Au Uianga a te Aronga Tatau

Te ariki ra ainei te Au Kite o Iehova i etai au tuanga meangiti ua o te toto?

Te au pauanga te aru mai nei kua nenei akaouia mei te itiu o Tiunu 15, 2000.

Te pauanga puapinga koia oki kare te Au Kite o Iehova e ariki ana i te toto. Te irinaki ngaueue kore nei matou e kare te ture a te Atua no runga i te toto e taui e kia aru i te au manako tukeke. Noatu rai, kua mama mai etai au itiu ou no te mea ka rauka te toto i te akapapaia i teianei ki roto e a au mea maata e tetai tuanga o te reira au mea. I te ikianga me ka ariki i te reira, ka tau tetai Kerititiano kia akara mamao atu ki roto i te au puapinga i te pae vairakau e te au kino. Ko tana ka manako koia oki e eaa ta te Pipiria e tuatua ra e te tupu anga tamou ki runga i tona piri anga ma te Atua Mana Katoatoa.

E mama ua te au itiu puapinga tikai. Ei tauturu i te kiteanga e eaa ra i pera ei, ka akamanako ana i etai au manako Pipiria, tuatua enua, e te pae vairakau.

Kua akakite te Atua ko Iehova ki to tatou ui tupuna matauia ko Noa e kia akonoia te toto ei apinga takake. (Genese 9:3, 4) I muri mai, kua akaata ta te Atua au ture ki to Iseraela i te tapunui o te toto: “E to te ngutuare o Iseraela, e to te au tangata ke . . . kia kai i te toto ra; ka anaana tikai toku mata i te reira tangata, i tei kai i te toto ra.” Na te kopaeanga i te ture a te Atua, ka akakino tetai tangata Iseraela i tetai ke; no reira, kua karanga te Atua: “E tipu ke atu au iaia i tona iti-tangata ra.” (Levitiku 17:10) I muri maira, i tetai uipaanga i Ierusalema, kua akaue te au apotetoro e te aronga pakari e ‘auraka tatou e kai i te toto.’ Te raveanga i te reira e mea puapinga e auraka e rave i te ainga tau kore e te akamori itoro.​—Angaanga 15:28, 29.

Eaa te aiteanga e ‘auraka’ i te reira taime? Kare te au Kerititiano e kai i te toto, me e ou me kare kua akatokaia; kare katoa ratou e kai i te kiko mei tetai animara kare i akataeia. Tei kopae katoaia ko te au kai kua kapitiia atu te toto ki roto, mei te totiti toto. Te kaianga i te toto na etai o taua au tu te aati ra i te ture a te Atua.​—1 Samuela 14:32, 33.

Kare te maata anga o te au tangata i te tuatau taito e manamanata no runga i te kaianga i te toto, mei ta tatou ka kite i roto i te au tataanga a Tertullian (i te rua e te toru anere mataiti T.N.). I te ariuanga ki te au akaapa anga pikikaa e kua kai te au Kerititiano i te toto, kua taiku a Tertullian i te au kopu tei topiri i te au koreromotu na te tongianga i te toto. Kua akakite katoa aia “me raveia tetai tarekareka anga, [ko etai] no te kaki noinoi ra kua opu i te toto ou o te aronga akaapaia . . . ei rapakau i to ratou maki uti.”

Ko te reira au rave anga (noatu me kua rave etai au Roma i te reira no te au tumu i te pae kopapa) e mea tarevake ia ki te au Kerititiano: “Kare matou e kapiti ana i te au toto animara i roto i ta matou kai matau uaia,” i tata ei a Tertullian. Kua taangaanga to Roma i te kai e toto to roto ei timata i te tu tiratiratu o te au Kerititiano tika tikai. Kua tuatua a Tertullian e: “Teianei, ka ui atu au kia koe, eaa ia apinga, me kua papu tikai ia koe e ka uri ke [te au Kerititiano] ma te vinivini mei te au toto o te animara, ka manako ei koe e ka noinoi ratou i te toto tangata?”

I teia tuatau, e iti ua te tangata te manako ra e kare i te mea maata te au ture a te Atua Mana Katoatoa me taiku tetai taote e kia ariki ratou i te toto. Koi papu ei e te inangaro ra te Au Kite o Iehova i te ora ua atu, te umuumuia ra tatou kia akarongo i ta Iehova ture no runga i te toto. Eaa te aite anga o teia i roto i te ravenga pae vairakau?

