Ko Iehova, To Tatou ‘Maroiroi i te Au Tuatau Tumatetenga’

“Te ora o te aronga tuatua-tika ra, no ko ïa ia Iehova ra, koia to ratou maroiroi i te tuatau tumatetenga.”​—SALAMO 37:39.

1, 2. (a) Eaa ta Iesu i pure ei no tana au pipi? (e) Eaa to te Atua anoano no runga i tona iti tangata?

E MANA katoatoa a Iehova. E mana tona i te paruru i tona aronga akamori tiratiratu na roto i tetai ua atu tu tana i inangaro. Ka rauka katoa iaia i te akataka ke tikai i tona iti tangata mei te toenga mai o teianei ao e te tuku ia ratou ki roto i tetai ngai meitaki e te au ua. Inara, no runga i tana au pipi, kua pure a Iesu ki tona Metua i te rangi e: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, [“no te vaerua kino ra oki,” NW].”​—Ioane 17:15.

² Kua iki a Iehova auraka kia apai ke ia tatou “i teianei ao.” Mari ra, ko tona anoano kia noo tatou ki rotopu i te tangata ravarai o teia ao kia rauka i te akakite i tana karere o te manakonakoanga e te akapumaanaanga ki etai ke. (Roma 10:13-15) Inara, mei ta Iesu i taiku i roto i tana pure, na te noo anga i roto i teia ao, kua akaari puia tatou ki “te vaerua kino ra oki.” Te akatupu nei te tangata akarongo kore e te au vaerua ririnui kikino i te mamae maata e te riri, e kare te au Kerititiano i taka ke mai mei te tumatetenga.​—1 Petero 5:9.

3. Ka aro katoa atu to Iehova aronga akamori tiratiratu i teea tu tikai, inara eaa te akapumaanaanga ta tatou e kite ra i roto i te Tuatua a te Atua?

³ I raro ake i taua au timataanga ra, e mea matau ua te na roto i te au tuatau o te akamaroiroi kore. (Maseli 24:10) E manganui te au tuatua e vai ra i roto i te au rekoti Pipiria no te aronga tiratiratu tei kite ana i te tumatetenga. “Manganui to te tangata tuatua-tika ra mate,” i karanga ai te tata taramo, “e akaoraia ra aia e Iehova i taua au mea katoa ra.” (Salamo 34:19) Ae, e tupu ana rai te au apinga kino ki “te tangata tuatua-tika.” Mei te tata taramo ia Davida, i tetai au taime ka ‘apikepike tatou, ka paruparu takiri roa.’ (Salamo 38:8) Inara, e mea pumaana tikai i te kite e “te vaitata nei a Iehova ki te aronga ngakau paruparu ra; e te akaora nei aia i te aronga ngakau taitaia.”​—Salamo 34:18; 94:19.

4, 5. (a) Kia tau ki ta Maseli 18:10, eaa te ka anoanoia ia tatou kia rave kia rauka ia tatou uaorai te paruruanga a te Atua? (e) Eaa tetai au takainga taka ke ta tatou ka apai kia rauka mai te tauturu a te Atua?

⁴ Kia tau ki ta Iesu pure, e tika roa e te tiaki maira a Iehova ia tatou. Koia to tatou “maroiroi i te tuatau tumatetenga.” (Salamo 37:39) Te taangaanga ra te puka o Maseli i te reo mei te reira  rai i te karanga anga e: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” (Maseli 18:10) Te akakite mai nei teia irava i tetai tuatua mou tumu no runga i to Iehova manako maru no tana au mea i anga. Te oronga maira te Atua i te paruruanga ki tona aronga tuatua tika e kimi maroiroi ra iaia, mei te mea ra e te oro ra tatou ki roto i tetai punanga ketaketa no te akaruru anga.

⁵ Me aroia atu e te au manamanata taitaia, akapeea tatou i te oro anga kia Iehova no te paruruanga? Ka akamanako ana tatou i e toru au takainga puapinga ta tatou ka apai kia rauka mai ta Iehova tauturu. Te mea mua, e uri tatou ki to tatou Metua i te rangi na roto i te pure. Te rua, e angaanga tatou kia tau ki tona vaerua tapu. E te toru, e kauraro tatou ki ta Iehova akanooanga na te kimi anga kia taokotai ma te au oa Kerititiano te ka akamaru mai i to tatou tumatetenga.

