Kia Akakaka i te Atua ‘Ma te Vaa Okotai’

“Kia akameitaki kotou i te Atua, i te Metua o to tatou Atu ra o Iesu Mesia, ma te ngakau okotai, e te vaa okotai.”​—ROMA 15:6.

1. Eaa ra te apiianga no te akono anga i te au manako tukeke ta Paulo i oronga mai ki te au taeake irinaki ra?

KARE te au Kerititiano ravarai e rave ana i te au ikianga aiteite me kare i rave ana i te au anoano aiteite. Inara, e mea tau kia aere taokotai te au Kerititiano ravarai na runga i te mataara ki te ora. Ka rauka ainei te reira? Ae, me kare tatou e rave i te au maro anga maata o te au mea tukeke meangiti ra. Ko tetai apii angaia ta te apotetoro ko Paulo i oronga ki te au taeake irinaki i te anere mataiti mua. Akapeea aia i te akataka anga i teia tumu puapinga maata? E akapeea tatou i te taangaanga anga i tana akoanga akauruia i teia tuatau?

Te Puapinga Maata no te Taokotai Anga Kerititiano

2. Akapeea a Paulo i te akakite anga mai i te anoano no te taokotai anga?

² Kua kite a Paulo e e puapinga maata te taokotai anga Kerititiano, e kua oronga aia i te akoanga memeitaki ei tauturu i te au Kerititiano kia akono tamou marie i tetai e tetai i roto i te aroa. (Ephesia 4:1-3; Kolosa 3:12-14) Noatu rai, i muri ake i te akatumu anga i te au putuputuanga e manganui e te atoro anga i tetai ke e tere atu i te 20 mataiti, kua kite aia e te tamou marie anga i te taokotai anga ka riro te reira ei akaaoanga. (1 Korinetia 1:11-13; Galatia 2:11-14) No reira, kua raurau atura aia i te au taeake irinaki te noo ra i Roma e: “Kia akaarite mai te Atua nona te akakoromaki e te pumaana . . . Kia akameitaki kotou i te Atua, i te Metua o to tatou Atu ra o Iesu Mesia, ma te ngakau okotai, e te vaa okotai.” (Roma 15:5, 6) I teia tuatau, e mea tau katoa kia akakaka tatou i te Atua ko Iehova ‘ma te vaa okotai’ ei pupu taokotai anga o tona au tangata. Te peea nei tatou i roto i teia tu nei?

3, 4. (a) Eaa ra te au turanga tuke tei rauka i te au Kerititiano i Roma? (e) Akapeea e rauka ai i te au Kerititiano i Roma i te tavini anga ia Iehova ‘ma te vaa okotai’?

³ E manganui te au Kerititiano i Roma e au oa no Paulo. (Roma 16:3-16) Noatu e e tuke to ratou au turanga, kua ariki a Paulo i tona au taeake ravarai ei “aronga katoa, i akaperepereia mai e te Atua.” Kua tata aia e: “E akameitaki ana au i taku Atua, no Iesu Mesia ra, ia kotou ravarai, no te mea kua tuatuaia to kotou akarongo e kako roa ake te ao katoa nei.” Te taka meitaki ra, e akaraanga meitaki te au Roma i roto i te au tu e manganui. (Roma 1:7, 8; 15:14) I taua taime rai, e au manako tuke to tetai au mema o te putuputuanga no runga i etai au tumu manako. No te mea e no roto mai te au Kerititiano i teia tuatau i tetai au turanga e te peu tukeke, i te apii anga i te akoanga akauruia a Paulo e akapeea i te akono anga i te au manako tukeke ka rauka i te tauturu ia ratou i te tuatua ‘ma te vaa okotai.’

