Te Kite Ra Ainei Koe i te Rekareka i Roto i “te Ture a Iehova”?

“E ao to te tangata . . . ko tei [“rekareka,” NW] ra i te ture a Iehova.”​—SALAMO 1:1, 2.

1. Eaa ra tatou i mataora ai ei au tavini no Iehova?

KO IEHOVA te tauturu nei e te akameitaki nei ia tatou ei au tavini tiratiratu nona. E tika, e manganui ta tatou au timataanga e aro atu nei. Inara, te rekareka katoa nei tatou i te tu mataora tikai. Kare teia i te mea poitirere, no te mea te tavini nei tatou i “te Atua mataora,” e te akatupu nei tona vaerua tapu i te rekareka ki roto i to tatou au ngakau. (1 Timoteo 1:11, NW; Galatia 5:22) Ko te rekareka e turanga ia no te mataora tika tikai tei tupu mai mei te tapapaanga atu me kore mei te raukaanga mai o tetai apinga meitaki. E te oronga tika mai nei to tatou Metua i te rangi i te au apinga aroa memeitaki na tatou. (Iakobo 1:17) Kare i te mea umere i reira e te mataora ua nei tatou!

2. Teea nga Salamo ta tatou ka uriuri?

² Te akakite puia nei te tu mataora i roto i te puka o Salamo. Ei akatauanga, e tika roa teia i roto i te Salamo 1 e te 2. Kua tuku te au pipi mua a Iesu Karaiti i te tataanga o te rua o te taramo e na te ariki o Iseraela ko Davida. (Angaanga 4:25, 26) Ko te tangata tei atu i te taramo mua tei kore i akakiteia te ingoa kua akamata i tana imene akauruia ki te au tuatua: “E ao to te tangata, kare e aaere i te ako a te akono kore i te Atua.” (Salamo 1:1) I roto i teia atikara e te ka aru mai, ka akara tatou e akapeea te Salamo  1 e te 2 i te oronga mai anga kia tatou i te tumuanga no te rekareka.

Te Muna o te Mataora

3. Kia tau ki ta te Salamo 1:1, eaa tetai au tumu e mataora ai te tangata akono i te Atua?

³ Te akaari maira te Salamo 1 eaa te tangata akono i te Atua i mataora ai. I te oronga anga i te au tumu no taua tu mataora ra, kua imene te tata taramo e: “E ao to te tangata, kare e aaere i te ako a te akono kore i te Atua, kare e tu i te arataa o te aronga rave ara ra, kare oki e noo i te nooanga o te aronga taitoito ra.”​—Salamo 1:1.

4. Eaa te arataa tau ta Zakaria raua ko Elisabeta i aruaru?

⁴ Kia rauka ai te mataora tika tikai, ka anoanoia tatou kia aru ki ta Iehova au umuumuanga tuatua tika. Ko Zakaria raua ko Elisabeta, tei rauka te ngateiteianga rekareka kia riro ei nga metua no Ioane Papetito, e “tuatua-tika raua i mua i te aroaro o te Atua, i te akono marie anga i te au akauenga, e te au akonoanga katoa a [“Iehova,” NW], ma te apa kore.” (Luka 1:5, 6) Ka mataora rai tatou me aru tatou i tetai mataara mei te reira e te patoi pakari atu i te ‘aaere anga na te ako a te akono kore i te Atua’ me kore kia aratakiia e ta ratou tuatua kino.

5. Eaa te ka tauturu ia tatou kia kopae i “te arataa o te aronga rave ara ra”?

⁵ Me kopae tatou i te aerenga manako o te aronga akono kore i te Atua, kare ia tatou e “tu i te arataa o te aronga rave ara.” Tika anga, kare tikai tatou e kitea ki te ngai ta ratou e putuputu ana i te aere​—ki roto i te au ngai tamataoraanga  tau kore me kore rongo kino. Akapeea me timataia tatou kia piri atu ki te aronga rave ara i roto i to ratou tu kare i tau i te tuatua tapu? E pure i reira tatou no ta te Atua tauturu kia tau te nooanga ki te au tuatua a te apotetoro ko Paulo e: “Auraka kotou e kapitiia ma te tau kore i te aronga akarongo kore ra: eaa to te tuatua-tika tau anga i te tuatua-tika kore? e eaa to te mārama tau anga i te poiri?” (2 Korinetia 6:14) Me irinaki tatou ki te Atua e te “mā te ngakau,” ka kopae tatou i te vaerua e te tu oraanga o te aronga rave ara e ka akono i te au akakeuanga e te au anoano ma, kapiti mai ma “te akarongo pikikaa kore.”​—Mataio 5:8; 1 Timoteo 1:5.

