Taangaanga i te Au Akakoroanga Pae Vaerua ei Akakaka i Tei Anga Mai ia Koe

“ME KARE tetai tangata i kite e ko teea ava tana e akakoro ra, kare i reira ko te aerenga o te matangi te manamanata.” Ko teia au tuatua, tei manakoia e na tetai tangata kite pakari o Roma i te anere mataiti mua, te tou ra ki te tika tikai o te tuatua e no te oraanga kia rauka te aratakianga, e mea puapinga te akanoo i te au akakoroanga.

Te oronga maira te Pipiria i te au akaraanga o te au tangata tei kite tikai i te akanoo i te akakoroanga. I te angaanga anga no tetai 50 mataiti, kua ‘tarai a Noa i te pai, kia ora tona ngutuare.’ Te peroveta ko Mose kua “akara tikai aia ki te tutaki o te oko.” (Ebera 11:7, 26, NW) Kua ariki a Iosua, te komono o Mose, i te akakoroanga tei orongaia e te Atua kia autu ki rungao i te enua ko Kanaana.​—Deuteronomi 3:21, 22, 28; Iosua 12:7-24.

I te anere mataiti mua T.N., ko te au akakoroanga pae vaerua o te apotetoro ko Paulo kare e ekoko e i akakeu maataia e te au tuatua a Iesu e “e tutu aereia te evangelia o te basileia nei, e kako rava ake te ao katoa nei.” (Mataio 24:14) Akamaroiroiia e te au karere e te au orama uaorai mei te Atu ko Iesu, kapiti mai te tukuanga angaanga “ei apai i to [Iesu] ingoa ki mua i te aroaro o te au etene,” kua riro ia Paulo te angaanga puapinga o te akanoo anga i te au putuputuanga Kerititiano e manganui na roto ia Asia Minora e tae atu ki Europa.​—Angaanga 9:15; Kolosa 1:23.

Ae, na roto i te au mataiti i aereia mai ana kua akanoo to Iehova au tavini i te au akakoroanga ngateitei e kua akatupu i te reira, ki to te Atua ra kaka. I teia tuatau nei ka akapeea tatou i te akanoo anga i te au akakoroanga? Eaa te au akakoroanga ta tatou ka tauta, e eaa te au takainga tau ta tatou ka apai kia taenaia te reira?

Puapinga Maata te Au Akakeuanga Tau

Ka rauka ua i te akanoo i te au akakoroanga vaitata rai e i roto i tetai ua atu tuanga o te oraanga, e te vai katoa nei to teia ao au tangata tei kite tikai i te akanoo i te akakoroanga. Inara, kare te au akakoroanga Teokaratiki, i aite ki te au umuumuanga o teianei ao. Te au akakeuanga maata o muri i te au akakoroanga e manganui i roto i te ao koia oki ko te anoano pakari i te apinga nui e te kaki pangia kore no te turanga e te mana akaaere. E tarevake maata tikai te aruaru atu i tetai akakoroanga kia rauka te mana akaaere e te turanga teitei! Te au akakoroanga e apai maira i te kaka ki te Atua ko Iehova te piri tika atura ia ki ta tatou akamorianga iaia e ki te au anoano o te Patireia. (Mataio 6:33) Taua au akakoroanga ra i kapuaia mai mei te aroa no te Atua e no te tangata tupu e to ratou akakoroanga kia akono i te Atua.​—Mataio 22:37-39; 1 Timoteo 4:7.

Kia tau tikai to tatou au akakeuanga ia tatou e akanoo ra e e aruaru ra i te au akakoroanga pae vaerua, noatu te reira e no te akamaata atu anga i ta tatou angaanga ngateitei me kore no te tere anga uaorai ki mua i te pae vaerua. Tera ra, i tetai au taime katoa kare e rauka ana i te akatupu i te au akakoroanga tei akakeu meitakiia. Ka akapeea tatou i te akanoo anga i te au akakoroanga e te akamaata atu anga i te tikaanga e rauka ai te reira?

Inangaro Pakari ka Anoanoia

E akamanako ana e i akapeea a Iehova i te rave anga kia oti te au mea tei angaia i te ao e pini ua ake. Ma te au tuatua “e aiai iora, e ao akera,” kua akataka a Iehova i te au tuatau tei aru mai no te au mea tei angaia. (Genese 1:5, 8, 13, 19, 23, 31) I te akamata anga te taime o te tuatau anga mai anga tataki tai, kua kite meitaki tikai aia i tona akakoroanga, me kore i tei akakoroia, no taua ra ra. E kua rave te Atua tona akakoroanga i te anga i te au apinga ravarai. (Apokalupo 4:11) “E ta tona [Iehova] vaerua i anoano ra, ko tana ïa e rave,” i tuatua ai te pateriareka ko Iobu. (Iobu 23:13) Mei teaa ra te merengoanga tikai no Iehova kia kite “i te au mea katoa tana i anga” e kia akakite i te reira e “te meitaki roa ra”!​—Genese 1:31.