⁴ Te vai ra i Roma te aronga irinaki ngati Iuda e te Kenitara. (Roma 4:1; 11:13) I te akara anga kare i rauka i etai au Kerititiano ngati Iuda i te tapu ia ratou uaorai i te rave i tetai au peu ta ratou i akono ana i raro ake i te Ture a Mose, noatu e kua kite ratou e kare e puapingaia taua au ravenga no te ora. I tetai tua, kua ariki tetai au Kerititiano ngati Iuda e manganui e kua tatara mai to Karaiti atinga ra ia ratou mei te au arai anga ta ratou i akono ana i mua ake ka riro mai ei ei au Kerititiano. Tei tupu mai, kua taui ratou i etai o ta ratou au peu e te au angaanga. (Galatia 4:8-11) Noatu rai, mei ta Paulo i tou maira, pouroa e “aronga katoa, i akaperepereia mai e te Atua.” Ka rauka te katoatoa i te akapaapaa i te Atua ‘ma te vaa okotai’ me ka tamou ratou i te manako ngakau tau ki tetai e tetai. Penei ko  tatou katoa i teia tuatau e au manako tukeke no runga i tetai au tumu manako, no reira e mea meitaki kia akamanako meitaki e akapeea a Paulo i te akataka anga mai i taua kaveinga puapinga maata.​—Roma 15:4.

“Ka Āriki Kotou ia Kotou Uaorai”

5, 6. Eaa ra i vai ei te au manako tukeke i roto i te putuputuanga i Roma?

⁵ I roto i tana reta ki to Roma, kua tuatua a Paulo no tetai turanga e tukeke te au manako. Kua tata aia: “Te manako ra oki tetai e, ka tika iaia kia kai i te manga tini katoatoa nei: e ko tetai oki ko tei kore i maroiroi ra, ko te kai tanu anake ua tana e ka kai.” Eaa ra i pera ai? I na, i raro ake i te Ture a Mose, kare e tau kia kaingaia te puaka. (Roma 14:2; Levitiku 11:7) Inara, kare taua Ture i vai mai ana i muri ake i te mate anga a Iesu. (Ephesia 2:15) No reira, e toru e te apa mataiti i muri ake i to Iesu matenga, kua akakite tetai angera ki te apotetoro ko Petero e auraka e manakoia te kai mei ta te Atua e manako ra e e mea viiviiia. (Angaanga 11:7-12) Ma te akamanakoanga i teia au tumu nei, penei te manako ra etai au Kerititiano ngati Iuda e e mea tau kia kai ratou i te puaka​—me kare e mea reka i te kai atu i tetai ua atu kai tei araiia ana i raro ake i te Ture.

⁶ Inara, te manako anga tikai i te kai anga i te au kai viivii o mua ana penei ka riro mai ei mea viivii ki tetai au Kerititiano ngati Iuda. Penei te manako tau kore ra taua aronga manako ngakau i te kite anga atu i to ratou au taeake ngati Iuda a Karaiti ra i te kai anga i taua kai ra. Tei maata atu, ko tetai au Kerititiano Kenitara, penei kare to ratou turanga akonoanga i kapiti mai ana i te au araianga kai, e penei ka umere e ka maro atu tetai no runga i te kai. E tikai, kare e tarevake no tetai tangata kia akakore i te kai i tetai au kai, me kare oki aia e maro atu e e mea tau taua akakore anga kai ra kia rauka mai te ora. Noatu rai, ka akakeu ngoie uaia te maro anga i roto i te putuputuanga e te au manako tukeke. Te anoanoia ra te au Kerititiano i Roma kia matakite e kare taua au tuke anga e arai ia ratou mei te akakaka anga i te Atua ‘ma te vaa okotai.’

7. Eaa ra te au manako tukeke te vai ra no runga i te tumu no te akono anga i tetai ra takake i te au epetoma taki tai ra?

