Ripoti a te Aronga Tutu Patireia

‘Ka Ano Mai e Tupae Mai ia Matou’

I ROTO ia Tiurai 2000, kua aere te kapiki anga ki Autiria, Tiamani, e te Tuiterani no te Au Kite tei kite i te tuatua Tiamani kia neke atu ki Porivia. Eaa ra? No te mea i roto i te au tapere pama akatakakeia i roto anake i te 300 kiro mita o Santa Cruz, i Porivia, te akaari ra te au Mennonite te kite ra i te tuatua Tiamani i te inangaro i te Pipiria.

Mei tetai 140 Au Kite tei ariki i te patianga. Kua aere tetai papaki no etai nga epetoma, ko etai ke e tai mataiti me kore e maata atu. I te raveanga i te reira, kua akaari ratou i te vaerua tei aite ki taua au mitinari o te anere mataiti mua tei akarongo i te kapiki: “Ka ano mai ki Makedonia nei, e tupae mai ia matou.”​—Angaanga 16:9, 10.

Mei teaa tikai te tu i te angaanga i roto i taua ngai ra? Kua akataka mai tetai o te aronga pakari i roto i te putuputuanga i reira e: “Ka taeria e varu ora te roa i te teretere anga ki tetai o te 43 enua o te Mennonite na runga i te au mataara one i roto i tetai motoka four-wheel-drive. Ka umuumu putuputuia e a ra i te atoro anga i te au ngai mamao roa atu e te moe anga i roto i te au puakapa i etai au po. Inara kua pauna tikai te maroiroi, no te mea kare te maataanga o teia aronga i akarongo ake ana i te evangeria i mua ana.”

I te akamataanga, kare te au Mennonite i ariki ana i te au atoroanga. Inara na te au tautaanga putuputu i tauturu ia ratou i te ariki i ta te Au Kite e oronga ra. Ei akaraanga, kua karanga e tai tangata pama e e tai mataiti iaia i te tatau anga i te makatini Awake! Kua kapiti katoa mai aia i reira e: “Kua kite au e e manganui te au tangata i konei kare e irinaki ana ki ta kotou e tuatua ra, inara kua irinaki au e ko te tuatua mou te reira.” I roto i tetai pupu tangata ke mai, kua karanga tetai tangata e: “Te karanga ra etai o toku tangata tupu e e au peroveta pikikaa kotou, te karanga ra tetai ke e tei ia kotou te tuatua mou. Ka inangaro uaorai au i te kite i te reira.”

E putuputuanga tetai i teianei no te reo Tiamani i Porivia, e 35 papuritia, kapitiia mai te 14 aronga tutu evangeria tamou. I teianei, kua riro mai e 14 o te au Mennonite i mua ana ei aronga tutu i te Patireia e e 9 aronga ke mai te aere putuputu ra ki te au uipaanga. Kua karanga tetai tangata pakari koi papetito ua akera e: “Te kite meitaki ra tatou i ta Iehova arataki anga. Kua tono mai aia i te au taeake e te au tuaine tei tukatau, i te reo Tiamani i te tauturu ia matou. Te mareka tikai nei matou.” Te tamaine a teia tangata e 17 ona mataiti, ko tei papetito katoa ia rai, kua kapiti mai e: “E mea piri te tu maoraora o te au taeake e te au tuaine mapu tei aere mai ki konei. Te maataanga ia ratou e au painia, te akapou ra i to ratou taime e te moni i te tauturu anga i etai ke. Te akakeu ra te reira iaku kia rave akapera katoa.”

E tikai, te aronga tei itae atu kia ‘ano atu’ kia tauturu te kokoti ra i te rekareka anga maata e te merengo anga oki.