Te Akakitekite Ua Anga i Roto i te Koro Tuatua Papaa i Meiko

TE AKONO meitaki anga i te tuatau iaia i te tiaki anga i tona au taeake teretere aere i Atene, kua piri atu te apotetoro ko Paulo ki roto i te akakitekite ua anga. Te ripoti maira te Pipiria e: “Kua māro atura aia . . . e i tana oki i aravei atu i te okoanga ra, kare e rā i vata.” (Angaanga 17:17) I tona teretere anga mei Iuda mai ki Galilea, kua akakitekite ua atu rai a Iesu ki te vaine Samaria i te pae i tetai ruavai. (Ioane 4:3-26) Te akono ra ainei koe ia koe uaorai i te au tuatau ravarai i te tuatua no runga i te evangeria o te Patireia o te Atua?

E meitaki tikai te koro tuatua Papaa i Meiko no te akakitekite ua anga. E atoro atu ana te au turoto i te au ngai orote, te aere maira e te aere atura te aronga apiipii i te apii teitei, e te aronga ke tei ritaea ki Meiko te aere ra ki te au paka e te au ngai kaikai anga. E manganui te Au Kite o Iehova tei kite i te reo Papaa kua tu katau i te akamataanga i te au pukapukaanga ki taua aronga ra. Ko te tika, te akara ra ratou kia tuatua ki tetai ua atu tangata te akaraanga no tetai enua ke mai me kare te tuatua Papaa ra. E akara ana tatou e akapeea ratou i te raveanga i te reira.

Te maata anga o te taime te aronga no tetai enua ke mai te tavini ra i roto i te koro o te Papaa e akaaravei ua ana ratou ia ratou uaorai ki taua aronga te akaraanga e no tetai enua ke mai e kua ui atu e e noea mai ratou. Kua tau teia i te taki atu ki te uianga e eaa ta te Kite angaanga i Meiko e te oronga ra i te tuatau nona i te akakite i te au irinakianga Kerititiano. Ei akaraanga, ko Gloria, te tavini ra i te ngai e umuumu maataia ra i roto i te koro o te Papaa i Oaxaca, te kite ra i te ngoie ua o te akamata i te pukapukaanga na taua mataara ra. I te oki anga mai ki te kainga mei te akakitekite ua anga i roto i te toa i te taoni, kua tapu mai nga tokorua no Engarani mai ia Gloria. Kua tuatua atu te vaine: “Kare au e irinaki ana e te kite nei au i tetai vaine kerekere e aere ra na runga i te mataara o Oaxaca!” Kare i riri ana, kua kata ua a Gloria, e kua akamata raua i te puka no runga i tana angaanga i Meiko e no teaa oki aia i Meiko? Kua pati atu te vaine ia Gloria ki tona kainga no tetai kapu kope. I muri ake i te akanooanga i tetai tuatau, kua oronga atu a Gloria i te au makatini Punanga Tiaki e te Awake!, inara kua patoi te vaine, i te akakite anga e e tangata irinaki kore aia i te Atua. Kua pau atu a Gloria e e reka ana aia i te tuatua ki te au tangata te irinaki kore ra i te Atua e kua inangaro i te kite i tona manako no runga i te atikara “Au Ngai Akamori​—Anoano Ainei Tatou Ia ratou?” Kua ariki te vaine, na te tuatua anga “Me ka rauka ia koe i te akakeu iaku, kua akatupu i reira tikai koe i tetai apinga umereia.” E manganui te au pukapukaanga reka tikai tei aru mai i te kapu kope. I muri akera kua akaruke te tokorua no Engarani, inara kua rave ua atu rai i te uriurianga na te mere electronic.

 Kua akapiri katoa atu a Gloria kia Saron, e vaine apiipii mei Washington, D.C. mai, tei Oaxaca aia i te raveanga i te angaanga oronga ua ki te au vaine no taua enua ra i te akaoti i tana pepa apii teitei. I muri ake i te akameitakianga ia Saron no tana angaanga meitaki, kua akataka atu a Gloria e no teaa ra aia i Meiko nei. Kua taki atu teia ki tetai pukapukaanga meitaki no runga i te Pipiria e eaa ta te Atua ka rave kare no te aronga putaua anake pera katoa ra no te katoatoa. Kua tuatua atu a Saron e mea kataanga i te mea e kare roa aia i tuatua ana ki te Au Kite i Marike, ko te tangata mua tana i aravei i Meiko koia oki ko tetai o te Au Kite o Iehova! Kua ariki a Saron i tetai apii Pipiria e kua akamata vave i te aere ki te au uipaanga Kerititiano.