I te matau angaia te pamu anga i te toto katoa i muri ake i te Tamaki II o te Ao, kua kite te Au Kite o Iehova e te patoi ra teia ki ta te Atua ture​—e te irinaki nei rai matou i te reira. Inara, kua taui te vairakau i te tuatau i topa. I teia tuatau, kare te au pamu anga e mei te toto katoa inara mei tetai o te au mea i roto ra: (1) te au teera muramura; (2) te au teera teatea; (3) te au platelet; (4) te paratima (serum), te tuanga vaivai. I runga ua i te au turanga o tetai tangata maki, penei ka oronga te au taote i te au teera muramura, te au teera teatea, au platelet, me kare paratima. Te pamuanga i teia au mea maata te tuku ra e okotai tu o te toto kia  akatakakeia i roto i te aronga maki. Te irinaki ra te Au Kite o Iehova e te arikianga i te toto katoa me kare i etai o taua au mea maata e a te aati ra i te ture a te Atua. Ma te puapinga, te akonoanga i teia turanga akanooia ki runga i te Pipiria kua paruru ia ratou mei te au kino e manganui, kapiti mai i te au maki mei te hepatitis e te AIDS te ka tupu mai mei te toto.

Inara, i te mea e ka rauka te toto i te akapapaia kia mamao atu i taua au mea maata ra, kua mama mai te au uianga no runga i te au tuanga iti ua tei raveia mai mei te au mea toto. Akapeea taua au tuanga iti ua i te taangaanga angaia, e eaa ta tetai Kerititiano ka manako i te ikianga no runga i te reira?

E mea ngata te toto. E pera te paratima​—e 90 patene ua e vai​—te apai aere ra i te au hormone, te au miti maani ua, te au enzyme, e te au mea akamatutu, kapiti mai te au mineral e te tuka. Te apai katoa ra te paratima i te au porotini mei te albumin, te au apinga akatoka, e te au antibody kia tamate i te au maki. Te rauka ra i te aronga kite i te akatakake e te taangaanga i te au porotini paratima e manganui. Ei akaraanga, kua orongaia te tu akatoka VIII ki te aronga tuia e te hemophiliac, tei tae ua. Me kare me kua tuia tetai tangata i te au maki, penei ka oronga te au taote e kia patiaia te gamma globulin, tei raveia mai mei te toto paratima o te tangata tei paruru ke ia. Te taangaangaia ra tetai atu au porotini paratima ei vairakau, inara te akatutu ra tei taikuia i runga akenei e akapeea tetai mea maata o te toto (te paratima) i te akapapa angaia e raukai tetai au tuanga meangiti. *

Mei te paratima toto ka riro ei tumu no te au tuanga iti tukeke ua, ka rauka katoa tetai atu au mea maata (te au teera muramura, te au teera teatea, te au platelet) i te akapapaia kia akatakake i etai atu au tuanga meangiti. Ei akaraanga, penei ka riro te au toto teera teatea ei tumu no te au interferon e te au interleukin, tei taangaangaia ei rapakau i etai au maki vaireti tuia e te au cancer. Ka rauka te au platelet i te akapapaia kia rave mai i tetai apinga rapakau i te motu. E te maaniia ra etai atu au vairakau te o maira (i te akamata anga) te au apinga mei te au mea toto. Kare te reira au rapakau anga i te au pamu anga o taua au mea maata; te o maira i roto i te reira tetai au tuanga me kare au tuanga o te reira. Ka ariki ainei te au Kerititiano i teia au tuanga i roto i te rapakau anga i te pae vairakau? Kare e rauka ia matou i te tuatua. Kare te Pipiria i oronga mai i te au akakite anga, no reira kia tuku tetai Kerititiano i tana uaorai iki anga akava ngakau ki mua i te Atua.

Ka patoi etai i tetai apinga tei rauka mai mei te toto (pera katoa te au tuanga iti ua tei akakoroia kia oronga mai i te paruru anga). Akapera ratou i te marama anga i ta te Atua akauenga ‘auraka e kai i te toto.’ Ka akamarama ratou e ko tana ture ki to Iseraela te umuumu ra i te toto tei akaateaia mai mei tetai manu kia ‘akataʼe [ia] ki raro i te one.’ (Deuteronomi 12:22-24) Eaa ra te reira i tau ei? Kia akapapa ei i te gamma globulin, te au mea no te akatoka i te toto, e te vai atura, te umuumuia ra e kia akaputuia te toto e kia akapapaia. No reira, te kopae ra etai au Kerititiano i taua au mea ra, mei ta ratou i kopae i te au pamu anga toto katoa me kare i te reira au mea maata e a i roto ra. Kia akangateiteiia to ratou tu atu anga kia tau ki to ratou akava ngakau tae.

Kua iki tuke tetai atu au Kerititiano. Te patoi katoa ra ratou i te au pamu anga toto katoa, te au teera muramura, te au teera teatea, te au platelet, me kare te paratima. Inara, penei ka akatika ratou i tetai taote kia rapakau ia ratou ma tetai tuanga tei raveia mai mei te au mea maata. Noatu i konei penei te vaira te au tuke anga. Penei ka akatika tetai Kerititiano i te patia anga gamma globulin, inara penei me kare aia e ariki i tetai patia anga e apinga to roto tei raveia mai mei te au teera muramura me kare teatea. Inara, i te katoa anga, eaa te ka taki atu i tetai au Kerititiano kia taopenga e ka rauka ia ratou i te ariki i te au tuanga e toto to roto?

