“Apii Atu ia Ratou, kia Akono i te Au Mea Katoa Taku i Akaue Atu kia Kotou”

‘E teianei, ka aere kotou, e akariro i te tangata ei pipi . . . , ma te apii atu ia ratou, kia akono i te au mea katoa taku i akaue atu kia kotou.’​—MATAIO 28:19, 20, akaaite ia NW.

1. Eaa te tuatua tei raveia i rotopu i te pipi ko Philipa e tetai tangata no Etiopia mai?

KUA aere atu te tangata no Etiopia mai ki Ierusalema. I reira kua akamori aia i te Atua tana e inangaro ra, ko Iehova. I te akaraanga, kua inangaro katoa aia i te Tuatua akauruia a te Atua. I tona oki anga ki te kainga ki runga i tona kariota, te tatau ra aia i tetai kopi o te au tata anga a te peroveta ko Isaia i te aravei anga mai a Philipa, e pipi na Karaiti, iaia ra. Kua ui atura a Philipa ki te tangata Etiopia e: “Te kite na koe i taau e tatau na?” Kua pau maira te tangata e: “Eaa au e kite ei, naringa e tangata te akakite mai kiaku?” Kua rave iora a Philipa i te tauturu i teia tangata apii ngakau tae no te Tuatua Tapu kia riro mai ei pipi na Karaiti.​—Angaanga 8:26-39.

2. (a) Na roto i teea tu i riro ei ei puapinga anga te pau anga tei orongaia mai e te tangata Etiopia ra? (e) Eaa te au uianga te piri atura ki ta Karaiti akauenga kia akariro i te tangata ei pipi ra ka akamanako tatou?

² E mea meitaki kia akamanakoia te pau anga a te tangata Etiopia. E tikai, te anoano ra aia i tetai tangata kia arataki iaia kia marama oki e eaa tana e tatau ra. I roto i to te reira uaorai tu, te akatutu maira teia tuatua i te puapinga maata o tetai ikuikuanga taka meitaki ta Iesu i kapiti mai i roto i tana akauenga kia akariro i te tangata ei pipi. Eaa oki te ikuikuanga? Kia kitea te pau anga, e akara rai tatou i ta tatou akamanakoanga i te au tuatua a Iesu tei kitea i roto ia Mataio pene 28. Ko te atikara i mua akenei kua akara tika ki runga i te au uianga e eaa ra? e kiea ra? Ka akamanako tatou i teianei i nga uianga e rua te piri ra ki ta Karaiti akauenga kia akariro i te tangata ra ei pipi​—eaa? e aea?

“Apii Atu ia Ratou, kia Akono i te Au Mea Katoa”

3. (a) Akapeea tetai tangata e riro mai ei ei pipi na Iesu Karaiti? (e) Te akariro anga i te tangata ei pipi te kapiti maira i te apii anga i teaa?

³ Eaa ta tatou ka apii atu e tauturu ei i tetai kia riro mai ei pipi na Karaiti? Kua akaue a Iesu i tana au pipi e: ‘E teianei, ka aere kotou, e akariro i te tangata i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; ma te apii atu ia ratou, kia akono i te au mea katoa taku i akaue atu kia kotou.’ (Mataio 28:19, 20, akaaite ia NW) No reira, kia apii tatou i te au mea ta Karaiti i akaue mai. * Inara, eaa te ka tauturu i te akapapu ki tetai tangata tei apiiia te au akauenga a Iesu e kare e kia riro ua mai ei pipi ra kareka ra kia vai tamou ua rai e ko tetai ra? Ko tetai tumu maata te kiteaia ra koia oki i roto i te au tuatua iki meitakiia a Iesu. E akara ana, kare aia e karanga ua ra e: ‘E apii ia ratou i te au mea katoa taku i akaue atu kia kotou.’ Kareka ra, te karanga ra aia e: ‘E apii ia ratou, kia akono i te au mea katoa taku i akaue atu kia kotou.’ (Mataio 19:17) Eaa te aite anga o te reira?

4. (a) Eaa te aite anga e kia akono i tetai akauenga? (e) E akatutu mai e akapeea tatou i te apii anga i tetai tangata kia akono i te au akauenga a Karaiti.