E manganui te aronga no tetai enua ke mai tei neke ki te au ngai i taatai i Meiko, i te kimi anga i te au turanga parataito. Kua taangaanga a Laurel i teia i te akamata i te au pukapukaanga i Acapulco, i te ui anga ki te tangata e me kua aite atu a Acapulco ei parataito i to ratou ngai i aere mai ei e eaa ta ratou e reka ana i reira. I reira aia e akataka atu ei e kare e roa atu ana ka riro te enua katoa ei parataito. Kua taki atu teia ravenga ki tetai apii Pipiria ki tetai vaine tana i aravei no Kanata mai i roto i tetai opati e akono ana i te au animara. Penei ka puapingaia rai taua tu akaaraveianga ra ki te ngai e noo ana koe?

‘I Runga i te Mataara e te Au Arataa’

E putuputu ana te taime e akamataia ana te pukapukaanga i runga i te mataara e te au arataa na te uianga: “E tuatua papaa ana koe?” E manganui te au tangata Meiko e tuatua ana no ta ratou angaanga me kare i noo ana ratou ki Marike.

Kua aravei atu tetai nga tokorua Kite i tetai vaine pakari tei roto aia i tetai pereo e oparaia ra e tetai neti. Kua ui raua ki te vaine me e tuatua papaa ana aia. Kua pau mai aia e e tuatua ana aia no te mea kua roa te au mataiti iaia i te nooanga ki Marike. Kua ariki aia i Te Punanga Tiaki e te Awake!, e kare roa aia i tatau ana i mua ana, e kua oake aia i tona ingoa, ko Consuelo, e te atereti. I te aere atu anga ki te ngai nooanga, e a ra i muri mai, kua kite mai raua e e kainga akonokono ia, te akaaereia ra e te au paretenia Katorika. I te akamataanga e ngata i te aravei atu anga ia Consuelo, no te mea kua tarotokaka mai te au paretenia e kua karanga atu e kare e rauka ia Consuelo i te ariki atu ia raua. Kua raurau te nga tokorua i te au paretenia kia akakite kia Consuelo e te reira raua e te inangaro ra i te aravei iaia. Kua pati atu a Consuelo i te nga tokorua kia tomo mai ki roto. Mei reira mai, te rekareka ra teia vaine e 86 mataiti i tetai apii Pipiria te rave putuputuia ana, noatu te au tuatua taukore a te au paretenia. Kua aere katoa ana aia ki tetai o te au putuputuanga Kerititiano.

Te karanga ra a Maseli 1:20: “Te kapiki nui nei te pakari ki te ngai atea ra; te puroro maira tona reo ki te au arataa.” E akara ana i akapeea teia i te tupuanga i roto i te ngai maata i San Miguel de Allende. I tetai popongi maiata, kua aravei atu a Ralph i tetai tangata pakarikari te noo ra ki runga i tetai nooanga. Kua poitirere te tangata i te orongaia anga Te Punanga Tiaki e te Awake! e kua akakite kia Ralph i te tua o tona oraanga.

Koia tetai i vaeau ana i Vietenama e ko tei tupu no te kite anga i te maata o te au mate kua rokoia e te taitaia pakari rava i tona tuatau i te angaanga vaeau anga. Kua tukunaia mai aia mei mua mai i te ngai tamakianga ki te ngai akapuanga o te vaeau. I reira, kua tukunaia aia kia orei i te au kopapa mate o te au vaeau no te akapapaanga no to ratou tukunaia atu anga na runga i te pai ki Marike. I teianei, e 30 mataiti i muri mai, te mamae  nei rai aia ma te putuputu i te au moemoea kino e te au manako ngakau no te mataku vinivini. I taua popongi ra, i te nooanga ki runga i te arataa, te pure muteki ra aia no te tauturu.

Kua ariki teia tangata tei vaeau ana i te puka e pera katoa i tetai patianga ki te Are Uipaanga Patireia. I muri ake i te aere anga ki te uipaanga, kua karanga aia e i roto i taua nga ora e rua ra i te Are Uipaanga Patireia, tona kite mua anga i te au i roto i te 30 mataiti. Tei konei teia tangata i San Miguel de Allende no e rua nga epetoma ua, inara kua rekareka aia te au apii Pipiria e maata e kua aere atu ki te au putuputuanga pouroa e oki ua atu aia ki te kainga. Kua raveia te akanoonooanga kia rave ua atu ia tana apii.

