Ko te Atua Ainei Tei Apa no to Tatou Au Manamanata?
Ko te Atua Ainei Tei Apa no to Tatou Au Manamanata?
TE TU anga ta Marion tamaine maata i tetai maki kino o te roro ra, kua rave a Marion ta tatou e manganui i rave ana. * Kua pure aia ki te Atua no te tauturu. “Kare e maara ana iaku tetai ua atu tuatau toku manako puapinga kore ua e ko au anake rai,” i karanga ai a Marion. I muri mai, kua taui kino te turanga o tana tamaine, e kua akamata a Marion i te ekoko no runga i te Atua. “Eaa ra teia i tupu ei?” i ui ei aia. Kare aia i marama ana e akapeea roa ai tetai Atua aroa e te manako maira i te akaruke anga iaia.
E mea matauia to Marion tupuanga. E maata ua atu te au tangata i te ao katoa te manako ra e kua akarukeia mai e te Atua i te au tuatau e anoanoia ra. “Te putoto nei rai au ma te ‘au uianga e no teaa ra e te ATUA e,’” i karanga ai a Lisa i muri ake i te taia anga tana mokopuna. “Kare i ngaro ake iaku te akarongo i roto i te Atua, inara kua taui tikai te reira.” Mei te reira katoa, i muri ake i te kite anga i tetai tumatetenga manako kore tei o atu tana tamaiti varevare ra, kua tuatua tetai vaine e: “Kare te Atua i oronga mai ana i tetai akapumaana anga kiaku no tei tupu ra. Kare aia i akaari mai ana i tetai akairo kiaku me kare i te tangi aroa.” Kua tuatua katoa mai aia e: “Kare rava au e akakore atu i ta te Atua i rave.”
Ko tetai ra kua akatupu i te au manako riri no te Atua me akara ratou i te ao te takapini ra ia ratou. Te kite ra ratou i te au taiate kua oripu ua i te putaua e te onge, te aronga oro-kimiora kare e manakonako anga, te au tamariki matiroeroe kare e rauka i te tareia no te AIDS oki, e te au tangata e mirioni ua atu tei tuia e tetai au maki ra. I te aro anga atu i teia e te au tumatetenga mei te reira rai, e manganui tei akaapa i te Atua no tona manako kore anga i te rave i te angaanga.
Inara, ko te tika ra, kare tei te Atua te apa no te au manamanata te akakino ra i te au tangata ravarai. Te tika anga, te vaira te au tumu tau kia irinaki e kare e roa atu ana ka akamatara te Atua i te kino tei tupu ki runga i te ngutuare tangata. Te pati atu nei matou ia koe kia uri ki te atikara te aru maira e kia akara e te manako tikai maira te Atua ia tatou.
[Tataanga Rikiriki i Raro]
^ para. 2 Tauiia te au ingoa.