“Te Ture a Iehova” Kare ia E Poka

‘E akakite atu au i te ture a Iehova; kua tuatua mai aia kiaku e: Ko taku Tamaiti koe . . . Ka pati mai kiaku, e naku e oronga i te au etene ei tuanga naau.’​—SALAMO 2:7, 8, akaaite ia NW.

1. Eaa te tuke i rotopu i to te Atua akakoroanga e to te pa enua?

E AKAKOROANGA to te Atua ko Iehova no te tangata ravarai e te enua. E akakoroanga katoa to te pa enua. Inara e aka tuke tikai to teia nga akakoroanga nei! E mea tau kia tapapa tatou i teia, no te mea kua akakite te Atua: “Mei te rangi nei oki e teitei maata tona i to te enua, koia katoa toku ra au aerenga e teitei i to kotou ra au aerenga, e toku ra au manako i to kotou ra au manako.” Papu tikai e ka akatupuia to te Atua akakoroanga, i te mea kua akakite atu rai aia e: “Mei te ua e topa nei, e mei te kiona, no runga mai i te rangi ra, e kare i oki akaou ki reira, kua tamauu ra i te enua, e kua akatupu ra, e kua akauua mai oki i tana, i raukaʼi oki te ua i te aronga e ruru, e te kai i te aronga e kai ra: Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:9-11.

2, 3. Eaa ra tei akataka meitakiia i roto i te rua o te taramo, inara eaa te au uianga tei akatuia mai?

 ² Kua akataka meitakiia mai i roto i te rua o te taramo e ka akatupuia to te Atua akakoroanga no runga i tona Ariki Mesia. Tei atu i te reira, koia oki te Ariki ko Davida o Iseraela i taito, kua akauruia e te Atua kia totou e e tuatau puapinga tetai e oripu ua ai te au pa enua. Ka tu to ratou au tutara e patoi i te Atua ko Iehova e Tei Akatainuia e ia. Inara, kua imene katoa te tata taramo e: “E akakite atu au i te ture a Iehova; kua tuatua mai aia kiaku e: Ko taku Tamaiti koe . . . Ka pati mai kiaku, e naku e oronga i te au etene ei tuanga naau, e te au enua openga ei apinga naau.”​—Salamo 2:7, 8.

³ Eaa te aiteanga o “te ture a Iehova” no te pa enua? Akapeea te reira i te akakeu anga i te tangata ravarai nei? E tika oki, eaa ra te aiteanga o teia au tupuanga nei no te aronga mataku Atua pouroa e tatau ra i te taramo rua?

Oripu ua te Pa Enua

4. Akapeea koe i te tapoto ua anga i te au manako maata o Salamo 2:1, 2?

⁴ I te tou anga ki te au angaanga a te pa enua e to ratou au tutara, kua akamata atu te tata taramo i tana atuanga na te imene anga e: “Eaa te au etene i oripu uaʼi, e te au tangata nei i manako ei i te mea puapinga kore? Te tu ra te ui ariki o te enua nei ki runga, e te kapiti katoa ra te ui rangatira e māro ia Iehova, e tana i akatainu ra.”​—Salamo 2:1, 2. *

5, 6. Eaa te “mea puapinga kore” ta te pupu pa enua “i manako ei”?

⁵ Eaa te “mea puapinga kore” ta te au pupu enua o teia tuatau nei “i manako ei”? I te ariki atu i Tei Akatainuia e te Atua​—koia te Mesia, me kore Karaiti—​“i manako ei,” me kore i akamanakonako ana te pa enua no runga, i te akono anga kia vai ua atu rai to ratou uaorai mana akaaere. E akatupuanga katoa to teia au tuatua nei o te taramo rua i te anere mataiti mua T.N. i te taokotai anga te nga mana akaaere o te ngati Iuda e te Roma i te tamate i te Ariki Akataoongaia o te Atua, ko Iesu Karaiti. Inara, i akamata te akatupuanga maata i te 1914 i te akamana angaia a Iesu ei Ariki i te rangi. Mei reira mai, kare okotai akaaerenga poritiki i te enua nei i ariki ana i te Ariki akateronoia o te Atua.

