Ririia ma te Kore e Ara

“I riri ua mai ratou iaku kare e ara.”​—IOANE 15:25.

1, 2. (a) Eaa tetai aronga e umere ei me tuatua akakinoia te au Kerititiano, inara eaa taua tu tuatua ra ka kore ei e akapoitirere ia tatou? (e) Teea aiteanga o te tuatua “riri” ta tatou ka akamanako i roto i teia atikara? (Akara i te tataanga i raro ake.)

TE TAUTA ra te Au Kite o Iehova i te akono i te au kaveinga e kitea ra i roto i te Tuatua a te Atua. Tei tupu, te rekareka nei ratou i te rongo meitaki i te au enua e manganui. Inara, i tetai au taime, kua tuatua pikikaaia ana ratou. Ei akaraanga, i roto i te oire maata o St. Petersburg, i Rutia, kua akamaara tetai opita kavamani e: “Kua ripotiia mai te Au Kite o Iehova kia matou mei tetai tu akapupuanga akonoanga rai e noo muna ua ra i roto i te poiri e te ta anga i te tamariki e te tamate anga ia ratou uaorai.” Inara i muri ake i te angaanga anga ma te Au Kite o Iehova i te piri anga atu ki tetai uruoaanga pa enua, kua tuatua taua opita rai: “Teianei ko taku e kite ra e au tangata katakata, noa ua nei. . . E au ua ratou e te maru, e e aroa maata tikai to ratou i tetai e tetai.” Kua kapiti atu aia: “Kare tikai au e marama ana eaa ra te tangata e tuatua aere ei i taua au pikikaa ra no runga ia ratou.”​—1 Petero 3:16.

² Kare o te au tavini o te Atua rekarekaanga kia akaapaia ei aronga rave kino, inara kare ratou e poitirere ana me tuatua akakino mai te tangata ia ratou. Kua akamatakite a Iesu i tana au pipi: “Kia riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou. . . . Tika atura te tuatua i tataia ki roto i ta ratou ture ra e, ‘I riri ua mai ratou iaku kare e ara.’” * (Ioane 15:18-20, 25; Salamo 35:19; 69:4) I muao ana kua akakite aia ki tana au pipi: “Kia tapa atu ratou i te ingoa o te pu o te are ra, ko Belezebuba, ka tanga atu ei oki to te ngutuare nona!” (Mataio 10:25) Te marama ua ra te au Kerititiano e ko te akakoromaki anga i taua akakinoanga ra e tuanga ia no te “rakau tamamae” ta ratou i ariki i to ratou riro anga mai ei au pipi na Karaiti.​—Mataio 16:24, NW.

3. Mei teaa te maata o te takinokinoanga ia te aronga akamori mou?

³ Kua roa te tuatua enua no te takinokinoanga i te aronga akamori mou, taeria roaia ki muri ia “Abela tuatua-tika.” (Mataio 23:34, 35) Kare te reira i kotinga uaia ki etai ua tupuanga takake. Kua akakite a Iesu e ka riro tana au pipi ei ‘makitakitaanga na te tangata katoatoa’ no tona ingoa. (Mataio 10:22) Pera katoa, kua tata te apotetoro ko Paulo e pouroa te au tavini o te Atua​—kapiti mai ia tatou tataki tai​—kia tapapa e ka takinga kinoia rai. (2 Timoteo 3:12) Eaa ra te tumu no teia?

Te Tumu o te Riri Tika Kore

4. Akapeea ra te Pipiria i te akaari anga mai i te tumu o te riri tika kore katoatoa?

⁴ Te akaari maira te Tuatua a te Atua e mei muatangana mai rai, te vai ua anga o tetai tumu kitea koreia. Akamanako ana i te taanga kino o te tangata akarongo mua, ko Abela. Te akakite ra te Pipiria e ko tona tuakana ta tangata, ko Kaina, “no taua vaerua kino ra aia,” ko Satani te Tiaporo. (1 Ioane 3:12) Kua akatutu maira a Kaina i to Satani tu, e kua taangaanga te Tiaporo iaia ei rave i tona au akakoroanga kino. Te akaari katoa maira te Pipiria i te marama no runga i ta Satani tuanga i roto i te au takinga kinoanga ki runga ia Iobu e ia Iesu Karaiti. (Iobu 1:12; 2:6, 7; Ioane 8:37, 44; 13:27) Kare roa te puka o Apokalupo i ekoko i te akakite mai i te tumu o te takinokinoanga o te au pipi a Iesu, i te akakite anga: “E uri te diabolo i tetai pae o kotou ki roto i te are tapekaanga, ei timata anga ia kotou.” (Apokalupo 2:10) Ae, ko Satani te tumu o te riri tika kore katoatoa ki runga i to te Atua iti tangata.

