Roiroi Kare ra i Akaroiroi
Roiroi Kare ra i Akaroiroi
‘Ko Iehova, ko tei anga i te enua e tae ua atu ki te openga ra; . . . Te oronga nei aia i te maroiroi no tei roiroi; e te akamaata nei aia i te maroiroi no tei apikepike.’—ISAIA 40:28, 29, akaaite ia NW.
1, 2. (a) Eaa te patianga rekareka tei akatueraia atu ki te katoatoa tei inangaro i te akono i te akamorianga mou? (e) Eaa penei te ka akatupu mai i tetai kino pakari tikai ki to tatou turanga pae vaerua?
EI AU pipi na Iesu, kua matau meitaki tatou ki tana patianga rekareka: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. . . . Te maru nei taku amo, e te māmā nei taku apainga.” (Mataio 11:28-30) Kua oronga katoaia mai ki te au Kerititiano “te tuatau rekareka no mua mai i te aroaro o [“Iehova,” NW] ra.” (Angaanga 3:19) Papu e kua kite ana tikai koe i te au tu akaanga roi o te apii anga i te au tuatua mou o te Pipiria, te rauka anga te manakonakoanga mataora no te tuatau ki mua, e te akono anga i ta Iehova au kaveinga i roto i toou oraanga.
2 Inara, ko etai o to Iehova aronga akamori kua aere ana na roto i te au taime o te roiroi ngakau. I tetai au tu e poto ua teia au taime o te akamaroiroi kore. I tetai au taime penei ka vai ua atu rai te manako ngakau paruparu no te au tuatau roa. I te openga, penei tetai papaki ka manako ngakau e ko ta ratou au apainga Kerititiano kua riro ei akateimaa kare ei apainga akaanga roi mei ta Iesu i taputou mai. Ko taua au tu manako tau kore ra penei ka akatupu i tetai kino pakari tikai ki to tetai Kerititiano pirianga ma Iehova.
3. Eaa ra a Iesu i oronga ai i te akoanga tei kiteaia ia Ioane 14:1?
3 Kare i roa i mua ake i tona opukina anga e te tamateangaia, kua akakite a Iesu ki tana au pipi: “Auraka e taitaia to kotou ngakau: ka akarongo i te Atua, ka akarongo katoa mai iaku.” (Ioane 14:1) Kua tuatua a Iesu i teia au tuatua i te au apotetoro e vaitata ua ra i te aro atu i te au tupuanga kino. Ka aruia mai teia e te au tupu anga o te takinokino. Kua kite a Iesu e ka inga tana au apotetoro no te akamaroiroi kore. (Ioane 16:1) Me akaruke uaia kare e akonoia, ka riro te manako ngakau mii i te akaapikepike i te pae vaerua e i te tangaro i to ratou irinakianga i roto ia Iehova. E tika katoa rai teia i te au Kerititiano i teia tuatau. Ka akatupu te akamaroiroi kore no tetai tuatau roa i te maata o te mamae, e penei ka akateiaa i to tatou ngakau. (Ieremia 8:18) Penei ka apikepike tatou te tangata i roto. I raro ake i teia taomianga, penei ka riro tatou ei ngoru i te pae ngakau e te pae vaerua, e ka ngaro katoa to tatou inangaro kia akamori ia Iehova.
4. Eaa te ka tauturu ia tatou kia akono i to tatou ngakau akatutu mei te akaroiroi anga?
4 Te tau tika ra ta te Pipiria ako e: “I te au mea katoa taau ka tapapa ra, kia maata taau tapapa anga i to ngakau; ko te tumu oki te reira o te ora.” (Maseli 4:23) Te oronga maira te Pipiria i te akoanga tau tikai te ka tauturu ia tatou kia paruru i to tatou ngakau akatutu mei te akamaroiroi kore e te roiroi i te pae vaerua. Inara, te mea mua, ka inangaroia tatou kia akataka tikai i te tumu o to tatou tu paruparu.
Kare te Akonoanga Kerititiano i te Apainga Teiaa
5. Eaa te patoianga i te akara anga e te vai ra no runga i te au pipi Kerititiano?
5 E tika e, kia riro ei Kerititiano ka umuumuia te tautaanga pakari. (Luka 13:24) Kua tuatua katoa a Iesu: “E te kore e apai i tona uaorai [“rakau tamamae anga,” NW], ka aru mai ei iaku, kare aia e riro ei pipi naku.” (Luka 14:27) I te akara atu anga mei te mea ra teia au tuatua e te patoi ra i te tuatua a Iesu no runga i tana apainga ei mea mama e te akaanga i te roi, inara ko te tikaanga tikai kare e patoianga.