⁶ Eaa ra te aiteanga i te ui anga a te tata taramo e ‘eaa te au tangata nei i manako ei i te mea puapinga kore’? Ko to ratou akakoroanga te mea puapinga kore; kare rava te reira e puapingaia e kua taka e kare e tupu. Kare e rauka ia ratou i te apai mai i te au e te rotaianga ki teia ao katoa nei. Inara, te rave mamao atura rai ratou i ta ratou angaanga i te patoi i te tutaraanga tu-Atua. Te tika koia oki, kua taokotai ratou i te apai anga i te turanga kaitamaki e  kua akaputuputu kapiti ia ratou uaorai i te patoi i Tei Teitei Rava e Tei Akatainuia e ia. E neneva tikai!

To Iehova Ariki Autu

7. Na roto i te pure, akapeea te au pipi mua a Iesu i te taangaanga anga ia Salamo 2:1, 2?

⁷ Kua taangaanga ta Iesu au pipi i te au tuatua o Salamo 2:1, 2 kiaia. I te takinokino angaia no to ratou akarongo, kua pure ratou e: “E te Atu [Iehova], ko koe te Atua i anga i te rangi e te enua, e te tai, e te apinga tini ravarai i roto ra; Ko tei tuatua mai na roto i te vaa o to tavini ra o Davida e, “Eaa te au etene i oripu uaʼi, e te au tangata nei i manako ei i te mea puapinga kore? Te tu ra te ui ariki o te enua nei ki runga, e te kapiti katoa ra te ui rangatira, e māro ia Iehova e tana i akatainu ra.” Kua uipa tika rai ratou, ko Heroda e Ponotio Pilato, e te au etene katoa e te tangata oki no Iseraela, e rave ia Iesu i to Tamaiti tapu taau i akatainu ra.” (Angaanga 4:24-27; Luka 23:1-12) * Ae, kua tupu te orureauanga i te patoi i te tavini akatainuia o te Atua ko Iesu i te anere mataiti mua. Inara, e akatupuanga ke mai to teia taramo nei i te au anere mataiti i muri mai.

8. Akapeea te Salamo 2:3 i tau ei ki te pa enua i teia tuatau nei?

⁸ I te tu anga to Iseraela i taito i te ariki tangata ua nei, mei ia Davida, kua akaputuputu te pa enua peikani e te au tutara ki te ngai okotai i te patoi i te Atua e tana i akaterono e i akatainu. Inara akapeea i to tatou nei tuatau? Kare te pa enua i teia tuatau e inangaro i te aru i te au umuumuanga a Iehova e ta te Mesia. No reira, te akaariia maira ratou e na ko ra e: “Tatou e momotu i ta raua tapeka e taka ke atu, e akaruke takiri tatou i ta raua au taura ia tatou nei.” (Salamo 2:3) Tetai ua atu rai au araianga tei tukuia e te Atua e e Tei Akatainuia e ia ka patoiia e te au tutara e e te pa enua. E tika, ko tetai ua atu au tautaanga i te momotu i taua au tapeka ra e te akaruke takiri i taua au taura ra kare ia e puapinga.

Ka Taitoitoia Ratou e Iehova

9, 10. Eaa ra a Iehova i taitoito ei i te au pupu enua?

⁹ Kare a Iehova e manata ana i tetai ua atu au tautaanga a te au tutara pa enua kia akanoo i to ratou uaorai mana ngateitei. Kua na ko atu rai te rua o te taramo: “Ko tei noo ki runga i te au rangi te ka kata mai; ka taitoitoia ratou e te Atu.” (Salamo 2:4) Ka rave atu rai te Atua i tona akakoroanga mei te mea ra e kare takiri o teia au tutara puapinga. Te kata ra aia i to ratou tu akatietie e ka taitoito ia ratou. E vaoo ua ia ratou kia pupu vaa ua no runga i ta ratou e akakoro ra i te rave. Kia Iehova e mea katakata tikai ratou. Te kata ra aia i ta ratou patoianga puapinga kore.

¹⁰ I tetai ngai ke atu i roto i tana au taramo, kua taiku a Davida no runga i te au enemi tangata e e te pa enua e kua imene e: “E ara koe, e te Atua Sabaota, e Iehova, e te Atua o Iseraela e, e tutaki atu i te au etene ravarai: auraka e akaperepere i taua au rave ara pikikaa katoa ra. E  oki mai ratou i te aiai; aoa iora mei te puaka-aoa ra, ka akapini aere uaʼi i te oire nei. I na! te puroro nei te kino no roto i to ratou vaa; e koke oki tei to ratou ngutu: e te na ko nei ratou, Koai tei akarongo ra? Ko koe ra, e Iehova, te kata ra koe ia ratou: e taitoito-anga te au etene katoa naau.” (Salamo 59:5-8) Te kata ua ra a Iehova i te pupu vaa e te kononinoni anga o te pa enua i roto i to ratou akakoroanga neneva i te patoi iaia.