5. Eaa tei muri i to Satani riri i te aronga akamori mou?

 ⁵ Eaa tei muri i to Satani riri i te aronga akamori mou? I roto i tetai parani tei akaari ua mai i te akaparau maata, kua akaao atu a Satani iaia uaorai ki “te Ariki au mutu kore,” i te Atua ko Iehova. (1 Timoteo 1:17; 3:6) Te maro ra aia e e maata roa te arairai a te Atua i roto i tana tutaraanga ki rungao i tana au mea i anga e kare e tangata e tavini ia Iehova ma te ngakau ma, e te rave ua ra te tangata no te noinoi. Te karanga ra a Satani e me akatikaia kia timata i te au tangata, ka rauka iaia i te akauri ke ia ratou tataki tai mei te tavini anga i te Atua. (Genese 3:1-6; Iobu 1:6-12; 2:1-7) I te akaapa anga ia Iehova e ko tetai tei takinga kino, tei pikikaa, e tei puapinga kore, kua umuumu a Satani kia akanoo iaia uaorai ei tutara akarere atu. No reira, ko tona vetaveta i te au tavini o te Atua te akakeuia ra e tona inangaro kia akamoriia.​—Mataio 4:8, 9.

6. (a) Akapeea tatou uaorai i te piri anga atu ki roto i teia itiu no to Iehova tu ngateitei? (e) Akapeea te marama anga i te itiu i te tauturu anga ia tatou kia tamou marie i to tatou tu tiratiratu? (Akara i te pia, kapi 16.)

⁶ Te kite ra ainei koe e akapeea teia itiu nei i te piri anga atu ki toou oraanga? Ei tavini no Iehova, penei kua kite koe e noatu ka umuumuia te tautaanga pakari i te rave anga i to te Atua anoano, ko te au puapinga ra no te rave pera anga e maata tikai. Inara, eaa i reira, me riro te au turanga i roto i toou oraanga i te akangata, te akamamae maata katoa, noou kia aru ki ta Iehova au ture e te au kaveinga? E akapeea mei te mea ra e kare e puapinga e rauka maira ia koe mei te tavini anga ia Iehova? Ka taopenga ainei koe e kare e puapinga i te tavini anga atu rai ia Iehova? Me kore ra ka riro ainei te aroa no Iehova e te marekaanga oonu no tona au tu umeremere i te akakeu ia koe kia aaere atu rai na tona au arataa katoa? (Deuteronomi 10:12, 13) Na te akatika anga ia Satani kia apai mai i tetai au tu ngata ki rungao ia tatou, kua oronga mai a Iehova no tatou tataki tai i te tuatau kia oake i ta tatou uaorai pauanga ki ta Satani akaaoanga.​—Maseli 27:11.

‘Me Akakino Mai te Tangata ia Kotou’

7. Eaa tetai ravenga ta te Tiaporo e taangaanga ra i te titau anga kia akauri ke ia tatou mei ia Iehova?

⁷ Ka akamanako vaitata atu tatou i teianei i tetai o te au ravenga pakari ta Satani e taangaanga ra i te tauta anga kia akapapu i tona tua o te itiu​—tana taangaanga anga i te akakino pikikaa. Kua kapiki a Iesu ia Satani e “e metua oki no te pikikaa.” (Ioane 8:44) Te ingoa akataka anga ko te Tiaporo, te aiteanga ko “Tei Pikikaa,” te akataka maira iaia e ko te patoi maata roa atu i te Atua, tana tuatua meitaki, e tona ingoa tapu. Te taangaanga ra te Tiaporo i te au tuatua taeke, te au tapepeanga pikikaa, e te au pikikaa tika ua mai i te akaaoanga atu i to Iehova tu ngateitei, e te taangaanga ra aia i teia au ravenga ei akaapa i to te Atua au tavini tiratiratu. Na te uri anga atu i te akakino ki runga i teia au Kite, ka rauka iaia i te akatupu i tetai timataanga pakari kia ngata roa atu ia ratou i te apai.