⁴ Kia akono i tetai akauenga ko te aite anga kia “taui ta tetai ra angaanga” ki tetai akauenga​—kia akarongo, me kare kia akono, i te reira. Akapeea, i  reira, me apii tatou i tetai kia akono, me kare kia akarongo, ki te au mea ta Karaiti i akaue mai? I na, e akamanako ana i te tu te apii ra tetai puapii akaoro i tana aronga e apii ra i te akaoro kia akono i te au ture i te pae akaoro anga. Penei ka apii te puapii akaoro i tana aronga e apii ra i te akaoro i te au ture no te mataara ia ratou i roto i te are apii. Inara, kia apii i tana aronga e apii ra i te akaoro e akapeea i te akono anga i taua au ture, ka arataki aia i te aronga e apii ra i te akaoro mei te mea rai e te akaoro tikai ra ratou i runga i te mataara e te tauta pakari ra i te taangaanga i te apii ta ratou i apii ana. Pera katoa, me apii tatou i te Pipiria ki te tangata, te apii ra tatou kia ratou i te au akauenga a Karaiti. Inara, te anoano katoa ra tatou i te arataki i te aronga apii ia ratou e tauta ra i te akono i te au ikuikuanga a Karaiti i roto i to ratou au oraanga i te au ra ravarai e i roto i te angaanga orometua. (Ioane 14:15; 1 Ioane 2:3) No reira, te rave ki katoa anga i ta Karaiti akauenga kia akariro i te tangata ei pipi te umuumuia ra kia riro katoa tatou ei au puapii e ei au arataki. Na roto i te reira tu, te aru ra tatou i te akaraanga tei akanooia e Iesu e pera a Iehova uaorai.​—Salamo 48:14; Apokalupo 7:17.

5. Eaa ra tetai tangata ta tatou e apii ra i te Pipiria ka tapupu ei i te akarongo ki ta Karaiti akauenga kia akariro i te tangata ei pipi ra?

⁵ Te apii anga i tetai ke kia akono i te au akauenga a Iesu te kapiti maira i te tauturu anga ia ratou kia akarongo ki te akauenga kia akariro i te tangata ra ei pipi. Ko etai ta tatou e apii ra i te Pipiria, penei e ravenga ngata te reira. Noatu e me e au mema maroiroi ratou i mua ana no tetai ekaretia o Kerititome, e mea papu e kare to ratou au puapii o te akonoanga mua i apii ana ia ratou kia aere e akariro i te tangata ra ei pipi. Te akatika nei etai au arataki akonoanga e me tae mai ki te apii anga i ta ratou anana kia tutu i te evangeria, puapinga kore ua tikai a Kerititome. I te tuatua anga no runga i ta Iesu akauenga kia aere ki roto i teianei ao e kia tauturu i te au tu tangata ravarai kia riro maira ei pipi, kua akakite te tangata apii Pipiria ko John R. W. Stott e: “No to matou akarongo kore anga ki te au akataka anga o teia akauenga nei e tu paruparu maata roa atu ia no te au Kerititiano tutu evangeria i roto i te ngai no te tutu aere anga i te evangeria i teia tuatau.” Kua akakite mai aia e: “E manako ana matou i te akakite atu i ta matou karere mei tetai ngai mamao. I tetai taime mei tetai tangata rai i te pae taatai matou te kapikipiki ua rai te akamatakite anga ki te au tangata te maremo ra. Kare matou e rere atu i te akaora mai ia ratou. Mataku matou i te mauu anga.”

6. (a) I te tauturu anga i tetai tangata apii Pipiria, akapeea e rauka ai ia tatou i te aru i te akaraanga o Philipa? (e) Akapeea tatou i te akaari anga i to tatou manako me akamata tetai tangata apii Pipiria i te piri anga mai ki roto i te angaanga tutu anga?

⁶ Me e tuanga tetai tangata no tetai akonoanga i mua ana ta tatou e apii ra i te Pipiria e te ‘mataku ra [to te reira au mema] i te mauu anga,’ penei e akaaoanga te reira nona kia autu i tona mataku  no te vai, ei tuatua akatutu ua, e te akarongo anga ki ta Karaiti akauenga kia akariro i te tangata ei pipi ra. Te anoano ra aia i te tauturu. No reira, te anoanoia ra kia akakoromaki tatou ia tatou e oake ra kiaia te ikuikuanga e te arataki anga te akaoonu ra i tona marama e te akakeu anga iaia kia rave i te angaanga, mei te au apii anga a Philipa i te akamarama anga i te tangata Etiopia e te akakeu anga iaia kia papetitoia. (Ioane 16:13; Angaanga 8:35-38) Kapiti katoa mai, to tatou anoano kia apii i te aronga apii Pipiria kia akono i te akauenga kia akariro i te tangata ei pipi te akakeu ra ia tatou kia angaanga i te pae ia ratou i te arataki anga ia ratou me rave ratou i ta ratou au takainga mua i roto i te tutu anga i te Patireia.​—Koheleta 4:9, 10; Luka 6:40.