⁷ Kua oronga a Paulo i te rua o te akaraanga: “Te manako nei tetai e, e tu ke to tetai rā i tetai rā; te manako nei oki tetai okotai rai tu to nga rā katoatoa.” (Roma 14:5a) I raro ake i te Ture a Mose, kare te angaanga e raveia ana i te ra Tapati.  Kua kotinga pakari katoaia te teretere anga i taua ra ra. (Exodo 20:8-10; Mataio 24:20; Angaanga 1:12) Inara, te akakoreia anga te Ture, kua akakoreia taua au araianga. Noatu rai, penei te manako taitaia ra etai au Kerititiano ngati Iuda no runga i te rave anga i tetai ua atu angaanga me kare no runga i te aerenga ki tetai ngai mamao i te ra ra ta ratou i manako ana i mua ana e e mea tapuia. I te riro katoa anga i muri mai ei au Kerititiano, penei kua akapae tikai ratou i te ra itu no te au akakoroanga pae vaerua, noatu rai e kare e tau ana te ra Tapati mei to te Atua manako anga. Kua tarevake ainei ratou i te rave i te reira? Kare, me kare oki ratou e maro atu e te umuumuia ra e te Atua te akono anga i te ra Tapati. No reira, i te akamanakoanga i te akava ngakau o tona au taeake Kerititiano, kua tata a Paulo: “Kia papu ra te tangata ravarai i tona uaorai ngakau.”​—Roma 14:5e.

8. Noatu e ka rauka ia ratou i te akaari i te akamanakoanga no te akava ngakau o tetai ke, eaa ra ta te au Kerititiano i Roma kare e tau kia rave?

⁸ Noatu rai, iaia e akamaroiroi pumaana ra i tona au taeake kia akakoromaki ua i te aronga tei putoto ra ma te au tumu manako o te akava ngakau, kua ako pakari atu a Paulo i te aronga tei tauta i te maro i te au taeake irinaki kia kauraro ki te Ture a Mose ei umuumuanga kia rauka mai te ora. Ei akaraanga, vaitata ki te 61 T.N., kua tata a Paulo i te puka o Ebera, e reta pakari ki te au Kerititiano ngati Iuda i te akataka marama anga tikai e kare e puapinga te kauraro anga ki te Ture a Mose no te mea e manakonako anga teitei atu to te au Kerititiano tei akatumuia ki runga i te atinga oko o Iesu.​—Galatia 5:1-12; Tito 1:10, 11; Ebera 10:1-17.

9, 10. Eaa ra ta te au Kerititiano kare e tau i te rave? E akataka mai.

⁹ Mei ta tatou i kite ana, kua taumaro a Paulo e ko te maani anga i te au ikianga tukeke kare e anoanoia kia riro mai ei akakino anga ki te taokotai anga me kare oki e o mai te aati anga i te au kaveinga Kerititiano. No reira, kua ui a Paulo ki te au Kerititiano ma tetai akava ngakau paruparu e: “Eaa ra oki koe i akaapaʼi i to taeake?” E kua ui atu aia ki te aronga maroiroi (penei te aronga te akatika ra to ratou akava ngakau ia ratou kia kai i tetai au kai tei tureia ana i raro ake i te Ture me kare i te rave i te angaanga noa i te ra Tapati): “E eaa oki koe i akavaavaa atu ei i to taeake?” (Roma 14:10) Kia tau ki ta Paulo, e mea tau kia kore oki te au Kerititiano akava ngakau paruparu e akaapa atu i to ratou au taeake e manako tukeke to ratou. I taua taime rai, auraka te au Kerititiano maroiroi e akavaavaa atu i te aronga te paruparu ra to ratou akava ngakau i roto i tetai au ngai. Kia akangateitei te katoatoa i te au manako tau o tetai ke e eiaa e “e maata te manako [ia ratou uaorai], i tei tau [ia ratou] kia manako ra.”​—Roma 12:3, 18.