Te Mana o te Pure

6. Akapeea ta te au Kerititiano mou manako anga i te pure?

⁶ Tetai aronga kite i te pae oraanga te akamaroiroi maira i te pure ei rapakauanga no te ngakau taitaia e te manamanata. Noatu e tika e ka tauturu te akamanako anga na roto i te pure no tetai atianga muteki ua i te akamaru i te manamanata, mei koia rai te karangaia ra no runga i tetai au tu tangianga natura me kore i te maoro i te mokotua. Kare te au Kerititiano mou e manako meangiti ua ana i te pure na te manako anga i te reira ei rapakauanga ua no te manako e te ngakau. Te manako ra tatou i te pure ei komunikeitianga tapu tikai ma Tei Anga mai. Te kapiti maira te pure i to tatou tu akono mou e te manako papu i roto i te Atua. Ae, e tuanga te pure no ta tatou akamorianga.

7. Eaa ra te aiteanga e kia pure ma te manako papu, e akapeea taua au pure ra i te tauturu anga ia tatou kia akono i te tumatetenga?

⁷ Ka anoanoia ta tatou au pure kia kapitiia mai e te manako papu, me kore te irinakianga, i roto ia Iehova. Kua tata te apotetoro ko Ioane: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) Ko Iehova, ko Tei Teitei rava, te Atua mou anake e te mana katoatoa, te oake maira i te manako anga taka ke ki te au pure akatenga a tona aronga akamori. Na te kite ua anga e te rongo maira to tatou Atua aroa ia tatou me akakite tatou i to tatou au apiapianga e te au manamanata kiaia e mea pumaana tikai.​—Philipi 4:6.

8. Eaa te au Kerititiano tiratiratu ka kore roa ai e manako akama me kore puapinga kore me akavaitata atu kia Iehova na roto i te pure?

⁸ Auraka roa te au Kerititiano tiratiratu e manako ngakau akama, puapinga kore, me kore ra kia ngere i te manako papu me akavaitata atu kia Iehova na roto i te pure. E tika e, me manako mareka kore tatou ia tatou uaorai me kore me kiia e te au manamanata, penei kare tatou e manako ua rai i te akavaitata atu kia Iehova na roto i te pure. I taua au atianga ra e mea meitaki kia akamaara tatou e ko Iehova ka ‘aroa mai aia ia tatou’ e ka “akapumaana i te aronga akaaka ra.” (Isaia 49:13; 2 Korinetia 7:6) I te au taime tikai o  te mamae ngakau e te tumatetenga ka anoanoia tatou kia uri ma te manako papu ki to tatou Metua i te rangi ei maroiroi no tatou.

9. Eaa ta te akarongo tuanga e rave ana i roto i ta tatou akavaitata anga atu ki te Atua na roto i te pure?

⁹ Kia puapinga maataia ai mei te tikaanga ngateitei o te pure, ka anoano tatou i te akarongo tika tikai. Te karanga ra te Pipiria e “ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Ko te akarongo e maata atu i ta te irinaki ua anga e te vai nei te Atua, e “e Atua e tikaʼi” aia. Ko te akarongo mou ka o mai te irinakianga ketaketa i roto i to te Atua tu kite e te anoano kia tutaki i to tatou aerenga oraanga akarongo kiaia. “Tei te aronga tuatua-tika ra to Iehova mata, e tei ta ratou kapiki tona taringa.” (1 Petero 3:12) Na te manako putuputu ua rai i to Iehova manako aroa no tatou e oronga mai i te aiteanga taka ke ki ta tatou au pure.

10. Eaa te mea kia tika i ta tatou au pure me inangaro tatou kia rauka mai te tauturu i te pae vaerua mei ko ia Iehova?

¹⁰ Te akarongo maira a Iehova ki ta tatou au pure me orongaia te reira ma te ngakau katoa. Kua tata te tata taramo: “Te kapiki nei au ma te ngakau katoa ra; e akarongo mai, e Iehova.” (Salamo 119:145) Kare i aite ki te au peu pure matau uaia i roto i te au akonoanga e manganui, kare ta tatou au pure i te tutu ua me kore kare i te tae kore te ngakau. Me pure tatou kia Iehova ma to tatou “ngakau katoa,” ka akakiia ta tatou au tuatua ki te aiteanga e te akakoroanga. A muri ake i taua au pure akatenga ra, ka akamata tatou i te kite i te maru te ka aere mai mei te tuku anga i ta tatou “apainga kia Iehova.” Mei ta te Pipiria e taputou maira, “nana [tatou] e tauturu mai.”​—Salamo 55:22; 1 Petero 5:6, 7.