“Te Au Mea Katoa”

7. Te apii anga i tetai kia “akono i te au mea katoa” te kapiti maira i te apii anga ia ratou ki teea au akauenga?

⁷ Kare tatou e kotinga ua ia tatou uaorai i te apii anga i te au pipi ou kia akariro i te tangata ei pipi. Kua ikuiku mai a Iesu ia tatou kia apii i tetai ke kia “akono i te au mea katoa” tana i akaue mai. Te kapiti tikai maira te reira i nga akauenga maata roa atu e rua​—kia aroa atu i te Atua e kia aroa atu i te tangata tupu. (Mataio 22:37-39) Akapeea e apiiia ai tetai pipi ou kia akono i taua au akauenga?

8. E akatutu mai e akapeea tetai pipi ou penei kua apiiia te akauenga kia akaari i te aroa.

⁸ E akamanako akaou ana i te akatutuanga o te tangata akaoro e apiiia ra. I te tangata akaoro e apiiia ra i te akaoro i runga i te mataara ma te puapii akaoro i te pae iaia ra, te apii ra te tangata e apiiia ra kare e kia akarongo ua ki tona puapii akaoro mari ra kia akara katoa i tetai au tangata akaoro motoka. Ei akatauanga, penei ka tou atu te puapii akaoro i tetai tangata akaoro te akatika aroa ra i tetai kia aere mai ki mua iaia i runga i te mataara; me kare ra i tetai tangata akaoro tei akapopoiri i te mori i mua i tona motoka kia kore oki e akamatapoia te katoatoa te aere maira mei tetai tua; me kare ra i tetai tangata akaoro tei oronga puareinga ua i te tauturu ki tetai oa kua kino tona motoka. Te apii maira taua au akaraanga ki te tangata e apiiia ra i te au apiianga puapinga maata tana ka rauka i te akono me akaoro aia. Mei te reira katoa, ko tetai pipi ou te aere ra i runga i te mataara ki te ora te apiiia ra kare mei tona uaorai puapii mari ra mei te au akaraanga meitaki katoa tana e kite ra i roto i te putuputuanga.​—Mataio 7:13, 14.

9. Akapeea tetai pipi ou i te apii anga e eaa te aite anga kia akono i te akauenga kia akaari i te aroa?

⁹ Ei akatauanga, penei ka akara tetai tangata apii Pipiria i tetai metua okotai ua i te tuku maata anga i te tauta anga kia tae mai ki te Are Uipaanga Patireia ma tana tamariki rikiriki i te aru mai anga. Penei ka kite aia i tetai tangata taitaia tei aere mai ma te tiratiratu ki te au uipaanga noatu te putoto ra aia i te tu taitaia, ko tetai vaine pakari takaua te apai maira i tetai aronga pakarikari ki te au uipaanga putuputuanga katoa, me kare i tetai mapu te o atura ki roto i te tama anga i te Are Uipaanga Patireia. Penei ka akara te tangata apii Pipiria i tetai tangata pakari o te putuputuanga tei rave tiratiratu i te arataki i te tavini anga koro noatu e manganui tana au apainga putuputuanga. Penei ka aravei aia i tetai Kite tei akangoruia e kua akanooia i roto i te are inara ei tumu anga no te akamaroiroi anga i te pae vaerua ki te katoatoa tei atoro atu iaia. Penei ka akara te tangata apii i tetai nga tokorua akaipoipo te rave ra i te au taui anga maata i roto i to raua oraanga kia rauka i te tavini ei nga tangata akono i to raua nga metua pakarikari. Na te akara anga i taua au Kerititiano aroa, tauturu, e te irinaki ra, te apiiia ra te pipi ou na roto i te akaraanga e eaa te aite anga kia akarongo ki ta Karaiti akauenga kia aroa atu i te Atua e te tangata tupu ra, ko te au taeake irinaki tikai ra. (Maseli 24:32; Ioane 13:35; Galatia 6:10; 1 Timoteo 5:4, 8; 1 Petero 5:2, 3) Na roto i teia tu, ka rauka​—e ka tau i te mema tataki tai o te putuputuanga Kerititiano ra​—kia riro mai ei puapii e ei arataki.​—Mataio 5:16.

