Te Au Karatuati o Gileada Kia Aere ei Aronga Angaanga Kokotianga Maroiroi!

“TE MAATA ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Mataio 9:37, 38) Kua riro taua au tuatua ei aiteanga takake no te aronga apiipii tei karatuatiia o te pupu 116 no te Apii Pipiria Punanga Tiaki o Gileada ia ratou e tapapa atura kia aere atu ki ta ratou au tukuanga angaanga mitinari.

I te Maanakai, Mati 13, 2004, e 6,684 tangata te katoatoa tei akaputu mai ki te Ngai Apiipii Anga Punanga Tiaki i Patterson, New York, e te au ngai tei kapitiia mai na roto i te satellite no te porokaramu karatuati, e kua rauka i te pupu i taua taime ra i te tuatua takake e te akamaroiroi. Ka rauka ia tatou i te puapingaia mei te ako tei oronga ia ia tatou e angaanga maroiroi ra i roto i te kokotianga pae vaerua.

Te tuatua akamataanga na Theodore Jaracz, e mema no te Pupu Akaaere e e karatuati no te pupu itu o Gileada, kua akamaata mai i ta Iesu au tuatua: “Ka aere . . . e akariro i to te pa enua katoa ei pipi.” (Mataio 28:19, 20) Kua tau tikai te reira, mei te mea ra e te tonokia ra te au karatuati kia tavini ki roto e 20 au pa enua tuketuke! Kua akamaara aia i te aronga apiipii e kua akapapa tikai te ikuiku mei ta te Atua Tuatua ia ratou kia riro ei aronga angaanga maroiroi i roto i te kokotianga pae vaerua puapinga maata.​—Mataio 5:16.

Akapeea i te Riro Anga ei Aronga Uua i te Angaanga Kokotianga

Te vaa tuatua mua i runga i te porokaramu ko Robert Wallen, ko tei akapiri vaitata tikai ki te Apii Gileada no te au mataiti. I te tuatua anga no runga i te tumu tuatua “Te Manea o te Aroa,” kua akakite aia i te aronga apiipii e: “Ko te Aroa e reo ia te ka rauka katoaia e te murare i te akarongo e te matapo i te kite.” Kua kite a Iesu i te taitaia o etai ke e kua kimi i te akaiti mai i te reira. (Mataio 9:36) Ka kite mai te aronga apiipii i te au tuatau i te rave akapera rai​—i roto i te angaanga tutu aere, i roto i te putuputuanga, i roto i te are mitinari, e i roto i to ratou uaorai akaipoipo anga. Kua raurau te vaa tuatua i te au karatuati: “E akatika i te manea o te aroa i te akaari i te reira uaorai i roto i toou oraanga ia koe e tavini ra i etai ke. Ko toou tu meitaki roa atu e meitaki oki no te oraanga i te au ra tataki tai i roto i te are mitinari. No reira, kia tauta i te kakau ia koe uaorai i te aroa.”​—Kolosa 3:12.

Tei aru mai ko Gerrit Lösch, e mema no te Pupu Akaaere e e karatuati o te pupu 41 o Gileada, kua akatupu i te tumu manako “Au Papuritia no te Ora.” (Isaia 52:7) No te tangata kia akaora kopapaia me akapouia te akatereanga o te au mea nei o teia taime nei, kia apii ratou i te kite tikai mei te Tuatua a te Atua, kia akakite i to ratou akarongo ki te katoatoa, e kia papetitoia. (Roma 10:10; 2 Timoteo 3:15; 1 Petero 3:21) Inara, te tumu maata no te akakiteanga i te ora kare oki kia akaora ua i te au tangata ravarai, mari ra kia apai mai i te akapaapaaanga ki  te Atua. No reira, kua raurau te Taeake ko Lösch i te au mitinari tau e: “E apai i te karere Patireia ki te pa enua katoa, e kia riro ei au papuritia maroiroi no te ora, pouroa ki to Iehova akapaapaa.”​—Roma 10:18.

