To te Atua Kavamani Patireia​—E Tika Tikai i Teia Tuatau Nei

“Akapeea ra e rauka ai i te au enua e manganui, ma te au tu peu tukeke i te au turanga tuketuke o te tupuanga, kia noo au ua? Kua karangaia ana e na tetai tamakianga ua rai mei tetai paraneta ke mai e taokotai i te tangata ravarai.”​—The Age, nuti pepa Autireria.

TETAI tamakianga mei tetai paraneta ke mai? Noatu me ka taokotai te reira i te pa enua katoa o te enua nei e me kare, te akakite tika maira ra te totou Pipiria i tetai tumatetenga e vaitata maira te ka akakeu i te pa enua o te ao kia ruru taokotai. E tikai e, ko te tumatetenga, na te au mana ririnui tikai o vao mai i te paraneta enua e akatupu.

Kua tuatua totou te Ariki ko Davida o Iseraela i taito i teia turanga o te ao. I raro ake i te akauruanga tu-Atua kua tata aia: “Te tu ra te ui ariki o te enua nei ki runga, e te kapiti katoa ra te ui rangatira e māro ia Iehova, e tana i akatainu ra, Te na ko ra, ‘Tatou e momotu i ta raua tapeka e taka ke atu, e akaruke takiri tatou i ta raua au taura ia tatou nei!’” (Salamo 2:2, 3; Angaanga 4:25, 26) I na ka akara ana e te kapiti katoa ra te au tutara o te ao ei okotai e maro atu ia Iehova, ko Tei Anga mai i te ao e pini ua ake, e tei akatainuia e ia, me kore tona Ariki akamanaia, ko Iesu Karaiti. Akapeea te reira i te tupu anga?

Kia tau ki te akapapaanga a te Pipiria e te au toutouanga tei akatupuia, i te mataiti 1914, kua akanooia te Patireia o te Atua i te rangi ma Iesu Karaiti ei Ariki. * I taua taime ra e okotai rai o te pa enua manako aiteite ua. Kare i kauraro atu ki  te tu ngateitei o te Patireia anau ouia o te Atua, kua o atu ra ratou ki roto i tetai putotoanga no te mana akaaere​—te Tamakianga Maata, me kore te Tamaki I o te Ao.

Akapeea ra to te Atua ko Iehova manako i taua tu ra i te tua o te au tutara tangata? “Ko tei noo ki runga i te au rangi ra te 3ka kata mai; ka taitoitoia ratou e [“Iehova,” NW]. Ei reira aia e tuatua mai ei kia ratou i tona riri, e tumatetenga roa akera ratou iaia i tona riri maata.” I reira, ka akakite a Iehova ki tana Tamaiti, te Ariki akatainuia o te Patireia e: “Ka pati mai kiaku, e naku e oronga i te au etene ei tuanga naau, e te au enua openga ei apinga naau. E ngaangaa ratou ia koe i te pāpā auri, e ungaungātiti roa ia koe mei te kapu a te potera ra.”​—Salamo 2:4, 5, 8, 9.

Ko teia akapaii anga openga i te pa enua patoi ki te papa auri ka tupu te reira ia Aramakito, me kore Aramagido. Te akataka maira te puka openga o te Pipiria, ia Apokalupo, i teia tupuanga puapinga e ko te “tamaki o taua rā maata o te Atua mana katoatoa ra,” i reira “te ui ariki o te ao katoa nei” e akaputuputu ia ai ki te ngai okotai. (Apokalupo 16:14, 16) Raro ake i te akanauruanga a te temoni, ka taokotai iora i reira te pa enua ma te akakoroanga okotai​—e tamaki atu i te Atua Mana Katoatoa.

Te vaitata viviki roa mai nei te taime e kapiti katoa ai te tangata nei i te tamaki atu i to te Atua tu ngateitei. Te mea katakata ra, kare to ratou “taokotai” e apai mai i te au puapinga no ratou uaorai. Inara, ko ta ratou e rave ra e akamataanga ua ia ki te au tei roa akenei te tangata ravarai i te tapapa anga. Akapeea ra? I taua tamakianga openga ra, ko to te Atua Patireia “e riro na te reira e akapueurikiriki e e akapou i taua au basileia katoa ra [o te ao], e ka vai rai te reira e tuatau ua atu.” (Daniela 2:44) Ko te Patireia o te Atua, kare ko tetai ua atu akaaerenga a te tangata, te kavamani te ka akatupu i te anoano o te tangata i te au no teianei ao.

Te Akaaere Maata o te Kavamani Patireia

Ko te Patireia tera ta te tangata ngakau tae e manganui e pure ana, i te na ko anga e: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:10) Kare i te turanga kitea koreia no te ngakau mari ra, e kavamani tika tikai te Patireia o te Atua tei akatupu i te au angaanga umere tikai mei te akamanaangaia mai te reira i te rangi i te 1914. Ka akamanako ana tatou i tetai au tumu puapinga e akaari maira e te angaanga pu tikai nei te Patireia o te Atua i teia tuatau.