6. Eaa tatou ka matakite ei no runga i te aronga taitoito?

⁶ Kia akarekareka ia Iehova, papu e ‘kare tatou e noo i te nooanga o te aronga taitoito.’ E taitoito ana tetai papaki i te tu akono i te Atua uaorai, inara i roto i teia “au ra openga ra,” ko te au Kerititiano mua tei riro ei au apoteiti e putuputu tikai te akakino i roto i ta ratou taitoito anga. Kua akamatakite mai te apotetoro ko Petero i te au oa akarongo: “E aku au akaperepere e, . . . Kia kite ra kotou i teia e, kia tae ki te au rā openga ra, e kitea mai ei e aronga taitoito, i te akono anga i ta ratou uaorai anoano, E te tuatua anga mai e, Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.” (2 Petero 3:1-4) Me kare roa tatou e “noo i te nooanga o te aronga taitoito ra,” ka kopae atu ia tatou i te tumatetenga tei papu e ka tupu kia ratou.​—Maseli 1:22-27.

7. Eaa tatou ka tamou ei i te au tuatua a te Salamo 1:1 ki te ngakau?

⁷ Tera ua me kore tatou e tamou i te au tuatua akamata anga o Salamo 1 ki te ngakau, ka ngere tatou i te tu pae vaerua tei rauka ia tatou na roto i te apiianga i te au Tuatua Tapu. Ko te tika, ka aere tatou mei te kino ki te kino takiri. Penei ka akamata mai to tatou ngere i te pae vaerua me aru tatou i te ako a te akono kore i te Atua. E oti penei ka piri putuputu atu tatou kia ratou. I te openga, penei ka riro mai tatou ei aronga taitoito apoteiti kare e akarongo. Te taka ua ra e, ko te pirianga oa ki te aronga akono kore i te Atua ka akatupu i tetai tu vaerua kare e akono i te Atua ki roto ia tatou e ka takore i to tatou pirianga ma te Atua ko Iehova. (1 Korinetia 15:33; Iakobo 4:4) Auraka roa tatou e akatika i te reira kia tupu kia tatou!

8. Eaa te ka tauturu ia tatou kia tamou marie i to tatou manako ki runga i te au apinga o te pae vaerua?

⁸ Ka tauturu te pure ia tatou kia tamou marie i to tatou au manako ki runga i te au apinga pae vaerua e i te kopae i te pirianga oa ma te aronga akono kore i te Atua. “Auraka rava kotou e apiapi i te au mea katoa nei,” i tata ai a Paulo, “e akakite ua ra ki te Atua i to kotou anoano i te au mea  katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” Kua akamaroiroi mai te apotetoro i te akamanakoanga i te au apinga mou, tau meitaki, tika, viivii kore, rekareka, rongo meitaki, meitaki, e te paapaaia. (Philipi 4:6-8) Kia tau ta tatou rave anga ki ta Paulo ako e auraka roa e akamoraro ki te turanga o te aronga akono kore i te Atua.

9. Noatu te kopae ra tatou i te au angaanga kino, akapeea tatou i te tautaanga kia tauturu i te au tu tangata katoa?

⁹ Noatu te kopae ra tatou i te au angaanga kino, e oronga ana ra tatou i tetai akakiteanga tau tikai ki etai ke, mei ta te apotetoro rai ko Paulo i tuatua ki te Kavana o Roma ko Feliki “i te tuatua no te tuatua-tika, e te akono meitaki, e te akavaanga a muri ake.” (Angaanga 24:24, 25; Kolosa 4:6) Te tutu nei tatou i te tuatua meitaki o te Patireia ki te au tu tangata katoa, e e akono ana tatou ia ratou na roto i te tu takinga meitaki. Te irinaki nei tikai tatou e ko te aronga “i akonoia no te ora mutu kore ra” ka riro mai ei aronga irinaki e ka rekareka i te ture a te Atua.​—Angaanga 13:48.

Rekareka Aia i Roto i te Ture a Iehova

10. Eaa te ka tauturu i te akamou i te apii ki roto i to tatou manako e te ngakau i te au tuatau o te apiianga naau uaorai?