6, 7. Eaa ka karangaia ai e ko ta tatou tu akamorianga kare e akaroiroi ana?
6 Te tautaanga maroiroi e te angaanga pakari, noatu e roiroi i te pae kopapa, ka riro ei merengoanga e te akaanga roi me raveia te reira no te akakoroanga Koheleta 3:13, 22) E eaa oki te akakoroanga meitaki atu mari ra ko te akakite anga i te tuatua mou umere o te Pipiria ki to tatou au tangata tupu? Pera katoa, ta tatou ropianga kia noo na to te Atua au turanga teitei o te tu akono tau e puapinga kore ua rai me akaaiteia atu ki te au puapinga ta tatou ka rauka mai i te openga. (Maseli 2:10-20) Noatu me takinokinoia, e manako ana tatou i te reira ei ngateiteianga kia mamae no te Patireia o te Atua.—1 Petero 4:14.
meitaki. (7 Ta Iesu apainga e tika roa e ka akaanga i te roi, me akaaiteia atu tikai ki te poiri i te pae vaerua o te aronga e noo atura i raro ake i te apainga a te akonoanga pikikaa. E maru tikai to te Atua aroa no tatou e kare e tuku ana i te au maroanga tau kore ki runga ia tatou. Ta Iehova ‘au akauenga kare oki i te mea teiaa.’ (1 Ioane 5:3) Ko te akonoanga Kerititiano mou, mei tei akakiteia i roto i te au Tuatua Tapu, kare i te apainga teiaa. Te taka ua ra e, ko ta tatou tu akamorianga kare e akatupu i te tu paruparu e te akamaroiroi kore.
“E Kopae Atu Tatou i te Au Mea Teiaa Ravarai”
8. Eaa te akatupu putuputu ana i te tu roiroi i te pae vaerua?
8 Tetai atu tu roiroi i te pae vaerua e kite ra tatou penei te putuputu ra i tupu no te apainga ke mai tei tukuia ki runga ia tatou e teia akatereanga kino o te au mea nei. No te mea “te vai ua nei rai to te ao ravarai i raro ake i taua vaerua kino ra,” te koropiniia nei tatou e te au mana akakeu tau kore te ka akaparuparu ia tatou e ka akakore i to tatou tu tau Kerititiano. (1 Ioane 5:19) Te au aruaruanga kare e anoanoia ka riro ei akangata e ei tamanamanata i ta tatou angaanga Kerititiano matauia. Penei ka akateiaa teia au apainga ke atu ia tatou e te akataitaia katoa ia tatou. Kua tau rai e, te ako maira te Pipiria ia tatou kia “kopae atu tatou i te au mea teiaa ravarai.”—Ebera 12:1-3.
9. Akapeea te au aruaruanga materia i te akateiaa anga ia tatou?
9 Ei akatauanga, te manako maata o teianei ao ki te turanga teitei, te moni, te tamataoraanga, te teretere aere no te tarekareka, e etai atu au aruaruanga materia ka akakeu ia i to tatou manako. (1 Ioane 2:15-17) Tetai au Kerititiano i te anere mataiti mua tei aruaru i te apinga maata kua akangata pakari tikai i to ratou au oraanga. Kua akamarama te apotetoro ko Paulo: “Te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate. Ko te anoano maata oki i te moni te tumu o te au kino katoa nei; kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.”—1 Timoteo 6:9, 10.
10. Eaa ta tatou ka tamou no runga i te apinga mei ta Iesu akatutuanga o te tangata tei ruru?
10 Me manako ngakau roiroi tatou e te akamaroiroi kore i roto i ta tatou tavinianga i te Atua, penei e no te riro ra te aruaruanga i te au apinga materia i te taapiapi i to tatou turanga pae vaerua? Ko teia tu e tika tikai, mei tei akakiteia mai e ta Iesu akatutuanga o te tangata tei ruru. Kua akaaite a Iesu i “te akono anga i te peu o teianei ao, i te pikikaa o te apinga, e te anoano maata i tetai au mea ke ra” ki te au tara e “pokia atura” te ua o te tuatua a te Atua i roto i to tatou au ngakau. (Mareko 4:18, 19) No reira, te ako maira te Pipiria ia tatou: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’”—Ebera 13:5.
