“Ko te Reira oki te Apinga Meitaki Roa Atu te ka Tupu kia Koe”

KO ALEXIS e tamaiti aia e rima ona mataiti i roto i te oire maata o Morelia, i Meiko, e te apii ra tona nga metua i te Pipiria e te aere ra ki te au uipaanga a te Au Kite o Iehova. I te tae anga ki tetai uruoaanga kotinga ma tona ngutuare tangata, kua kite atu aia i tetai akaariarianga no te akatutu anga mei tera are ki tera are. Kua viviki aia i te tanga ki tona metua tane e kua ui atu e, “Papa, Papa, eaa koe i kore ei e aere ki vao i te tutu aere?” Kua pau atu tona metua tane, “Te apii nei rai au kia rauka iaku i te rave i te reira.” Ma te mataora kua pau atu a Alexis e, “Papa, ko te reira oki te apinga meitaki roa atu te ka tupu kia koe.”

Kua kite mai teia tamaiti ou ua i te inangaro kia angaanga rotai ki tona kite ia Iehova. I te mea e te noo ra etai o tona nga katini ou i roto i taua are rai, kua pure na mua aia kia Iehova e i reira kua tuatua atu aia kia raua no runga i tana i kite mai ma te tauturu a tona nga metua mei te My Book of Bible Stories. Noatu e kare oki a Alexis i kite ake i te tatau, kua kite meitaki aia eaa tei roto i te puka mei te au tutu te akatutu ra i te au tua. Kua karanga katoa aia e te inangaro ra aia i te atoro i te au tangata i roto i to ratou kainga i te oronga atu kia ratou tana e tamou maira no runga i te au akakoroanga a te Atua.

E tikai, ka rauka i te mapu e te ruaine i te akono i to ratou au oraanga kia rotai ki ta Iehova, “Tei Tapu,” e tapapa maira ia ratou e rauka ai i reira i te arikianga meitaki roa atu i te oronga anga i tetai kite no runga iaia ki te pa enua. (Isaia 43:3; Mataio 21:16) Kare e ekoko anga, ko te reira oki te apinga meitaki roa atu te ka tupu ki tetai tangata.