¹⁰ No runga i te tangata e ao tona, kua karanga katoa te tata taramo e: “Ko tei [“rekareka,” NW] ra i te ture a Iehova; e tei tana ture tona manako anga i te po e te ao.” (Salamo 1:2) Ei au tavini no te Atua, te ‘rekareka nei tatou i roto i te ture a Iehova.’ Me ka rauka, i te au tuatau o te apiianga naau uaorai e te akamaaraaraanga, penei ka tatau tatou ma te ‘akamanako,’ i te akatangi maata anga i te au tuatua. Na te rave anga i teia me tatau i tetai ua atu tuanga o te au Tuatua Tapu e tauturu i te akamou i te apii ki roto i to tatou manako e te ngakau.

11. Eaa tatou ka tatau ei i te Pipiria i te “po e te ao”?

¹¹ Kua akamaroiroi mai ana “te tavini akono meitaki e te pakari” ia tatou kia tatau i te Pipiria i te au ra ravarai. (Mataio 24:45) No te anoano maata kia akamatau meitaki ki te karere a Iehova no te tangata nei, e mea meitaki kia tatau tatou i te Pipiria “i te po e te ao”​—ae, noatu kare tatou e varea e te moe no tetai ua atu tumu. Kua raurau a Petero ia tatou: “Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira.” (1 Petero 2:1, 2) Te kite ra ainei koe i te rekareka i roto i te tatau anga i te Pipiria i te au ra e te akamanako anga i te po no runga i ta te Atua Tuatua e te au akakoroanga? Kua pera te tata taramo.​—Salamo 63:6.

12. Eaa ta tatou ka rave me te rekareka ra tatou i roto i ta Iehova ture?

¹² To tatou mataora mutu kore tei runga ia i to tatou kite i te rekareka i roto i te ture a te Atua. E apakore te reira e te tika, e e tutaki maata tei te akono anga i te reira. (Salamo 19:7-11) Kua tata te pipi ko Iakobo e: “Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.” (Iakobo 1:25) Me e rekareka tika tikai to tatou i roto i te ture a Iehova, kare e ra e topa ma te kore tatou e oronga i te akamanakoanga ki te au mea pae vaerua. E tika roa e, ka akakeuia tatou kia ‘kimi i te au mea oonu o te Atua’ e te akono i te au anoano o te Patireia na mua i roto i te oraanga.​—1 Korinetia 2:10-13; Mataio 6:33.

 E Tau Aia ki te Rakau

13-15. I roto i teea tu i tau ei tatou mei te rakau i tanumia ki te pae i te puna vai tae marie?

¹³ I te akataka mamao atu anga i te tangata tiratiratu, kua tuatua te tata taramo e: “E tau aia ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa i mae tona rau; ko tana katoa e rave ra, te meitaki ra ïa.” (Salamo 1:3) Mei tetai au tangata apa pouroa, ko tatou e tavini nei ia Iehova te kite ra i te au tu ngata o te oraanga. (Iobu 14:1) Penei ka mamae tatou i te takinokino e tetai atu au timataanga tukeke tei piri mai ki to tatou akarongo. (Mataio 5:10-12) Inara, ma te tauturu a te Atua, te rauka ra ia tatou i te akakoromaki meitaki i teia au timataanga, mei te tumu rakau maroiroi rai e autu atu i te au matangi pakari.

¹⁴ Ko tetai rakau tei tanumia ki te pae i te puna vai tae marie kare ia e maro i roto i te reva vera me kore i te tuatau maro. Me e aronga mataku Atua tatou, ka aere mai to tatou maroiroi mei ko mai i te Puna tae marie​—i te Atua ko Iehova. Kua akara a Paulo ki te Atua no te tauturu e kua tau kia karanga e: “E tika iaku te au mea ravarai nei [ia Iehova] ko tei akamaroiroi mai iaku nei.” (Philipi 4:13) Me aratakiia e me utuutuia tatou e to Iehova vaerua tapu, kare tatou e mae, kare e uua kore me kore e mate i te pae vaerua. Te uua nei tatou i roto i te angaanga a te Atua e te akaari katoa ra i te ua o tona vaerua.​—Ieremia 17:7, 8; Galatia 5:22, 23.

