Te Complutensian Polyglot​—Tetai Apinga Urianga Tuatua Enua

VAITATA mei te 1455, e taui anga maata tetai i roto i te nenei anga i te Pipiria. Kua taangaanga a Johannes Gutenberg i tetai matini nenei ei maani anga i te Pipiria mua tei neneiia i te taangaanga anga i te taipe reta nekeneke ua. I te openga iora, kua matara mai te au tapeka anga i tapekaia ai te Pipiria ki te au pepa tata rima ia kare e rava ana. I te openga, e maata te au Pipiria i rauka i te maaniia e ma te tutaki anga meangiti ua. Kare i roa ana, kua riro mai te Pipiria ei puka tua atea maataia i te ao.

E reo Ratino ta Gutenberg Pipiria. Inara kare i roa ana kua kitea mai e te aronga apii i Europa e te inangaro ra ratou i tetai tataanga papu o te Pipiria i roto i to reira au reo mua​—te Epera e te Ereni. Kua manako te Ekaretia Katorika e ko te Vulgate Ratino te urianga ariki anake ra o te Pipiria, inara te vaira e rua nga manamanata maata. I te 16 anere mataiti, e maata te au tangata kare i kite i te reo Ratino. Pera katoa, no tetai tauatini mataiti, e maata te au tarevake a te tangata kopi tei kiteaia mai i roto i te tataanga Vulgate.

Kua inangaro te aronga uri e te aronga apii i tetai Pipiria i roto i te au reo mua, pera katoa tetai akatikatika anga i te urianga Ratino. I te 1502, kua iki te katinara ko Jiménez de Cisneros, e tangata pae vaerua e te akakitekite poritiki na Isabella I o Paniora, i te akareka i to ratou au anoano ma te puka okotai ua. Kua kiteaia mai i reira te apinga urianga tuatua enua ko te Complutensian Polyglot. Kua inangaro a Cisneros i te maani i tetai Polyglot, me kare e Pipiria i roto i te reo ke ke, te ki ra i te tataanga meitaki i roto i te reo Epera, Ereni, e te Ratino, pera katoa ko etai au tuanga ki roto i te reo Arama. Tei roto rai te nenei anga i tona akamata anga, no reira ka riro katoa teia ravenga ei tumu anga puapinga i roto i te akatupu anga o te nenei anga.

Kua akamata a Cisneros i tana angaanga maata na te oko mai anga i te au tataanga Epera taito, ko te manganui te vai ra i Paniora. Kua koi katoa mai aia i te au tataanga Ereni e te Ratino tuketuke. Ka oronga mai teia i te tumu anga no te tataanga Polyglot. Kua oronga atu a Cisneros i te akaputu anga tikai ki tetai pupu o te aronga apii tana i akapapa ana i te Apii Teitei akanoo ouia o Alcalá de Henares, i Paniora. Ko tetai i rotopu i te aronga apii i patiia kia tauturu mai ko Erasmus o Rotterdam, inara kare teia tangata kite tuatua i ariki mai ana i te patianga.

E tai ngauru mataiti te angaanga anga te aronga apii i te akaputu i te angaanga maata, e a mataiti i muri mai i raveia ai te nenei anga tikai. E maata te au manamanata kite, i te mea e kare a te aronga nenei reo Paniora taipe no te au font i roto i te reo Epera, te Ereni, me kare i te reo Arama. No reira, kua taangaanga a Cisneros i te au tauturu a tetai tangata nenei kikite, ko Arnaldo Guillermo Brocario, kia akapapa i te taipe no te au font i roto i teia au reo nei. I te openga iora, kua akamata te aronga nenei i te nenei anga i te 1514. E ono voriumu i oti i roto ia Tiurai 10, 1517, e a marama i mua ua ake te mateanga te katinara. Kua neneiia etai ono anere kopi no te angaanga tei oti, ma te tau kore i te tuatau tikai te taenga te Inikuiti Paniora ki tona take. *

 Akapapaanga o te Angaanga

Te au kapi ravarai o te Polyglot kua oronga mai i tetai akakiteanga puapinga maata. I roto i te au voriumu e a te aite ra ki te au Tuatua Tapu Epera, kua mama mai te tataanga o te Vulgate i rotopu i te kapi tataki tai; ko te tataanga Epera i akanooia i vao ake i te pa; e ko te tataanga Ereni, pera katoa ma tetai urianga interlinear i roto i te reo Ratino, tei roto i te pa. I roto i te au koromu, kua mama mai te au tumu o te au tuatua Epera e manganui. E i te tuanga i raro roa o te kapi tataki tai te aite ra ki te Penetatuku, kua kapiti katoa mai te aronga tata i te Targum of Onkelos (tetai tuatua akaou i te reo Arama o nga puka mua e rima o te Pipiria) kapiti atu ma tetai urianga Ratino.