Te Vaerua o te Atua to Tatou Tauturu

11. Eaa tetai mataara e pau mai ana a Iehova ia tatou me “pati” no tana tauturu?

¹¹ Kare a Iehova e ko Tei Akarongo anake ua mai i te pure mari ra ko Tei Pau katoa mai. (Salamo 65:2) Kua tata a Davida: “I te rā e tumatetengaʼi au ra e kapiki rai au ia koe ra; ka akarongo mai oki koe iaku nei.” (Salamo 86:7) Kia tau ki te reira, kua akamaroiroi a Iesu i tana au pipi kia “pati” no te tauturu a Iehova no te mea ko te “Metua i te ao ra” ka ‘oronga i te vaerua tapu i te aronga e pati atu iaia ra.’ (Luka 11:9-13) Ae, te angaanga ra to te Atua mana rave angaanga ei tauturu, me kore ei akapumaana, ki tona iti tangata.​—Ioane 14:16.

12. Akapeea e rauka ai te vaerua o te Atua i te tauturu ia tatou me i te akara anga e e maata tikai te au manamanata?

¹² Noatu me aro atu tatou i te au timataanga, ka rauka i te vaerua o te Atua i te akaki ia tatou ki “te mana maata meitaki nei.” (2 Korinetia 4:7) Te apotetoro ko Paulo, ko tei akakoromaki i te au turanga taitaia e manganui, kua tuatua papu tikai e: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Pera katoa, e manganui te au Kerititiano i teia tuatau tei kite i tetai akaouanga o te maroiroi i te pae vaerua e te manako ngakau i te pau angaia mai ta ratou au pati akatenga. Putuputu, te au manamanata tumatetenga i te akara anga e kare e maata roa ana i muri ake i te rauka mai anga ia tatou te tauturu a te vaerua o te Atua. No teia maroiroi i orongaia mai e te Atua, ka rauka ia tatou kia karanga mei te apotetoro ra e: “Kua kako matou i te mate, kare ra i apiapi: kua pekapeka matou, kare ra i ope te manakoanga: Kua takinga-kinoia, kare ra i akarukeia: kua uriia ki raro, kare ra i mate rava.”​—2 Korinetia 4:8, 9.

13, 14. (a) Akapeea a Iehova i te riro anga ei maroiroi no tatou na roto i tana Tuatua i tataia? (e) Akapeea te taangaanga anga i te au kaveinga Pipiria i te tauturu anga ia koe uaorai?

¹³ Kua akauru e kua akono katoa te vaerua tapu i te Tuatua tataia a te Atua no to tatou puapinga. Akapeea a Iehova i te riro anga ei maroiroi no tatou i te au tuatau o te tumatetenga na roto i te au kapi o tana Tuatua? Tetai mataara koia oki na te oronga anga mai i te pakari meitaki e te tu kite o te manako no tatou. (Maseli 3:21-24) Te tereni maira te Pipiria i to tatou au tu kite manako e te akameitaki roa atu i to tatou mana no te akamanako anga. (Roma 12:1) Na roto i te tatau anga putuputu e te apiianga i te Tuatua a te Atua, kapiti mai te taangaanga i te reira, ka rauka kia ‘akamatau kia kite to tatou ngakau i te meitaki e te kino.’ (Ebera 5:14) Penei kua kite ana koe uaorai e akapeea te au kaveinga  Pipiria i te tauturu anga ia koe kia rave i te au ikianga pakari i toou aro anga atu i te au tu ngata. Te oronga maira te Pipiria i te pakari kia tatou te ka tauturu ia tatou i te kimi i te au ravenga tau ki te au manamanata tumatetenga.​—Maseli 1:4.

¹⁴ Te oronga maira te Tuatua a te Atua i tetai tumu ke atu no te maroiroi​—te manakonakoanga no te ora. (Roma 15:4) Te akakite maira te Pipiria kia tatou e kare te au apinga kino e tupu tamou ua atu rai. Noatu eaa te au takinga kinoanga ka kite tatou no teia nei ua ia. (2 Korinetia 4:16-18) Tei ia tatou te ‘manakonakoanga o te ora mutu kore, i ta te Atua, ta te kore e tika kia pikikaa, i tuatua oronga mai ou teianei ao.’ (Tito 1:2) Me rekareka tatou i taua manakonakoanga ra, ma te manako putuputu ua anga i te tuatau mataora ki mua ta Iehova e taputou maira, ka rauka ia tatou i te akakoromaki i raro ake i te takinga kino.​—Roma 12:12; 1 Tesalonia 1:3.

