Te Manako Tikai Maira te Atua ia Koe

E MEA matauia i te kapiki i te tauturu ki te Atua me tei roto tatou i te au tu manamanata. No te mea, koia oki te ‘maata, e te mana maata; tona kite, e mea kitea koreia kia kimi.’ (Salamo 147:5) Tei iaia te turanga meitaki roa atu i te tauturu ia tatou kia autu i to tatou au manamanata. Kapiti atu ki te reira, te pati maira te Pipiria ia tatou kia ‘riringi i to tatou ngakau’ ki mua iaia. (Salamo 62:8) No teaa ra, i reira, i manako ei te manganui e kare te Atua i pau mai ana i ta ratou au pure? Ko te aite anga ainei ia e kare aia e manako mai ana?

Kare ra e viviki ua i te akaapa i te Atua no te ngere anga no tetai ua atu angaanga, e oki ra i te akamaara i te tuatau i toou tamariki anga. Te kore anga to nga metua e akatika atu i te au taumaro anga ravarai aau ra, i akaapa ana ainei koe ia raua no te kore oki i aroa mai ia koe? E manganui te au tamariki i akapera ana. Inara, i toou maata anga mai, kua ariki koe e te akaariia ra te aroa na roto i te au mataara e manganui e te tuatua anga e ae ki te au pati anga katoatoa a te tamariki ra kare ei mea aroa tikai kia raveia.

Mei te reira katoa, me kare a Iehova e pau mai i ta tatou au pure ki ta tatou e inangaro ra, kare te aite anga e kare aia e akarongo maira kia tatou. Ko te tika, te akaari maira te Atua i tona manako no tatou katoatoa i roto i te au mataara e manganui.

“Nona oki to Tatou Ora”

Te mea mua, no te Atua oki i akameitakiia ai “to tatou ora, e i aaere ei, e i noo ei oki.” (Angaanga 17:28) Te oronga anga mai kia tatou i te ora e mea papu e te akaari maira aia i te manako aroa no tatou!

Pera katoa, te oronga maira a Iehova i ta tatou e anoano ra e rauka ai ia tatou kia ora ua atu. E tatau tatou: “Te akatupu nei koe i te ngangaere na te au puaka, e te rakau rikiriki na te tangata: te rauka nei te kai no roto i te enua.” (Salamo 104:14) Te tika anga, e maata atu ta Tei Anga ia tatou i oronga mai ei au mea anoano anga no te oraanga. Te oronga aroa maira aia i te “ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.”​—Angaanga 14:17.

Noatu rai, penei te manako ra etai e, ‘Me te aroa maata maira te Atua ia tatou, eaa aia i tuku ua ai ia tatou kia mamae?’ Kua kite ainei koe i te pau anga ki taua uianga ra?

Ko te Atua Ainei te ka Akaapaia?

Te maata anga o te mamae o te tangata ra na ratou uaorai i akatupu. Ei akaraanga, kua kiteaia te au kino o tetai au angaanga te tuku ra i te oraanga ki roto i te kino. Noatu rai, te piri nei te au tangata ki roto i te ainga tau kore, te inu tau kore i te kava e tetai atu au apinga akakona, te kai avaava, te piri anga ki roto i te au tarekareka kino roa atu te akaoro viviki anga, e te vai atura. Me te akatupu ra taua tu kino i te mamae anga, koai te ka akaapaia? Ko te Atua me kare ko tetai ainei te rave pakari kore ra? Te akakite maira te Tuatua akauruia a te Atua e: “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti.”​—Galatia 6:7.

Kapiti atu, te tamamae ra te au tangata i tetai e tetai. Me akakite tetai pa enua e ka tamaki, papu e kare te Atua i apa no te mamae tei tupu mai. Me ta tetai tangata kino i tetai taeake tangata, ko te Atua ainei te ka akaapaia no tetai ua atu kino e tupu maira me kare no te mate ra? Kare rava! Me takinga kinoia, tamamaeia, e ka ta mai tetai mana tutara i te aronga i raro ake i tana akatere anga, ka akaapa ainei tatou i te Atua? E manako tau kore te reira.​—Koheleta 8:9.

Inara, akapeea te au mirioni ua atu tei noo i roto i te tu putaua manakonako kore ua me kare ra tei onge ra? Ko te Atua ainei te ka akaapaia? Kare. Te oronga maira to tatou kainga paraneta i te kai maata ei angai anga i te katoatoa. (Salamo 10:2, 3; 145:16) No te tua akaaite kore anga i te apinga ta te Atua i oronga maira te taki atura ki te  akatotoa anga i te onge e te putaua. E te arairai ra te tu karapii o te tangata ra kia kore taua manamanata ra e akatikatikaia.