Te voriumu rima o te Polyglot te vaira te au Tuatua Tapu Ereni i roto i nga pa e rua. Ko tetai te oronga maira i te tataanga Ereni, e ko tetai te aite ra ki te tataanga Ratino no roto mai i te Vulgate. Te pirianga i rotopu i te au tataanga i roto i nga reo kua akatumuia na roto i tetai au reta meangiti te taki atura i te tangata tatau ki te tuatua aiteite i roto i te pa tataki tai. Ko te tataanga Ereni Polyglot te akaputunga mua o te au Tuatua Tapu Ereni tei oti, me kare te “Koreromotu Ou,” tei neneiia, aru mai i muri poto ua ake ko te tataanga tei akapapaia e Erasmus.

Kua taangaanga matakite te aronga apii i te tatau e te akatano i te tataanga te rima o te voriumu e 50 ua au tarevake tei maaniia. No te akono matakite anga a teia aronga apii, kua akangateitei te aronga akaapa o teia tuatau i te reira ki te tataanga rongonui Ereni a Erasmus. Te au font Ereni manea kua aite ki te manea ua o te au tataanga mamaata taito. I roto i tana puka The Printing of Greek in the Fifteenth Century, te karanga ra a R. Proctor e: “Kia orongaia te ngateitei kia Paniora no te maani anga i tana taipe Ereni mua, kare ekokoanga e e fount Ereni meitaki roa atu tei maaniia.”

Te voriumu ono o te Polyglot te vaira te au tauturu tuketuke no te apii Pipiria: tetai tikitinari Epera e te Arama, ko tetai urianga no te Ereni, Epera, e te au ingoa Arama, tetai karama Epera, e tetai papaanga Ratino no te tikitinari. Kare i te mea poitirere, kua akapaapaaia te Complutensian Polyglot ei “apinga akakiteanga ki te ravenga no te typograph e ki te taineti Tuatua Tapu.”

To Cisneros akakoroanga no teia angaanga “kia akaora mai i te apiianga o te au tuatua tapu tei vai akaangaroi ana,” inara kare aia e inangaro kia orongaia te Pipiria ki te tangata katoatoa. Kua manako aia e “kia uuna mamao meitakiia te Tuatua a te Atua mei te itae anga a te tangata noa ua.” Kua irinaki katoa aia e “kia kotingaia te au Tuatua Tapu ki te au reo taito e toru tei akatikaia mai e te Atua ki runga i te tataanga tei tataia i runga ake i te upoko o tana Tamaiti i tamateia.” * No teia tumu nei, kare te Complutensian Polyglot i kapiti mai ana i tetai ua atu urianga i roto i te reo Paniora.

Patoi te Vulgate i te Au Reo Mua

Te tu tikai o te Polyglot kua oronga mai i etai au manamanata i rotopu i te aronga apii tei piri mai. Kua tukunaia te tangata apii Paniora rongonui ko Antonio de Nebrija * ei akaaere i te uri akaou anga i te tataanga o te Vulgate te ka mama mai i roto i te Pipiria Polyglot. Noatu  e kua manako te Ekaretia Katorika i ta Jerome Vulgate ko te urianga mana anake ra, kua kite a Nebrija e te anoanoia ra kia akaaiteia te Vulgate ki te au tataanga Epera mua, te Arama, e te Ereni. Kua inangaro aia i te akatano i te au tarevake tei kiteaia tei aere mai i roto i te au kopi e vai ua ra o te Vulgate.

Ei akapapu i tetai au tarevake i rotopu i te Vulgate e te au reo mua, kua raurau atura a Nebrija ia Cisneros: “E akakaka maata akaou mai i nga mori e rua kare i tutungiia o to tatou akonoanga, te au reo Epera e te Ereni. E tutaki i te aronga tei oronga mai ia ratou uaorai ki teia angaanga nei.” E kua rave katoa aia i te manako te aru maira: “I te tuatau tataki tai te mama maira tetai tuke anga i roto i te au tataanga Ratino o te Koreromotu Ou, penei kia oki akaou tatou ki te au tataanga Ereni. I te au taime ravarai te vaira tetai manamanata i rotopu i te au tataanga Ratino tuketuke me kore i rotopu i te au tataanga Ratino e te Ereni o te Koreromotu Taito, penei kia kimi tatou i te tika anga i roto i te tumu Epera tikai.”

