Raveanga i Tei Meitaki ra t te Au Tuatau Anoanoia

“KIA rave tatou i tei meitaki ra ki te katoatoa,” i raurau ei te apotetoro ko Paulo, “inara ki te aronga tikai tei piri mai kia [tatou] i te akarongo.” (Galatia 6:10, NW) Te tauta marie ra te Au Kite o Iehova takapini i te ao nei i te akono i taua kaveinga ra i roto i to ratou oraanga, i te raveanga i tei meitaki ra ki te aronga ravarai, koia tikai to ratou au oa akarongo. Te kite putuputuia ra teia i te au tuatau anoanoia. E tamanako ana tatou i te au akaraanga no teia taime ua nei mei te au pa enua e toru ra.

I roto ia Titema 2002, kua u atu tetai uriia ririnui tikai ki runga ia Kuama, ma te au matangi tei tere atu i te 300 kiro mita i te ora. E manganui te au are tei tatakakeia, ko etai atu kua takore takiriia. Kua akapapa viviki te au putuputuanga i reira i te au pupu tama kia tauturu i te au ngutuare tangata o te Au Kite tei tukia pakariia. Kua oronga mai te manga o Kuama i te au apinga e te aronga angaanga kia ripea i te au are tei takinoia, e kua oronga mai te manga o Vaii i te turuturuanga. I roto i nga epetoma i muri mai, kua tae atu tetai pupu kamuta mei Vaii mai kia tauturu i te angaanga patu akaou anga, e kia tauturu ia ratou, kua taangaanga te au taeake i reira i to ratou orote. Kua riro te vaerua taokotaianga rekareka ei kite ki te katoatoa i roto i te oire ra.

I roto i tetai ngai o te oire maata i Mandalay, i Maianama, kua ka poitirere mai tetai ai kare i mamao mai mei te Are Uipaanga Patireia. E are tetai i te pae mai te nooia ra e tetai tuaine kare e maroiroi ana i te pae vaerua e tona ngutuare tangata. Te pupui maira te matangi na te mataara o tona kainga, e no reira kua oro atu aia ki te are uipaanga kia pati i tetai tauturu. I taua taime ra, te akamanea akaouia ra te are uipaanga, e no reira e manganui te au taeake i reira. Kua poitirere ratou i te aravei anga i te tuaine no te mea kare roa ratou i kite ana e e noo ana aia i taua ngai ra. Ma te viviki, kua tauturu te au taeake i te neke anga i te au apinga a te ngutuare tangata ki tetai ngai meitaki. I te akarongo anga te tane, e kare aia i te Kite, no runga i te ai, kua rapu viviki mai aia ki te kainga i te kite anga e te akono ra te au taeake i tona ngutuare tangata. Ma te umere e te mareka, kua rekareka katoa aia no te mea e taangaanga putuputu ana te aronga noni i taua turanga ra no te keikeia. Kua akakeu teia akakiteanga o te takinga meitaki i te tuaine e tana tamaiti kia piri akaou mai ki te putuputuanga Kerititiano, e te aere ra raua ki te au uipaanga katoatoa.

I te mataiti tavini anga i topa akenei, e manganui i roto ia Motamapiki i aro atu i te onge no te au tuatau maro e te tupu kore o te au kai tanu. Kua ariki viviki te opati manga i taua ngai ra na te oronga anga i te kai ki te aronga te anoano ra. Kua raveia te tuaanga ki te au Are Uipaanga Patireia, i tetai taime i muri ake i te au uipaanga  putuputuanga. Kua karanga tetai tuaine e metua takaua aia e: “Kua aere mai au ki te putuputuanga ma te taitaia, kare i kitea e eaa taku ka oake ei kai ki taku tamariki me oki atu matou ki te kainga.” Na te tauturu anga aroa tei orongaia mai e te au taeake i akamaroiroi viviki iaia. “Mei te tuakaouanga rai te reira kiaku!” i karanga ai aia.

“Te angaanga meitaki ra” te Au Kite i te tu pae vaerua na te tuaanga i te karere a te Pipiria no te pumaana e te manakonakoanga. Te irinaki ra ratou mei te tangata pakari rai i te tuatau taito ra: “Ko tei akarongo mai [i te pakari tu akono i te Atua], ka noo marie ua ia ma te ora; e akaea ua aia ma te mataku kore i te kino.”​—Maseli 1:33.

[Au Tutu i te kapi 31]

1, 2. Tuaanga i te kai ki te aronga e anoano ra i Motamapiki

3, 4. Te uriia i Kuama tei takore i te au are e manganui

[Akameitakianga]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe