Ko Teea Akonoanga Taau ka Iki?

‘KO TE au akonoanga tukeke e au mataara tukeke ia te arataki atura ki te akakoroanga okotai. No te mea, kare ainei e, te vaira e okotai ua Atua?’ Kua kiteaia taua manako e te manganui te manako ra e noatu e e puapinga maata te pirianga ki te akonoanga, kare e manamanata roa ana e ko teea akonoanga ta tetai ka iki.

I te akaraanga mua, penei e akaraanga tau teia taumaro anga, i te mea e e tika e te vaira e e okotai ua Atua, ko te Mana Katoatoa ra. (Isaia 44:6; Ioane 17:3; 1 Korinetia 8:5, 6) Inara, kare e rauka ia tatou i te kopae i te au akaraanga tukeke​—te au tukeanga katoa​—i rotopu i te au pupu akonoanga e manganui te karanga ra e te tavini ra i te Atua mou. E maata tikai to ratou tuke i roto i ta ratou au ravenga, to ratou au irinaki anga, ta ratou au apii anga, e ta ratou au umuumuanga. E maata tikai te au tukeke anga e ko te aronga te piri ra ki tetai akonoanga me kare ki tetai pupu te ngata ra i te marama me kare i te ariki i ta tetai e apii ra me kare e irinaki ra.

I tetai tua, kua tuatua a Iesu e: “E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.” (Ioane 4:24) Te akatika ra ainei te akamori anga i te Atua ma te tuatua mou i te au manako tukeanga e manganui e koai te Atua, eaa tona au akakoroanga, e peea aia i te inangaro mai anga e kia akamoriia? E mea tau ainei kia irinaki e kare te Atua Mana Katoatoa e manata roa ana e akapeea tatou i te akamori anga iaia?

Te Au Kerititiano Mou i Taua Taime e i Teianei

I tetai taime e au manako tuketuke to te au Kerititiano o te anere mataiti mua no runga i te au mea. Ei akaraanga, i te tuatua anga no te aronga o Korinetia, kua tuatua te apotetoro ko Paulo e: “Kua akakiteia mai au ia kotou, e aku au taeake, e to te ngutuare o Keloe, e e taumāro anga tei rotopu ia kotou na. Teia taku tuatua, te karanga na kotou e, No Paulo au; e no Apolo au; e no Kepha au; e no te Mesia au.”​—1 Korinetia 1:11, 12.

Kua akara ainei a Paulo i teia au tuke anga e e meangiti ua te puapinga? Te aru ua ra ainei te tangata taki tai i tona uaorai aerenga ki te akaoraanga? Kare rava! Kua ako iora a Paulo e: “E teianei, e te au taeake, te ako atu nei au ia kotou i te ingoa o to tatou Atu ra o Iesu Mesia, e ei tuatua okotai ta kotou ravarai, e auraka ei pae ke i roto ia kotou na; kia kapiti marie ra kotou ma te ngakau okotai e te manako okotai.”​—1 Korinetia 1:10.

E tikai, kare e rauka te taokotai anga irinaki anga na roto i te maroanga. Ka rauka ua te reira me kimikimi marie tikai te au tangata tataki tai i te au tumu manako e itaeia ai e e arikiia ai taua au manako taopenga ra. No reira, e takainga puapinga tikai tetai apiianga naau uaorai no te  Tuatua a te Atua e te anoano tikai ia ra kia akono tei apiiia ra kia rekareka i te tu taokotai anga ta Paulo e tuatua ra. Ka kitea ainei taua taokotai anga ra? Mei ta tatou i kite ana, kua roa to te Atua akonoanga i tona iti tangata ra ei pupu. Ka rauka ainei i te akatakaia mai taua pupu i teia tuatau?

Te Au Akameitakianga no te Kapitianga Tika

Kua ui ana te tata taramo ko Davida e: “Koai, e Iehova, te ka tuitarere i toou ra puakapa? Koai te ka noo i to maunga tapu ra?” E uianga akakeu anga manako tikai te reira. Kua oronga mai a Davida i te pauanga: “Ko te tangata aerenga tiratiratu, ko tei akono i te tuatua-tika ra; e ko tei tuatua i te tuatua-mou i roto i tona ra ngakau.” (Salamo 15:1, 2) Ka rauka i tetai akamarama anga tikai o te Pipiria i te akataka mai i te akonoanga te tau ra no taua au umuumuanga tu-Atua. No reira, na te kapiti anga ki taua pupu ra, ka rekareka tetai i te taokotai anga akamaroiroi anga ma te au tangata te akamori taokotai ra i te Atua “ma te vaerua e te tuatua-mou.”

Kua akaari mai te Au Kite o Iehova e ka rauka katoa te taokotai anga na roto i te irinaki anga e te angaanga anga i roto i teia ao taokotai kore. I roto i to ratou au pupu e au mema i mua ana no te au akonoanga tukeke e te au pupu eteniki e manganui. Ko tetai Au Kite e aronga tei irinaki mua ana e kare te Atua e ora ana me kore te irinaki ra e kare e Atua. Kare tetai papaki e manako tikai mai ana i te akonoanga. Mei roto mai i teia tu tukeke o te au akonoanga, te au peu, e te au apiianga kua aere mai te aronga tataki tai te rekareka ra i teianei i tetai taokotai anga akonoanga kare i kiteaia i roto i te ao i teia tuatau.