Akapeea a Cisneros i te ariu atu anga? I roto i tana tuatua ki te Pipiria Polyglot, kare a Cisneros i ekoko ana i te akakite mai i tona manako. “Kua tuku matou i te urianga Ratino a Jerome i akameitakiia i rotopu i ta te Tunako [te tataanga Epera] e i ta te Ekaretia Orieni [te tataanga Ereni], mei nga keia rai i tariia, e tai i tetai tua ia Iesu e tai i tetai tua, tei komono i te aronga Roma, me kare i te Ekaretia Ratino.” No reira, kare a Cisneros i akatika ana ia Nebrija kia akatano i te Vulgate Ratino kia tau ki te tataanga o te au reo mua. I te openga iora, kua iki a Nebrija i te akaruke i te angaanga kare i tuku atu i tona ingoa ki te uri akaou anga kare e tano ana.

Comma Johanneum

Noatu e kua riro te Pipiria Polyglot a Alcalá de Henares ei takainga maata ki mua i roto i te maani anga i tetai tataanga tamaia i roto i te au reo mua o te Pipiria, kua autu te peu i te atianga ki rungao ake i te tu apii anga. Kua mou ngateiteiia te Vulgate e kua manako te aronga tata i te au atianga e manganui kia akatano i te tataanga Ereni o te “Koreromotu Ou” kia akapapuia e te aite ra te reira ki te Ratino kare na tetai ake mataara. Ko tetai o teia au akaraanga koia oki ko te tataanga pikikaa rongonui tei kiteaia ko te comma Johanneum. * Ko te au tataanga Ereni mua kare teia tuatua i vai ana, i te akaraanga kua tukunaia atu i te au anere mataiti e manganui i muri ake i te tata anga a Ioane i tana reta; kare te reira i mama mai ana i roto i te au tataanga Ratino taito o te Vulgate. No reira kua akaatea a Erasmus i teia tauianga i roto i tana “Koreromotu Ou” Ereni.

Kare te aronga tata o te Polyglot i inangaro ana i te akaateaia mai mei tetai irava tei riro  mai ei tuanga no te tataanga peu a te Vulgate no te au anere mataiti. No reira, kua mou ua atu ratou i te tataanga pikikaa i roto i te Ratino i te iki anga kia uri i te reira e te tauru atu i te reira ki roto i te tataanga Ereni kia rotai oki nga pa e rua.

Tetai Tumu Anga no te Au Urianga Pipiria Ou

Te puapinga o te Complutensian Polyglot kare i vai ua ana ki runga i te tika e te vaira i roto i te reira te tataanga nenei mua o te katoaanga o te au Tuatua Tapu Ereni ki to te Septuagint. Mei ta Erasmus “Koreromotu Ou” tei riro mai ei Tataanga tei Rauka o te au Tuatua Tapu Ereni (te tumuanga no te au urianga e manganui i roto i tetai ua atu au reo), kua oronga mai te tataanga Epera o te Polyglot i tetai tataanga maata no te au Tuatua Tapu Epera e te Arama. * Kua taangaanga a William Tyndale i teia Polyglot ei tumuanga no te tataanga Epera no tana urianga o te Pipiria i roto i te reo Papaa.

No reira, te angaanga a te pupu o te aronga apii tei nenei i te Complutensian Polyglot kua oronga tikai mai i te tere anga ki mua o te apiianga Tuatua Tapu. Kua neneiia mai te puka i te tuatau te tupu maira te inangaro anga i roto i te Pipiria i roto ia Europa e kua akamata i te akamaroiroi i te urianga o te reira ki roto i te reo matauia e te au tangata. Kua riro mai te Polyglot ko tetai kapiti anga maata i roto i te au takainga te oronga atura ki te tama anga e te akaoraanga o te tataanga Ereni e te Epera. Te rotai katoatoa ra teia ki te akakoroanga tu-Atua e ko te tuatua tamaia a Iehova, ‘e tu ïa e rimua te tuatua a to tatou Atua.’​—Salamo 18:30; Isaia 40:8; 1 Petero 1:25.

[Au Tataanga Rikiriki i Raro]

[Tutu i te kapi 29]

Cardinal Jiménez de Cisneros

[Akameitakianga]

Biblioteca Histórica. Universidad Complutense de Madrid

[Tutu i te kapi 30]

Antonio de Nebrija

[Akameitakianga]

Biblioteca Histórica. Universidad Complutense de Madrid

[Akameitakianga no te Tutu i te kapi 28]

Biblioteca Histórica. Universidad Complutense de Madrid