Akameitakiia te Aronga tei Oronga i te Kaka ki te Atua

“E ka tupou ratou ki mua ia koe, E Iehova, e ka oronga i te kaka ki toou ingoa ra.”​—SALAMO 86:9, NW.

1. Eaa ra i rauka ai ia tatou i te apai mai i te kaka ki te Atua na roto i te au mataara te tere maata atura i ta te au mea ora kore ka rauka i te rave?

TE TAU ra a Iehova no te akapaapaa anga mei tana au mea i anga ravarai. Koi apai muteki ua maira tana au mea anga ora kore i te kaka kiaia ra, tei ia tatou tangata nei te kite i te uriuri anga, te marama anga, te ariki anga, e te akamori anga. Kia tatou nei, i reira, i tuatua mai ei te tata taramo e: “E maeva i te rekareka i te Atua, e te pa enua katoa e; E imene ei akakakā i tona ingoa: e akariro i tona kakā ei akapaapaa anga iaia.”​—Salamo 66:1, 2.

2. Koai ma tei ariu mai ki te akauenga kia oronga i te kaka ki te ingoa o te Atua, e no teaa ra?

² Te maataanga o te tangata ravarai kua kopae i te akakite i te Atua me kare i te oronga i te kaka kiaia. Inara, i roto i te au enua e 235, tere atu ki te ono mirioni o te Au Kite o Iehova te akaari maira e te kite ra ratou i ta te Atua ‘au mea tei kore e tau kia akara ra’ na roto i te au mea tana i maani e kua “kitea” e ratou te kite muteki o te au mea angaia ra. (Roma 1:20; Salamo 19:2, 3) Na te apii anga i te Pipiria, kua rauka katoa ia ratou i te kite e i te aroa ia Iehova. Kua totou mai a Salamo 86:9, 10 e: “Te au pa enua ravarai taau i maani ra ka aere mai ratou, e ka tupou ratou ki mua ia koe, E Iehova, e ka oronga i te kaka ki toou ingoa ra. No te mea e maata koe e te rave ra i te au mea vavaria; ko koe te Atua, ko koe anake ra.” (NW)

3. Akapeea te “aronga maata rava” i te oronga anga i te ‘akamori i te po e te ao’?

³ Kua akataka aiteite mai a Apokalupo 7:9, 15 i te “aronga maata rava” o te aronga tei “akamori [i te Atua] i te po e te ao i tona nao.” Kare te Atua e maro tikai maira i te akapaapaa anga akamutu kore mei tona au tavini, kareka ra e akaaerenga takapini i te ao tona aronga akamori. No reira me e po i roto i etai au enua, ko te au tavini a te Atua i tetai mai tua o te ao te angaanga maata ra i te akakitekite aere. No reira ka rauka i te karangaia e kare te ra e opu ana ki runga i te aronga te apai maira i te kaka kia Iehova. Kare e roa atu ana “ko tei uti i te aʼo” ka maeva maata i to ratou reo i te akapaapaa anga ia Iehova. (Salamo 150:6) Inara, i taua taime rai, eaa ta tatou tataki tai ka rave i te oronga anga i te kaka ki te Atua? Eaa te au akaaoanga  ta tatou ka aro atu? E eaa te au akameitakianga ta te aronga tei oronga i te kaka ki te Atua e tatari ra? Na roto i te pauanga, ka akamanako ana tatou i tetai papaanga Pipiria no runga i te kopu tangata Iseraela o Gada.

Tetai Akaaoanga Taito

4. Eaa te akaaoanga ta te kopu tangata o Gada i aro atu?

⁴ I mua ake ka tomo atu ei ki roto i te Enua Taputouia, kua pati atu te au mema o te kopu tangata Iseraela o Gada e kia akatikaia ratou kia noo i roto i te enua ki i te puakatoro i te tua itinga ia Ioridana. (Numero 32:1-5) E noo ei ki reira ko te aite anga kia autu i te au akaaoanga pakari. Te kopu tangata i te tua opunga kua rauka te paruruanga o te O o Ioridana​—e arai anga natura ki te tomo anga vaeau. (Iosua 3:13-17) Inara, no runga i te au enua i te itinga o Ioridana ra, te karanga ra The Historical Geography of the Holy Land, na George Adam Smith, e: “E paraa e te atea [te reira], vaitata rai e kare e arairai anga i o mai, i runga i te ngai titika maata o Arapia. No reira kua akatuera pouroa ia te reira ki te tomoanga a te aronga ori aere ua te pongi ra, ko etai ia ratou kua tomo mai ki roto i te reira i te au mataiti ravarai no te ngangaere.”