Kua akakite te “Questions From Readers” i roto i The Watchtower o Tiunu 1, 1990, e ko te au porotini paratima (e au tuanga iti ua) te neke ra mei te toto o tetai vaine nui ki te akapapa anga toto akatakakeia o tana pepe. I reira kua oronga atu tetai metua vaine i te au immunoglobulin ki tana tama, te orongaanga i te au paruru anga puapinga. Ma te takake, i te au teera muramura o te pepe e akaoti ra i to te reira oraanga, kua akapapaia to ratou okitene apai apinga ra. Kua riro mai etai o te reira  ei bilirubin, te tikoti ra i te enua ki te metua vaine e kua akaateaia e te au repo o tona kopapa. Kua taopenga etai au Kerititiano i te mea e ka rauka te au tuanga toto iti ua i te orongaia ki tetai tangata na roto i teia tu natura, ka ariki ratou i tetai tuanga toto iti ua tei raveia mai mei te au paratima me kare au teera.

I te mea te tuke ra te au manako e te au iki anga tau ki te akava ngakau te aiteanga i reira e kua puapinga kore te itiu? Kare. E mea pakari ia. Inara, te vaira te tu ngoie ua. Te akaari maira te au manako i runga akenei e te patoi ra te Au Kite o Iehova i te au pamu anga toto katoa e to te reira au mea maata o te toto. Te akaue ra te Pipiria i te au Kerititiano ‘auraka e kai i te manga i apaiia na te au idolo ra, e te toto, e te mea kukumi uaia ra, auraka oki e akaturi.’ (Angaanga 15:29) I te pae mai i te reira, me no runga i te au tuanga iti ua o tetai ua atu o te au mea maata, ka tau te au Kerititiano tataki tai, i muri ake i te akamanako meitaki anga e na roto i te pure, kia iki ma te akava ngakau tau nona uaorai.

E manganui te tangata ka ariki ua i tetai rapakau anga i te akaraanga e ka oronga viviki mai i te puapinga, noatu i tetai rapakau anga te kiteia ra e maata te manamanata, mei tei tika o te au mea e toto to roto. Ka tauta tetai Kerititiano ngakau tae e kia rauka te manako tau e te o maira e maata atu i te au tu i te pae kopapa. Te ariki ra te Au Kite o Iehova i te au tauta anga kia rauka mai te akonoanga meitaki i te pae vairakau, e te manako meitaki ra ratou i te kino te ka o mai e te puapinga no tetai ua atu rapakau anga. Inara, no runga i te au mea tei raveia mai mei te toto, te manako meitaki ra ratou i ta te Atua e tuatua ra e to ratou uaorai piri anga ma Tei Oronga i te Ora kia tatou.​—Salamo 36: 9.

Mei teaa ra te akameitakianga no tetai Kerititiano kia rauka te papu anga mei te tata taramo ra tei tata: “E rā oki e te paruru te Atua ra ko Iehova: ka oronga mai a Iehova i te meitaki e te kakā: kare rava ona meitaki e tāpu i te aronga aerenga tiratiratu ra. E Iehova . . . , e ao to te tangata e irinaki ia koe ra”!​—Salamo 84:11, 12.

[Tataanga Rikiriki i Raro]

[Pia i te kapi 31]

AU UIANGA KA TAIKU KI TETAI TAOTE

Me aro atu koe i tetai vai anga me kare tetai rapakau anga te o maira te au mea toto, e ui:

Kua kite ainei te au tangata rapakau te ka o mai, e ko tetai o te Au Kite o Iehova, te tata nei au no te au pamu anga toto auraka (toto katoa, au teera muramura, au teera teatea, te au platelet, me kare te paratima toto) kia orongaia mai kiaku noatu e eaa te au turanga?

Me kua maaniia mai etai vairakau ka orongaia mai mei te paratima toto, te au teera muramura me kare teatea, me kore te au “platelet,” e ui:

Kua maaniia ainei te vairakau mei tetai o te au mea maata e a o te toto ra? Me koia ia, e akamarama mai ana i to roto i te reira?

Mei teaa te maata o teia vairakau e toto to roto ka orongaia atu, e na roto i teea tu?

Me ka akatika toku akava ngakau iaku kia ariki i teia tuanga iti ua, eaa te au manamanata i te pae vairakau te ka o mai?

Me ka akakeu toku akava ngakau iaku kia kore e akatika i teia tuanga iti ua, eaa atu tetai rapakau anga penei ka taangaangaia?

I muri ake i toku manako maata anga no runga i teia, aea au e tau ei kia akakite atu kia koe i taku iki anga?