“Mei Teaa Tikai Koe i te Marama?” ko te uianga ia ta te tangata ikuiku o Gileada ko Lawrence Bowen i ui ei. Kua tou aia ki ta Iesu au tuatua tei rekotiia ia Mataio 6:22 e kua akamaroiroi i te aronga apiipii tei karatuati kia akono “ngoie” i to ratou mata e rauka ai i te “akaata i te akamaroiroianga i te pae vaerua te akakaka ra ia Iehova e kia puapinga te au taeake tangata.” Mei te akamataanga o tana angaanga orometua, kua akanoo a Iesu i te akaraanga apa kore i roto i teia tu na te tamou marie anga i tona akaraanga ki runga i te rave anga i to te Atua anoano. I te akamanako oonu anga ki runga i te au apinga umere ta tona Metua i apii mai iaia i te rangi ra kua tauturu ia Iesu i te akakoromaki i te au timataanga a Satani i roto i te metepara. (Mataio 3:16; 4:1-11) Kua akaari a Iesu i te irinaki tikai ki runga ia Iehova i te akatupuanga i ta te Atua i oronga kiaia ra kia rave. Pera katoa, e rauka ai i te akono i te au akaaoanga ki mua, kia tamou te au mitinari ma te au peu meitaki no te apii Pipiria e kia irinaki pu tikai ki runga ia Iehova.

Kua taopenga a Mark Noumair, tetai tangata ikuiku o Gileada e tetai karatuati o te pupu 77 o Gileada, i teia au pa tuatua, tuatuaanga no runga i te tumu manako “Tei to Rima Matou Nei.” (Iosua 9:25) Kua akamaroiroi aia i te aronga apiipii  kia aru i te tu o te ngati Gibeona taito ra. Noatu a Gibeona e e “oire maata, . . . e e tangata toa anake oki to reira tangata,” kare te ngati Gibeona i maro kia kitea ia mai me kore kua tapapa kia raveia te au apinga ki ta ratou i inangaro. (Iosua 10:2) Kua tavini puareinga ratou ei “pāpā vaie i taua rā ra, e ei kave vai” i raro i te ngati Levi ei turuturu i ta Iehova ra akamori anga. (Iosua 9:27) E tikai, kua karanga te au mema o te pupu tei karatuati ki te Iosua Maata, ko Iesu Karaiti e, “Tei to rima matou nei.” I teianei, ia ratou e apai ra i ta ratou au tukuanga angaanga i te ngai ke aere, ka anoanoia ratou kia ariki i tetai ua atu angaanga ta te Iosua Maata ka oronga kia ratou kia rave.

Au Tupuanga e te Au Uiuianga

“Ka Akataka Mai i te Tuatua Tapu” ko te tumu tuatua ia no tetai uriurianga ta Wallace Liverance, tetai tei karatuati o te pupu 61 o Gileada e ko tetai o te au tangata ikuiku, i rave ei ki tetai pupu aronga apiipii. Kua akakite mai ratou e kua rave akaouia te au tupuanga tei rekareka ia e ratou i roto i te angaanga orometua koro i te taime o te tuatau apii. Te kite pu ia ra e kua taeria te apii pakari o te au Tuatua Tapu i te rima marama o te terenianga i to ratou ngakau e kua akakeu ia ratou kia oronga atu ki etai ke i ta ratou i tamou mai. (Luka 24:32) I te rima marama i te terenianga, kua rauka i tetai o te aronga apiipii i te oronga atu ki tona uaorai teina tikai tana i tamou mai. Kua akamaroiroi teia i tona teina kia kimi i te putuputuanga i reira e kia akamata i tana uaorai apii o te Pipiria. Kua tau aia i teianei ei papuritia kare i papetitoia ake.