5. Akapeea a Iakoba i te akamaroiroi anga i te uanga o Gada kia ariu atu me tamakiia mai?

⁵ Akapeea te kopu tangata o Gada i te autu anga i raro ake i taua taomi anga tapupu kore ra? I te anere mataiti i mua atu, i roto i tana totou i runga i te roi mate, kua akakite atura to ratou ui tupuna ko Iakoba e: “Ko Gada ra, ka eke aia i tetai takanava: ka eke ra ratou iaia i muri ake.” (Genese 49:19) I te akaraanga mua penei e akara anga taitaia taua au tuatua. Te tikaanga, inara, kua riro te reira ei akauenga no te ngati Gada kia tamaki atu. Kua akapapu atura a Iakoba kia ratou e me ka tamaki atu ratou, ka akaruke taakamaia te aronga takanava, ma te ngati Gada e arumaki atura na muri atu ia ratou.

Au Akaaoanga ki ta Tatou Akamori Anga i Teia Tuatau

6, 7. Akapeea te turanga o te au Kerititiano i teia tuatau i aite ei ki to te kopu tangata o Gada?

⁶ Mei te kopu tangata o Gada, kua vai akatueraia te au Kerititiano i teia tuatau ki te au taomianga e te au akateiaa anga o ta Satani akatereanga; kare e paruruanga temeio i akaora mai ia tatou mei te kukumi anga ma ratou. (Iobu 1:10-12) E manganui ia tatou te autu ra i te au taomianga no te aere anga ki te apii, te rave angaanga no te oraanga, e te utuutu anga i te tamariki. Auraka e ngaropoina i te au taomianga no tetai tu noou uaorai me kare no roto roa mai. E mea tau kia akakoromaki etai i ‘tetai tara i roto i te kopapa’ na roto i te tu o tetai akangoru anga kino me kare i te maki. (2 Korinetia 12:7-10) Kua akakinoia tetai uaorai ma te au manako puapinga kore. Penei ka arai “te au rā kino ra” o te mataiti ruaine i te au Kerititiano pakarikari i te tavini anga ia Iehova ma te maroiroi tei rauka ana ia ratou.​—Koheleta 12:1.

⁷ Te akamaara katoa maira te apotetoro ko Paulo kia tatou e “e kukumianga ta tatou . . . ki te  au vaerua ririnui kino i te au ngai o te rangi.” (Ephesia 6:12, NW) Te vai tuera putuputu ua nei tatou ki ‘te vaerua o teianei ao,’ te vaerua no te meameaau e te tu akono viivii ta Satani e tana au temoni e akamaroiroi maira. (1 Korinetia 2:12; Ephesia 2:2, 3) Mei ia Lota tei mataku i te Atua, penei te taitaia ra tatou i teia tuatau no te au mea tau kore ta te au tangata takapini ia tatou e tuatua ra e e rave ra. (2 Petero 2:7) Te vai tuera katoa ua nei tatou ki ta Satani akakinoanga. Te rave nei a Satani i te tamaki i te toenga o te aronga akatainuia, “tei mou marie i te tuatua-akakite a [“te Atua,” NW] ra.” (Apokalupo 12:17) Te kite katoa ra ta Iesu “mamoe ke atu” i ta Satani akakino anga i roto i te tu o te au arai anga e te au takinga kino.​—Ioane 10:16.

Ka Tuku ua me ka Tamaki Atu?

8. Akapeea tatou i te ariu anga atu ki te au akakinoanga a Satani, e no teaa ra?

⁸ Eaa tikai to tatou tu me ariu atu ki ta Satani akakinoanga? Mei te kopu tangata taito o Gada, e mea tau kia maroiroi tatou i te pae vaerua e kia tamaki atu, kia tau ki te au arataki anga a te Atua. Ma te mii, kua akamata etai i te topa atu ki raro ake i te au taomianga o te oraanga, na te akangaropoina anga i ta ratou au apainga i te pae vaerua. (Mataio 13:20-22) Kua karanga tetai Kite no teia nei e eaa ra i meangiti mai ei te aronga te aere ra ki te uipaanga i roto i tona putuputuanga: “Te roiroi ua atura te au taeake. Kua taitaia pouroa ratou.” E tikai, e manganui te au tumu i roiroi ei te au tangata i teia tuatau. No reira, e mea ngoie ua i te akamanako i ta te Atua akamori anga ei taomi anga ke, ei apainga teiaa tikai. Inara e mea tau​—tikai ainei​—taua manako ra?

