“Kia Akakiteia to Iehova Ingoa”

ITEIANEI ao, te ariki rekarekaia ra Te Punanga Tiaki e tona tokorua te makatini, Awake!, no to raua au manako i te pae vaerua e te ikuiku anga puapinga tikai. I te akamanako anga i teia, kua tata ua akenei tetai vaine tatau i Varani i te reta tei aru mai:

“E vaine mapu au, no Aperika mai tikai, ma te meangiti ua te apii anga. Kare i roa akenei, kua akamata au i te tatau i ta kotou au makatini. Akakeuia e te au tumu manako, kua kite mai au i te puapinga o te tatau anga. Ei akameitakianga kia kotou, kua meitaki mai au i taku au tuatua e ka rauka i te tata i tetai reta ma te iti ua o te au tarevake i roto.

“Kua umere au e kua akono kotou i te au apinga katoatoa no runga i te tangata nei, te paraneta, e Tei Anga mai. E taka meitaki tikai teia au atikara e te akakeu ra te reira i tetai tangata kia inangaro i te riro mai ei tangata tatau tikai. Kare o tetai tangata ke atu tu kite i te apii atu i te au tu tangata ravarai i te taime okotai.

“E umere katoa ana au i toku kite anga e kare teia au apinga katoatoa e raveia ana no tetai kimikimi anga moni, mari ra no te akakite ua anga i to Iehova ingoa. Kua kite au e kua rauka ia kotou tona mareka anga, e te akameitaki nei au ia kotou. Kia tamou marie uatu rai kotou ine kia rauka te akamaroiroianga mei Tei Anga mai kia rauka ai i te apii atu.”

Te aruaru ra te Au Kite o Iehova i teia taime nei i ta ratou angaanga apii Pipiria i roto i te 235 au enua. Te neneiia ra Te Punanga Tiaki i roto e 148 au reo e te Awake! i roto e 87. Kare teia au tianara i neneiia kia apai mai te akapaapaa anga ki tetai ua tangata. Te akoanga akatumuia ki runga i te Pipiria e te au akakitekiteanga ou ua tei kiteaia i roto i te reira kua akatakaia kia akangateitei i Tei Anga mai, ko tei karanga e: “Ko au toou Atua ra ko Iehova, ko tei akakite ia koe i te mea e puapingaʼi koe na.” (Isaia 48:17) Kia puapingaia koe uaorai na te tatau kapiti putuputu anga i te au Tuatua Tapu ma teia au tauturu apii Pipiria.