Akakitekite Ua Anga ki te Ngai Angaanga e te Apii

Te akakite ra koe ia koe uaorai e e ko tetai o te Au Kite o Iehova i taau ngai angaanga? I akapera ana a Adrián, e okooko ana i te au apatimani orote i Cape San Lucas. Tei tupu mai, kua akakite mai tona taeake angaanga ko Judy: “E toru mataiti i topa akenei, naringa koe i akakite mai kiaku e ka riro mai au e ko tetai o te Au Kite o Iehova, kua karanga atu au: “Kare rava i roto i te mirioni mataiti!’ Inara kua iki au e kua inangaro au i te tatau i te Pipiria. Kua manako au, ‘Mei teaa tikai te aka angaanga i te reira, mei te mea ra e e reka ana au i te tatau?’ Inara, i toku manako kare i pou ana e ono kapi i muri mai i kite mai au e te umuumu ra au i te tauturuanga. Te tangata ua taku i manako mai e ko tetai taeake angaanga ko Adrián. E reka ana au i te tuatua kiaia no te mea koia ua te tangata akono tau tikai i reira.” Kua oronga viviki atu a Adrián kia aere mai ma tana vaine tapao, ko Katie, e kua pau pouroa i te au uianga a Judy. Kua akamata a Katie i tetai apii Pipiria kiaia, e kare i roa ana i muri mai kua riro mai a Judy ei Kite papetitoia.

Akapeea i te akakitekite ua anga i te apiipii? E rua nga Kite te apai ra i te apii i te reo Paniora i te apii maata inara kare i tae mai ana e tai ra no te mea kua aere ki tetai uruoaanga Kerititiano. I to raua oki anga mai ki te apii, kua patiia atu raua kia akakite mai i roto i te reo Paniora e eaa ta raua i rave ana. Kua akono meitaki raua i teia tuatau i rauka meitaki ia raua i te rave i roto i te reo Paniora i te oronga i tetai kite. Te puapii, ko Silvia, e inangaro tikai tona ki roto i te totou Pipiria. Kua ariki aia i tetai apii Pipiria i roto i te reo Papaa e i teianei e papuritia aia no te evangeria. E maata rai tona ngutuare tangata te apii katoa ra. Kua karanga a Silvia e: “Kua kite mai au i taku i kimi ua ana i toku oraanga katoa.” Ae, ka akatupu te akakitekite ua anga i te au ua meitaki.

Taangaanga Anga i Etai Au Tuatau

Ka taki atu te tu aroa ua i te oronga anga i te akakite anga. Kua kite mai a Jim raua ko Gail, te tavini ra i San Carlos, Sonora, i te tikaanga o te reira. Tetai vaine te akaaere ra i tana au puakaoa i te 6:00 a.m. kua tapu i te akarakara i tona aua. Kua pati atu a Jim raua ko Gail iaia kia aere mai ki roto kia kapu kope. Ko te taime mua i roto i te 60 mataiti, kua akarongo aia no runga ia Iehova e te manakonakoanga no te oraanga mutu kore. Kua akamataia tetai apii Pipiria.

Te akono katoa ra rai a Adrienne i te au manuiri ma te tu takinga aroa. Te kaikai ra a Adrienne i  tetai ngai kaikai anga i Cancún e i aravei mai ei tetai tamaiti mapu e kua ui mai me no Kanata mai aia. Iaia i te pauanga e no reira mai aia, kua akataka mai aia e te tauta ra aia e tona metua vaine i te tauturu i tona tuaine no tetai ripoti a te apii no runga i te aronga no Kanata mai. Kua aere mai, te metua vaine, e tuatua papaa ana. I muri ake i te pau maru anga i tana au uianga no runga i te aronga no Kanata mai, kua karanga atu a Adrienne: “Inara e tumu tikai toku i aere mai ei mei Kanata mai​—kia tauturu i te tangata kia kite no runga i te Pipiria. Ka inangaro ainei koe i te reira?” Kua pau mai te vaine e te inangaro ra aia. Kua akaruke aia i tana akonoanga e tai ngauru mataiti i mua atu e te tauta ra aia i te apii i te Pipiria koia anake ua. Kua oronga aia kia Adrienne i tona atereti e te numero terepaoni, e kua akamataia tetai apii Pipiria meitaki.

