Ka Tau Ainei kia Riro Koe ei Mema no Tetai Ekaretia?

‘KARE au e inangaroia kia riro ei mema no tetai ekaretia me kore ra kia aere putuputu ki te pure e rauka ai i te irinaki ki te Atua!’ Ko te manako teia o te tangata e manganui no runga i te riro anga ei mema no tetai ekaretia me kore i roto i tetai ua atu akaaerenga akonoanga. E tika e, te karanga ra tetai papaki e e pirianga vaitata roa atu to ratou ki te Atua i te rekareka anga i te tu natura i vao ake i to te tae anga atu ki tetai au angaanga akonoanga i roto i tetai are pure. I teia tuatau, e mea matauia i te manako e ko te pirianga ki tetai pupu akonoanga me kore akaaerenga akonoanga kare ia i te umuumuanga no te irinakianga ki te Atua.

Kareka, tetai papaki, e tuke rai te manako. Te maro ra ratou e e mea anoanoia te riro anga ei mema e te taeanga atu ki te ekaretia, e puapinga katoa, me ka inangaro tetai kia rauka ta te Atua arikianga. No reira ko te uianga e me ka anoanoia tikai te pirianga akonoanga e maata roa atu te reira i to te inangaro ua i te tare numero me kore i te apii kite teitei. Noatu ra eaa te tu, no te mea oki e ka o mai to tatou pirianga ki te Atua, kare ainei i reira i te mea tau e kia kimi e eaa tikai to te Atua manako no runga i teia mea nei? Eaa, i reira, ta tatou ka kite mai mei tana Tuatua, te Pipiria, no runga i teia tumu tuatua?

Akapeea ta te Atua Akono Anga i te Tangata i te Tuatau i Topa

Vaitata i te 4,400 mataiti i topa akenei, kua rokona poitirere uaia te enua katoa e tetai vaipuke kino pakari. Kare taua tupuanga ra e ngoie ua i te akangaropoina, e e au tua ta te au iti tangata i te ao katoa nei no runga i te reira i roto i to ratou tuatua enua o mua ana. Noatu te tuke tuke o te au akakiteanga, e maata te au tu aiteite o teia au tua nei, tei kapiti mai i te tika e e nga mea tangata ua rai e tetai au manu tei ora mai.

Ko te aronga tei ora mai i te Vaipuke e au tangata tataki tai ua ainei ia tei manuia ua i te ora mai mei te akapouanga? Te akaari maira te tataanga a te Pipiria e kare ko teia tei tupu. Ma te puapinga maata, kare te Atua i akakite ana ki te tangata tataki tai ravarai no runga i te Vaipuke te ka tae mai. Mari ra, kua akakite aia kia Noa, ko tei  akamatakite atu i reira i te tangata i tona tuatau i te Tiruvi e vaitata maira.​—Genese 6:13-16; 2 Petero 2:5.

Ko te ora tei runga ia i te riro anga ei tuanga no teia pupu piri vaitata ua e te ariki puareinga ua anga i ta te Atua aratakianga i orongaia kia Noa. Te au manu katoa i roto i te araka tei ora mai i te Vaipuke kare i takake te ora anga mai mei teia pupu nei. Kua orongaia te au ikuikuanga tano meitaki tikai kia Noa kia rave i te au akanoonooanga tei tau no te akaoraanga i te oraanga manu.​—Genese 6:17–​7:8.

Te au anere mataiti i muri mai, kua riro to Noa au uanga na roto i tana tamaiti ko Sema ei tuikaa i Aiphiti. Kareka ra, ko to Iehova akakoroanga koia oki kia akaora mai ia ratou e kia apai mai ia ratou ki te enua tana i koreromotu ki to ratou tupuna ko Aberahama. I rauka akaou, kare teia i akakiteia ana ki te tangata tataki tai ravarai mari ra kua akakiteia na mua ki te aronga tei ikiia ei au arataki no ratou​—ko Mose e tona tuakana, ko Aarona. (Exodo 3:7-10; 4:27-31) I muri ake i te akaora angaia te au tuikaa mua ei pupu mei Aiphiti mai, kua orongaia kia ratou ta te Atua Ture i te Maunga i Sinai e kua akanooia ei iti tangata o Iseraela.​—Exodo 19:1-6.

I rauka ua te akaoraanga no te ngati Iseraela tataki tai no te mea kua akapiriia atu ratou ki tetai pupu tei akanoo tu-Atua ia e kua aru i te aratakianga a te au arataki tei akamanaia no teia pupu nei. Kua raveia te au apinga oronga no te au tangata Aiphiti tataki tai katoa kia taokotai mai ki teia pupu i te akaraanga kua riro mai te mareka anga tu-Atua. Te akaruke anga to Iseraela ia Aiphiti, kua aru atu eia aronga tataki tai ia ratou, i te tuku anga ia ratou i reira kia rauka mai te manakonako anga no te akameitaki anga a te Atua.​—Exodo 12:37, 38.

No reira, i te anere mataiti mua, kua akamata a Iesu i tana angaanga tutu aere anga, i te taokotai mai i te au tangata ei pipi nana. Kua akono aia ia ratou ei pupu, noatu e kua oronga katoa atu aia i te manako aroa ki te aronga tataki tai tei tau ki to ratou au anoano. Ki te au apotetoro tiratiratu e 11 ra, kua tuatua a Iesu e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou.” (Luka 22:28, 29) I muri mai, kua aere mai to te Atua vaerua tapu ki rungao i te au pipi i to ratou taokotai mai anga ei pupu ra.​—Angaanga 2:1-4.

Te akaari meitaki maira teia au akaraanga e i te tuatau i topa e akono ua ana te Atua i tona iti tangata ei pupu taokotaiia. Te au tangata tokoiti ua ta te Atua i taangaanga uaorai ra​—ko Noa, ko Mose, ko Iesu, e tetai atu​—e tikai, kua taangaangaia e Ia kia komunikeiti atu ki tetai pupu pirianga taokotai. Kare ua atu e tumu kia irinaki e te akono tuke ua atura te Atua i tona au tavini i teia tuatau. E tikai, te oronga maira teia i tetai atu uianga: Kua rava ua ainei te pirianga ki tetai ua atu pupu akonoanga? Ka tamanako tatou i teia uianga puapinga maata i roto i te atikara te aru maira.

[Tutu i te kapi 4]

Kua roa to te Atua akono anga i tona iti tangata ei pupu taokotaiia