11. Akapeea tatou i te takore anga i te au apinga te ka akateiaa ia tatou?
11 Tetai au taime ko te akangata ra i to tatou oraanga, kare ko te aruaru anga kia maata atu te au apinga, mari ra ko ta tatou e rave ra ki te au apinga tei tu takere tatou. Tetai papaki penei ka kite i te roiroi o te manako ngakau tei tupu mai no te au manamanata ngata o te oraanga kopapa, te ngaroanga o te au akaperepere me kore no tetai au manamanata kino. Kua kite ana ratou i te anoano no te au akatanotanoanga mei tera taime ki tera taime. Tetai tokorua akaipoipo kua iki kia takore i tetai o ta raua au angaanga rekaia e te au angaanga uaorai kare e anoanoia. Kua akara aere raua na roto i to raua au apinga e kua akapae pouroa i te au apinga tei piri atu ki taua au angaanga ra e kua akaatea takiri atu i te reira. I te au taime ka aereia, ka puapingaia tatou pouroa mei te akarakara marie anga i to tatou au tu e te au apinga, i te akaatea anga i te au akateiaaanga ravarai kare e inangaroia kia kore tatou e akaroiroi e e taitaia to tatou ngakau.
Puapinga te Tu Tau Tikai e te Tu Mako
12. Eaa te ka tau tatou kia ariki no runga i to tatou uaorai au tarevake?
12 To tatou uaorai au tarevake, noatu i te au mea rikiriki ua, ka akangata marie ua i to tatou au oraanga. E tika rava te au tuatua a Davida: “Kua na runga taku nei au ara i toku mimiti: mei te apainga teimaa kare e maranga iaku nei.” (Salamo 38:4) E putuputu, tetai au akatanotanoanga tau i te akamaru i ta tatou au apainga teiaa.
13. Akapeea te tu tau tikai i te tauturu anga ia tatou kia rauka te manako tau no ta tatou angaanga orometua?
13 Te akamaroiroi maira te Pipiria ia tatou kia akatupu i te “pakari meitaki e te [“manako kite,” NW].” (Maseli 3:21, 22) ‘Te pakari no runga maira, e maru,’ i karanga ai te Pipiria. (Iakobo 3:17) Kua kite ana etai i te taomianga kia akaaiteite i te maata o te angaanga ka rauka ki ta etai ke atu e rave ra i roto i te angaanga orometua Kerititiano. Inara, te ako maira te Pipiria ia tatou: “Kia akapapu ra te tangata ravarai i tana uaorai angaanga, e i reira e rauka ai iaia te tumu no te rekareka nona anake rai, kare no te akaaite anga atu ki te tangata ke. Na te tangata tataki tai e rave i tana uaorai apainga.” (Galatia 6:4, 5, NW) E tika e, ko te akaraanga meitaki a te au oa Kerititiano ka akamaroiroi ia tatou kia tavini ia Iehova ma te ngakau katoa, kareka ra te pakari meitaki e te tu tau tikai ka tauturu ia tatou kia akanoo i te au akakoroanga tika tikai kia tau ki to tatou uaorai au turanga.
14, 15. Akapeea tatou i te akaari anga i te pakari meitaki i te akono anga i to tatou au anoano i te pae kopapa e te pae ngakau?
14 To tatou tu tau tikai noatu i te au ngai penei i te akara anga e meangiti ua rai te puapinga ka riro ei tauturu i te kopae atu i te au manako ngakau akaroiroi. Ei akatauanga, te akatupu ra ainei tatou i te au tu tau te akatupu ra i te oraanga kopapa meitaki? E akamanako ana i te akaraanga a tetai tokorua akaipoipo tei tavini i ko i tetai o te au opati manga o te Au Kite o Iehova. Kua kite ana raua i te puapinga o te pakari meitaki i te paruru anga atu i te roiroi. Kua karanga te vaine: “Noatu eaa te maata o ta maua angaanga, e tauta ana maua i te aere e moe mei taua taime rai i te au po ravarai. E akaetaeta uaua putuputu katoa ana maua. Kua tauturu tikai teia ia maua. Kua rauka ia maua i te kite e eaa to maua au kotinga, e e rave ana maua i te au apinga kia tau rai ki te reira. E tamata
ana maua auraka e akaaiteite ia maua uaorai ki te aronga tei akara anga e e maata tikai te maroiroi.” E kai putuputu ana ainei tatou i te au kai meitaki e te rava o te akaanga anga roi? Na te akono anga tau tikai i to tatou oraanga meitaki ka akaiti mai ia i te au manako paruparu i te pae ngakau e te pae vaerua.15 E au anoano taka ke to tetai papaki o tatou. Ei akatauanga, tetai tuaine Kerititiano kua tavini ana ki roto i te angaanga orometua tamou i roto i tetai au tukuanga angaanga ngata tikai. Kua tu ana aia i te au tu manamanata pakari o te oraanga, kapiti mai i te kaneta. Eaa te tauturu ra iaia kia akono atu i te au turanga taitaia? Kua karanga aia e: “E mea puapinga noku kia rauka te taime kia noo ko au anake rai e kia muteki ua. Te maata atu o taku kite i te taitaia e te roiroi e tupu maira, ko te rapurapu maata atu ia o toku inangaro i te au atianga maru ko au anake rai kia tatau e kia akaanga roi.” Te pakari meitaki e te manako kite ka tauturu ia tatou kia kite e kia mareka ua i to tatou au anoano tataki tai e i te kopae anga atu i reira i te roiroi i te pae vaerua.