11. Eaa te ka tupu me tauta te pa enua i te patoi i te akakoroanga o te Atua?

¹¹ Te akaketaketa maira te au tuatua o Salamo 2 i to tatou akarongo e ka rauka i te Atua i te takore i tetai ua atu akaaoanga. Ka rauka ia tatou te irinakianga pakari e e akatupu ua ana aia i tona anoano e kare roa e akaruke i tona au tavini tiratiratu. (Salamo 94:14) Ina, i reira, eaa te ka tupu me rave te pa enua i te au tautaanga i te patoi atu i to Iehova akakoroanga? I akakite ei teia taramo, “ei reira te [Atua] e tuatua mai ei kia ratou i tona riri,” mei te tangi o te aruru maata o te mangungu. Kapiti atu, i roto “i tona riri maata,” mei te rapa anga maata tikai o te uira, “e tumatetenga roa akera ratou iaia.”​—Salamo 2:5.

Kua Akatainuia to te Atua Ariki

12. Te tau ra te Salamo 2:6 ki teea akateronoanga?

¹² Aru atu i ta Iehova i tuatua na roto i te tata taramo kare e ekoko e kua riro ei tamanamanata i te pa enua. Kua akakite te Atua: “Kua akatainu ra au i taku ariki i runga i toku maunga tapu ra, i Ziona.” (Salamo 2:6) Te Maunga ko Ziona tetai maunga ia i Ierusalema te ngai i akatainuia ai a Davida ei ariki ki rungao ia Iseraela katoa. Kareka ko te Ariki Mesia kare ia e noo ki runga i tetai terono i roto i taua oire ra me kore i tetai ngai ke atu i runga nei i te enua. Ko te tika, kua akatainu ke ana a Iehova ia Iesu Karaiti ei Ariki Mesia ikiia nona i runga i te Maunga ko Ziona i te rangi.​—Apokalupo 14:1.

13. Eaa te koreromotu ta Iehova i maani ki tana Tamaiti?

¹³ Te tuatua nei te Ariki Mesia i teianei. Kua akakite aia: ‘E akakite atu au i te ture a Iehova [ko te maani ra i tetai koreromotu no te Patireia ki tana Tamaiti]; kua tuatua mai aia [te Atua ko Iehova] kiaku: Ko taku Tamaiti koe; e riro oki au, i teianei ra, ei metua noou.’ (Salamo 2:7, akaaite ia NW) Kua taiku a Karaiti i te koreromotu Patireia i tona akakite anga ki tana au apotetoro e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou.”​—Luka 22:28, 29.

14. Eaa ka tuatuaia ai e ko Iesu te mou nei i te taoonga ariki te kare roa e rauka kia akaaoia?

¹⁴ Mei tei totouia ia Salamo 2:7, kua ariki a Iehova ia Iesu ei Tamaiti Nana i tona papetitoanga e na te akatu akaou anga iaia ki te oraanga vaerua. (Mareko 1:9-11; Roma 1:4; Ebera 1:5; 5:5) Ae, ko te Tamaiti anau tai a te Atua te Ariki o te Patireia i te rangi. (Ioane 3:16) Ei uanga ariki no te Ariki ko Davida, ko Iesu te mou nei i te taoonga ariki te kare roa e rauka kia akaaoia. (2 Samuela 7:4-17; Mataio 1:6, 16) I akakite ei teia taramo, kua akakite te Atua ki tana Tamaiti: “Ka pati mai kiaku, e naku e oronga i te au etene ei tuanga naau, e te au enua openga ei apinga naau.”​—Salamo 2:8.

15. Eaa ra a Iesu i pati ei i te pa enua ei tuanga nana?

 ¹⁵ Te Ariki​—koia te Tamaiti uaorai a te Atua​—te mou i te turanga mana piri vaitata roa atu kia Iehova. Ko Iesu to Iehova tei timataia, tei tiratiratu, e te irinakiia. Kapiti atu, tei ia Iesu te tuanga ei Tama Anau Tai na te Atua. E tika tikai e, ko Iesu Karaiti “te tu tikai aia o te Atua akara koreia, ko te Tama mua aia o te au mea ravarai i angaia ra.” (Kolosa 1:15) Tana ua ka anoano i te rave koia oki e pati e na te Atua ‘e oronga i te pa enua etene ei tuanga nana e te au enua openga ei apinga nana.’ Kua rave a Iesu i teia patianga nei ei tangata tei ‘te tamariki a te tangata ra tona mataoraanga’ e no tona anoano maata i te rave i te anoano o tona Metua i te rangi no te enua e no te tangata nei.​—Maseli 8:30, 31.