9. Akapeea te rave anga i ta Karaiti amo te taki atura ki te akaangaroi anga?

⁹ E akamanako ana i ta Iesu i tuatua ana ki te urupu i tona tuatau tei akataitaia katoaia e te au taomianga o te oraanga: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.” Te karanga ra ainei a Iesu e ka aere mai taua akaangaroi na te akameangiti mai anga i ta tetai tavini anga ki te Atua? Ei tuke anga, kua tuatua a Iesu e: “Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.” Ko tetai amo ra e rakau me kare e auri ia te tuku ra i tetai tangata me kore i tetai manu kia apai i te au apinga teiaa. Eaa, i reira, tetai tangata ka inangaro ei i te apai i taua amo ra? Kare ainei e kua “teiaa [takereia tatou] i te apainga” ra? Ae, inara mei ta te irava Ereni e akakite katoa maira e: “Aere mai kiaku ra i raro ake i taku amo.” E akamanako ana: te oronga maira a Iesu i te tauturu ia tatou i te puto i ta tatou apainga! Kare tatou e rave i te reira i roto i to tatou uaorai maroiroi.​—Mataio 9:36; 11:28, 29, tataanga i raro ake, NW; 2 Korinetia 4:7.

10. Eaa te ka tupu mai mei ta tatou au tauta anga kia oronga i te kaka ki te Atua?

¹⁰ Me apai tatou i te amo no te riro anga ei pipi, te patoi ra tatou ia Satani. “E patoi atu i te diabolo, e nana e rere ke atu,” i taputou mai ei a Iakobo 4:7. Kare teia e karanga ra e na te rave anga i te reira e mea ngoie ua. Te tavini anga i te Atua te umuumu maata ia ra te tauta anga pakari. (Luka 13:24) Inara te oronga maira te Pipiria i teia taputou i roto ia Salamo 126:5: “Ko tei ruru ma te roimata ra, ka kokoti ïa ma te rekareka.” Ae, kare tatou e akamori ra i tetai Atua akameitaki kore. Koia “tei tutaki mai i te aronga i kimi tikai iaia,” e te akameitaki ra aia i te aronga tei oronga ra i te kaka kiaia.​—Ebera 11:6.

Akakaka Anga i te Atua ei Aronga Tutu Patireia

11. Akapeea te angaanga koro i riro ei ei paruru anga i te patoi atu i te au akakinoanga a Satani?

¹¹ Kua akaue a Iesu e: “E teianei, ka aere kotou, e akariro i to te pa enua katoa ei pipi.” Ko te angaanga tutu anga te mataara maata i te oronga ki te Atua “te atinga ra, i te akameitaki.” (Mataio 28:19; Ebera 13:15) Te rauka anga i “to [tatou] au vaevae te akatamaka angaia i te apinga o te tuatua meitaki o te au” ko tetai katoaia tuanga o to tatou “paruru umauma katoa”​—ta tatou paruru anga i te patoi i te au akakinoanga a Satani. (Ephesia 6:11-15, NW) Te akapaapaa anga i te Atua i roto i te angaanga koro ko tetai mataara meitakiia kia akamatutu i to tatou akarongo. (2 Korinetia 4:13) Te tauturu ra te reira ia tatou kia akaruke tatou i te au manako papu kore. (Philipi 4:8) Te piri anga ki roto i te angaanga koro te akatika ra ia tatou kia rekareka i te taokotaianga akamaroiroi ma te au taeake akamori.

12, 13. Akapeea te piri putuputu anga ki roto i te angaanga koro e puapingaia ai te au ngutuare tangata ra? E akatutu mai.

 ¹² Ka riro katoa te angaanga tutu anga ei angaanga tau no te ngutuare tangata. Kia papu, te anoanoia ra e te aronga ou te tamataora anga tau. Inara, te tuatau e akapouia ra ei ngutuare tangata i roto i te angaanga koro kare e riro mai ei mea reka kore. Ka rauka i te au metua i te akariro i te reira ei mea rekareka maata na te tereni anga i ta ratou tamariki kia meitaki tikai i roro i te angaanga orometua. Kare ainei e te reka ra te aronga ou i te au mea te rave meitaki ra ratou? Te akaari anga i te tu tau, kare e maro maata atura i te aronga ou ki to ratou au kotinga anga, ka rauka i te au metua i te tauturu ia ratou kia rekareka i roto i te angaanga orometua.​—Genese 33:13, 14.