¹⁰ Kua akataka mai a Paulo i te manako tau na roto i teia tu: “Auraka tei kai ra, e akavaavaa atu i tei kore i kai ra; e auraka katoa oki tei kore e kai ra e akaapa atu i tei kai ra: kua ārikiia mai oki aia e te Atua.” Pera katoa, kua akakite mai aia e: “Mei te Mesia i āriki mai ia tatou nei, kia kakā te  Atua.” Mei te mea e kua arikiia te maroiroi e te paruparu e te Atua e e Karaiti, kia aiteite rai to tatou tu ngakau maata e “ka āriki kotou ia kotou uaorai.” (Roma 14:3; 15:7) Koai ma tikai te ka patoi atu i te reira?

Kua Akatupu te Aroa Taeake i te Taokotai Anga i Teia Tuatau

11. Eaa ra te turanga takake tei vai ana i to Paulo tuatau?

¹¹ I roto i tana reta ki to Roma, te tuatua ra a Paulo no tetai turanga takake. Koi takore ua akera rai a Iehova i tetai koreromotu e kua akanoo i tetai mea ou. Kua ngata i etai i te ariki i te reira. Kare taua turanga tikai e vai ana i teia tuatau, inara penei te mama maira taua au maro anga i tetai au taime.

12, 13. Eaa ra etai au turanga ka rauka i te au Kerititiano i teia tuatau nei i te akaari i te akamanakoanga no te akava ngakau no to ratou au taeake?

¹² Ei akaraanga, penei kua piri ana tetai vaine Kerititiano ki tetai akonoanga te manako ketaketa ra i te tu tau ua o te kakau e te akara anga. I tona ariki anga i te tuatua mou, penei te kite ra aia i te tu ngata i te akatika anga i te manako e kare e araiia ana te aao anga i te kakau karakara e te tau i te au atianga tau me kare i te taangaanga anga i te au apinga akamanea tau. Mei te mea e kare te kaveinga Pipiria i o mai ana, kare e tau ana no tetai ua atu kia tauta i te akakeu i taua vaine Kerititiano ra kia aati i tona akava ngakau. I taua taime rai, kua kite aia e auraka aia e akaapa i te au vaine Kerititiano te akatika ra to ratou akava ngakau ia ratou kia taangaanga i taua au apinga ra.

¹³ E akamanako ana i tetai atu akaraanga. Penei kua utuutuia tetai tangata Kerititiano i roto i tetai ngai kare e akatikaia kia taangaangaia te kava. I muri ake i te rauka anga mai te kite no te tuatua mou, kua kite aia i te manako o te Pipiria e e apinga orongaia mai te uaina mei te Atua e penei ka taangaangaia ma te tau. (Salamo 104:15) Kua ariki aia i taua manako ra. Noatu rai, no tona turanga, kua inangaro aia i te kopae takiri mai i te inu anga i te kava, inara kare aia e akavaavaa i te aronga tei taangaanga tau i te reira. No reira kua akono aia i te au tuatua a Paulo: “Ka umuumu tatou i te tuatua i akatupu i te au, e te tuatua e meitaki kapipiti ei ra.”​—Roma 14:19.

14. I roto i teea au turanga ka akono ei te au Kerititiano i te tu o ta Paulo akoanga ki to Roma?

¹⁴ Kua tupu mai tetai au turanga te umuumuia ra te akonoanga i te aiteanga tikai o ta Paulo akoanga ki to Roma. E manganui te aronga tataki tai i roto i te putuputuanga Kerititiano, e tukeke to ratou au anoano. No reira, penei ka rave ratou i te au ikianga tuke​—ei akaraanga, i roto i te tumu o te kakau me kare i te akamaneaanga. E tikai, kua akakite mai te Pipiria i te au kaveinga taka meitaki ta te au Kerititiano ngakau tae ravarai ka akono. Auraka tetai ia tatou e aao i te kakau me kare i te au akamanea rauru tuke rai me kore te akataka ra ia tatou ki te au mea tau kore o teianei ao. (1 Ioane 2:15-17) Kia maaraia e te au Kerititiano i te au taime ravarai e, noatu te akaangaroi ra ratou, e au orometua ratou i te akatutu anga i te Ngateitei i te Ao Katoa e Pini Ua Ake. (Isaia 43:10; Ioane 17:16; 1 Timoteo 2:9, 10) Inara, i roto i te au ngai e manganui te vai ra te au ikianga tau ma te tuke maata no te au Kerititiano. *

Kopae i te Turori Anga i Tetai Ke

15. Ei puapinga anga no tona au taeake, i raro ake i teea au turanga kare tetai Kerititiano, e taangaanga i tona au tika anga?