 No to tatou au akakoroanga kia tupu tika tikai, kia pakari katoa to tatou anoano kia rauka te reira. Eaa te ka tauturu ia tatou i te akatupu i taua tu anoano pakari ra? Noatu i te vai utonga kore ua anga te enua kare e marikonga, te kite atura ra a Iehova e eaa te ka tupu i te openga​—e poe manea roa i roto i te mareva, te ka apai mai i te kaka e te ngateitei kiaia. Pera katoa, to tatou anoano kia akaoti i ta tatou i akakoro i te rave ka rauka ua i te tatanu na te manakonako anga no runga i te au mea te ka tupu e te au puapinga o te rauka anga i te akatupu i te akakoroanga. Ko tera tei tupu kia Tony e 19 mataiti te pakari. Kare roa i ngaropoina ana iaia tona manako mua i te atoro anga i te opati manga o te Au Kite o Iehova i Europa Opunga. Mei reira mai, ko te uianga tei vai ki roto i te manako o Tony koia oki, ‘Mei teaa ra te tu kia noo e kia tavini i roto i tetai ngai mei tera?’ Kare roa a Tony i tapu ana i te akamanako e me ka rauka rai, e kua aruaru atu rai aia i te reira. Kua mataora tikai aia e i te au mataiti i muri mai kua arikiia mai tana patianga kia tavini i ko i te manga!

Ta tatou taokotai anga ki etai ke atu tei taena takereia tetai akakoroanga ka riro katoa i te akatupu ki roto ia tatou tetai anoano kia rauka mai te reira. Ko Jayson, e 30 mataiti, kare i rekareka ana i te piri ki roto i te angaanga orometua i tona mapu ouanga. Inara i muri ake i te akaotianga o tana apii teitei, kua inangaro tikai aia i te piri ki te tavinianga painia, riro mai i reira ei tangata tutu tamou i te Patireia. Eaa tei tauturu ia Jayson kia tatanu i te anoano kia painia? Kua pau aia e: “Na te tuatua anga ki etai ke atu tei painia ana e te angaanga anga ma ratou i roto i te angaanga orometua i akakeu pakari iaku.”

Ka Tauturu te Tata Anga i to Tatou au Akakoroanga ki Raro

Tetai manako kare e taka roa ana ka taka meitaki e te papu ua me akakite tatou i te reira na roto i te au tuatua. Kua kite a Solomona e e ririnui maata to te au tuatua tau mei te au ko i te oronga anga i te aratakianga i roto i te oraanga. (Koheleta 12:11) Me tataia taua au tuatua ra ki raro, ka akatupu te reira i tetai manakoanga oonu ki roto i te manako e te ngakau. No teaa atura oki i reira a Iehova i akaue ei i te ui ariki o Iseraela kia tata i tetai kopi uaorai o te Ture? (Deuteronomi 17:18) Penei i reira ka inangaro tatou i te tata ki runga i te pepa i to tatou au akakoroanga e te parani no te itae anga atu i te reira, te papa anga i te au arairaianga ta tatou e tapapa atura kapiti mai te au mataara kia autu atu i te reira. Ka tauturu maata katoa kia kite i te au tumu manako ka anoanoia tatou kia kite meitaki tikai, i te au tu karape te ka anoanoia kia rauka ia tatou, e te aronga ravarai te ka rauka i te tauturu e te turuturu mai ia tatou.

Kua riro te akanoo anga i te au akakoroanga pae vaerua nona uaorai i te akatupu i te tu ngaueue kore kia Geoffrey, e painia takake no tetai tuatau roa i roto i tetai ngai mamao i tetai enua i Asia. Kua tupu ra te tumatetenga i te mate poitirere ua anga tana vaine. Aru mai i tetai tuatau akatanotanoanga, kua iki a Geoffrey i te tuku takiri iaia uaorai ki roto i tana angaanga orometua ei painia na te akanoo anga i te au akakoroanga. I muri ake i te tata anga i tana au parani ki runga i te pepa, na roto i te pure kua akanoo aia kia akamata ia e toru au apiianga Pipiria ou me tae ki te openga marama. I te ra okotai, kua akara akaou aia i tana angaanga i rave, e i te au ngauru ra ravarai, kua akara aia i tona turanga. Kua taena ainei iaia tona akakoroanga? Ma te au apiianga Pipiria e a i ripotiia mai, e rekareka maata tikai tona i te pau e ae!