Te mea mua, e manga akaaere ririnui e te mako meitaki to te reira tei akatereia e te Ariki akateronoia, ko Iesu Karaiti. I te 33 T.N., kua akariro te Atua ko Iehova ia Iesu Karaiti ei Upoko no te putuputuanga Kerititiano. (Ephesia 1:22) Mei reira mai, to Iesu taangaanga anga i tona taoonga upoko, i te akaari anga i tona kite akaaere. Ei akaraanga, i te tupu anga tetai onge maata i Iudea i te anere mataiti mua, kua rave viviki te putuputuanga Kerititiano i te oronga atu i te tauturu ki to te reira au mema. Kua akaaereia tetai angaanga tauturu, e kua tukunaia atu a Banaba e Saula ki Anetioka ma tetai tauturu.​—Angaanga 11:27-30.

Kare e iti mai te ka tapapaia atu ia Iesu Karaiti i teianei e te angaanga nei te kavamani Patireia. Noatu e aea e tupu ei, te au tumatetenga​—ngaruerue enua, onge, vai puke, uriia, matangi ririnui, me kore te aruru anga o te maunga ka​—e viviki ua ana rai te putuputuanga Kerititiano o te Au Kite o Iehova i te tauturu i te au anoano o te au oa akarongo e etai ke atu i roto te au ngai tei uia. Ei akatauanga, i te u anga te au ngaruerueanga enua kino pakari ki Ere Taravatoa i roto ia Tianuare e Peperuare 2001, kua akaaereia te au angaanga tauturu ki roto i te au tuanga katoatoa o te enua, e kua oronga te au pupu o te Au Kite o Iehova mei Kanata, Kuatemara, e Marike i te tauturu. E toru o ratou au ngai akamorianga pera katoa kua tere roa atu i te 500 kainga tei patu viviki akaouia i te taime poto ua.

Au Tangata no te Kavamani Patireia o te Atua

Mei te akanooangaia mai te reira i te 1914, i te akaputuputu anga e te akaaere anga to te Atua Patireia i te rangi i te reira au tangata mei roto mai i te au iti tangata ravarai takapini i teia ao. Te akatupu ra teia i tetai totouanga umere roa tei rekotiia e Isaia: “E riro kia tae ki te au rā openga ra, e akatinamouiaʼi te maunga ra o te are o Iehova [tana akamorianga mou tei akateiteiia] ki runga i te take o te au maunga ra; . . . e putuputu ua mairai te au etene katoa ra ki reira.” Te akaari maira te totou e “e manganui te tangata” ka aere ki runga i taua maunga ra e ariki atu i te au ikuikuanga e te au ture a Iehova.​—Isaia 2:2, 3.

Kua riro teia angaanga i te akatupu i te akapupuanga puapinga roa atu o teia tuatau nei​—tetai taokotaianga taeake pa enua tei tere atu i te 6,000,000 Kerititiano i roto i te 230 enua o te enua nei. I ko i te au uruoaanga pa enua a te Au Kite o Iehova, e putuputu ua ana te aronga akarakara i te umere i te kite i te aroa, te au, e te taokotai i rotopu i te au urupu maata o te tangata, i te autu anga atu te au arairaianga o te enua, te peu akonoanga, e te reo. (Angaanga 10:34, 35) Kare ainei koe e akatika e no tetai kavamani kia rauka ai i te apai mai i te au anereanga pupu eteniki ki te ngai okotai ma te au e te rotai, ka anoanoia te reira kia meitaki tikai e te ngaueue kore​—e te tika tikai?

To te Atua Patireia e te Apiianga

E au turanga ta te au kavamani ravarai te ka tapapaia te au tangata o te reira kia akono, e te aronga ravarai tei inangaro i te noo ki raro ake i taua kavamani ra kia akono i taua au turanga ra. Mei te reira katoa, e au turanga rai to te Patireia o te Atua te ka anoanoia te katoatoa tei tau ei au tangata no te reira kia akono. Inara, no te tangata e manganui e maata te au turanga tuke tuke kia ariki e rauka ai kia aru i taua au turanga rai e angaanga maata tikai. Tei konei, i reira, tetai tumu akaou mai e akakite papu ua maira ki te tika tikai o te Patireia o te Atua​—ta te reira porokaramu puapinga meitaki no te apiianga te taenaia ra e te akatuke ra kare ko te manako ua mari ra e te ngakau katoa.

