Te Akaaoanga no te Tereni Anga i te Tamariki i Teia Tuatau

I TE aiai roa anga po, te teateamamao ra tetai ona o te ngai kaikai anga i te tapiri i te ngai kaikai anga e te oki atu ki te kainga. Kua tomo mai i reira nga vaine e rua ma tetai tamaiti e kua ota i tetai kai. No te roiroi tikai, kua manako te ona kia akakite atu kia ratou e te piri nei te ngai kaikai anga, inara kua iki aia i te akapapa i te kai na ratou. Koi pukapuka ra e te kaikai ra nga vaine e rua, te orooro aere ra te tamaiti na roto i te are kaikai, te titiri anga i te au kuki ki runga i te taua e te takatakai ra i te reira ki raro ake i te vaevae. Kare i tapu ana iaia, kua katakata ua te mama o te tamaiti. Te akaruke anga nga vaine i te openga ra, kua tama te ona roiroi i te taua repo ra.

Mei taau rai i kite, te akatutu maira teia turanga oraanga tika tikai i te au ngutuare tangata e manganui, kare e rave meitakiia ana te tereni anga i te tamariki. Tukeke te au tumu. Kua tuku ua etai au metua i ta ratou tamariki kia rave i ta ratou uaorai e inangaro ra, i te manako anga e kia utuutuia te tamariki na roto i tetai tu rangatira anga. Me kare no te maata oki i te angaanga i roto i to ratou oraanga, penei kare te au metua e akono ana i te tuatau kia oronga ki ta ratou tamariki te manako tau e te tereni anga e anoanoia ra. Ko etai au metua te manako ra e e apinga puapinga maata roa atu te apii anga a ta ratou tamariki, no reira vaitata rai e kua oronga ratou ki te tamariki i te rangatira anga kotinga koreia me rauka mai iaia te au maka meitaki i te apii e kia aere atu ki tetai kaoreti rongonui tikai.

Inara, te karanga ra etai e ko te au turanga matauia a nga metua e to te taiate ra te anoanoia ra kia akatikatikaia. Kua taumaro ratou e te o atura te tamariki ki roto i te au tu kino ravarai e te maata atura te ravenga kino i te apii mei tera ra i tera ra. No reira, kua akakite mai tetai puapii maata o tetai apii rotopu i Seoul, i te Repapuriki o Korea, e e mea tau kia raveia te tereni anga i te tu tangata ra ko te mea muaia. Te karanga ra aia e: “I muri ake i to patu anga i tetai tu memeitaki ra ka aru mai ei te tuku anga manako no te kite.”

Te au metua e manganui te inangaro ra i ta ratou tamariki kia aere ki te kaoreti e kia autu i roto i te oraanga kua kopae ke i te au reo akamatakite anga. Me e metua koe, te inangaro ra ainei koe i taau tamariki kia riro mai ei tu tangata aa? Ei tangata mamaata ainei ma tetai manako no te tu akono e te apainga ra? Ko tetai tangata te manako atura i tetai ke, i tei tau, e e tu papu tona ra? Me koia ia, e akamanako ana i te atikara te aru maira ine.