8. Akapeea a Satani i te apai mai anga i te akakino ki runga ia Iobu, e eaa tei tupu?

⁸ Akamanako ana eaa tei tupu kia Iobu, te aiteanga o tona ingoa e “Apinga Makitakitaia.” Kapiti atu ki te akatupu anga i te ngere ki ta Iobu au apinga, tana tamariki, e tona oraanga pae kopapa, kua akariro a Satani ia Iobu kia akara anga e mei te tangata ara rai e akautungaia ra e te Atua. Noatu kua akangateitei maataia ana aia, kua akavaavaaia a Iobu, e tona kopu tangata e te au oa piri katoa. (Iobu 19:13-19; 29:1, 2, 7-11) Pera katoa, na roto i te aronga akapumaana pikikaa, kua umuumu a Satani kia ‘aati ia Iobu ki te au  tuatua,’ te mea mua na te tuatua taeke anga e kua rave aia i tetai au ara kino tikai e oti akaapa tika ua atu iaia i reira ei tangata rave ara. (Iobu 4:6-9; 19:2; 22:5-10) Mei teaa ra te mamae ngakau kia Iobu!

9. Akapeea i te maani angaia a Iesu kia akara anga e e tangata ara?

⁹ Ei tangata turuturu maata roa atu no to Iehova tu ngateitei, kua riro mai ko te Tamaiti a te Atua te takete maata o ta Satani makitakitaanga. I te aerenga mai a Iesu ki te enua nei, kua umuumu a Satani kia maani iaia kia akara anga viivii i te pae vaerua, mei tana rai i pera ia Iobu, i te maani anga ia Iesu kia akara anga e e tangata ara. (Isaia 53:2-4; Ioane 9:24) Kua kapiki te tangata iaia e e kona kava e e tangata kakai e kua karanga e ‘e demoni tona.’ (Mataio 11:18, 19; Ioane 7:20; 8:48; 10:20) Kua tapepe pikikaaia aia no te tuatua akakino. (Mataio 9:2, 3; 26:63-66; Ioane 10:33-36) Kua akataitaia tikai teia ia Iesu, no te mea kua kite aia e te akaata tika kore ua ra te reira ki runga i tona Metua. (Luka 22:41-44) I te openga, kua patitiia a Iesu ki runga i te rakau tamamae anga ei tangata rave kino taumaaia. (Mataio 27:38-44) I te tamou marie anga i te tu tiratiratu apakore, kua akakoromaki a Iesu i te maata o “te reira tu akakino a te aronga rave ara.”​—Ebera 12:2, 3.

10. Akapeea ana te toenga o te aronga akatainuia i te riro mai anga ei takete na Satani i teia au tuatau nei?

¹⁰ I teia au tuatau, kua riro katoa te aronga toenga akatainuia o ta Karaiti au pipi ei takete no te makitakitaanga a te Tiaporo. Kua akatakaia a Satani e ko “te akaapa i to [Karaiti] au taeake . . . , ko tei akaapa ia ratou ki mua i te aroaro o to tatou Atua i te po e te ao.” (Apokalupo 12:9, 10) Mei tona uri angaia mai mei te rangi e kua akanooia ki te tuanga o te enua nei, kua akapakari roa atu a Satani i tana au tautaanga kia akatutu i te au taeake o Karaiti ei au tangata kino tei akataaia. (1 Korinetia 4:13) I tetai au enua, kua kapiki pikikaaia ana ratou e e akapupuanga kino, mei te au Kerititiano katoa rai i te anere mataiti mua. (Angaanga 24:5, 14; 28:22) Mei tei kiteaia i te akamataanga mai, kua akaapaia ana ratou na roto i te tuatua pikikaa akaariu ke. Inara, “i te teitei, e te akaaka, i te rongo kino, e te rongo meitaki,” ko te au taeake akatainuia o Karaiti, tei turuia e to ratou au oa “mamoe ke atu,” kua tauta ma te akaaka ‘i te akono i te au akauenga a te Atua e te rave i te angaanga o te akakitekite anga ia Iesu.’​—2 Korinetia 6:8; Ioane 10:16; Apokalupo 12:17.

11, 12. (a) Penei eaa te tumu o tetai au akakinoanga ta te au Kerititiano e kite ra? (e) Na teea au mataara penei e kino ei tetai Kerititiano ma te tika kore no tona akarongo?

¹¹ E tika e, kare te au akakinoanga katoatoa ta te au tavini taki tai o te Atua e kite ra e no te “tuatua-tika ra.” (Mataio 5:10) Tetai au manamanata penei no to tatou uaorai au tu apa. Kare e akameitakianga takake mei te mea tatou e ‘te pāpāia ra i ta tatou uaorai ara, ka akakoromaki ei tatou i te reira.’ Inara, mei te mea tetai Kerititiano e ‘no te akava ngakau i te Atua, i akakoromaki ei i te aue no te mate tika kore, te meitaki ra te reira’ i roto i te mata o Iehova. (1 Petero 2:19, 20) I raro i teea au turanga penei e tupu ei teia?