Akapeea te kavamani Patireia i te akatupu anga i teia angaanga ngata nei? Na te mataara tutu anga a te au apotetoro “i tera are i tera are” e te apii anga i te Tuatua a te Atua ki te tangata tataki tai. (Angaanga 5:42; 20:20) Mei teaa tikai te puapinga meitaki o teia tu apiianga? Kua tata a Jacques Johnson, e orometua Katorika, i roto i tetai nuti pepa epetoma i Kanata no runga i tana au tautaanga kia akaariuke i tetai vaine mei te apii anga ma te Au Kite o Iehova. “Kua manamanata tikai au e te kite ra e kua o au ki roto i tetai tamakianga kare e puapingaia,” i tuatua ai aia. “Kua akamata au i te kite e i te au marama i pou kua rauka i teia nga vaine o te Au  Kite o Iehova i te akatupu i tetai au pirianga puapinga ma teia mama mapu ou e noo ua ana ki te kainga. Kua piri raua kiaia na te tauturu anga iaia, te akataeake anga iaia, te akanoo anga i te au pirianga puapinga o te ngakau. Kare i roa kua riro mai aia ei mema maroiroi i roto i ta raua akonoanga e kare e rauka iaku i te paruru i te reira kia kore e tupu.” Mei te ngakau o teia Katorika i mua ana i akakeuia e te karere Pipiria tei apiiia e te Au Kite o Iehova e e to ratou tu Kerititiano, koia katoa te ngakau o te mirionianga e akakeuia nei i te ao katoa.

Ko teia tu apiianga​—e apiianga Patireia​—tei akatumuia ki runga i te Pipiria, te turu anga i au turanga puapinga o te reira e ta te reira au turanga no te tu akono tau. Te apii ra te reira i te tangata kia aroa e kia akangateitei i tetai e tetai noatu eaa to ratou ngai i aere mai ei. (Ioane 13:34, 35) E tauturu katoa te reira i te tangata kia ariu ki te akoanga: “E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Na te akaruke anga i to ratou tu oraanga i mua ana e te aru anga ki te au ture e te au kaveinga a te kavamani Patireia, e mirioni ua atu tei kite i te au e te mataora i teianei e te au manakonakoanga manea no te tuatau ki mua.​—Kolosa 3:9-11.

Tetai tauturu takake roa no te rauka anga mai teia taokotaianga i te ao katoa koia oki ko teia makatini, Te Punanga Tiaki. Na roto i te au mataara taokotaiia o te urianga e te au apinga nenei no te au reo ke ke, ko te au atikara tumu i roto i Te Punanga Tiaki tei neneiia i te taime okotai i roto i te 135 reo, e ka rauka i te 95 patene e ara atu aronga tatau o te reira i te ao katoa i te apii i te au apiianga i roto i to ratou uaorai reo i te taime okotai.

Tetai tangata tata e Momani kua papa i te au angaanga mitinari puapinga roa atu i vao ake i tana uaorai akonoanga. Kua papa aia i Te Punanga Tiaki e te Awake!, tei neneiia e te Au Kite o Iehova, e ko te nga makatini tutu evangeria meitaki roa atu e kua tuatua e: “Kare rava e rauka i tetai tangata i te akaapa i te Punanga Tiaki me kore i te Awake! i te akamaroiroi i te noo manako kore ua​—e tuke rai teia, te akatupu ra te reira i tetai tu matakite taku i kite ana i tetai taime ua ake i roto i tetai au puka akonoanga ke. E tau meitaki tikai te Punanga Tiaki e te Awake! i roto i ta te reira au tumu tuatua tei akanooia ki runga i te tumu tika, tei kimikimi meitakiia, e tei piri atu ki te ao tika tikai.”

E mea umere tikai te akapapuanga e te angaanga tika tikai nei te Patireia o te Atua. Te mataora nei e te maroiroi tikai nei te Au Kite o Iehova i te akakite i “te evangelia o te basileia nei” ki to ratou au tangata tupu, i te pati anga ia ratou kia riro mai ei au tangata no te reira. (Mataio 24:14) Te tau ra ainei taua manakonakoanga ra kia koe? Ka rauka ia koe kia rekareka i te au akameitakianga ka rauka mai mei te taokotai anga ma te aronga e apiiia ra e te tauta ra i te noo kia tau ki te au turanga o te Patireia. Meitaki roa atu ra, ka rauka ia koe te manakonakoanga o te noo anga i raro i te tutaraanga a te Patireia i roto i te ao ou tei koreromotuia i “te vai tika anga o te tuatua-tika ra.”​—2 Petero 3:13.

[Tataanga Rikiriki i Raro]

[Tutu i te kapi 4, 5]

I te 1914 kua o atu te pa enua ki roto i te tamakianga o te ao

 [Au Tutu i te kapi 6]

Te angaanga tauturu e akapapuanga e te angaanga ra te aroa Kerititiano

[Tutu i te kapi 7]

Te puapinga nei te Au Kite o Iehova i te ao katoa mei taua porokaramu rai o te apiianga