¹³ Kapiti atu, ko tetai ngutuare tangata te akapaapaa taokotai ra i te Atua te akatupu ra i te au pirianga vaitata. E akamanako ana i tetai tuaine tei akarukenaia mai e tana tane irinaki kore e kua akarukenaia ma te tamariki tokorima ra. Kua aro atu aia i reira i te akaaoanga no te aere anga atu ki roto i te angaanga e te oronga anga i te apinga materia na tana tamariki. Kua roiroi ainei aia e kua kopae aia i te au inangaro pae vaerua a tana tamariki ra? Te maara ra iaia e: “Kua apii meitaki au i te Pipiria e te au puka Pipiria e kua tauta i te akono i taku i tatau. Kua apai au i te tamariki ki te au uipaanga e ki te angaanga orometua ki tera ngutupa ki tera ngutupa i te au taime ravarai. Tei tupu no taku au tauta anga? Kua papetito pouroa ia te tamariki tokorima ra.” Ka tauturu katoa te piri anga ki katoa i roto i te angaanga orometua ia koe i roto i taau au tauta anga kia utuutu i taau tamariki “i te ako anga e te akatikatikaanga manako a Iehova.”​—Ephesia 6:4, NW.

14. (a) Akapeea te aronga ou i te oronga anga i te kaka ki te Atua i te apii? (e) Eaa te ka rauka i te tauturu i te au mapu kia kore e “akama i te evangelia”?

¹⁴ E te aronga ou e, me te noo ra koe i roto i tetai enua te akatikaia ra te reira e te ture, te oronga ra ainei koe i te kaka ki te Atua na te akakitekiteanga i te apii, me kare te tuku ra koe i te mataku i te tangata kia tapu ia koe? (Maseli 29:25) Kua tata mai tetai Kite e 13 mataiti i Pueto Riko e: “Kare roa au i akama ana i te tutu aere i te apii no te mea kua kite au e ko teia te tuatua mou. I roto i te apii e tuku ua ana au i toku rima ki runga e te akakite anga i taku i kite mei roto mai i te Pipiria. Me ka va mai tetai tuatau noku, kua aere au ki te are vairanga puka e kua tatau i te puka Young People Ask.” * Kua akameitaki ainei a Iehova i tana au tauta anga? Kua ripoti mai aia: “I tetai taime ka ui mai toku au oa apii i te au uianga kiaku e pera katoa ka pati mai i tetai kopi o te puka.” Me te tapupu ra koe no runga i teia, penei ua ake te anoanoia ra koe kia akapapu kia koe uaorai “i to te Atua ra anoano, tei meitaki, e te tau, e te apa kore oki” na te apii meitaki naau uaorai. (Roma 12:2) Me kua irinaki koe i taau i apii ana e ko te tuatua mou, kare roa koe e “akama i te evangelia.”​—Roma 1:16.

Tetai “Ngutupa Maata” o te Angaanga

15, 16. Eaa te “ngutupa maata te taki atura ki te angaanga” ta etai au Kerititiano i tomo atu ki roto, e eaa te au akameitaki anga tei tupu mai?

¹⁵ Kua tata mai te apotetoro ko Paulo e ko taua “ngutupa maata te taki atura ki te angaanga” kua akatueraia mai kiaia. (1 Korinetia 16:9, NW) Te akatika ra ainei toou au turanga kia tomo atu koe ki roto i tetai ngutupa no te angaanga ra? Te piri anga ki roto i te painia tamou me kare i te angaanga painia tauturu, ei akaraanga, te kapiti maira i te oronga anga e 70 me kore e 50 ora i te marama ki te angaanga tutu anga. Tei matauia, te ariki rekarekaia ra te au painia e te au taeake Kerititiano no ta ratou angaanga tiratiratu. Inara no te tikaanga e kua akapou maata atu ratou i te tuatau i roto i te angaanga orometua kare te reira i akariro ia ratou kia akateitei atu i to ratou au taeake e i te  au tuaine. Mari ra, te tatanu ra ratou i te tu tei akamaroiroiia mai e Iesu e: “E au tavini puapinga kore matou nei: ko tei tau tikai ia matou ra, ko ta matou ïa i rave io nei.”​—Luka 17:10.