¹² Kua takinga kinoia ana tetai papaki no te mea kua patoi ratou i te piri atu ki roto i te au peu tanumanga tei kore i tau ki ta te tuatua tapu. (Deuteronomi 14:1) Te au mapu Kite kua riro ana ei takete no te tuatua akakino no te akarongo anga ki ta Iehova au turanga akono tau. (1 Petero 4:4) Tetai au metua Kerititiano kua akaapa tarevakeia ana ei “manako kore” me kore e “takinga kino” no te mea no tei kimi ratou i te rapakauanga maki toto kore no ta ratou tamariki. (Angaanga 15:29) Kua akataaia ana te au Kerititiano e te kopu tangata e e te tangata tupu no te riro anga ei au tavini no Iehova. (Mataio 10:34-37) Taua aronga katoatoa ra te aru ra i te akaraanga tei akanooia e te au peroveta e e Iesu uaorai i te takinga kino tika kore.​—Mataio 5:11, 12; Iakobo 5:10; 1 Petero 2:21.

Akakoromaki Anga i Raro Ake i te Akakino

13. Eaa te ka tauturu ia tatou kia akono marie i to tatou tu tau i te pae vaerua me aro atu tatou i te akakinoanga pakari?

¹³ Me aere mai tatou ki raro ake i te akakinoanga pakari no to tatou akarongo, penei ka maroiroi kore tatou, mei te peroveta rai ko Ieremia, e ka manako e kare e rauka ia tatou kia tavini ua atu rai i te Atua. (Ieremia 20:7-9) Eaa te ka tauturu ia tatou kia akono marie i to tatou tu tau i te pae vaerua? E kimi kia akara i te manamanata mei to Iehova atu turanga. Te manako ra aia i te aronga tei vai tiratiratu ua i raro ake i te timataanga  ei au tangata autu, kare ei aronga takinoia. (Roma 8:37) E tamata ana i te akatutu i roto i toou manako i te aronga tei turu i to Iehova tu ngateitei i te aro anga atu i te au tu akangateitei kore ta te Tiaporo ka titiri atu ki runga ia ratou​—taua au tangata ra e te au vaine mei ia Abela, Iobu, te metua vaine o Iesu ko Maria, e etai atu aronga tiratiratu i taito, pera katoa to tatou au oa tavini i teia tuatau nei. (Ebera 11:35-37; 12:1) E akamanakonako no runga i to ratou aerenga tiratiratu. Taua tiaorangi maata ra o te aronga tiratiratu te pati maira ia tatou kia kapiti atu kia ratou i runga i te turanga autu teitei tei akonoia no te aronga no to ratou akarongo oki i autu ei i teianei ao.​—1 Ioane 5:4.

14. Akapeea e rauka ai i te pure akatenga i te akaketaketa ia tatou kia vai tiratiratu ua?

¹⁴ Me ‘maata to tatou manako mirimiri-ngata i roto ia tatou,’ ka rauka ia tatou kia uri kia Iehova na roto i te pure akatenga, e nana e akapumaana e e akaketaketa mai ia tatou. (Salamo 50:15; 94:19) Nana e oronga mai i te pakari ta tatou e anoano ra i te akono atu i te timataanga e i te tauturu ia tatou kia akara tamou ki te itiu, o to Iehova tu ngateitei, ko te reira oki tei muri i te riri tika kore tei akairiia mai ki runga i tona au tavini. (Iakobo 1:5) Ka rauka katoa ia Iehova i te oronga mai no tatou i “te au o te Atua, ko tei maata ua atu i te kite tangata.” (Philipi 4:6, 7) Teia au tei orongaia mai e te Atua ka tauturu ia tatou kia vai maru ua e te ngaueue kore i te aro anga atu i te taomianga kino pakari, kare e tuku ua atu ki ta te ekoko me kore te mataku. Na roto i tona vaerua, ka rauka ia Iehova i te utuutu ia tatou na roto i tetai ua atu tana ka akatika kia aere mai ki rungao ia tatou.​—1 Korinetia 10:13.