¹⁵ Na te taangaanga anga i te tuatua Epera tei tataia “e tau,” te taangaanga ra te tata taramo i tetai akaaiteiteanga. Te akaaite ra aia i e rua nga apinga tuke, inara e aiteite ua to raua tu. E tuke rai te tangata mei te au tumu rakau, inara e mea papu e kua riro te tu ruperupe o te tumu rakau tei tanumia ki te pae i te puna vai tae marie ei akamaara i te tata taramo i te tu puapinga i te pae vaerua o te aronga ko tei “[“rekareka,” NW] ra i te ture a Iehova.” Me rekareka tatou i te ture a te Atua, ka riro ia te maata o to tatou au ra mei to te rakau. Ko te tika, ka rauka ia tatou i te noo e tuatau ua atu.​—Ioane 17:3.

16. Eaa e na roto i teea tu e ko ‘ta tatou katoa e rave ra e mea meitaki ïa’?

¹⁶ Ia tatou e aruaru ra i te arataa tiratiratu, te tauturu maira a Iehova ia tatou i te akakoromaki i te taomianga o te au timataanga e te au tu ngata. Te pereperekavana nei tatou e te uua nei i roto i te angaanga a te Atua. (Mataio 13:23; Luka 8:15) ‘Ta tatou katoa e rave e mea meitaki ïa’ no te mea ko to tatou akakoroanga maata koia oki ko te rave i to Iehova anoano. I te mea e e puapinga ua ana rai tona au akakoroanga e e rekareka ua ana tatou i tana au akaueanga, ka puapinga tatou i te pae vaerua. (Genese 39:23; Iosua 1:7, 8; Isaia 55:11) Tika roa teia noatu me aro atu tatou i te au tu tumatetenga.​—Salamo 112:1-3; 3 Ioane 2.

Te Akara Anga te Puapinga ra te Akono Kore i te Atua

17, 18. (a) Te akaaite ra te tata taramo i te akono kore i te Atua ki teaa? (e) Noatu e te puapinga ra te akono kore i te Atua i te pae apinga kopapa, eaa i kore ei o ratou tinamouanga tikai?

¹⁷ Mei teaa ra te tuke i ta te akono kore i te Atua mei ta te aronga tuatua tika! Penei ka akara anga e te puapinga ra te aronga akono kore i te Atua i te pae apinga kopapa no tetai taime, inara kare ratou e puapingaia ra i te pae vaerua. Te kite papuia atura teia mei te tuatua akaou atu a te tata taramo: “Kare mei te reira te akono kore i te Atua ra; e tau ïa ki te ota e pueu ua i te matangi ra. E kore ei e mou te akono kore i te Atua i te akavaanga, e te rave ara i te uipa anga o te aronga tuatua-tika ra.” (Salamo 1:4, 5) I na ka akara te karanga ra te tata taramo e, “kare mei te reira te akono kore i te Atua ra.” Ko tana e aite ra kare ratou e mei te au tangata akono i te Atua, ko tei akaaite uaia akenei ki te au rakau uua, ma te mou.

¹⁸ Noatu me te puapinga ra te aronga akono kore i te Atua i te pae apinga kopapa, kare o ratou tinamouanga tikai. (Salamo 37:16; 73:3, 12) Aiteite rai ratou mei te tangata apinga nui neneva ta Iesu i taiku mai i roto i te akatutuanga i te patiia anga kia iki i roto i tetai mea tei o mai tetai tuanga apinga. Kua akakite a Iesu ki te aronga i reira: “E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” Kua akatutu a Iesu i teia manako na te karanga anga e kua puapinga meitaki tikai te kainga o tetai tangata apinga nui e kua manako aia e vavai i tona au are vairanga e e akatu i te au  mea mamaata atu ei akaputu i tona au apinga ravarai. Kua manako i reira te tangata e e kai, e inu, e e tamataora iaia uaorai. Inara kua tuatua maira te Atua: “E tera ra neneva e! ei teianei rai po e tiki naia mai ei toou vaerua: noai iora tenana au apinga taau i akaputu?” I te akaketaketa anga i tana apiianga puapinga, kua kapiti atu a Iesu e: “Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.”​—Luka 12:13-21.

19, 20. (a) E akataka mai i te angaanga muatangana o te papaanga e te tairianga. (e) Eaa te aronga akono kore i te Atua i akaaiteia ai ki te ota?

