Ka Rauka Ainei Taau Au Pure i te Akatukeanga?

KOAI ainei ia tatou tei kare i aro atu ana i tetai turanga kino e kare a tatou akatereanga o te reira? Te akaari maira te Pipiria e kua kite te apotetoro ko Paulo e ka rauka te pure i te akakeu i te tupuanga o taua au tu kino ra.

I to Paulo titirianga tau koreia ki roto i te are auri i Roma, kua pati atu aia ki tona au oa irinaki kia pure nona ra, kapiti atu anga: “Kia akaoki vaveia ra au ia kotou na, i maata uaʼi taku tuatua ia kotou e, e akapera.” (Ebera 13:18, 19) I tetai atianga akaou mai, kua akakite mai a Paulo i te irinaki e ka ariki mai te Atua i te au pure e ka tukuna vaveia mai aia ki vao. (Philemona 22) Kare i roa ia ana kua tukunaia atu a Paulo e kua akamata akaou i tana angaanga mitinari.

Inara ka rauka ainei te pure i te taui i te tupuanga o toou au manamanata? Penei paa. I na, e akamaara, kare te pure i te angaanga tu akonoanga ua. E tuatua anga tika tikai te reira ma to tatou Metua aroa e te mana i te au rangi ra. Kia manako ngoie ua tatou kia taka tikai ta tatou au pure, inara kia tiaki marie i reira i te akara e ka akapeea a Iehova i te ariki mai anga.

Penei kare te Atua e ariki tika mai ki te pure katoatoa, penei kare aia e pau ua ana i te mataara me kore i te tuatau i tapapa ei tatou. Ei akaraanga, ia Paulo, kua pure putuputu no runga i te “tara i roto i [tona] kopapa nei.” Kare te Atua i akaatea ana i to Paulo manamanata, me eaa te reira, inara kua akapumaana aia ia Paulo ma te au tuatua akamaroiroi: “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.”​—2 Korinetia 12:7-9.

Ka rauka katoa ia tatou te akapapu anga e noatu e kare te Atua e akaatea i tetai manamanata tikai, ka rauka iaia i te ‘akatupu katoa i te akapuanga i taua timataanga ra, kia tika ia [tatou] kia akakoromaki.’ (1 Korinetia 10:13) A tetai ra kare e roa atu ana, ka takore te Atua i te au mamae katoatoa o te tangata nei. I teia taime nei, ko te ariu anga ki “tei akarongo i te pure ra” ka rauka ia te akatukeanga.​—Salamo 65:2.