15. Eaa te ka tauturu ia tatou kia kopae i te makitakita anga atu me mamae tatou?

¹⁵ Eaa te ka tauturu ia tatou kia kore e kiia e te makitakita ki te aronga tei riri ia tatou ma te kore e ara? E akamaara e ko to tatou au enemi maata koia oki ko Satani e te au temoni. (Ephesia 6:12) I tetai au tangata e takinokino ra ia tatou ma te kite e te akakoro tikai, e manganui te aronga tei patoi i te iti tangata o te Atua no te kite kore me kore no te akavareia ra e etai ke. (Daniela 6:4-16; 1 Timoteo 1:12, 13)To Iehova inangaro no “te tangata katoatoa” kia rauka te tuatau “kia ora, e kia rauka te kite i te tuatua-mou.” (1 Timoteo 2:4) E tika rava e, ko tetai aronga patoi i mua ana e au taeake Kerititiano no tatou i teianei tei tupu mai no te kite anga i to tatou tu apa kore. (1 Petero 2:12) Kapiti mai, ka rauka ia tatou i te tamou mai i tetai apiianga mei te akaraanga a te tamaiti a Iakoba ko Iosepha. Noatu e kua maata tikai to Iosepha mamae no tona au tuakana, kare roa aia i akaenemi atu ia ratou. No teaa ra? No te mea kua kite aia e te o maira a Iehova ki roto i teia mea, i te akakeukeu aere anga i te au tupuanga kia rauka i te akatupu i Tona akakoroanga. (Genese 45:4-8) Ka rauka katoa ia Iehova i te akakeu i tetai ua atu tamamaeanga tika kore ka na roto tatou kia riro mai no te kaka o tona ingoa.​—1 Petero 4:16.

16, 17. Eaa tatou kare ei e manamanata puapinga kore ua i te au tautaanga a te aronga patoi i te arai i te angaanga tutu aere anga?

¹⁶ Kare tatou e inangaro i te manamanata puapinga kore ua mei te mea i tetai taime te akara anga e te puapinga ra te aronga patoi i te arairai anga i te tereanga ki mua o te tuatua meitaki. Teianei te akangaueue nei a Iehova i te pa enua na roto i te akakiteanga e orongaia ra i te ao katoa nei, e te aere maira te au apinga tei inangaroia ki roto. (Hagai 2:7) Kua akakite, a Iesu Karaiti, te Tiaki Meitaki: “Ka akarongo mai taku mamoe i toku reo, taku rai oki i karanga atu na kia kotou, kua kite oki au ia ratou, e ka aru mai oki ratou iaku. E oronga atu au i te ora mutu kore no ratou . . . kare rava oki ratou i roto i toku nei rima e riro ia etai ke.” (Ioane 10:27-29) Te o katoa maira te au angera tapu ki roto i te kokotianga maata i te pae vaerua. (Mataio 13:39, 41; Apokalupo 14:6, 7) No reira, kare e apinga ta te aronga patoi ka tuatua e ka rave te ka arai i to te Atua akakoroanga.​—Isaia 54:17; Angaanga 5:38, 39.

 ¹⁷ E putuputu ua ana, te au tautaanga a te aronga patoi i te puapinga kore. I roto i tetai ngai i Aperika, e manganui te au pikikaa kino tei akaevaia ana no runga i te Au Kite o Iehova, te kapiti anga mai e e aronga akamori Tiaporo ratou. No teia i reira, me atoro ua atu ana te au Kite, kua oro a Grace ki muri i tona are e kua pipini e na te akaruke ua atu anga ratou. I tetai ra kua taki te orometua o tana akonoanga i tetai o ta tatou puka ki runga e kua akakite ki te katoatoa rava i reira e auraka e tatau i te reira no te mea ka akakeu te reira ia ratou kia akaruke i to ratou akarongo. Kua akaara teia i manako tarotokaka o Grace. Tera mai taime i oki akaou mai ei te au Kite, kare aia i pipini kua piri atu ra ki te pukapukaanga e kua ariki i tana uaorai kopi o te puka. Kua akamataia tetai apiianga Pipiria, e i te 1996 kua papetitoia aia. I teianei te taangaanga ra a Grace i tona taime i te kimi atu i etai ke penei ko tei akakite tarevakeia ana no runga i te Au Kite o Iehova.

E Akaketaketa i Toou Akarongo i Teianei

18. Eaa ra i anoanoia ai te akaketaketa i to tatou akarongo i mua ake ka tupu mai ei te au timataanga pakari, e ka akapeea e rauka ai ia tatou te rave i te reira?