¹⁵ Te vai ra e tai kaveinga openga puapinga maata ta Paulo e apai maira ki to tatou manako i roto i tana akoanga i te au Kerititiano i Roma. I tetai au taime, penei kare tetai Kerititiano ma te akava ngakau tereni meitakiia e rave i tetai ikianga te ka rauka iaia. No teaa ra? No te mea kua kite aia e ko te aruaru anga i tetai aerenga ra penei ka akakino atu i tetai ke. No taua tu nei, eaa ta tatou ka tau kia rave? Te karanga ra a Paulo e: “E mea meitaki oki kia kore e kai i te puaka, e kia kore e inu i te wina, e kia kore e rave i te au mea ravarai e turori ei to taeake ra.” (Roma 14:14, 20, 21) No reira, “ko tatou ko tei maroiroi nei, ka akakoromaki i te apikepike o te maroiroi kore e tikaʼi, eiaa e akatika i ta tatou uaorai. E akarekareka tatou katoa nei i tetai ke, kia meitaki aia, kia maroiroi.” (Roma 15:1, 2) Me akaririia te  akava ngakau o tetai taeake Kerititiano i ta tatou e rave ra, na te aroa taeake e akakeu ia tatou kia akamanako e kia kotinga i ta tatou au ikianga. Ko tetai akaraanga no teia penei ko te taangaanga anga i te au kava akakona. Te akatikaia ra tetai Kerititiano kia inu i te uaina ma te tu tau ua. Inara me te rave ra i te reira penei ka turoriia tona oa, kare aia e maro atu i tana tika anga.

16. Akapeea e rauka ai ia tatou i te akaari i te akamanakoanga no te aronga i roto i ta tatou ngai angaanga anga?

¹⁶ Kia akono katoaia teia kaveinga ki ta tatou au angaanga i vao ake i te putuputuanga Kerititiano. Ei akaraanga, penei te noo ra tatou i roto i tetai ngai te apii ra te akonoanga o reira i tona au tangata kia akara i tetai ra o te epetoma ra ei ra akaangaroi anga. No taua tumu ra, kia kore oki e turori atu i to tatou au tangata tupu e te akatupu anga i te au arai anga no te angaanga tutu anga, ka kopae mamao atea tatou i te rave i tetai apinga i taua ra ra te ka akariri atu i to tatou au tangata tupu. I tetai turanga, penei ka neke tetai Kerititiano apinganui i te tavini i te ngai e maata atu te anoanoia ra i roto i te au tangata kare e maata ana te apinga. Penei ka iki aia i te akaari i te akamanakoanga no tona au tangata tupu ou ua na te aao anga i te kakau tau me kore na te aruaru anga i tetai tu oraanga tau noatu e ka rauka iaia i te tutaki i tetai tu oraanga meitaki roa atu.

