Au Uianga a te Aronga Tatau

Eaa ra a Davida, te tavini tiratiratu o Iehova ra, i akatika ai i tana vaine ko Mikala kia rave mai i tetai tiki, me kare i te itoro, tei akakiteia mai i roto ia 1 Samuela 19:12, 13?

Te mea mua, e akamanako poto ana tatou i te aerenga tuatua. Te tae mai anga te au nuti ki te vaine a Davida e te moetapapa ra te Ariki ko Saula i te ta ia Davida, kua ariu viviki atu aia. Te karanga ra te Pipiria e: “Kua tuku iorā Mikala ia Davida ki raro na roto i te māramārama; e aere atura aia, e oro atura, e ora atura. E kua rave iorā Mikala i tetai tiki [mei te tu o tetai tangata te maatamaata i te akaraanga], kua tuku iora ki roto i te roi, e kua tuku iora i te kakau uru puakanio ei urunga nona, e kua tapoki iora ki te kakau.” Te aere mai anga te au karere a Saula i te opu ia Davida, kua akakite atura a Mikala kia ratou e: “Kua mate aia i te maki.” Kua akaroaroa teia ravenga nei i te tuatau puapinga, e kua autu atura a Davida i tona oro anga.​—1 Samuela 19:11-16.

Te akakite maira te au kimikimi anga a te kimikimi apinga taito e i taua au tuatau taito ra, kua raveia te au tiki kare no te ravenga akonoanga ua mari ra no te au akakoroanga ture katoa. Mei te au pepa tikaanga e te au koreromotu i tataia te akataka ra i te au tikaanga akatuanga enua i teia tuatau, pera katoa te au tiki i te tuatau taito. I te akaraanga, te rauka anga te tiki, i raro ake i tetai au turanga, te orongaia ra ki tetai unonga te tikaanga kia rave mai i te kainga o tona metua tane ongai tei mate ra. Penei na teia e akamarama mai e eaa, i tetai atianga i mua atu ana, i rave mai ei a Rahela i te tiki a tona metua tane e eaa aia i apiapi ei e kia kiteaia akaou mai te reira. I taua atianga, kare te tane a Rahela, ko Iakoba, i kite ana e eaa ta tana vaine i rave.​—Genese 31:14-34.

Te riro mai anga to Iseraela ei iti tangata, kua orongaia kia ratou te Ture Ngauru, te rua o te reira te arai tikai ra i te maani anga i te au itoro. (Exodo 20:4, 5) I muri mai, kua taiku atu te peroveta ko Samuela ki teia ture i te tuatua anga ki te Ariki ko Saula. Kua na ko atura aia: “Kua aite katoa te meameaau ki te ara ra ki te purepure, e te māro ki te kino e te akamori idolo ra.” (1 Samuela 15:23) No teia tumu nei, kare i manakoia e kua riro te tiki e ei au akakoroanga no te akatuanga anga i Iseraela. Noatu rai, i te akaraanga kua rave uaia atu teia tu taito no te tamataku anga ngati Iuda i roto i etai au ngutuare o Iseraela. (Te Au Akava 17:5, 6; 2 Ariki 23:24) I te mea e kua rave mai a Mikala i tetai tiki ki roto i tana au apinga te akakite maira e kare tona ngakau i tae katoa kia Iehova. Penei kare a Davida i kite no runga i te tiki me kare ra kua akatika ua i te reira no te mea e tamaine a Mikala na te Ariki ko Saula.

Kua akakiteia mai to Davida manako no te akamori mou kia Iehova na roto i te au tuatua: “E maata oki a Iehova, e kia maata tona akameitaki angaia: kia matakuia oki aia, auraka te au atua katoa. Te au atua ravarai no te au etene ra e idolo ïa: ko Iehova ra tei anga i te au rangi ra.”​—1 Paraleipomeno 16:25, 26.

[Tutu i te kapi 29]

Te rua o te Ture Ngauru te arai ra i te maani anga i te au itoro, mei te tiki e akaariia maira i konei

[Akameitakianga]

From the book The Holy Land, Vol. II, 1859