Te Au Temeio a Iesu​—E Tika Ainei me e Mea Maani Ua?

“KUA apai maira ratou i te aronga i uruia e te demoni e manganui iaia [Iesu Karaiti] ra; peke ke atura iaia taua au vaerua ra i te reo ua; e akaora atura i te aronga katoa i mate i te maki.” (Mataio 8:16) “Tu akera aia [Iesu] ki runga, kauvae atura i te matangi, e na ko atura ki te kare, Kua oti ana, kia aki. Torue atura te matangi, marino rava atura.” (Mareko 4:39) Eaa toou manako no teia au tuatua? Te irinaki ra ainei koe e te akataka maira te reira i te au tupu anga tika tikai e te tuatua enua me kore te manako ra ainei koe e e au tua akatutu ua te reira, me e au tua maani ua?

E manganui i teia tuatau te akakite ra i te au ekoko anga pakari no runga i te tika anga o te tuatua enua o ta Iesu au temeio. Teia tuatau o te teretikopu e te nenei apinga rikiriki, o te akarakara i te mareva, e te angaanga enitinia gene, i te akara anga kare e inangaro i te ariki i te au ripoti no te au angaanga temeio e te au mea umere tu-Atua.

Te manako ra etai pae i te au papaanga no te au temeio e e mea umere me kare ra e akatutu ua. Kia tau ki te tangata tata o tetai puka te karanga ra i te kimi aere i te Iesu “tika tikai,” te au tua no runga i te au temeio a Karaiti ra “ei au apinga okooko” ua kia akamaata i te Akonoanga Kerititiano.

Te manako ra tetai pae i te au temeio a Iesu e e au pikikaa anga tikai. I tetai au taime kua uriia atu te au akaapa anga no te akavare anga kia Iesu uaorai. Kia tau kia Justin Martyr o te rua anere mataiti T.N., kua “rave katoa [te aronga akaapa ia Iesu] i te kapiki iaia e e tangata manamana e e tangata akavare i te au  tangata.” Kua akaapa etai pae e “kare [a Iesu] i rave ana i tana au temeio ei peroveta ngati Iuda, mari ra ei tangata manamana, ei tangata tereniia i roto i te au iero peu etene.”

Akataka Anga e Kare e Rauka

Penei te manako ra koe e i muri i taua au manako ekoko, te vaira tetai tumu anga puapinga maata eaa te au tangata i emiemi ei i te irinaki i te au temeio. E mea ngata ia ratou i te kite i te reira, e kare e rauka katoa, i te ariki i te manako e ka rauka i tetai au mana ririnui i te akatupu i te au temeio. “Kare te au temeio e tupu ua mai​—ma te tika,” i na tetai tangata ou ei tei kapiki iaia uaorai ko tetai tangata kitea kore i te Atua. Kua taiku mai aia i reira i te au tuatua a te tangata kimi kite Tekotia o te 18 anere mataiti ko David Hume, tei tata e: “Ko tetai temeio ra te aati ra ia i te au ture no te natura.”

Inara, e manganui te ka matakite tikai no te tuatua anga e ka rauka tetai apinga umere. Te kapiki ra The World Book Encyclopedia i tetai temeio ei “tupu anga kare e rauka i te akamaramaia mai na roto i te au ture i kiteaia no te natura.” Kia tau ki taua akatakaanga, i te akara anga ki te maata anga kua riro te teretere anga mareva, te komunikeitianga kare e uaireti, e te neke anga tateraiti ei “au temeio” i te anere mataiti i topa ua akenei. Papu tikai e kare i te mea pakari te reira kia tuatua e kare te au temeio e rauka no te mea kare e rauka ia tatou i te akamarama i te reira tei akatumuia ki runga i te kite o teia tuatau nei.

Me akara matatio tatou i etai o te akapapu anga Tuatua Tapu te koropini ra i te au temeio tei taikuia kia Iesu Karaiti eaa ta tatou ka kite? E tika ainei me e mea maani ua ainei te au temeio a Iesu?