‘Titiri i Taau Kai ki Runga i te Vai’

Tuatua anga i te tuatua mou Pipiria i te au atianga rava rai kua akatupu putuputuia i te oronga anga i tetai akakite anga ki te au tangata e meangiti me kore e kare e tuatau i te akarongo anga i te karere o te Patireia. I roto i tetai ngai kaikai anga e putuputuia ana i te tangata i te aere ki te taoni uapu o Zihuatanejo, kua pati tetai Kite i nga tokorua no tetai enua ke mai kia noo ki tana kainga kai, no te mea kua ki te ngai kaikai anga. Kua teretere teia nga tokorua na runga i te poti mei tera ngai ki tera ngai e itu mataiti. Kua akakite mai raua i to raua manako ngakau taukore no runga i te Au Kite o Iehova. I muri ake i te aravei anga i roto i te ngai kaikai anga, kua atoro atu te Kite i nga tokorua ki runga i to raua poti e kua pati atu ia raua kia aere mai ki tona kainga. Kua ariki raua e tere atu i te 20 makatini e e rima puka e kua taputou kia aravei atu i te Au Kite i te ngai ka aru mai e ka tapu ei raua.

Kua kite atu a Jeff raua ko Deb i tetai ngutuare tangata ma tetai pepe tamaine manea i te ngai kaikaianga i roto i te ngai maata o te okookoanga i Cancún. I te oronga anga i te tuatua no runga i te pepe, kua pati mai te nga metua ia raua kia kapiti mai i te kai anga i te pizza. Kua kiteaia mai i te openga iora e no Initia mai teia ngutuare tangata. Kare roa raua i rongo ana i te Au Kite o Iehova, kare rai i kite ana i ta tatou au puka. Kua akaruke raua i te ngai maata o te okookoanga ma etai o te au puka Kite.

Kua aiteite tetai apinga i te tupuanga i runga i te airani i te pae taatai i Yucatán. Kua pati atu tetai tokorua Tinito koi akaipoipo ou ua akenei. Kua pati raua ia Jeff kia nenei i tetai tutu no raua, e kua mataora aia i te rave i te reira. Kua kite mai i reira aia e noatu e kua noo ana raua ki Marike e 12 mataiti te roa, kare roa raua i kite ana me kare i rongo ana i te Au Kite o Iehova! Kua aru mai tetai pukapukaanga mataora. Kua akamaroiroi atu a Jeff ia raua kia atoro atu i te Au Kite me oki atu raua ki te kainga.

Penei e atianga takake tetai i toou ngai e ka rauka te tuatau no te akakitekite ua anga. I te aere mai anga te peretiteni o Marike i te atoro i te peretiteni o Meiko i tana pama i te pae mai ia Guanajuato, kua aere mai te au tangata ripoti takapini i te ao katoa i te ripoti eaa tei tupu. Kua akono tetai ngutuare tangata e Kite ratou i te tuatau kia tutu aere i roto i te reo Papaa. E meitaki tikai te arikianga. Ei akaraanga, kua ripoti tetai tangata ripoti no runga i te au tamakianga e maata tikai, mei tei tupu i Kosovo e Kuaiti. Kua mate tetai taeake i roto i tona nga rima i muri ake i te puia mai anga e tetai tangata pupui. I te kiteanga no runga i te tuakaouanga, kua akameitaki te tangata ripoti i te Atua ma te taeanga i te roimata i roto i tona nga mata no te akakiteanga kiaia e e akakoroanga tetai no te oraanga. Kua karanga aia e noatu e kare aia e aravei akaou i nga tokorua e Kite raua, ka mou aia ki tona ngakau i teia nuti meitaki mei te Pipiria mai.

Te kiteaia mai nei, te tupuanga openga ra o taua akakitekiteanga kare e kitea putuputuia ana. Inara, kua tuatua te Ariki pakari ko Solomona e: “E titiri i taau kai ki runga i te vai; e manganui akera te ra i topa, rauka akaou atura ia koe.” Kua tuatua katoa aia: “Ei te popongi ka ruru ei i taau ua, e ei te aiai auraka e tapu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.” (Koheleta 11:1, 6) Ae, e akamaroiroi i te “titiri i taau kai” ki runga i te vai e “ruru i taau ua” ma te oronga ua, mei ia Paulo e Iesu rai e mei teia Au Kite o teia tuatau nei i roto i te koro e tuatua papaa ra i Meiko.