Ta Iehova Ture Patoi i te Pa Enua

16, 17. Kia tau ki te Salamo 2:9, eaa te vai atura no te pa enua?

¹⁶ I te mea e te akatupuia nei te taramo rua i teianei, i te tuatau o to Iesu taenga kitea koreia, eaa ra te vai atura no te pa enua? Kare e roa atu ka akatupu te Ariki i ta te Atua akakiteanga: “E ngaangaa ratou [te pa enua] ia koe i te pāpā auri, e ungaungātiti roa ia koe mei te kapu a te potera ra.”​—Salamo 2:9.

¹⁷ Te au papa auri a te au ariki i te au tuatau i taito e au akairo ia no te mana ariki. Tetai au papa kua maaniia ki te auri, mei te mea rai tei tuatuaia i roto i teia taramo. Te akaari maira te tuatua akatutu tei taangaangaia i konei e e mea mama ua i te Ariki ko Karaiti i te takore atu i te pa enua. E tai rai tuki anga ririnui ki te papa auri kua ngaangaa te vairanga potera a te tangata i maaniia ai, pueu takiri atu ei te reira.

18, 19. E rauka ai to te Atua marekaanga, eaa ta te ui ariki o te enua ka anoano i te rave?

¹⁸ Ka anoanoia ainei te au tutara pa enua kia kite i taua ngaangaa anga kino ra? Kare, no te mea te pati ra te tata taramo kia ratou ma teia au tuatua nei: “E tenana, e te ui ariki ra, kia pakari kotou; e āriki i te ako, e te au akava o te enua nei.” (Salamo 2:10) Te kapikiia nei te ui Ariki kia akarongo meitaki, kia pakari i roto i teia mea nei. E mea tau kia akamanako ratou i te puapinga kore o ta ratou au parani, tei tuke ki ta te Patireia o te Atua ka rave no te puapinga o te tangata nei.

¹⁹ E rauka ai to te Atua marekaanga, ka anoanoia te ui ariki o te enua nei kia taui i to ratou aerenga. Te akoia ra ratou kia “akamori ia Iehova ma te mataku; E rekareka, ma te rutetetete.” (Salamo 2:11) Akapeea i reira mei te mea e apai ratou i taua takainga ra? Kare e oripu ua, me kore e marikonga kore ua te manako, ka rekareka ra ratou i te au manakonakoanga ta te Ariki Mesia ka tuku ki mua ia ratou. E mea tau kia akaruke te au tutara o te enua i te tu parau e te tu akatietie ta ratou e akaari pu ua maira i roto i ta ratou tutaraanga. Kapiti katoa atu, kia taui ratou auraka e tavarevare e kia taangaanga i te pakari no runga i te tutaraanga teitei roa o to Iehova mana ngateitei e te mana akaaite koreia o te Atua e tona Ariki Mesia.

“Ka Ongi Ana i te Tamaiti”

20, 21. Eaa te aiteanga e “ka ongi ana i te Tamaiti”?

²⁰ I teianei te tuku atura te Salamo 2 i tetai patianga akaaroa ki te au tutara o te pa enua. I to te akaputuputu kapiti mai no te patoianga, kua akoia atu ra ratou e: “Ka ongi ana i te Tamaiti ra, ko te riri aea aia [te Atua ko Iehova], mate iora kotou i te arataa ra; kare oki tona riri e roaia kua tupu.” (Salamo 2:12a) E akarongo i te Atu Ngateitei ko Iehova me tuku aia i tetai ture. Te tuku anga te Atua i tana Tamaiti ki runga i te terono, kua tau te au tutara o te pa enua kia akamutu i te ‘manako i te mea puapinga kore.’ Tika anga i reira rai kua ariki ratou i te Ariki e kua tuku i te akarongo katoa kiaia.

²¹ Eaa ‘ka ongi ei i te tamaiti’? I te atuia anga teia taramo nei, ko te ongi e akaarianga no te pirianga oa e e raveia ana me ariki atu i te au manuiri ki te kainga o tetai, ei reira ratou rekareka ai i te arikianga. E akaarianga katoa te ongi i te tu tiratiratu. (1 Samuela 10:1) I roto i teia irava o te taramo rua, te akaue ra te Atua i te pa enua kia ongi, me kore kia ariki, i tana Tamaiti ei Ariki akatainuia.

