Au Uianga a te Aronga Tatau

Kua karanga etai e kare oki a Paulo i parari pai ana i runga i te airani o Melita, i te apatokerau o Sicily, i runga ra i tetai airani ke mai. Teiea ngai i parari pai ei aia?

Te taikuia nei teia uianga ki tetai manako no teia taime ua nei e kua parari pai te apotetoro ko Paulo, kare oki i runga i te airani o Melita, inara ki runga ia Cephalonia (me kore ko Kefallinía) i te pae mai ia Corfu i roto i te Tai Ionia, i te pae itinga i Ereni. Te akakite maira te rekoti akauruia e kua aere a Paulo mei Kaisarea mai i raro i te tapeka anga a te opita akaaere Roma ko Lulio, kapiti mai ma etai o te au vaeau ke mai e to Paulo au taeake. Tei akatutuia i runga i te mapu, kua teretere atu ratou ki Sidona e Mura. Tauianga ki tetai pai titona maatamaata mei Alekanederea  mai, i Aiphiti, kua aere atu ratou ki te tua opunga ki Cnidus. Kare oki i rauka ia ratou i te akamou ki te ara tei manakoia no te tikotianga i te Tai Aegean pati mai i te ope o Ereni e aere atu ki Roma. Kua opara te au matangi ririnui tikai ia ratou ki apatokerau aere atu ki Kereta e i raro i te akaruruanga o te reira pae tai. I reira kua tapu ratou ki ko i te ava ko Fair Havens. I te tukunaia atu anga ‘ki te tai mei Kereta ra,’ kua “mānu ke atura” te pai i tetai “matangi uriia, Eurokalido te ingoa.” Te pai titona teimaa kua “takanimonimo aere uaia” e tae ua atu ki te 14 o te po. I te openga iora, kua parari pai te katoatoa o te 276 tangata i runga i tetai airani tei kapikiia e te irava Ereni o te au Tuatua Tapu e ko Me·liʹte.​—Angaanga 27:1–​28:1.

I te au mataiti, e tuketuke te au akakiteanga tei karangaia no runga i te akatakaanga o teia airani, ko Me·liʹte. Kua manako tetai papaki e ko te airani Melite Illyrica, tei kiteia i teianei e ko Mljet ia, i roto i te Tai Adriatic i te pae tai o Croatia. Inara i te akaraanga kare teia i manakoia, mei te mea e ko te ngai apatonga roa o Mljet e ngata i te rotai ki te au tuanga tei aru mai o to Paulo teretereanga, koia oki ia Sarakusa, Sicily, e oti i reira ki te itinga pae tai o Itaria.​—Angaanga 28:11-13.

Kua taopenga te maata anga o te au tangata uri Pipiria e te tou ra a Me·liʹte ki te airani Melite Africanus, tei kiteia i teianei e ko Melita. Te ava openga i tapu ei te pai tei apai ia Paulo koia oki ko Fair Havens, i runga ia Kereta. I na kua opara tetai matangi uriia i te pai ki te tua opunga aere atu ki Kalauda. Kua opara ua te matangi i te pai no te au ra e manganui. E mea tau tikai i te manako e ka aere mamao atu te pai tei oparaia e te matangi ririnui ki te itinga e tae atu ki Melita.

I te akamanako anga i te matangi mou e te “aratakianga e te pakari o te au,” kua akakite mai a Conybeare e Howson i roto i ta raua puka The Life and Epistles of St. Paul: “Te mamao i rotopu ia Kalauda [me kore, ko Cauda] e Melita tei raro ua mai i te 770 kiro mita. E mea umere tikai teia tupuanga, e i te akaraanga e ngata tikai i te irinaki e ko te enua, i te ngai i akavaitata atu ei te au mataro i te tai ngauru ma a o te po e kare oki ko tetai ngai ua mai mari ra ko Melita. E ngata tikai teia akapapuanga.”

Noatu e te orongaia maira te au akatakaanga ke atu, ko tetai parari pai i Melita tei akaariia maira ki runga i te mapu tei aru mai kua tau i te akaraanga ki te rekoti a te Pipiria.

[Mapu/Tutu i te kapi 31]

(No runga i teia, akara i te puka)

Ierusalema

Kaisarea

Sidona

Mura

Cnidus

KERETA

KALAUDA

MELITA

SICILY

Sarakusa

Roma

MLJET

ERENI

CEPHALONIA