¹⁹ Te tangata akono kore i te Atua “kare i maata tona apinga i te Atua.” No reira, kare to ratou tinamouanga e te turori koreanga i maata atu i to te ota, te pakiri angiangi o te ua titona. I te au tuatau muatangana i muri ake i te kokotiia anga te titona, kua apainaia atu te reira ki te ngai papaanga, tei matauia e ngai paraa ua i runga i tetai ngai teitei. I reira te au tereti ma te toka koi me kore te nio auri i raro ake i te reira e putoia ai e te au manu na runga i te titona ei atiati i te au tumu kia ungaunga e ei akamatara mai i te au ua mei te ota. Aru mai, e taangaangaia ana te tairi ei ope mai i te putunga katoa e pei ei i te reira ki roto i te reva kia puia e te matangi. (Isaia 30:24) Ka pururu te au ua ki runga i te ngai papa titona, aangi atu i reira te matangi i te tumu ki te pae e te pupui atu i te ota. (Ruta 3:2) I muri ake i te na roto anga te titona i te ruru i te akaatea i te au kirikiri e te vai atura, kua papa i reira no te vairanga me kore no te taviri anga. (Luka 22:31) Kareka ko te ota kua pou ia.

²⁰ Mei te au ua i pururu ki runga i te one e kua vai rai kareka te ota kua puia atu, ka vai katoa rai te aronga tuatua tika e ko te aronga akono kore i te Atua ka akaateaia atu. E mea papu tikai, i reira e, te mataora nei tatou e kare e roa atu ka ngaro ke atu taua aronga rave kino ra e tuatau ua atu. Ia ratou i akaateaia atu ei, ka akameitaki maataia te au tangata tei rekareka i te ture a Iehova. E tika tikai e, i te openga ka rauka i te au tangata akarongo ta te Atua apinga aroa o te oraanga mutu kore.​—Mataio 25:34-46; Roma 6:23.

Te ‘Aerenga Akameitakiia o te Aronga Tuatua Tika’

21. Akapeea ake i ‘tau ei ia Iehova te aerenga o te aronga tuatua-tika’?

²¹ Te taopenga ra te taramo mua ki teia au tuatua nei: “Te tau maira oki a Iehova i te aerenga o te aronga tuatua-tika ra, kareka te aerenga o te akono kore i te Atua ra, ko te mate ïa.” (Salamo 1:6) Akapeea ra i ‘tau ei i te Atua te aerenga o te aronga tuatua-tika ra’? Mei tera ra oki e, me te  aruaru ra tatou i tetai arataa tiratiratu, kia papu ia tatou e te kite maira to tatou Metua i te rangi i to tatou oraanga akono i te Atua e te ariki maira ia tatou ei au tavini marekaia nona. I reira, ka rauka ia tatou e e mea tau kia titiri i to tatou apiapianga pouroa ki rungao iaia ma te irinakianga e te manako maira tikai aia ia tatou.​—Ezekiela 34:11; 1 Petero 5:6, 7.

22, 23. Eaa te ka tupu ki te aronga kino e ki te aronga tuatua tika?

²² “Te aerenga o te aronga tuatua-tika ra” ka vai e tuatau ua atu, kareka te au tangata kino ka mate ia no ta Iehova akautungaanga pakari ka tuku. E to ratou “aerenga,” me kore te arataa o te oraanga, ka ope ia ma ratou. Ka rauka ia tatou te irinakianga i roto i te akatupuanga o te au tuatua a Davida e: “E roa poto ake, e kare ua te tangata kino ra, koia tika rai, ka akara koe i tona ngai, e kare ua! Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira.”​—Salamo 37:10, 11, 29.

²³ Mei teaa ra te mataora ta tatou ka kite me orongaia mai te tikaanga no tatou kia noo ki runga i te enua parataito i te kore anga o te aronga kino! I reira te aronga maru e te tuatua-tika e mataora ai i te au tika tikai no te mea ka kite ua rai ratou i te rekareka i roto i “te ture a Iehova.” I mua ake ra, i te reira, kia akatupuia “te ture a Iehova ra.” (Salamo 2:7a) Te atikara ka aru mai ka tauturu ia tatou kia kite e eaa taua ture ra e eaa te aiteanga o te reira no tatou e no te pamiri tangata katoa.

Akapeea Koe me Pau?

• Eaa ra te tangata akono i te Atua i mataora ai?

• Eaa te akaari maira e te kite nei tatou i te rekareka i roto i te ture a Iehova?

• Akapeea tetai tangata e tau ei mei te rakau pipi meitakiia ki te vai?

• Akapeea te aerenga o te tangata tuatua tika i tuke ei mei to te tangata akono kore i te Atua?

[Au Uianga Apii]

[Tutu i te kapi 11]

Ka tauturu te pure ia tatou kia kopae i te pirianga oa ma te aronga akono kore i te Atua

[Tutu i te kapi 12]

Eaa te tangata tuatua tika i tau ei mei te rakau?