Papaanga no Tetai Oraanga Roa e te Mataora

“TE INANGARO ra te katoatoa kia pakari atu; inara kare tetai tangata e inangaro kia pakari ratou.” I akapera ei te tuatuaanga. E manganui te tangata te aere atura ki te mataiti ritaea te akara ra ki mua e ka maata atu te taime e ka meangiti mai te au apainga. Inara, te mataku ra ratou e ka riro mai e kare e akakoroanga e te puapinga kore. Te mataku katoa ra ratou i te akatakakeanga, te mataora kore, e te akaparuparuanga o te oraanga kopapa.

Eaa, i reira, te taviri no tetai oraanga mataora? Ka tauturu te au taeake meitaki e te ngutuare tangata aroa i te apai mai te mataora ki te mapu e te pakari katoa. Inara ko te oronga anga a tetai ke ki te oraanga o tetai tangata ruaine kare ko te reira te mea puapinga maata. Ko te mea puapinga maata atu koia oki eaa ta te tangata pakari ka rave no tetai ke.

Kua kiteia mai i tetai apii e roa te tuatau o te 423 tokorua ruaine e “i te oronga anga ki te oraanga o tetai aronga ke penei ka tauturu i te akaroa i to tatou uaorai au oraanga.” Kua akataka mai, a Stephanie Brown, tei akaaere i te apii, e: “Te akakite maira teia au kiteanga e kare ko ta tatou ka rauka mai mei te au pirianga te akariro ra i te araveianga ki tetai ke ei mea puapinga; ko ta tatou ra ka oake.” Penei ka kapiti mai taua oronga anga i te tauturu anga i tetai ke i te tama are, akonoanga i te tamariki, oro anga i te rave i te au apinga nana, oronga anga i te apinga akaoro, me kore akarongo anga ki tetai tangata te inangaro ra i te tuatua.

Mei tetai 2,000 mataiti i topa akenei, kua karanga a Iesu: “E maata atu te mataora o te orongaanga i to te rave mai.” (Angaanga 20:35) Kare te papaanga no te oraanga roa e te mataora e tei runga i te aka moni i roto i te pangika me kore i te au rapakau kia kore e pakari atu e te au papaanga kai. Mari ra, kia vai maroiroi e te oronga anga i tona tuatau, te ririnui, e te maroiroi i te akapuapinga i te oraanga o tetai ke.

Kareka ra, e maata atu te ka inangaroia e i te oronga ua anga kia akaora ia tatou mei te ruaine anga, te maki, e te mate. Ko te Patireia o te Atua anake te ka takore i taua au apinga ra. I raro ake i ta te reira tutaraanga, ka kore te maki e pera katoa “e kore rava te mate.” (Apokalupo 21:3, 4; Isaia 33:24) Ko te tika, ka noo te au tangata akarongo ra e tuatau ua atu ma te mataora i runga i tetai enua parataito. (Luka 23:43) Te mataora ra te Au Kite o Iehova i te oronga ki tetai ke i teia papaanga akatumuia ki runga i te Pipiria no tetai oraanga roa e te mataora.