e akaki i te enua nei, e e akavi; e kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.” Kia akatupu i taua akauenga umere, te anoanoia ra to tatou nga metua mua kia ora ua atu​—e tuatau ua atu​—e pera katoa ta raua anau. Kare e apinga i akakiteia mai e e tumatetenga, e tika kore, e mamae, me kore e mate.

Ko teia te tuatau i raveia ai to te Atua anoano i te rangi ra e i runga i te enua nei. Ko te aronga tei rave i tona anoano ka kite i te mareka anga maata i te rave anga i te reira. Eaa tei tarevake?

Ka tupu mai tetai akaaoanga tapapa koreia ki to te Atua anoano. Kare, kare te reira e pauia. Noatu rai, kua oronga mai te reira i te tuatau roa no te mamae e te mii te ka akatupu i te oripu maata no runga i to te Atua anoano no te tangata ravarai. No teianei kua riro tatou katoatoa ei aronga tamamaeia. Eaa ra taua akaaoanga?

To te Atua Anoano i Tetai Tuatau no te Meameaauanga

Ko tetai o te “au tamariki [vaerua] a te Atua” kua kite atu e ka rauka i te tamanamanataia atu to te Atua anoano no te tangata ra, ko tana parani koia oki kia rauka mai te au akameitaki anga kiaia uaorai. Te maata atu i te akamanako anga teia mea ora vaerua i te reira, te maata atura ia i te akara anga e rauka te reira e te reka maata atu angaia o te reira. (Iakobo 1:14, 15) Penei kua manako aia e me ka rauka iaia i te rave mai i nga tangata mua i te akarongo kiaia  kare ki te Atua ra, ka maroia i reira te Atua kia akakoromaki ua i tetai ngateitei patoi. Penei kua manako aia e kare te Atua e tamate ia raua, no te mea ka riro te reira e kua poka to te Atua ra akakoroanga. Mari ra, ka taui te Atua ko Iehova i tana akakoroanga, i te ariki anga i te taoonga o teia tamaiti vaerua ta Tona au tangata angaia ka akarongo atu i teianei. Ma te tau, kua tapaia taua meameaau i muri maira ko Satani, koia oki, “Tei Patoi.”​—Iobu 1:6.

E tau ei ki tona ra anoano, kua aravei atu a Satani i te vaine. Kua raurau aia iaia kia kopae i to te Atua anoano e kia takake ma te akono tau, i te tuatua anga e: “Kare rava korua e mate. . . . Ka riro korua mei te Atua ra te tu, i te kite i te meitaki e te kino.” (Genese 3:1-5) Ki te vaine ra, i te akaraanga i teia ko tetai apinga te ka oronga mai i te rangatira anga, e kua ariki aia i te reira e ko tetai mataara meitaki roa atu no te oraanga. I muri mai, kua akakeu aia i tana tane kia piri mai kiaia.​—Genese 3:6.

Kare e ko teia to te Atua anoano no nga tokorua. No raua te reira anoano. E ka apai mai te reira i te au tupuanga kikino. Kua akakite takere ana te Atua kia raua e ka taki atu taua aerenga ra ki to raua mate. (Genese 3:3) Kare raua i angaia kia puapinga tu takake ra mei te Atua. (Ieremia 10:23) Kapiti atu, ka riro mai raua ei apa ua, e ko te apa e te mate ka topa atu i teianei ki runga i ta raua anau. (Roma 5:12) Kare e rauka ia Satani i te akakore i teia au tupuanga.

Kua taui takiri ainei teia au tupuanga i ta te Atua akakoroanga, me kare i te anoano, no te tangata ravarai e te enua nei? Kare. (Isaia 55:9-11) Inara kua akatupu mai te reira i te au maro anga te anoanoia ra kia pauia: Ka rauka ainei i te tangata ravarai kia ‘riro mei te Atua ra te tu, i te kite i te meitaki e te kino,’ mei ta Satani i karanga ana? Koia oki, me orongaia te tuatau, ka rauka ainei ia tatou i te iki na tatou uaorai e eaa te tika e te tarevake, te meitaki e te kino, i roto i te au ngai katoatoa o te oraanga? Ka tau ainei i te Atua te akarongo tikai, e e meitaki roa atu tana mataara no te tutara anga? E tau ainei tona ra anoano no te akarongo ki katoa? Akapeea koe me pau?