Te Putuputuanga​—E Akakiteanga no to te Atua Aroa

15. Akapeea te au Kerititiano i te riro anga ei akameitakianga ki tetai e tetai?

¹⁵ Tetai apinga oronga ke atu mei ko ia Iehova te ka tauturu ia tatou i te au tuatau o te tumatetenga koia oki ko te pirianga taeake ta tatou e rekareka ra i roto i te putuputuanga Kerititiano. Te karanga ra te Pipiria: “E aroa tetai oa mou ra i te au tuatau katoa, e e taeake tei anauia maira i te tuatau tumatetenga.” (Maseli 17:17, NW) Te akamaroiroi maira te Tuatua a te Atua i te katoatoa i roto i te putuputuanga kia akangateitei e kia aroa i tetai e tetai. (Roma 12:10) “Auraka rava e tangata e kimi i tona uaorai meitaki, e kimi ra te tangata ravarai i to etai ke,” i tata ai te apotetoro ko Paulo. (1 Korinetia 10:24) Te akono i taua tu manako ra ka tauturu ia tatou kia akara tamou ki runga i te au anoano o etai ke kare ki runga i to tatou uaorai au timataanga. Me oronga tatou ia tatou uaorai ki etai ke, kare tatou e te tauturu ua ra ia ratou mari katoa ra te rekareka ra tatou i tetai tuanga o te mataora e te marekaanga te ka akamama atu i ta tatou uaorai au apainga.​—Angaanga 20:35.

16. Akapeea e rauka ai i te au Kerititiano ravarai kia riro ei akamaroiroianga ?

¹⁶ Te au tane e te au vaine pakari i te pae vaerua ka rauka kia akono i tetai tuanga puapinga i te akaketaketa anga i etai ke. Kia rauka ai i te rave, e akamaora atu ratou ia ratou uaorai kia rauka i te akavaitata atu. (2 Korinetia 6:11-13) Ka puapinga tikai te putuputuanga me tuku te katoatoa i te taime i te akameitaki i te aronga mapu ou, i te akaketaketa atu i te aronga ou tei akarongo, e i te akamaroiroi i te aronga tei ngakau taitaia. (Roma 15:7) Ka tauturu katoa te aroa taeake ia tatou kia kopae i te vaerua tarotokaka i tetai e tetai. Kia marie tatou i te taopenga e ko te au tu ngata uaorai e au tu apikepike i te pae vaerua. Kua raurau a Paulo ma te tau tikai i te au Kerititiano kia “akapumaana atu i te ngakau taitaia.” (1 Tesalonia 5:14) Te akaari maira te Pipiria e te kite katoa ra rai te au Kerititiano tiratiratu i te tumatetenga.​—Angaanga 14:15.

17. Eaa to tatou au tuatau e vai ra i te akaketaketa i te tatua o te taokotai anga taeake Kerititiano?

 ¹⁷ Te au uipaanga Kerititiano te oronga maira i tetai tuatau meitaki tikai no tatou kia akapumaana e kia akamaroiroi i tetai e tetai. (Ebera 10:24, 25) Teia kapitianga aroa kare i takotinga uaia ki te au uipaanga putuputuanga. Mari ra, te akara katoa ra to te Atua iti tangata no tetai au tuatau kia piri ki te taokotai anga tau i roto i te au turanga ua nei. Me tupu mai te au turanga taitaia, ka papa ua tatou i te tauturu i tetai e tetai no te mea kua akanoo keia ana te tatua ketaketa o te pirianga taeake. Kua tata te apotetoro ko Paulo: “Kia kore rava te tau kore i te kopapa nei; kia arite katoa ra te au melo akono ia ratou uaorai. Kia mamae tetai melo ra, e mamae katoa te au melo ravarai; e kia akateiteiia tetai melo ra, e rekareka ïa te au melo ravarai.”​—1 Korinetia 12:25, 26.