¹⁶ Te painia anga te umuumuia ra te ako ia koe uaorai, te akatereanga ia koe uaorai, e te rave anga i te au atinga puareinga ua. Inara, te au akameitaki anga, e meitaki tikai te reira. “Te rauka anga i te akono meitaki anga i te Tuatua a te Atua e akameitaki anga tika tikai te reira,” i karanga ai tetai painia mapu ko Tamika te ingoa. “Me painia koe, ka taangaanga putuputu koe i te Pipiria. I teianei me aere au mei tera ngutupa ki tera ngutupa, ka rauka iaku i te akamanako i te au irava te tau ra no te tangata ngutuare taki tai.” (2 Timoteo 2:15) I karanga mai ei tetai painia ko Mica te ingoa: “I te kite anga e i akapeea te tuatua mou i te akakeu anga i te oraanga o te tangata ko tetai akameitaki anga umereia.” Ko tetai mapu ko Matthew te ingoa te tuatua ua maira i te rekareka i te “kite anga i tetai tangata i te aere mai anga ki roto i te tuatua mou. Kare e rauka i tetai ua atu tu o te rekareka i te mono i teia.”

17. Akapeea tetai Kerititiano i te autu anga i te au manako ngakau papu kore no runga i te painia?

¹⁷ Ka rauka ainei ia koe i te akamanako kia piri atu ki roto i te painia anga? Penei te inangaro ra koe i te rave i te reira inara te manako ra e kare e tau ana. “E au manako ngakau papu kore toku no runga i te painia,” i akakite mai ei tetai tuaine mapu ko Kenyatte te ingoa. “Kua manako au e kare e rauka. Kare au i kite e ka akapeea i te akapapa anga i te au tuatua akamata anga me kare i te uriuri manako anga mei te au Tuatua Tapu.” Inara, kua tuku atu te aronga pakari i tetai tuaine painia kite kia angaanga kiaia. “E mataora tikai i te angaanga anga kiaia,” ta Kenyatte e maara ra. “Kua akariro te reira iaku kia inangaro i te painia.” Ma etai akamaroiroianga e te tereni anga, penei ka inangaro katoa koe i te painia.

18. Eaa te au akameitaki anga te ka aere mai ki te aronga tei tomo atu ki roto i te angaanga mitinari?

¹⁸ Penei ka akatuera te painia i te ngutupa ki tetai ua atu au akameitakianga o te angaanga. Ei akaraanga, penei ka tau etai au tokorua akaipoipo no te tereni anga mitinari kia tonoia kia tutu aere i roto i tetai enua ke. E mea tau kia akatikatika atu te au mitinari ki tetai enua ou, penei i tetai reo ou, i tetai peu ou, e te au kai ou. Inara ka akariro te au akameitaki anga o taua au tamanamanata ra kia akangaro ke atu i te au manako papu kore. Te karanga ra a Mildred, ko tetai mitinari kite i Meiko, e: “Kare au i tataraara ana i taku ikianga kia riro  mai ei mitinari. Ko tetai apinga ia taku i inangaro ana mei toku meangiti anga ei tamaine ra.” Eaa te au akameitaki anga tana i rekareka ana? “I te kainga, e rauka mai ei tetai apii Pipiria e mea ngata ia. I konei ra, kua tere atu e a aku aronga apii e tai taime te akamata ra i roto i te angaanga koro!”

19, 20. Akapeea te angaanga Betela, te angaanga pa enua, e te Apii Terenianga Orometua i te apai mai anga i te au akameitaki anga ki te manganui?

¹⁹ Te aere katoa maira te au akameitaki anga maata ki te aronga te tavini ra i te Betela i te au opati manga o te Au Kite o Iehova. Te karanga ra a Sven, ko tetai taeake mapu te tavini ra i Tiamani, no tana angaanga i te Betela e: “I toku manako te rave nei au i tetai apinga puapinga mutu kore. Ka rauka iaku i te taangaanga i toku kite i roto i teia ao. Inara ka aite te reira mei te tuku anga i te moni ki roto i tetai pangika te vaitata ra i te pangakarapu.” E tika mou e, te tavini anga ei tangata tauturu kare e tutakiia te kapiti maira te akaatinga anga. Inara te karanga ra a Sven e: “Me oki koe ki te kainga, kua kite koe e ko te au mea katoatoa taau i rave ana i taua ra ra na Iehova ia. E te oronga maira te reira kia koe i te manako ‘meitaki rava.’”