Te tumuanga no taua taokotai anga ko te Tuatua a te Atua, ko te Pipiria. E tikai, te kite ra te Au Kite o Iehova e kare e rauka ia ratou i te maro atu e eaa ta tetai ka rave. Inara te ariki ra ratou i te akameitaki anga na te akamaroiroi anga i tetai kia apii mei te Pipiria kia akatumuia ta ratou iki anga no te akamori anga ki runga i taua tango ketaketa ra. Na roto i teia tu nei, e maata ua atu te au akameitaki anga te ka rauka mai i te akamori anga i te Atua “ma te vaerua e te tuatua-mou.”

I teia tuatau, e maata te tumatetenga no te topa anga ki roto i te au akakeu anga kino e te au akavareanga. Te iki anga i te tu tika o te kapitianga e mea puapingaia. Te akakite maira te Pipiria e ko “tei kapiti katoa i tona aerenga ki to te aronga pakari ra, ka pakari katoa ïa” e e “kino te tuatua meitaki i te kapiti anga kikino ra.” (Maseli 13:20; 1 Korinetia 15:33) Te kapiti anga ki te aronga akamori tika tikai o te Atua e paruruangaia. No reira, te akamaara maira te Pipiria kia tatou, e: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Mei teaa ra te akameitaki anga me tauturu aroa te au oa mou, te au taeake e te au tuaine pae vaerua i tetai e tetai i te akono i ta ratou au apainga ki mua i te aroaro o te Atua ra!

Kua akapapu mai a Ottmar i teia manako. Kua utuutuia i roto i tetai ngutuare Katorika i Tiamani, kua akamutu ua aia i te aere ki te pure. Te akataka maira aia e: “Me aere au ki te pure, e manako puapinga kore ua toku me aere mai ki vao i to te aere atu anga ki roto.” Noatu rai, kua akono aia i tona akarongo i roto i te Atua. No reira kua aravei atu aia i te Au Kite o Iehova e kua irinaki e e au tavini mou ratou no te Atua. Kua kite aia i te anoano kia kapiti atu kia ratou. Te karanga ra aia i teianei e: “Te angaanga maroiroi anga i roto i tetai akaaerenga i te ao katoa, te rekareka nei au i te au o te manako e te ngakau. Te tauturu marieia nei au kia rauka mai te kite maata tikai o te Pipiria. E puapinga maata taua mea ra kiaku uaorai.”

Tetai Patianga ki te Aronga te Kimi Ra

Ko te au tangata te aiteite ra te manako te angaanga piri vaitata ra ei pupu ka rauka i te akatupu i tetai angaanga meitaki i ta te aronga tataki tai e angaanga takake ra mei tetai ki tetai. Ei akaraanga, ta Iesu au ikuikuanga akarukeanga ki tana au pipi koia oki: ‘E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu  ia ratou, kia akono i te au mea katoa taku i akaue atu kia kotou.’ (Mataio 28:19, 20) Akapeea e rauka ai taua angaanga i te akatupu merengoia me kare oki e arataki anga me kore e akaaerenga? Akapeea tetai i te akarongo anga ki teia akauenga Tuatua Tapu me te tauta ra aia i te tavini takake anga i te Atua?

I te mataiti i topa akenei, kua tuaia e te Au Kite o Iehova e 91,933,280 puka tei akatumuia ki runga i te Pipiria, te au puka rikiriki, e te au poroutia, e te 697,603,247 makatini, no reira kua taeria e anere mirioni tangata i roto i te 235 enua ma te karere mei roto mai i te Tuatua a te Atua. Mei teaa te akapapu anga meitaki tikai taua pupu akaaere meitaki, taokotaiia e e maata atu te au tauta anga i akatupuia i ta te aronga tataki tai tauta anga tauturu kore ka rauka mai!

Kapiti atu ki te tua anga i te puka Pipiria, te rave ra te Au Kite o Iehova i te au apii Pipiria kare e tutakiia i te tauturu anga i te au tangata kia rauka tetai marama oonu o ta te Atua e umuumu maira. I te mataiti i topa akenei, i roto i te avereti, kua raveia e 5,726,509 o taua au apiianga Pipiria i te epetoma taki tai ma te au tangata tataki tai me kore ma te au pupu. Kua tauturu teia apiianga Pipiria i te au tangata e mirioni ua atu kia rauka tetai tumuanga ketaketa kia rave i ta ratou iki anga ei tumu anga no te akamori anga. Te patiia atu nei koe kia apii i te au umuumuanga tu-Atua tei akanooia i roto i te Pipiria. Ka rauka i reira ia koe i te rave i taau iki anga.​—Ephesia 4:13; Philipi 1:9; 1 Timoteo 6:20; 2 Petero 3:18.

Me te inangaro ra koe i te akamareka i te Atua, e puapinga te pirianga akonoanga​—inara kare ki tetai ua atu pupu akonoanga. Te anoanoia ra koe kia akatumu i taau iki anga no te akonoanga ki runga i te kite Pipiria tikai, kare ki runga i te au apiianga akapapu koreia me kore i te akarongo taringa ua. (Maseli 16:25) E apii i te au umuumuanga no te akonoanga mou. E akaaite i te reira ki toou uaorai au irinaki anga. E iki kia tau ki te reira.​—Deuteronomi 30:19.

[Au Tutu i te kapi 7]

Te rekareka nei te Au Kite o Iehova i te taokotai anga i roto i tetai ao taokotai kore