18. Eaa te manako tarevake ta tatou ka tau kia kopae me rokoia e te manako ngakau paruparu?

¹⁸ I tetai au taime, penei ka manako ngakau paruparu roa tatou kare e rekareka i te taokotai anga ma te au oa Kerititiano. Kia tamaki atu tatou i taua au manako ra kia kore tatou e akangere ia tatou uaorai ki te akapumaanaanga e te tauturu ta te au oa akarongo ka oronga mai. Te akamatakite maira te Pipiria ia tatou e: “Ko tei tau kore i tetai ke, kua ketaketa ra i tona uaorai manako; kua patoi atu aia ki te au tuatua pakari katoa ra.” (Maseli 18:1) Ko to tatou au taeake e te au tuaine e akakiteanga no to te Atua aroa ia tatou. Me ariki tatou i taua oronga anga aroa, ka kite tatou i te maru i te au tuatau tumatetenga.

Akono Marie i te Tu Papu

19, 20. Akapeea te au Tuatua Tapu i te tauturu anga ia tatou kia kopae i te au manako papu kore?

¹⁹ Me tupu te akamaroiroi kore e te mii, e mea ngoie ua i te akamou ki runga i te au manako papu kore. Ei akatauanga, i te kite anga i te kino, penei ka akamata tetai papaki i te ekoko i to ratou uaorai turanga i te pae vaerua, i te taopenga anga e ko to ratou tu ngata e akairo no to te Atua mareka kore. E akamaara, ra e, kare a Iehova e timata i tetai ua atu ki “te kino.” (Iakobo 1:13) “Kare oki aia [te Atua] e tuku inangaro mai i te mate, e te aue ki te tamariki a te tangata nei,” i karanga ai te Pipiria. (Te Aue o Ieremia 3:33) Kare, ko Iehova e oonu tikai tona mii me mamae tona au tavini.​—Isaia 63:8, 9; Zekaria 2:8.

²⁰ Ko Iehova oki ‘te Metua o te aroa, e ko te Atua nona anake te pumaana.’ (2 Korinetia 1:3) Te manako maira aia ia tatou, e ka akateitei aia ia tatou i te tuatau tau. (1 Petero 5:6, 7) Na te manako putuputu ua rai i to te Atua aroa no tatou e tauturu ia tatou kia akono marie i te manako papu, e kia rekareka katoa. Kua tata a Iakobo: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa.” (Iakobo 1:2) No teaa ra? Kua pau aia: “Kua akatika anakeia mai aia ra, e rauka ïa iaia te korona ora, ta te Atu i tuatua mai e no te aronga i anoano iaia ra.”​—Iakobo 1:12.

21. Noatu te au turanga ngata ta tatou e aro atura, eaa te akapapuanga ta te Atua e oronga maira ki te aronga tei vai tiratiratu ua kiaia?

²¹ Mei ta Iesu i akamatakite mai ia tatou, i roto i teianei ao ka rokoia tatou e te kino. (Ioane 16:33) Inara te taputou maira te Pipiria e kare e “na te mate aina me kare na te tumatetenga me kare na te takinga kino na te pongi aina me kare na te noo apinga kore me kare na te tu kino” e akataka ke ia tatou mei te aroa o Iehova e te aroa o tana Tamaiti. (Roma 8:35, 39, NW) Mei teaa ra te akapumaana anga kia kite e ko tetai ua atu tumatetenga ta tatou e aro atura no teia nei ua ia! I teia taime ra, ia tatou e tapapa atu nei i te openga o to te tangata mamaeanga, te tiaki nei, to tatou Metua aroa, ko Iehova ia tatou. Me oro tatou kiaia no te paruruanga, ka riro aia ‘ei akapuanga no te aronga i takinga-kinoia, e akapuanga i te tuatau tumatetenga.’​—Salamo 9:9.

Eaa ta Tatou i Kite?

• Eaa ta te au Kerititiano ka tapapa atu i te noo anga i teia ao kino?

• Akapeea e riro ei ta tatou au pure akatenga ei akaketaketa anga me aro atu tatou i te au timataanga?

• Akapeea to te Atua vaerua i riro ei ei tauturu?

• Eaa ta tatou ka rave i te tauturu anga i tetai e tetai?

[Au Uianga Apii]

[Tutu i te kapi 18]

Ka anoanoia tatou kia kimi ia Iehova mei te mea ra e te oro ra tatou ki roto i tetai punanga ketaketa

[Au Tutu i te kapi 20]

Te aronga pakari i te pae vaerua e taangaanga i te au tuatau ravarai kia akameitaki e kia akamaroiroi atu i etai ke