²⁰ Kua rekareka etai au taeake i te akameitaki anga no te angaanga pa enua, te angaanga anga i runga i te patu anga i te manga i roto i te au enua ke. Kua tata tetai nga tokorua tei tavini ana e varu tukuanga angaanga ke e: “E mea umere te au taeake i konei. E mea mamae ngakau te reira i te akaruke anga​—e varu taime te ‘mamae anga’ to maua ngakau. E kite anga meitaki tikai ta maua i kite!” Te vaira oki te Apii Terenianga Orometua. Te oronga maira te reira i te terenianga pae vaerua ki te au taeake tau kare i akaipoipo ake. Kua tata tetai karatuati e: “E mea ngata iaku i te akakite atu na roto i te au tuatua i toku kimi anga i tetai mataara i te akameitaki atu ia kotou no taua apii umere anga. Ko teea tetai atu akaaerenga ka rauka i te aruaru maata i te tauta anga kia oronga i te tereni anga?”

21. Eaa te akaaoanga ta te au Kerititiano katoatoa e aro atura i roto i ta ratou tavini anga ki te Atua?

²¹ Ae, e manganui te au ngutupa no te angaanga te vai tuera ua ra. E tika, te maata anga o tatou kare e rauka i te angaanga i te Betela me kore i roto i te enua ke. Kua akakite mai a Iesu uaorai e ka akatupu maata te au Kerititiano i te “ua” tukeke no te au turanga tukeke ra. (Mataio 13:23) No reira, ta tatou akaaoanga ei au Kerititiano, koia oki kia rave i te meitaki o to tatou turanga​—kia rave i tetai tuanga maata i roto i ta Iehova angaanga te ka tika ki to tatou au turanga. Me rave tatou i te reira, te oronga ra tatou i te kaka kia Iehova, e ka akapapuia mai kia tatou e te mareka tikai maira aia. E akamanako ana ia Ethel, tetai tuaine pakarikari i roto i tetai kainga akono anga i te ruaine. Kua akakitekite putuputu atu aia ki te aronga e noo ra i reira i roto i tona kainga e kua piri atu ki te akakitekiteanga terepaoni. Noatu tona au kotingaanga, kua rave aia i tana angaanga ma te ngakau katoa.​—Mataio 22:37.

22. (a) I roto i teea au mataara ke e rauka ai ia tatou i te apai mai i te kaka ki te Atua? (e) Eaa te tuatau umere te tatari maira ia tatou?

²² Kia maara ra, i reira, e te tutu aere anga ko tetai mataara ia te ka rauka ia tatou i te apai mai i te kaka kia Iehova. Na te akaraanga meitaki i roto i to tatou tu akono e te akara anga me te rave ra tatou i ta tatou angaanga, i te apii, e i te kainga, te akariro ra tatou i to Iehova ngakau kia rekareka. (Maseli 27:11) Te taputou maira a Maseli 28:20 e: “Ko te tangata pikikaa kore ra, te maata ra tona meitaki.” E mea tau i reira kia ‘ruru akaperepere kore’ tatou i roto i ta tatou tavini anga ki te Atua, i te kite anga e ka kokoti maata tatou i te au akameitaki anga. (2 Korinetia 9:6) Na te rave anga i te reira, tei ia tatou te akameitaki anga kia ora i taua tuatau umere me rauka i “tei uti i te aʼo ra” i te oronga kia Iehova te kaka te tau tikai ra kiaia!​—Salamo 150:6.

[Tataanga Rikiriki i Raro]

Maara Ainei ia Koe?

• Akapeea te au tangata o te Atua i te tavini anga ia Iehova i te “po e te ao”?

• Eaa te akaaoanga ta te kopu tangata o Gada i aro atu, e eaa ta te reira e apii maira ki te au Kerititiano i teia tuatau?

• Akapeea te angaanga orometua i riro ei ei paruruanga i te patoi anga atu i te au akakinoanga a Satani ra?

• Eaa te “ngutupa maata” ta etai i tomo atu ki roto, e eaa te au akameitaki anga ta ratou e rekareka ra?

[Au Uianga Apii]

[Tutu i te kapi 15]

I te tamaki anga atu te ngati Gada i te aronga takanava ra, e mea tau kia tamaki atu te au Kerititiano i te patoi i te au akakinoanga a Satani

[Tutu i te kapi 17]

Te rekareka nei tatou i te taokotai anga akamaroiroi i roto i te angaanga orometua

[Tutu i te kapi 18]

Penei ka akatuera mai te angaanga painia i te ngutupa maata ki tetai au akameitakianga no te angaanga, kapiti anga mai i te:

1. Angaanga pa enua

2. Angaanga Betela

3. Angaanga mitinari