“E Tae ua Atu ki te Openga o Teianei Ao”

10. (a) Mei teaa te roa ka rave ua atu ei tatou i te akariro anga i te tangata ei pipi ra? (e) Eaa te akaraanga ta Iesu i akanoo no runga i te rave anga i te au tukuanga angaanga?

¹⁰ E tae roa atu ei e aea tatou e rave ei i te akariro anga i te tangata ei pipi ra? Kia tae ua atu ki te openga o teianei ao. (Mataio 28:20) Ka rauka ainei ia tatou i te akatupu i teia tu o ta Iesu akauenga? Ei putuputuanga i te ao katoa, ka tauta tatou i te rave i te reira. I te au mataiti i topa akenei, kua oronga rekareka tatou i to tatou taime, te maroiroi, e te au apinga kia kimi i te aronga tei “akonoia no te ora mutu kore.” (Angaanga 13:48)  I teia tuatau, te akapou nei te Au Kite o Iehova i tetai avereti e toru mirioni ora e ara atu i te au ra ravarai o te mataiti i roto i te angaanga tutu anga Patireia e te akariro anga i te tangata ei pipi i te ao katoa. Te rave nei tatou i te reira no te mea te aru ra tatou i to Iesu akaraanga. Kua akakite mai aia e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) To tatou anoano manako ngakau tae katoa te reira. (Ioane 20:21) Te inangaro ra tatou e maata atu i to te akamata anga i te angaanga tei orongaia mai kia tatou; to tatou inangaro anga kia akaoti i te reira.​—Mataio 24:13; Ioane 17:4.

11. Eaa tei tupu ki etai o to tatou au taeake e te au tuaine Kerititiano, e eaa ta tatou ka ui kia tatou uaorai?

¹¹ Inara, te mii nei tatou, i te akara anga atu e kua paruparu etai o to tatou au taeake irinaki i te pae vaerua e, tei tupu mai, kua akamarie mai me kore kua akamutu i te rave i ta Karaiti akauenga kia akariro i te tangata ei pipi. E mataara ke atu ainei tetai ka rauka ia tatou i te tauturu ia ratou kia akaou i to ratou taokotai anga ki te putuputuanga e kia akamata akaou ratou i te piri atu ki roto i te akariro anga i te tangata ei pipi ra? (Roma 15:1; Ebera 12:12) Te mataara i tauturu ei a Iesu i tana au apotetoro i roto i to ratou turanga paruparu no tetai tuatau poto ua te akakite maira e eaa ta tatou ka rave i teia tuatau.

E Akaari i te Manako

12. (a) I mua ua ake i to Iesu matenga, te rave ra tana au pipi i teaa? (e) Akapeea a Iesu i te akono anga i tana au pipi noatu e kua akaari mai ratou i te au tu paruparu tikai?

¹² I te openga o ta Iesu angaanga orometua i runga i te enua nei, te vaitata anga mai tona mate, “kua akaruke iora [te au apotetoro] iaia, oro atura.” Mei ta Iesu i akakite mai ana, kua ‘pueurikiriki ke atura [ratou] ko te tangata ko tona uaorai kainga.’ (Mareko 14:50; Ioane 16:32) Akapeea a Iesu i te akono anga i tona au oa paruparu i te pae vaerua? I muri poto ua ake i tona akatuia anga, kua akakite a Iesu ki etai o tana au pipi: “Auraka e mataku: ka aere, ka akakite atu ki taku au taeake, e aere ratou ki Galilea; ei reira ratou e kite mai ei iaku.” (Mataio 28:10) Noatu e kua akaari mai te au apotetoro i te tu paruparu tikai, kua kapiki rai a Iesu ia ratou “toku ai taeake.” (Mataio 12:49) Kare i ngaro ana tona irinaki i roto ia ratou. Na roto i teia tu, e tu aroa e te akakore i te ara to Iesu, mei to Iehova ra tu aroa e te akakore anga i te ara. (2 Ariki 13:23) Akapeea tatou i te aru anga ia Iesu?