Akamaroiroi te Atua ko Iehova ia Tatou
16, 17. (a) Eaa te akono anga i to tatou oraanga pae vaerua i puapinga maata roa ai? (e) Eaa te ka tau tatou kia kapiti atu ki roto i ta tatou angaanga matau i te au ra ravarai?
16 Te akono anga i to tatou oraanga i te pae vaerua, e tika oki e, e puapinga maata tikai. Me rauka ia tatou tetai pirianga vaitata tikai ma te Atua ko Iehova, penei ka roiroi tatou i te pae kopapa, kareka ra kare rava tatou e akaroiroi i te akamori anga iaia. Ko Iehova oki teia “te oronga nei aia i te maroiroi no tei [“roiroi,” NW]; e te akamaata nei aia i te maroiroi no tei apikepike.” (Isaia 40:28, 29) Te apotetoro ko Paulo, tei kite uaorai i te tika tikai o teia au tuatua nei, kua tata e: “Kore ei matou i roiroi; mate ua rai oki te tangata i vao nei, te akaouia nei te tangata i roto, i tera rā i tera rā.”—2 Korinetia 4:16.
17 Akara ana i te tuatua “i tera rā i tera rā.” Te tamanako maira teia i te tuku ua anga ia tatou uaorai ki ta Iehova e oronga ua maira i te au ra tataki tai. Tetai mitinari tei tavini tiratiratu no te 43 mataiti, kua aro atu i te au tuatau o te roiroi e te akamaroiroi kore i te pae kopapa. Inara kare aia i akaroiroi. Kua karanga aia: “Kua akariro au ei angaanga matau i te tu vave i mua ake ka akamata ai i tetai angaanga, kia rauka iaku i te akapou i tetai taime i te pure kia Iehova e te tatau i tana Tuatua. Teia angaanga matau i te ra ravarai kua tauturu iaku i te akakoromaki e teia noa ai.” Ka rauka tikai ia tatou i te irinaki ki to Iehova mana akamaroiroi me putuputu, ae “i tera rā i tera rā,” i te pure kiaia e te manakonako no runga i tona au tu teitei e tana au taputou.
18. Eaa te akapumaanaanga ta te Pipiria e oronga maira no te aronga tiratiratu tei pakari me kore tei makimaki?
18 E tauturu maata tikai teia ki te aronga tei manako ngakau akamaroiroi koreia no te pakari anga e te makimaki. Taua aronga ra penei ka ngakau taitaia, kare no te mea e te akaaiteite atura ratou ia ratou uaorai ki etai ke atu, mari ra no te akaaiteite atura ratou ia ratou uaorai ki to ratou tu i mua ana. Mei teaa ra te akapumaana anga kia kite e te akangateitei ra a Iehova i te aronga ruaine! Te karanga ra te Pipiria: “E korona kakā te upoko inaina, kia rokoia atu tei te arataa tuatua-tika ra.” (Maseli 16:31) Kua kite a Iehova i to tatou au kotinga e te mareka maata maira i ta tatou akamorianga ngakau katoa noatu to tatou au tu apikepike. E te au angaanga memeitaki ta tatou i rave takere ana kua mou tikai i te rekotiia i roto i to te Atua manako. Te akapumaana maira te au Tuatua Tapu ia tatou: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.” (Ebera 6:10) Mei teaa ra to tatou katoatoa rekareka anga kia noo ki rotopu ia tatou te aronga tei vai tiratiratu kia Iehova no te au rau ngauru mataiti e manganui!