Te Tumu Tikai

Koai, i reira, te ka akaapaia me maki tetai tangata me kare me mate no te ruaine anga? Ka poitirere ainei koe i te kite e kare katoa ko te Atua te ka akaapaia no te reira? Kare te Atua i anga i te tangata kia ruaine e kia mate.

I te tukunaia anga te nga tangata mua, ko Adamu raua ko Eva, ki roto i te kainga i Edene, kua oronga a Iehova kia raua i te manakonako no te ora mutu kore i roto i tetai parataito i te enua. Inara, kua inangaro tikai aia i te enua kia nooia e te au tangata tei ariki i ta ratou akatuanga anga. No reira, kua tatuangaia e ia to raua au manakonako o te ora no te tuatau ki mua. Ka noo a Adamu raua ko Eva i roto i te Parataito me ka vai akarongo ua rai raua ki Tei Anga aroa mai ia raua.​—Genese 2:17; 3:2, 3, 17-23.

Ma te mii, kua meameaau a Adamu raua ko Eva. Kua iki a Eva i te akarongo kia Satani te Tiaporo. Kua pikikaa aia kiaia i te tuatua anga e te tapu ra te Atua i tetai apinga meitaki mei iaia ra. No reira kua akamata aia i te aerenga takake e te tauta anga kia ‘riro mei te Atua ra te tu, i te kite i te meitaki e te kino.’ Kua piri atu a Adamu kiaia i roto i tana meameaauanga.​—Genese 3:5, 6.

I to raua ara anga i roto i teia tu nei, kua akaari a Adamu raua ko Eva ia raua uaorai e kare e tau kia ora atu e tuatau ua atu. Kua kite raua i te au tupuanga tumatetenga no te ara. Kua ngaro to raua maroiroi e te tu oraora, e i te openga iora kua mate atu raua. (Genese 5:5) Inara, e au tupuanga kino roa atu ta raua meameaauanga. Te mamae nei rai tatou mei te au tupu anga ara a Adamu raua ko Eva. Kua tata te apotetoro ko Paulo e: “E teianei no te tangata okotai ra [Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Ae, no te meameaau a Adamu raua ko Eva, kua akatotoaia te ara mei tetai maki kino rai i roto i te au tangata katoa.

Te Akapapu Anga Maata Roa Atu e te Manako Maira te Atua

Ko te aite anga ainei e kua kino takiri te tangata ta te Atua i anga maira? Kare, e kua tae mai tatou i teianei ki te akapapu anga maata roa atu e te manako maira te Atua ia tatou. Ei tutaki anga maata kiaia uaorai,  kua oronga mai te Atua i te ravenga kia oko i te tangata ravarai mei te ara e te mate. Ko te tutaki anga ra ko to Iesu oraanga tiama, tei oronga puareinga ua maira no tatou nei. (Roma 3:24) No reira, kua tata te apotetoro ko Ioane e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Tei tupu no teia ravenga maata no te aroa, tei ia tatou te manakonako anga akaou kia ora atu e tuatau ua atu. Kua tata a Paulo ki to Roma e: “Kua taea katoaia te tangata ravarai i te tika kia ora, i te tuatua-tika a te tangata okotai ra.”​—Roma 5:18.

Te papu ra ia tatou e i to te Atua tuatau tau, kare e mamae me kore e mate i runga i te paraneta Enua. Kareka ra, ka tutara te au turanga tei kiteaia i roto i te puka o Apokalupo e: “I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:3, 4) Penei ka karanga koe e, ‘Kare roa au e kite i taua tuatau.’ Inara, te tika anga e penei ka kite koe. E noatu e me ka mate koe, ka rauka i te Atua i te akatu mai ia koe mei te mate mai. (Ioane 5:28, 29) To te Atua akakoroangaia no tatou, e ka tupu te reira. Mei teaa ra te mamao te tika anga o te reira i te tuatua anga e kare te Atua e manako mai ana i te tangata!

“Akavaitata Atu ki te Atua”

E mea pumaana i te kite e kua akamata te Atua i tetai akatikatikaanga roa e te tinamou, ki te manamanata no te mamaeanga o te tangata. Inara, akapeea ra i teia tuatau nei? Eaa ta tatou ka rave me mate tetai tei akaperepereia ra me kare kua rokoia ta tatou tamariki e te maki? I na, kare i tae ake te tuatau no te Atua i te akakore atu i te maki e te mate. Te akakite maira te Pipiria e ka tiaki tatou no tetai manga tuatau e akatupuia mai ei te reira. Inara kare te Atua i akaruke mai ana ia tatou ma te kore e tauturu. Te na ko maira te pipi ko Iakobo e: “E akavaitata atu ki te Atua, e nana e akavaitata mai kia kotou na.” (Iakobo 4:8) Ae, te pati maira Tei Anga ia tatou kia akavaitata atu tatou kiaia, e i te aronga kare rava i manako kore ana i tana turu anga katoa i roto i te au turanga ngata tikai.

