‘Kua Apii Mai Aia ia Matou kia Akangateitei i Tana Akonoanga’

KO TETAI o te Au Kite o Iehova mei te kotinga enua o Rovigo, i Itaria, kua kite e maki tuma tona e te kino atura tona turanga. I muri ake i te noo anga no tetai nga ra i roto i te are maki, kua pati aia e auraka kia rapakauia na roto i te pamu toto anga, kua akonoia aia i te kainga e te au neti no ko mai i te au pupu angaanga no te maki cancer.

E pakari tikai te akarongo e te papa meitaki o teia vaine maki e 36 mataiti i te taokotai atu kua akakeu oonu tikai i te aronga rapakau tei rapakau iaia. I muri ua ake i tona mateanga no te maki cancer, kua tata tetai neti tei tauturu ana iaia ki roto i tetai makatini no te pae neti anga i tana i kite ana no te vaine maki tana i kapiki e ko Angela.

“E oraora tikai a Angela e te anoano kia ora atu. Kua kite papu tikai aia i tona turanga e te pakari o tona maki, e mei tetai ua atu ia tatou rai, te kimi ra aia i tetai ravenga, tetai rapakauanga, me kare tetai vairakau. . . . Ko matou te au neti kua tomo marie atu ki roto i tona oraanga. Kare matou i aravei ana i te patoianga. No runga i te reira, to Angela tu tuera ua kua riro ei manata kore. E mea mataora tikai kia akono atu iaia, i te mea e kua kite matou e tuatau tau tikai te reira no te piri anga tangata tau e te puapinga i te kapiti atu anga. . . . Kua kite viviki matou no runga i tana akonoanga e ka riro ei arai anga no te rapakau anga i tona maki.” Ko tona manako te reira no te mea te manako ra aia i te tika anga kia orongaia te pamu anga toto kia Angela, tei patoiia e ia.​—Angaanga 15:28, 29.

“Ei aronga kite no te rapakau anga maki, kua akakite atu matou kia Angela e kare matou e ariki atu i tana ikianga, inara na tana tauturu anga, kua marama matou e eaa te aiteanga o te ora kiaia. Kua marama katoa tikai matou i te puapinga o tana akonoanga nona ra e tona ngutuare tangata. Kare a Angela i ariki atu. Kare aia i oronga ua atu ki to te maki tu. E pakari tikai aia. Kua inangaro aia kia ora, kia tamaki, e kia ora ua atu rai. Kua kite aia i tana tauta anga, e tona irinaki anga. E tauta anga pakari tana tei ngere matou i te reira, ko tetai akarongo, i to matou turanga ra kare e pakari roa ana. . . . Kua apii mai a Angela kia matou e kia kite i te puapinga no te akangateitei i tana akonoanga, e apinga tuke tikai mei ta matou au angaanga. . . . Kua irinaki matou i ta Angela i apii mai ia matou e mea puapinga maataia, no te mea kua aravei matou i te au tangata tukeke ravarai, te au turanga tukeke ravarai, e te au akonoanga tukeke ravarai, e kua kite mai matou e ka oronga atu i tetai apinga ki te aronga ta matou i aravei.”

Te akakite maira i reira te atikara o te makatini ki te Ture no te Au Angaanga no te Au Neti o Itaria, tei akatikaia i te 1999, te karanga ra e: “Te rave ra te au neti i te angaanga, i te akamanako anga i te au puapinga akonoanga a te tangata tataki tai, te tu tau, e te au peu, pera katoa te iti tangata e te turanga tane vaine.” I tetai au taime, e mea ngata no te au taote e te au neti kia akangateitei i te irinaki o te au tangata maki, e kia arikiia te au turanga o te aronga tei ariki i te rave i te reira.

Te au ikianga a te Au Kite o Iehova te raveia ra teia no to ratou oraanga e te rapakau anga i te pae vairakau me akara meitakiia atu te reira. Te tamanako pakari ra ratou i ta te au Tuatua Tapu e tuatua ra, tei akatutuia mai e to Angela tu, kare ratou i te aronga patoi pakari. (Philipi 4:5) Takapini i te ao, te tupu maata atura te numero o te aronga kite o te rapakau anga maki tei ariki i te akangateitei o te akava ngakau o ta ratou aronga maki Kite ra.