Au Uianga a te Aronga Tatau

Eaa te aiteanga o ta Iesu tuatua i tona akakite anga ki tana au pipi e: “Kua kite au ia Satani i te topa anga, mei te uira no runga i te rangi ra”?

Koi iki ua akera a Iesu e 70 pipi, e “tataki toko rua atura [aia] i te tono anga ia ratou na mua iaia i te au oire, e te au ngai ravarai tana i akakoro e, e aere katoa aia ki reira.” I te oki anga mai o te 70, kua rekareka tikai ratou no tei puapingaia ta ratou angaanga tutuanga. “E te Atu, kua vi katoa te au demoni ia matou i to ingoa na,” i na ratou ei. I taua taime ra, kua karanga atura Iesu e: “Kua kite au ia Satani i te topa anga, mei te uira no runga i te rangi ra.”​—Luka 10:1, 17, 18.

I te akamataanga, penei i te akaraanga te tuatua ra a Iesu no tetai tupuanga tei tupu ke ana. Inara, e 60 mataiti i muri mai i to Iesu tuatua anga i te au tuatua i runga ake nei, kua taangaanga te apotetoro tangata metua ko Ioane i te reo mei te reira rai, i te tata anga e: “Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.”​—Apokalupo 12:9.

I te tata anga a Ioane i taua au tuatua ra, te noo ra rai a Satani i te rangi. Akapeea tatou i kite ei? No te mea e puka a Apokalupo no te totou, kare no te tuatua enua. (Apokalupo 1:1) No reira, i to Ioane tuatau, kare ake rai a Satani i titiriia ake ki raro nei i te enua. Ko te tika, te akaari maira te akapapuanga e kare teia i tupu ana e na te tae roa anga ki muri poto ua ake i to Iesu akaterono angaia ei Ariki no te Patireia o te Atua i te 1914. *​—Apokalupo 12:1-10.

Eaa, i reira, a Iesu i tuatua ai i to Satani tuaru angaia mai mei te rangi mei te mea ra e kua tupu ke ana? Kua manako tetai aronga kite e te ako ra a Iesu i tana au pipi no te akaari anga i te tu parau tau kore. Kua irinaki ratou, mei tera te tu e, te karanga ra aia e: ‘Kua autu kotou ki rungao i te au temoni, auraka ra e akaparau. Kua oria oki a Satani e te ngakau parau, e kua arataki atu te reira ki tona topaanga viviki roa.’

Kare e rauka ia tatou kia manako maro atu i roto i teia mea nei. Inara, i te mea ra te akaraanga e te rekareka ra a Iesu ma tana au pipi e te tuatua ra no runga i to Satani topaanga a te tuatau ki mua. Maata roa atu i tetai ua atu o tana au pipi, kua kite meitaki tikai a Iesu i to te Tiaporo riri kino. E akamanako ua ana i te rekareka ta Iesu i kite i te akarongo anga e kua vi te au temoni ririnui i tana au pipi tangata apa ua nei! Ko teia akavianga i te au temoni e akaarianga poto ua ia no te tuatau ki mua e tamaki ei a Iesu, te angera maata ko Mikaela, kia Satani e e titiri ei iaia mei te rangi mai ki te enua nei.

I to Iesu tuatua anga e i kite ana aia ia Satani i te “topa anga,” te taka ua ra e te akaketaketa ra aia i te papuanga tikai o to Satani topaanga. Te aiteite ra rai teia ki tetai au totou Pipiria ke atu e tuatua ra no runga i te au tupuanga no te tuatau ki mua mei te mea ra e kua tupu ke ana te reira. Ei akaraanga, e akara ana e akapeea tetai au tuanga o te totou no runga i te Mesia ia Isaia 52:13–​53:12 i te tuatua angaia mei te mea ra e kua tupu ke ana te reira. Mei te mea ra e te akapapu ra a Iesu i te irinakianga e ko to Satani tuaru angaia mai mei te rangi ka tupu ia kia tau ki te akakoroanga o Tona Metua. Kua papu katoa ia Iesu e i to te Atua tuatau tau, ka uriia a Satani e tana au temoni ki roto i te vaarua takere kore e takore ravaia atu ei.​—Roma 16:20; Ebera 2:14; Apokalupo 20:1-3, 7-10.

[Tataanga Rikiriki i Raro]