Aru mai i teia au tupuanga, kua rave a Richard Asher raua ko John Gibbard i te au uiuianga ma te au tavini tiratiratu e manganui o Iehova kua roa te tuatau, kapiti mai te au akaaere tutaka tei rauka ia ratou i te terenianga takake i ko i te Ngai Apiipii Anga Punanga Tiaki. E au karatuati oki ratou no te au pupu o mua o te Apii Gileada. Kua maara i tetai e kua karanga te Taeake ko Knorr i teia i te tuatau o te apii: “I Gileada ka rave maata koe i te apii. Inara me ka aere mai koe ki vao ma te katu maata, kua poka i reira matou. Ka inangaro matou kia aere mai koe ki vao ma te ngakau maata.” Kua akakite te au taeake teretere i te pupu o teia taime nei kia manako atu i te tangata, kia akono ia etai atu mei ia Karaiti rai, e kia ariki akaaka i tetai ua atu tukuanga angaanga orongaia kia ratou. Kare e ekokoanga e na te akonoanga i teia ako ka tauturu i te au mitinari ou kia uua i roto i ta ratou au tukuanga angaanga.

Kia Aere ei Aronga Angaanga Kokotianga Maroiroi!

Kua rauka te katoatoa i te tuatau i te akarongo atu mei ia Stephen Lett, ko tetai mema akaou mai o te Pupu Akaaere. Kua oronga aia i te tuatua puapinga tikai o te porokaramu, te ingoa “Kia Aere ei Aronga Angaanga Kokotianga Maroiroi!” (Mataio 9:38) I te kokotianga tikai, kua kotingaia te tuatau no te kokotianga i te mea tanuia. E umuumuanga tetai no te aronga kokotianga i te angaanga pakari. Mei teaa tikai te puapinga o te reira i te openga o teianei akatereanga o te au mea nei! I roto i te kokotianga maata i te pae vaerua, tei roto te oraanga i te tu kino. (Mataio 13:39) Kua akamaroiroi te Taeake ko Lett i te au karatuati, eiaa ‘e tavarevare i ta ratou angaanga,’ mari ra “kia kaka ma te vaerua” e kia “tavini ia Iehova” i roto i teia kokotianga kare e rave akaouia. (Roma 12:11, NW) Kua taiku te vaa tuatua i ta Iesu au tuatua: “Ka akateitei i to kotou mata, ka akara i te au koro ra; kua teatea ïa i teianei kua mou.” (Ioane 4:35) Kua raurau i reira aia i te au karatuati kia akaari i to ratou maroiroi no te angaanga kokotianga na te tukuanga ki mua i te tautaanga tikai i te itae i te au tangata i te taime e i te ngai e kiteaia e ratou e na te akonoanga i te au tuatau katoatoa kia rave i te akakitekite ua anga. Na te matakite anga kia akatupuia te au mea ka ngoie ua i te oronga atu i tetai kite puapinga tikai. E Atua maroiroi a Iehova, e te tapapa ra aia ia tatou katoatoa kia aru iaia e kia angaanga pakari i roto i te kokotianga pae vaerua.​—2 Ariki 19:31; Ioane 5:17.

I te taopenga anga i te porokaramu, kua oronga te tiamana, te Taeake ko Jaracz, i te au aroa mei te au opati manga e manganui e kua oronga ki te aronga apiipii i ta ratou au tiporoma. Kua tatau tetai o te au karatuati i tetai reta mei te pupu, i te akakiteanga i te ariki oonu no te terenianga tei rauka mai ia ratou. Te taka meitaki ra, kua akakeu te porokaramu karatuati o te pupu 116 i te katoatoa tei tae kia tauta maata atu kia aere atu ei aronga angaanga kokotianga maroiroi.

[Pia i te kapi 25]

TE AU TU O TE PUPU

Numero o te au enua tei komonoia: 6

Numero o te au enua tei tukuia: 20

Numero o te aronga apiipii: 46

Mataiti avereti: 34.2

Au mataiti avereti i roto i te tuatua mou: 17.2

Au mataiti avereti i roto i te angaanga tamou: 13.9

[Tutu i te kapi 26]

Te 116 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.