13. Akapeea tatou i te manako anga i te aronga tei paruparu i te pae vaerua?

¹³ E mea tau kia manako oonu tatou no te aronga tei akamarie me kare tei akamutu i te piri atu ki roto i te angaanga orometua. Te maara nei rai ia tatou i te au angaanga o te aroa a taua au taeake irinaki ra i rave ana i te tuatau i topa​—penei ake no etai au ngauru mataiti. (Ebera 6:10) Te mii tikai nei tatou i to ratou pirianga oa. (Luka 15:4-7; 1 Tesalonia 2:17) Inara, ka akapeea, tatou i te akakite anga i to tatou manako no ratou?

14. I te aru anga ia Iesu, akapeea tatou i te tauturu anga i tetai tangata paruparu?

 ¹⁴ Kua akakite a Iesu ki te au apotetoro maromaroa e kia aere ratou ki Galilea e ka kite ratou iaia i reira. I te tika anga, kua pati a Iesu ia ratou kia aere atu ki tetai uipaanga takake. (Mataio 28:10) Mei tei reira katoa i teia tuatau, te akamaroiroi nei tatou i te aronga tei paruparu i te pae vaerua kia aere mai ki te au uipaanga a te putuputuanga Kerititiano, e penei ka anoanoia tatou kia akamaroiroi atu ia ratou e maata atu te taime i te rave anga i te reira. I roto i te turanga o te au apotetoro, kua akatupu mai te patianga i te ua, no te mea kua “aere atura te au pipi tino ngauru ma tai ra ki Galilea, i tetai maunga ta Iesu i tuatua mai kia ratou ra.” (Mataio 28:16) Mei teaa ra to tatou manako rekareka me ariu mai te aronga paruparu ki ta tatou au patianga maana e te akamata akaou anga i te aere mai ki te au uipaanga Kerititiano ra!​—Luka 15:6.

15. Akapeea tatou i te aru anga i to Iesu akaraanga i te ariki anga i te aronga paruparu tei aere mai ki to tatou ngai uipaanga?

¹⁵ Akapeea tatou i te ariu anga atu me tae mai tetai Kerititiano paruparu ki te Are Uipaanga Patireia? I na, eaa ta Iesu i rave i tona kite anga atu i tana au apotetoro, tei paruparu no tetai tuatau poto ua i te akarongo ra, i te tae anga mai ki te ngai i ikiia no te uipaanga ra? “Kua akavaitata mairā Iesu, na ko maira kia ratou.” (Mataio 28:18) Kare aia i akara ua mai ia ratou mei te ngai mamao inara kua akavaitata maira kia ratou. E akamanako ana mei teaa rai te manako rekareka o te au apotetoro i te rave anga a Iesu i te tamata anga! Kia rave katoa tatou i te tamata anga e te ariki pumaana anga i te aronga paruparu i te pae vaerua tei rave i te tauta anga kia oki mai ki te putuputuanga Kerititiano.

16. (a) Eaa tei apiiia mai kia tatou mei te akara anga i to Iesu akono anga i tana au pipi? (e) Akapeea tatou i te akaata anga i to Iesu manako no te aronga paruparu ra? (Akara i te tataanga i raro ake.)

¹⁶ Eaa ua atu ta Iesu i rave? Te mea mua, kua rave aia i tetai akakite anga: ‘Ko te mana katoa kua tukuia mai, tei iaku anake.’ Te rua, kua oronga aia i tetai tukuanga angaanga: ‘E teianei, ka aere e akariro i te tangata ei pipi.’ Te toru, kua rave aia i tetai taputou: ‘Tei vaitata ua ra au ia kotou i te au ra katoa.’ Inara te kite ra ainei koe e eaa ta Iesu kare i rave ana? Kare aia i ako atu ana i te au pipi no to ratou au tarevake e te au manako ekoko. (Mataio 28:17) E meitaki ainei tana aravei anga? Ae. Kare i roa ana, kua rave akaou te au apotetoro “i te apii anga atu e te tuatua anga atu [“i te tuatua meitaki,” NW].” (Angaanga 5:42) Na te aru anga i te akaraanga a Iesu e akapeea i te manako anga e akapeea i te akono anga i te aronga paruparu, penei ka kite katoa tatou i te au tupuanga ngakau pumaana i roto i to tatou uaorai putuputuanga. *​—Angaanga 20:35.