Okotai ua mataara i te akanoo i teia au maro anga i mua i te au mata katoatoa o te au mea anga kite ra: E akatika i te aronga tei kimi i te akatakake anga kia tauta kia akariro i te reira ei puapinga anga. Te tamate ua anga ia raua kare e akanooia te au maro anga tei akatupuia mai. Te tuku anga i te au tangata kia aere ua atu no tetai tuatau e akanooia ai te au tumu no te mea ka kitenaia mai te au tupu anga. Kua akakite mai te Atua e ka rave aia i te au tumu na roto i teia mataara i tona akakite anga ki te vaine e ka anau aia i te tamariki. I akamata mai ei i reira tetai ngutuare tangata. Kia akameitakiia teia, i ora ai tatou i teia tuatau nei!​—Genese 3:16, 20.

Inara, kare te aite anga o teia, e ka akatika te Atua i te au tangata e te tamaiti vaerua meameaau kia rave pouroa i ta ratou e inangaro ra. Kare te Atua i kopae ke i tona ngateitei, kare katoa aia i akaruke i tana akakoroanga. (Salamo 83:18) Kua akamarama mai aia i teia na te akakite mai anga i te akapaii anga i te openga ra i tei akamata mai i te meameaau e te akakore anga i te au tupu anga kino katoatoa. (Genese 3:15) Mei te akamata anga, i reira, e taputou anga no te akamaru tei orongaia ki te ngutuare tangata.

I taua taime rai, kua akaatea mai to tatou nga metua mua ia raua uaorai e ta raua anau i te tuatau ki mua mei te tutara anga a te Atua. Kia arai katoatoa ai te Atua i te au tupuanga mii no ta raua ikianga te umuumuia ra e kia tuku atu aia i tona ra anoano ki runga ia ratou i te au ngai  ravarai. Kua aite te reira me kare te takake anga e akatikaia kia raveia.

E tikai, ka rauka i te aronga tataki tai i te iki i te tutara anga a te Atua. Ka kite ratou e eaa to te Atua anoano no te au tangata i teia tuatau e kia aru vaitata ua i te reira. (Salamo 143:10) Noatu rai, kare ratou i atea ke mai mei te au manamanata me ka vai pau koreia mai te maro anga no to te tangata takake ki katoa anga.

Kua kiteaia mai i te akamata anga te au tupu anga no te iki anga nana uaorai. Kua tamate te mataiapo o te ngutuare tangata, ko Kaina, i tona teina ko Abela no te mea “e tuatua kikino tana uaorai, e e tuatua-tika ta tona teina.” (1 Ioane 3:12) Kare e ko to te Atua anoano teia, no te mea kua akamatakiteia ana a Kaina e te Atua e i muri maira kua akautunga atu iaia. (Genese 4:3-12) Kua iki takake akono tau a Kaina i tei orongaia mai e Satani; no reira “no taua vaerua kino ra aia.” Kua pera katoa rai tetai papaki.

Kua tere atu i te 1,500 mataiti i roto i te tuatua enua o te tangata, “kua kino roa ra te enua i mua i te aroaro o te Atua; e kua ki te enua i te takinga-kino.” (Genese 6:11) Kua umuumuia te tuku anga tau kia akaoraia mai te enua mei te kino. Kua rave te Atua i tei tau ra na te apai mai anga i te tiruvi maata e te paruru anga i tetai ngutuare tangata tuatua tika tei ora ana—ko Noa, tana vaine, tana tamariki tamaroa, e ta ratou au vaine. (Genese 7:1) E uanga pouroa tatou na ratou.