Akanoo i te Au Akakoroanga Poto ua ei Au Akairo

Tetai au akakoroanga penei e akaraanga ngata i te akamataanga. Kia Tony, tei taikuia i mua ake, ko  te tavini i ko i tetai opati manga o te Au Kite o Iehova mei te moemoea rai te akaraanga. No te mea e marikonga kore ua tona tu oraanga, e kare katoa rai aia i rave ake i tetai akatapuanga ki te Atua. Inara kua iki a Tony kia akaau i tona oraanga ki to Iehova au arataa e kua akariro i te reira ei akakoroanga nona kia tau no te papetitoanga. I muri ake i te rauka anga taua akakoroanga ra, kua itae atu aia no te painia tauturu e te painia tamou, te akairo anga ki runga i tana karena i te au ra e akamata ai. I muri ake i tona painia anga no tetai tuatau, i te akaraanga kare te tavini anga i ko i te opati manga i te akakoroanga ngata.

E mea meitaki rai no tatou penei kia akanoo i to tatou au akakoroanga no te tuatau roa ki roto i etai au akakoroanga potopoto ua te tuatau. Kia riro te au akakoroanga ka aru mai ei au akairo i te tauta anga kia rauka tetai akakoroanga no te tuatau roa. Na te akara putuputu ua anga i to tatou turanga kia tau ki taua au akairo mataara ra e tauturu ia tatou i te akamou marie i to tatou manako. Te pure putuputu ua anga kia Iehova no runga i ta tatou au parani ka tauturu katoa ia tatou kia tamou ki te kaveinga. “Auraka e tukutuku i te pure,” i ako ei te apotetoro ko Paulo.​—1 Tesalonia 5:17.

Ka Anoanoia te Ikianga Papu Tikai e te Aruaru

Noatu ta tatou au parani meitaki i akanooia e te anoano pakari i te akatupu i te reira, ka vai rai tetai au akakoroanga kare e rauka i te rave. Mei teaa ra te taitaia o te pipi ko Ioane Mareko i te kore anga te apotetoro ko Paulo i inangaro i te apai iaia i te rua o to Paulo tere mitinari! (Angaanga 15:37-40) Kua rauka ia Mareko tetai apiianga mei teia taitaiaanga e kua akatano i tona akakoroanga kia akamaata atu rai i te angaanga. Papu e kua akapera rai aia. I muri mai, kua taiku akaperepere tikai a Paulo ia Mareko e kua rauka te rekareka i te pirianga vaitata ma te apotetoro ko Petero i Babulonia. (2 Timoteo 4:11; 1 Petero 5:13) Penei ko tona akameitakianga maata roa atu koia oki ko te tata anga i tetai tua akauruia no to Iesu oraanga e te angaanga orometua.

I roto i ta tatou aruaruanga no te au akakoroanga pae vaerua, penei ka kite katoa tatou i te au manamanata. I te tuku ua atu i te au, e akara akaou tatou, e akapapu akaou, e e taui akaou. Me tupu mai te au arairaianga, ka anoanoia tatou kia tauta ua atu rai ma te ikianga papu tikai e te aruaru. “E tuku atu i taau angaanga kia Iehova ra, e ka akatinamouia taau i akakoro ra,” i akapapu mai ei te ariki pakari ko Solomona.​—Maseli 16:3.

Kareka, i tetai au taime no te au turanga oki kare i reira e rauka i te aruaru i tetai au akakoroanga. Ei akaraanga, penei na te oraanga kopapa apikepike me kore te au apainga ngutuare tangata e tuku mamao atu i tetai au akakoroanga kia kore e taena ia tatou. Auraka roa e ngaro ia tatou te tika e ko te tutaki maata koia oki ko te oraanga mutu kore​—i te rangi me kore i te Parataito i te enua nei. (Luka 23:43; Philipi 3:13, 14) Akapeea teia e rauka mai ei? “Ko tei akono ra i to te Atua ra anoano, e tika ïa i te ora anga e tuatau ua atu,” i tata ai te apotetoro ko Ioane. (1 Ioane 2:17) Noatu kare to tatou turanga e akatika kia taena ia tatou tetai akakoroanga, ka rauka rai ia tatou i te “mataku i te Atua mou e te akono i tana au akauenga.” (Koheleta 12:13, NW) Ka tauturu te au akakoroanga pae vaerua ia tatou kia akamou marie ki runga i te rave anga i te anoano tu-Atua. No reira e taangaanga tatou i te reira ei akakaka i Tei Anga mai ia tatou.

[Pia i te kapi 22]

Au Akakoroanga Pae Vaerua ei Akamanako Anga

○ Tatau anga i te Pipiria i te au ra ravarai

○ Tatau anga i te au itiu ravarai o Te Punanga Tiaki e te Awake!

○ Akameitaki atu anga i te tu o ta tatou au pure

○ Akaari anga i te ua o te vaerua

○ Tauta anga kia akamaata atu i te angaanga

○ Kia meitaki maata atu i roto i te tutuanga e te apiianga

○ Akatupu anga i te au tu karape mei te akakitekiteanga na roto i te terepaoni, te akakitekite ua anga, e i te ngai pitiniti