Te Anoanoia ra Ainei te Akoanga Meitaki?

I TEIA tuatau, e manganui te irinaki ra e tei ia ratou te kite i te meitaki mei te kino e tei ia ratou te tika anga i te rave i tetai ua atu apinga ta ratou e inangaro ra. Te karanga ra tetai pae e te meitaki ua ra te au apinga ravarai me te akariro ra te reira kia manako meitaki te tangata. Te akakino maataia nei, te oraanga akaipoipo e te ngutuare tangata, kua roa te manako angaia e ko te au akanoonooanga tau o te taiate tangata.​—Genese 3:5.

E akamanako ana ia Verónica, * tei noo i Meiko. Kua ripoti mai aia: “I mua ua ake i to maua ra akamaara anga e 15 mataiti akaipoipoanga, kua akakite mai taku tane kiaku e te noo piri ra aia ki tetai vaine ke. Kua karanga mai aia e no te mea e mapu ake teia vaine e te akariro ra iaia kia manako meitaki, kare aia e akaruke iaia. Kua poitirere au i te manako anga e kare toku oa meitaki e noo akaou mai i te pae iaku ei tokorua noku. E manako ua ana au e ko te matenga o tei akaperepereia e au ko te tumu anga mamae roa atu ia. Kiaku nei ra, e mamae roa atu te akaturi no te mea kare e kua ngere ua iaku tetai taku tikai e inangaro ra kareka ra kua rave ua atu aia i te au apinga tei tamamae iaku.”

I na te vai ra te turanga o tetai tangata e 22 mataiti tei kopae ke ana e e tamaiti tana inara kare e inangaro ana i te ariki i tana au apainga ei metua tane. Te manako ra aia e na tona metua vaine e akono iaia e tana tamaiti. Me kare aia e ariki pouroa mai i tana au umuumu anga, ka riri aia e ka tuatua akakino atu iaia, mei tetai tamaiti manako tau kore rai. Kare tona metua vaine e maroiroi ana i te aro atu i taua tu kino ra.

Kare teia au turanga nei i te mea tuke roa. Te kake ua atura te tatara anga e te kopae anga i te pae ture i te au ngai ravarai. E manganui te au tamariki te kite ra i tetai o to ratou metua i te akaruke anga i te kainga i te akamata i tetai oraanga ou. Kua ngaro i etai au mapu te akangateitei katoa no tetai ke, kapiti atu to ratou nga  metua, e te piri ra ki roto i te tu kare i manako matauia ana i te tuatau i topa. Ko te tamatamata anga ainga, te apinga akakona, te taia anga e te au mapu, e te ta anga te tamariki i te au puapii me kore i nga metua ra kua riro mai ei mea matauia i roto i te au enua e manganui. E penei te kite ra koe e kare anake e ko te akono anga i te tamariki e te akaipoipo anga te ngai te aro atura i te au tu ngata i roto i te ao i teia tuatau nei.

Ia tatou e kite ra i teia au tupuanga, penei ka manako tatou e eaa te tupu nei ki te taiate. Me kua kite tikai te au tangata i te meitaki mei te kino, eaa ra te au manamanata e manganui kare rai i akatikatikaia? Te anoanoia ra ainei te akoanga meitaki? Te vai ra ainei tetai tumu no te akoanga puapinga, ko tei riro mai ei mea irinakiia? Noatu e manganui te karanga ra e te irinaki ra ratou i te Atua e tana Tuatua tataia, i te akara anga kare teia e akakeu ana i ta ratou au ikianga. Inara eaa te au puapinga te ka rauka mai ia tatou me kimi e me rauka mai ia tatou te akoanga mei ko mai i te Atua? Ka akamanako ana tatou i te reira i roto i te atikara e aru mai nei.

[Tataanga Rikiriki i Raro]