Mei te tuatau o te tuatua enua, kua oronga mai te Atua i te arataki anga no te aronga tei inangaro tikai i te kite i tona anoano. Kua akauru aia i te au tangata tiratiratu kia tata i tana au akakiteanga no tetai ua atu tei akara kiaia no te arataki anga. Kua tataia teia au akakiteanga i roto i te Pipiria. (2 Timoteo 3:16) Kua akatika aroa aia i te au tangata akarongo kia tomo atu ki roto i tetai pirianga kiaia, pera katoa te riro mai anga ei au oa nona. (Isaia 41:8) E kua oronga mai aia kia ratou i te maroiroi ta ratou e anoano ra kia akakoromaki i raro ake i te au timataanga ngata ta te tangata ravarai e kite ra i teia au tuatau mareniamu no te takake anga. (Salamo 46:1; Philipi 4:13) Mei teaa ra to tatou mareka anga no teia pouroa!

‘Kia Raveia Toou Anoano’​—Ma te Ki Anga Pu Tikai

Ko ta te Atua i rave e tae mai ki teia tuatau kare ko te katoa angaia o tona anoano no te tangata ravarai. Kua tata te apotetoro Kerititiano ko Petero e: “Inara te vaira te au rangi ou e tetai enua ou ta tatou e tapapa atura i tau ki tana taputou, e i roto i teia te vaira te tuatua tika.” (2 Petero 3:13, NW) Te taiku ra teia tuatua akatutu ki tetai mana akatere anga ou i runga ake i te tangata ravarai e tetai taiate tangata ou i raro ake i taua kavamani ra.

Te taangaanga anga i te tuatua taka meitaki, kua tata te peroveta ko Daniela e: “E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu . . . e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Te akakite maira teia totou i te openga o te akatereanga o te au mea angaanga kore o teia tuatau e te monoia anga te reira e te Patireia, me kore te kavamani, a te Atua. E tuatua meitaki tikai teia! Te au kaitamaki e te tu karapii tei akaki i teianei ao ki te takinga kino e te akakoko akaou ra i te akakino i te enua ka ngaro ke atuia a tetai ra.

Aea teia au mea e tupu ei? Kua ui te au pipi a Iesu e: “Aea teia au mea nei, e eaa te akairo o toou ra parutia e te openga o te akatereanga o te au mea nei?” Ei tuanga no tana pau anga, kua tuatua a Iesu e: “E kia tutu aereia teia tuatua meitaki o te patireia ki te au enua tei tangataia ei kite ki te au pa enua ravarai; i reira e tae mai ei te openga.”​—Mataio 24:3, 14, NW.

E tumu anga te reira e te kiteaia nei e te raveia nei teia angaanga tutu anga i te ao katoa. Penei kua kite ana koe i te reira i roto i toou uaorai ngai noo anga. I roto i tana puka These Also Believe, kua tata te Poropeta ko Charles S. Braden e: “Kua tapoki katoaia te enua e te Au Kite o Iehova ma ta ratou akakitekite anga. . . . Kare tetai pupu akonoanga okotai i te ao nei i akakite kia maata atu te maroiroi e te rave tamou marieanga i te tauta anga kia akatotoa i te tuatua meitaki o te Patireia i ta te Au Kite o Iehova.” Te akakite maroiroi ra te Au Kite i teia  tuatua meitaki e tere atu i te 230 enua e vaitata rai e 400 reo. Ko teia angaanga tei totouia mai kare rava i akatupuia i mua ana i roto i te ao katoa. Ko te reira tetai o te au akapapu anga e manganui e te vaitata maira no taua Patireia ra i te mono i te au kavamani a te tangata.

Ko te Patireia ta Iesu i karanga mai e ka tutu aereia ko te reira tikai tana i apii mai kia pure tatou i roto i tana pure akaraanga: “Kia tae mai toou patireia. Kia tupu toou anoano mei to te rangi ra, ki runga katoa i te enua nei.” (Mataio 6:10, NW) Ae, ko taua Patireia te ravenga ta te Atua ka taangaanga i te akatupu i tana akakoroanga, tona anoano, no te tangata ravarai e no te enua nei.

Eaa te aiteanga no te reira? Na Apokalupo 21:3, 4 e pau mai: “Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” Ka tupu tikai i reira to te Atua ra anoano i runga i te enua nei e i to te rangi ra​—ma te ki anga pu tikai. * Ka inangaro ainei koe kia riro mai ei tuanga no te reira?

[Tataanga Rikiriki i Raro]

[Tutu i te kapi 5]

Te takake anga mei te anoano o te Atua ra te apai maira i te tumatetenga