Au Uianga a te Aronga Tatau

Eaa ra te Au Kite o Iehova e apai ei i te numero 144,000 e taikuia ra i roto i te puka a Apokalupo e e tika tikai e kare oki i te akatutuanga ua?

Kua tata te apotetoro ko Ioane e: “Kua akarongo atura au i te maata anga o te aronga i akairoia ra: okotai anere e a ngauru ma a i te tausani i akairoia ra, no te au kopu ravarai o te tamariki a Iseraela ra.” (Apokalupo 7:4) I roto i te Pipiria, ko te takiota tuatua “te aronga i akairoia” te tou ra ki tetai pupu o te aronga tataki tai tei ikiia mei roto mai i te au tangata ravarai kia tutara ma Karaiti i te rangi i rungao i te enua Parataito e aere maira. (2 Korinetia 1:21, 22; Apokalupo 5:9, 10; 20:6) To ratou numero, 144,000, kua marama tika tikaiia no te au tumu e manganui. Kua kitea tika ia mai tetai i roto i te aerenga tuatua o Apokalupo 7:4.

I muri ake i te akakite angaia ki te apotetoro ko Ioane na roto i te orama no runga i teia pupu e 144,000 aronga tataki tai, kua akaariia atu kiaia tetai pupu akaou mai. Kua akataka mai a Ioane i teia pupu rua e “e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki.” Te tou ra teia aronga maata rava ki te aronga te ka ora atu i te “mate maata,” te ka akapou i teianei ao kino.​—Apokalupo 7:9, 14.

Inara, e akara, i te tuke ta Ioane i taiku i rotopu i te irava 4 e te 9 o Apokalupo pene 7. Kua karanga aia e ko te pupu mua, “o te aronga i akairoia ra,” e numero papu tikai ia. Inara, te pupu rua, “e aronga maata rava,” kare ona numero papu tikai. Ma te reira i te manakoanga, e mea tau kia akono i te numero 144,000 e mea tika tikai. Naringa te numero 144,000 e mea akatutu uaia e te tou ra ki tetai pupu e kare tikai ona numero, ka ngere te puapinga o te tuke i rotopu i taua nga irava ra. No reira, te akakite pakari maira te aerenga tuatua e kia akono tikaiia te numero 144,000.

Te au aronga kite tukeke o te Pipiria, i te tuatau i topa e i teianei, kua tae katoa ki te taopenga anga aiteite​—koia oki, e numero tika tikai. Ei akatauanga, i te tuatua anga no runga ia Apokalupo 7:4, 9, kua karanga te tangata tata tikitinari Peritane ko Dr. Ethelbert W. Bullinger i etai 100 mataiti i topa akenei e: “Ko te tuatuaanga mama ua ia no te tika: ko tetai numero papu tei tuke ki te numero papu kore i teianei pene tikai.” (The Apocalypse or “The Day of the Lord,” kapi 282) No teia taime ua nei, kua tata a Robert L. Thomas, Meangiti., e poropeta no te Koreromotu Ou i Te Ngai Apii Anga o te Pu: “Te tu no te akatutuanga e akatakaanga paruparu ua ia.” Kua kapiti katoa aia: “E numero papu tikai ia [ia 7:4] tei tuke mei te numero papu kore o 7:9. Me ka akono akatutuia te reira, kare e rauka i tetai numero i roto i te puka kia akono tikai ia.”​—Revelation: An Exegetical Commentary, Voriumu 1, kapi 474.

Ka tauetono etai e i te mea e te vai ra i roto ia Apokalupo te reo akatutu tikai, pouroa te au numero tei kiteaia i roto i teia puka, kapiti mai te numero 144,000, e akatutuanga ia. (Apokalupo 1:1, 4; 2:10) Inara, ko taua taopenga anga, kua taka meitaki e kare oki e tano ana. E tika, te vai ra i roto ia Apokalupo te au numero  akatutu e manganui, inara te kapiti katoa maira te au numero tika tikai. Ei akatauanga, kua tuatua a Ioane no “te ingoa o te au Aposetolo a te Punua-mamoe tino ngauru ma rua ki rungao.” (Apokalupo 21:14) Kua taka meitaki, te numero 12 te taikuia ra i roto i teia irava e tika tikai ia, kare oki e akatutu anga. Pera katoa, kua tata te apotetoro ko Ioane no runga i “nga mataiti okotai tausani” o to Karaiti tutara anga. Ka tau katoa taua numero ra kia akono tika tikai ia, mei ta tetai akamanako anga meitaki o te Pipiria e akaari maira. * (Apokalupo 20:3, 5-7) No reira, noatu me ka akono tika tikai ia me kore ka akatutu ua ia tetai numero i roto ia Apokalupo tei runga te reira i to te reira tumuanga e te akanooanga.

Te taopenga anga e e tika tikai te numero 144,000 e te tou ra ki tetai numero kotingaia o te aronga tataki tai, e pupu meangiti ia me akaaiteia ki te “aronga maata rava,” kua rotai katoa ki tetai au irava Pipiria ke mai. Ei akatauanga, i muri mai i roto i te orama tei rauka mai i te apotetoro ko Ioane, te akataka maira te 144,000 e ko te aronga tei “okoia ïa no roto i te tangata nei, ei popo mua.” (Apokalupo 14:1, 4) Te tuatuaanga “popo mua” te tou ra ki tetai ikianga komono meangiti ua. Pera katoa, ia Iesu i runga nei i te enua, kua tuatua aia no runga i te aronga te ka tutara ma iaia i roto i tona Patireia i te rangi ra e kua kapiki oki ia ratou e ko te “anana iti.” (Luka 12:32; 22:29) E tikai, ko te aronga mei roto mai i te tangata ravarai te ka tutara i te rangi ra e meangiti ua me akaaiteia ki te aronga o te tangata ravarai te ka noo ki runga i te enua Parataito e aere maira.

No reira, te aerenga tuatua o Apokalupo 7:4 e te au tataanga taikuia tei kiteaia i tetai ngai ke mai i roto i te Pipiria te akapapu maira e ko te numero 144,000 oki kia akono tika tikai ia te reira. Te tou ra te reira ki te aronga te ka tutara i te rangi ra ma Karaiti ki rungao i tetai enua parataito, te ka akakiia e tetai numero maata e te kitea koreia o te pupu tangata mataora te akamori ra i te Atua ko Iehova.​—Salamo 37:29.

[Tataanga Rikiriki i Raro]

[Tataanga i te kapi 31]

Te numero o te aronga akatuangaia ki te rangi ra kua kotingaia ki te 144,000

[Tutu i te kapi 31]

Te “aronga maata rava” kua tare koreia

[Akameitakianga no te Tutu i te kapi 31]

Stars: Courtesy of Anglo-Australian Observatory, photograph by David Malin