Auraka e Tuku i te Au
19. Akapeea tatou e puapingaia ai mei te rave maroiroi anga i te mea meitaki?
19 Manganui te irinaki ra e ka rauka i te angaanga pakari putuputu i te pae kopapa i te takore i te roiroi. Pera katoa rai, te au angaanga putuputu i te pae vaerua ka rauka i te tauturu i te akamaru i tetai ua atu au manako ngakau paruparu o te ngakau me kore i te pae vaerua. Te karanga ra te Pipiria: “Auraka tatou e tuku i te au i te takinga Galatia 6:9, 10, NW) Akara ana i te au tuatua “i te takinga meitaki” e te ‘rave i tei meitaki.’ Te tamanako maira teia i te raveanga i to tatou tua. Te rave anga i te au apinga memeitaki no etai ke ka tauturu tikai i te paruru ia tatou mei te akaroiroi i roto i ta tatou tavinianga ia Iehova.
meitaki, i te tuatau tikai ka kokoti ia tatou me kare tatou e akaroiroi. E tikai i reira, me e tuatau tau to tatou no te reira, kia rave tatou i tei meitaki ra ki te katoatoa, inara ki te aronga tikai tei piri mai kia [tatou] i te akarongo.” (20. Kia tamaki atu i te akamaroiroi kore, noai ma te pirianga ta tatou ka kopae atu?
20 I tetai tua, te taokotai anga e te au rave anga ma te au tangata e kopae ra i ta te Atua au ture ka riro ei apainga akaroiroi. Te akamatakite maira te Pipiria ia tatou: “Teimaa to te toka, teimaa katoa to te one; teimaa maata ra to te riro o te neneva i aua nga mea katoa e rua ra.” (Maseli 27:3) Kia tamaki atu i te au manako ngakau o te akamaroiroi kore e te roiroi, e mea meitaki no tatou kia kopae i te pirianga o te aronga e akamanako ua ra i te au manako tau kore e te ka viviki ua i te kimi apa e te akaapa atu i etai ke.
21. Akapeea tatou e riro ei ei akamaroiroianga ki etai ke atu i ko i te au uipaanga Kerititiano?
21 Te au uipaanga Kerititiano tetai mataara mei ko ia Iehova ei akaki ia tatou ki te maroiroi i te pae vaerua. I reira ka rauka ia tatou te tuatau meitaki roa kia akamaroiroi i tetai e tetai ki te ikuikuanga akaanga roi e te taokotaianga. (Ebera 10:25) Pouroa i roto i te putuputuanga kia tauta i te akamaroiroi atu me tuatua i ko i te au uipaanga me kore me piri atu ki te porokaramu mei te paata mai. Tei te aronga tikai te arataki ra ei au puapii te apainga o te akamaroiroi anga i etai ke. (Isaia 32:1, 2) Noatu me e anoano tetai kia apii e kia ako, kia riro ua rai te tu o te akoanga ei akaanga i te roi. (Galatia 6:1, 2, NW) To tatou aroa no etai ke ka tauturu tikai ia ia tatou kia tavini ia Iehova ma te kore e akaroiroi.—Salamo 133:1; Ioane 13:35.
22. Noatu to tatou tu apa tangata ua nei, eaa tatou ka akamaroiroi meitaki ei?
22 Te akamorianga ia Iehova i teia tuatau openga ka o mai te angaanga. E kare te au Kerititiano i matara mai mei te au tu o te roiroi i te pae manako, te mamae ngakau, e te au turanga taitaia. To tatou tu tangata apa ua nei e paruparu ua, mei te potera rai. Inara, te karanga ra te Pipiria: “Te āriki nei ra matou i taua apinga nei i te āriki karakaraea nei, kia riro te mana maata meitaki nei ki te Atua, auraka ia matou.” (2 Korinetia 4:7) Ae, ka roiroi tatou, inara auraka roa tatou kia akaroiroi me kore kia tuku i te au. Kareka ra, e tika ia tatou kia “akamaroiroi, e kia karanga e, ‘Ko Iehova toku tauturu.’”—Ebera 13:6.
Akamanako Poto Akaou Anga
• Eaa tetai au apainga akateiaa te ka rauka ia tatou i te kopae atu?
• Akapeea tatou i te piri anga atu ki te rave anga “i tei meitaki” ki to tatou au oa Kerititiano?
• Akapeea a Iehova i te tauturu anga ia tatou me manako ngakau roiroi tatou me kore me akamaroiroi koreia?
[Au Uianga Apii]
[Tutu i te kapi 23]
Kua kite a Iesu e ka riro te akamaroiroi kore no tetai tuatau roa i te tamanamanata i te au apotetoro
[Tutu i te kapi 24]
Kua takore etai i tetai au angaanga rekaia e te au angaanga kare e anoanoia
[Tutu i te kapi 26]
Noatu to tatou au kotinga, te mareka maata maira a Iehova i ta tatou akamorianga ngakau katoa