¹⁸ No te mea ka rauka ia Satani i te tamaki poitirere ua mai ma te riri tika kore i tetai ua atu taime, e mea puapinga tikai e kia akaketaketa tatou i to tatou akarongo i teianei. Akapeea e rauka ai ia tatou te rave i te reira? Kua akakite tetai ripoti mei tetai enua tei takinokinoia ana to Iehova iti tangata: “E tai apinga tei kite papuia: Te aronga tei rauka te au tu meitaki i te pae vaerua e te marekaanga oonu no te tuatua mou o te Pipiria kare e manamanata i te mou ngaueue kore anga i te taeanga mai te au timataanga. Kareka te aronga tei kore i tae ki te au uipaanga i te ‘tuatau tau ra,’ e kare e tae putuputu ana ki te tavini anga koro, e te tuku ua atu ki ta te au itiu rikiriki ua kua putuputu i te inga i raro ake i te timataanga ‘kino.’” (2 Timoteo 4:2) Me  kite koe i te au ngai te ka anoanoia koe kia akameitaki atu, e tauta pakari i te rave i te reira ma te kore e tavarevare.​—Salamo 119:60.

19. Eaa ra ta te tu tiratiratu o te au tavini o te Atua ka akatupu i te aro anga atu i te riri tika kore?

¹⁹ Te tu tiratiratu o te aronga akamori mou i raro ake i te kino pakari o to Satani riri e akakiteanga ora ia ki te tu tika tikai, te tu tau tikai, e te tuatua tika o to Iehova tu ngateitei. To ratou tu tiratiratu kua riro ei akarekareka i te ngakau o te Atua. Noatu te akairi maira te tangata i te akakino ki rungao ia ratou, koia ra ko tei runga roa atu tona ngateitei i te enua e te rangi ‘kare i akama ia ratou kia karangaia aia e e Atua no ratou.’ E tika rava, no runga i taua aronga tiratiratu katoatoa ra, ka rauka tikai kia karangaia e: “Kare oki teianei ao i tau i taua aronga ra.”​—Ebera 11:16, 38.

[Tataanga Rikiriki i Raro]

Ka Rauka Ainei ia Koe te Akataka?

• Eaa tei muri i te riri tika kore tei akakoroia no te aronga akamori mou?

• Akapeea a Satani i te taangaanga anga i te akakino i te tauta anga kia aati i te tu tiratiratu o Iobu e o Iesu?

• Akapeea ra a Iehova i te akaketaketa anga ia tatou kia tu ngaueue kore i te aro anga atu i te riri o Satani?

[Au Uianga Apii]

[Pia/Tutu i te kapi 16]

Kua Kite Ratou i te Itiu Tika Tikai

Kua akakite tetai o te Au Kite o Iehova i Ukarania, te ngai kua araiia te angaanga tutu aere i te Patireia no te 50 mataiti, e ara atu: “Te turanga ta te Au Kite o Iehova i kite ia ratou uaorai i roto kare e tau kia vaito uaia i roto i te aerenga manako no te pirianga tangata. . . . Te rave ua ra te maataanga o te au opita i ta ratou angaanga. Te taui anga te kavamani, kua taui rai te au opita i te tu tiratiratu, kareka matou kua noo tamou ki taua tu rai. Kua kite matou e kua akakiteia mai te tumu tika tikai o to matou au manamanata i roto i te Pipiria.

“Kare matou i manako ia matou uaorai ei aronga takino apa kore uaia e te au tangata takinokino. Eaa tei tauturu ia matou kia akakoromaki koia oki ko te maramaanga taka meitaki o te itiu tei akatuia mai i roto i te kainga i Edene​—te itiu o to te Atua tikaanga kia tutara. . . . Kua apai matou i tetai turanga no tetai itiu tei piri atu kare ki te au inangaro anake uaorai o te tangata mari katoa ki te au inangaro o te Ngateitei o te ao e pini ua ake. E maramaanga teitei roa atu to matou i te au itiu tika tikai e o maira. Kua riro teia ei akaketaketa ia matou e kua tauturu ia matou i te akono marie i to matou tu tiratiratu noatu tei raro ake i te au turanga pakari roa atu.”

[Tutu i te kapi 16]

Ko Victor Popovych, kua opuia i te 1970

[Tutu i te kapi 13]

Koai ra tei muri i te akakinoanga ta Iesu i na roto?

[Au Tutu i te kapi 15]

Ko Iobu, ko Maria, e te au tavini o te Atua i teia tuatau, mei ia Stanley Jones, kua turu i to Iehova tu ngateitei