Akapeea tatou, e akavaitata atu ei ki te Atua? Kua ui te Ariki ko Davida i te uianga aiteite mei te toru mareniamu mataiti i topa, i te na ko anga e: “Koai, e Iehova, . . . te ka noo i to maunga tapu ra?” (Salamo 15:1) Kua pau a Davida i tana uaorai uianga i te tuatua anga aia e: “Ko te tangata aerenga tiratiratu, ko tei akono i te tuatua-tika ra; e ko tei tuatua i te tuatua-mou i roto i tona ra ngakau. Ko tei kore i urutoe tona arero, ko tei kore i takinga-kino i tona tangata tupu.” (Salamo 15:2, 3) I tetai atu au tuatua, te turou maira a Iehova i te aronga tei aru i te aerenga ta Adamu raua ko Eva i kopae ana. Te akavaitata nei aia ki te aronga tei rave i tona ra anoano.​—Deuteronomi 6:24, 25; 1 Ioane 5:3.

Akapeea tatou i te rave anga i to te Atua ra anoano? Kia apii tatou i te ‘mea meitaki, e te tau ki mua i te aroaro o to tatou Ora ra o te Atua,’ e oti kia iki i te rave i te reira ma te tau. (1 Timoteo 2:3) Te kapiti maira te reira i te akono anga i te kite tika tikai no te Tuatua a te Atua, te Pipiria. (Ioane 17:3; 2 Timoteo 3:16, 17) E maata atu te kapiti maira i te tatau ua anga i te Pipiria. Te anoanoia ra tatou kia aru i te ngati Iuda i Berea o te anere mataiti mua tei rongo ana i ta Paulo tutu anga. No ratou, ka tatau tatou: “Kua āriki ua oki ratou i te tuatua ma te ngakau maora, e te kimi anga i te tuatua i tataia ra, i te tau anga oki i taua tuatua ra, kare e rā i tukua.”​—Angaanga 17:11.

Pera katoa i teia tuatau, te apii meitaki anga i te Pipiria te akaketaketa ra i to tatou akarongo i roto i te Atua e te tauturu ra ia tatou kia patu i tetai pirianga vaitata kiaia. (Ebera 11:6) Te tauturu katoa ra te reira ia tatou kia ariki tikai e akapeea a Iehova i te akono anga i te tangata​—kare no te au akameitaki anga tuatau poto ua mari tikai ra no te meitaki no te tuatau roa no te katoatoa tei akonoia.

E akamanako ana i te au tuatua no tetai au Kerititiano tokoiti ua tei rauka ana tetai pirianga vaitata ki te Atua. “E maata tikai toku inangaro ia Iehova, e e maata tikai taku kia akameitaki atu iaia,” i na Danielle 16 mataiti ra. “Kua oronga mai aia i nga metua aroa noku tei rauka te aroa  tika tikai nona ra e tei apii mai iaku kia rotai ma tana Tuatua.” Kua tata tetai Kerititiano i Urukuai e: “Te ki nei toku ngakau i te marekaanga, e kua akakeuia au kia akameitaki ia Iehova no tona aroa takinga meitaki e no tona pirianga oa.” Te turou katoa maira te Atua i te aronga ou tikai. Te tuatua maira a Gabriela e itu mataiti e: “E maata atu toku inangaro i te Atua i tetai ua atu apinga i roto i te ao katoa! E Pipiria rai taku naku rai. E reka ana au i te kite no runga i te Atua e tana Tamaiti.”

I teia tuatau, te ariki ra te aronga ngakau tae e au mirioni ua atu i te ao katoa ki te tata taramo tei tuatua e: “E mea meitaki ra iaku kia akavaitata atu ki te Atua.” (Salamo 73:28) Kua tauturuia ratou kia autu i te au manamanata ta ratou e aro atura i teianei, e tei ia ratou te manakonako anga papu no te noo anga e tuatau ua atu i roto i te Parataito i runga i te enua. (1 Timoteo 4:8) Eaa ka kore ei e akariro i te reira ko toou akakoroanga kia “akavaitata atu ki te Atua”? E tikai, te papu nei ia matou e: “Kare ra aia i atea ke atu ia tatou katoa nei.” (Angaanga 17:27) Ae, te manako tikai maira te Atua ia koe!

[Au Tutu i te kapi 5]

To Iehova manako anga ia tatou te kiteaia ra i roto i te au tu e manganui

[Tutu i te kapi 7]

Ka rauka katoa i te tamariki ou i te akavaitata atu ki te Atua

[Au Tutu i te kapi 7]

I teia tuatau, te tauturu maira a Iehova ia tatou kia tamou marie. I te tuatau tau, ka takore aia i te maki e te mate