‘Tei Vaitata ua ra Au ia Kotou i te Au Ra Katoa’

17, 18. Eaa te au manako akamaroiroi anga te vaira i roto i te au tuatua a Iesu, ‘tei vaitata ua ra au ia kotou i te au ra katoa’?

¹⁷ Te au tuatua openga o ta Iesu akauenga, ‘tei vaitata ua ra au ia kotou i te au ra katoa,’ te vaira  tetai manako akamaroiroi anga no te katoatoa tei tauta i te akatupu i ta Karaiti akauenga kia akariro i te tangata ei pipi ra. Noatu eaa te patoianga ta te au enemi ka apai mai ki runga i ta tatou angaanga tutu anga i te Patireia e eaa ua atu te au tu no te akakino anga ta ratou ka tuku mai ki runga ia tatou, kare o tatou tumu anga kia mataku. Eaa ka kore ei? Tei ia tatou a Iesu, to tatou Arataki, ‘te mana katoa o to te rangi e te ao katoa,’ i te turu ia tatou!

¹⁸ Ta Iesu taputou ‘tei vaitata ua ra au ia kotou i te au ra katoa’ e tumu anga katoa no te akapumaana anga maata. Ia tatou e tauta ra i te rave i ta Karaiti akauenga kia akariro i te tangata ei pipi, kare tatou e kite ua i te au ra no te rekareka mari ra i te au ra katoa no te tu maromaroa. (2 Paraleipomeno 6:29) Ko etai ia tatou te kite ra i te au tuatau mii tikai i te aue anga i te matenga o tetai tei akaperepereia ra. (Genese 23:2; Ioane 11:33-36) Ko tetai papaki te autu ra i te ruaine anga, i te kino anga te oraanga i te pae kopapa e te maroiroi. (Koheleta 12:1-6) Ko tetai papaki te aro atura rai i te au ra i to ratou tamanamanata angaia e te au manako taitaia. (1 Tesalonia 5:14) E e maata ua atu te numero o tatou te putoto ra i roto i te au tu ngata i te pae moni. Inara, noatu taua au akaaoanga, te autu nei tatou i roto i ta tatou angaanga orometua no te mea tei ia tatou a Iesu ‘i te au ra katoa,’ kapiti anga mai i te au ra taitaia roa atu o to tatou oraanga.​—Mataio 11:28-30.

19. (a) Ta Iesu akauenga kia akariro i te tangata ei pipi ra eaa te au ikuikuanga te vaira? (e) Eaa te tauturu ra ia tatou kia akatupu i ta Karati akauenga?

¹⁹ Mei ta tatou i kite ana i roto i teia atikara e to mua akenei, ta Iesu akauenga kia akariro i te tangata ei pipi ra te kapiti maira i te au tu ravarai. Kua akakite mai ana a Iesu kia tatou e eaa ra e kiea ra e raveia ai e tatou tana akauenga. Kua akakite katoa mai ana aia kia tatou e eaa ta tatou ka apii e aea tatou e rave roa atu ei i te reira. E tikai, te akatupu anga i teia akauenga maata e akaaoanga ia. Inara ma to Karaiti mana e turu ra ia tatou e iaia i te pae ia tatou, ka rauka ia tatou i te akatupu i te reira! Ka ariki ainei koe?

[Au Tataanga Rikiriki i Raro]

Akapeea Koe me Pau?

• Akapeea tatou i te apii anga i tetai kia akono i ta Iesu i akaue mai?

• Eaa te au apiianga ta tetai pipi ou ka kite mei tetai papaki i roto i te putuputuanga?

• Eaa ta tatou ka rave e tauturu ei i te aronga tei paruparu i te pae vaerua?

• Eaa te maroiroi e te pumaana te ka rave mai tatou mei ta Iesu taputou e ‘tei vaitata ua ra au ia kotou i te au ra katoa’?

[Au Uianga Apii]

[Au Tutu i te kapi 15]

Te anoanoia ra tatou kia riro ei au puapii e ei au arataki

[Au Tutu i te kapi 17]

Te apii ra tetai pipi ou i te au apiianga puapinga mei te akaraanga tei akanooia e tetai papaki