17. Eaa ra i tau ei kia akamanakoia tetai i roto i te au ikianga ta tatou e rave ra?

¹⁷ E mea tau ainei i te tapapa atu i te aronga “tei maroiroi” kia rave i taua au akatikatika anga? I na, e akamanako ana i teia akatutuanga: Ia tatou e akaoro ra i runga i te mataara maata, kua kite atu tatou i mua ia tatou i tetai tamariki e aere vaitata maira ki te mataara. Ka akaoro viviki atu ainei tatou no te mea e tei ia tatou te tika anga kia rave i te reira? Kare, ka akamarie mai tatou kia kore te kino e tupu ki te tamariki. I tetai taime, te umuumuia ra taua inangaro anga kia akamarie mai, me kare kia tuku ua, i roto i to tatou pirianga ki to tatou au taeake irinaki me kare ki tetai ke. Penei te rave ra tatou i tetai apinga e tika anga to tatou i te rave i te reira. Kare te au kaveinga Pipiria i aatiia. Noatu rai, me ka akariri atu tatou i tetai ke me kare ka akakino atu i te aronga akava ngakau paruparu ra, na te aroa Kerititiano e akakeu ia tatou kia rave i te reira ma te matakite. (Roma 14:13, 15) Na te tamou marie anga i te taokotai anga e te akamaata anga i te au anoano o te Patireia e puapinga maata atu ia i te akono anga i to tatou uaorai au tika anga.

18, 19. (a) I te akaari anga i te akamanakoanga no tetai, akapeea tatou e aru ei i to Iesu akaraanga? (e) I roto i teea au tumu ta tatou pouroa e rave taokotai ra, e eaa ra te ka uriuriia i roto i te atikara e aru mai nei?

 ¹⁸ Me rave tatou na roto i teia tu nei, te aru ra tatou i te akaraanga meitaki tikai. Te karanga ra a Paulo e: “Kare katoa oki te Mesia i akarekareka iaia uaorai, i tei tataia ra e, ‘Te akakino a te aronga i akakino ia koe ra, kua iri mai ïa ki runga iaku.’” Kua puareinga ua a Iesu i te akaatinga i tona oraanga no tatou. Papu tikai e te puareinga ua ra tatou i te akaatinga i etai o to tatou au tika anga me ka tauturu te reira i te “apikepike o te maroiroi kore” kia akakaka i te Atua ma te taokotai anga kia tatou. E tika tikai, i te akaari anga i tetai tu ariki anga e te ngakau tae ki te au Kerititiano akava ngakau paruparu ra—​me kare te oronga kotinga anga i ta tatou au ikianga e kare e maro atu i to tatou au tika anga​—te akaari ra i te “tau i te anoano o te Mesia ra o Iesu.”​—Roma 15:1-5.

¹⁹ Noatu e penei e tukeke to tatou au manako no runga i te au tumu kare te au kaveinga Tuatua Tapu i o mai ana, i roto i te au tumu no te akamori anga, te rave taokotai katoa nei ra tatou. (1 Korinetia 1:10) Te kiteaia ra taua taokotai anga, ei akatauanga, i to tatou ariu anga atu ki te aronga tei patoi i te akamori mou. Kua kapiki te Tuatua a te Atua i taua aronga patoi ra ei au tangata ke e te akamatakite maira ia tatou kia matakite i “te reo o te tangata ke.” (Ioane 10:5) Akapeea e rauka ai ia tatou i te akataka i taua au tangata ke ra? Akapeea tatou i te ariu anga atu kia ratou? Ka akamanakoia teia au uianga i roto i te atikara e aru mai nei.

[Tataanga Rikiriki i Raro]

Akapeea Koe me Pau?

• Eaa ra i kore ei i riro ei takinga kino anga te au manako tukeke no te au tumu uaorai ki te taokotai anga?

• Eaa ra tatou ei au Kerititiano ra ka akaari ei i te akamanakoanga maana no tetai e tetai?

• Eaa ra etai au mataara ka rauka ia tatou i te akono i ta Paulo akoanga no runga i te taokotai anga i teia tuatau, e Eaa ra te ka akakeu ia tatou kia rave i te reira?

[Au Uianga Apii]

[Tutu i te kapi 9]

E puapinga maata te akoanga a Paulo no runga i te taokotai anga no te putuputuanga

[Tutu i te kapi 10]

Te taokotai ra te au Kerititiano noatu e e au turanga tukeke to ratou

[Tutu i te kapi 12]

Eaa ra ta teia tangata akaoro ra ka rave i teianei?