Kia Rave me Kare Auraka e Rave ki Etai Ke?

“TAAU kare e inangaro kia raveia kia koe, auraka e rave ki etai ke.” Kua kapitiia teia tuatua akono tau ki te puapii Tinito rongonui e te tangata kimi kite ko Confucius. I teia tuatau, i etai 2,500 mataiti i muri mai, e manganui te mou ra rai ki te irinaki e kua rave tetai tangata i tana apainga i te pae akono na te tapupu ua anga i te rave anga i te kino ki etai ke.

Kia papu, e puapinga to teia papaanga a Confucius no te tu akono. Te Pipiria, i tetai tua, te akakite maira i tetai tuanga o te tu e te raveanga o te tangata nei. Pera katoa penei te ka kapikiia e ko te ara no te angaanga kino, koia oki, ko te raveanga i te au mea tarevake ki tetai o te au taeake tangata, te tuatua ra te Pipiria i te ara no te rave kore i te tika. Kua tata te pipi Kerititiano ko Iakobo e: “E teianei ko te tangata i kite i te rave i te mea meitaki, e kare i rave, kua riro ïa ei ara nana.” (Iakobo 4:17) Kare e ka ikuiku ua i te au Kerititiano e auraka e rave i te kino ki etai ke, kua oronga a Iesu Karaiti i teia akoanga: “E te au mea katoa ta kotou i anoano ia etai ke ra, na reira katoa kotou ia ratou: ko ta te ture ïa, e ta te au peroveta.”​—Mataio 7:12.

Kua akakoro te Atua i te akamataanga e kia akono te au tangata ravarai i tetai e tetai ia ratou e inangaro ra kia akonoia mai. Kua akanoo mai aia i te akaraanga meitaki roa atu i te akono anga i tetai na roto i te tu i anga mai ei aia i te au tangata: “Kua anga iora oki te Atua i te tangata i tona uaorai tu; i anga aia iaia i te tu o te Atua ra; i anga aia ia raua ko te tane e te vaine.” (Genese 1:27) Ko teia te aiteanga e kua oronga aroa mai te Atua i te tangata ma te akava ngakau, koia oki, me tereni meitakiia, ka arataki ia ratou i te akono i tetai ke i te mataara te ka inangaro ratou uaorai kia akonoia mai.

E manganui i teia tuatau te mamae nei mei te manakonako kore e te tauturu kore i te nga rima o te aronga manako kore e te manako ua ra ia ratou uaorai. Te taka meitaki ra, e maata atu te anoanoia ra e auraka kia rave ua i te kino e te kino ra ki tetai ke inara, mari ra, kia rave i te mea meitaki e te ka tauturu ia ratou. No teia tumu nei, te rave ra te Au Kite o Iehova ma te oronga ua i te angaanga tau i te tauturu i tetai ke i te kite i te manakonako anga meitaki roa tei kiteaia i roto i te Tuatua a te Atua. Me atoro atu ratou i to ratou tangata tupu ma te nuti meitaki mei te Pipiria mai, te rave ra ratou ma te vaerua aroa, i te rave anga ki tetai ke i ta ratou e inangaro ra kia raveia kia ratou uaorai.