22. Eaa te akamatakiteanga ta te au tutara o te pa enua ka tau kia akarongo?

²² Te aronga e patoi ra i te ariki i te mana akaaere o te Ariki ikiia a te Atua te akakino ra ia  Iehova. Te akakore ra ratou i te mana ngateitei o te Atua ko Iehova no te ao e pini ua ake e tona mana akaaere e te kite i te iki i te Ariki tau meitaki roa atu ei tutara no te tangata nei. Ka kite te au tutara o te pa enua e ka rokona poitirere uaia mai ratou e te riri o te Atua, ia ratou e tauta ra i te akatupu i ta ratou uaorai au parani. “Kare oki tona riri e roaia kua tupu,” me kore ka viviki ua e kare e rauka kia araiia. E mea tau kia ariki meitaki te au tutara o te pa enua i teia akamatakiteanga e te akono kia rotai ki te reira. Na te rave anga i te reira ka rauka te ora.

23. Te vai nei rai te taime no te tangata tataki tai i te rave i teaa?

²³ Te taopenga ra teia taramo puapinga pakari e: “E ao to te aronga e irinaki iaia [ia Iehova].” (Salamo 2:12e) Te vai nei rai te taime no te tangata tataki tai kia kimi i te ora. Te tika katoa ra te reira no te au tutara tataki tai tei turuturu ana i te au parani a te pa enua. Ka rauka ia ratou kia oro kia Iehova, te ka oronga mai i te akapuanga i raro ake i te tutaraanga Patireia. E rave ra ratou i te reira i mua ake ka takore ei te Patireia o te Mesia i te pa enua patoitoi.

24. Akapeea tatou i te noo anga i tetai oraanga merengo atu i roto katoa tikai i teia ao manamanata?

²⁴ Me aruaru tatou i te apii maroiroi i te au Tuatua Tapu e te akono i ta te reira akoanga i roto i te oraanga, ka rauka ia tatou i teianei tikai i te noo i tetai oraanga merengo maata atu i roto i teia ao manamanata. Ka riro te akono anga i te akoanga Tuatua Tapu i te akatupu i te au pirianga ngutuare tangata mataora atu e te mataraanga mai mei te au manata e te au matakuanga e takino nei i teia ao. Ka oronga mai te aru anga i te au aratakianga Pipiria i te irinakianga papu e te akarekareka ra tatou i Tei Anga mai. Kare tetai ua atu mari ua ko Tei Ngateitei i te Ao e Pini Ua Ake te ka rauka i te oronga mai i te akapapuanga no ‘te oraanga i teianei e te ao a muri atu’ i muri ake i tona tama anga i te enua i te aronga tei patoi i te mea tika na te kopae anga i te tutaraanga Patireia.​—1 Timoteo 4:8.

25. I te mea e kare e poka “te ture a Iehova,” eaa ta tatou ka tapapa atu e ka tupu i to tatou nei tuatau?

²⁵ “Te ture a Iehova” kare ia e poka. Mei ta te Atua ko Tei Anga mai ia tatou, i kite e eaa tei meitaki roa atu no te tangata ravarai nei e ka akatupu rai i tona akakoroanga kia akameitaki i te au tangata akarongo ki te au, te mareka ua, e te tinamou i raro ake i te Patireia o tana Tamaiti akaperepere. No runga i to tatou tuatau, kua tata te peroveta ko Daniela e: “E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia . . . . e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Te papu ua ra, i reira e, ko te taime rapurapu tikai teia i te ‘ongi i te Tamaiti’ e te tavini i te Atu Ngateitei, ko Iehova!

[Au Tataanga Rikiriki i Raro]

Akapeea Koe me Pau?

• Eaa “te mea puapinga kore” ta te au pupu pa enua “i manako ei”?

• Eaa ra a Iehova i taitoito ua ai i te pa enua?

• Eaa ta te Atua ture no te pa enua?

• Eaa te aiteanga e “ka ongi ana i te Tamaiti”?

[Au Uianga Apii]

[Tutu i te kapi 16]

Kua imene a Davida no runga i te Ariki Mesia tei autu

[Tutu i te kapi 17]

Kua orureau te au tutara e te tangata o Iseraela i te patoi ia Iesu Karaiti

[Tutu i te kapi 18]

Kua akatainuia a Karaiti ei Ariki i runga i te Maunga i Ziona i te rangi