Te Kimianga i te Mataora

I ETAI au mataiti i topa akenei, kua uiia ki te au tangata i Varani, Tiamani, Peritane, e Marike e, “Eaa te ka umuumuia kia rauka ai te mataora?” O te aronga tei uiuiia, e 89 patene tei karanga e na te oraanga kopapa meitaki; e 79 patene kua taiku mai i tetai akaipoipoanga me kore i te pirianga tokorua merengo tikai; e 62 patene kua tou ki te au akameitakianga ei metua; e e 51 patene kua manako e ko tetai ngai angaanga puapinga meitaki te umuumuia ra no te mataora. E noatu te akamatakite maira te pakari tei matauia e kare te moni e akapapu mai i te mataora, e 47 patene o te aronga tei uiia kua papu tikai e ka rauka i te reira. Eaa ta te au tumu e akaari maira?

Mea mua, akara i te pirianga e karangaia ra i rotopu i te moni e te mataora. Tetai akarakaraanga o te okotai anere tangata ona roa atu i Marike kua akaari mai e kare ratou i mataora atu i te tangata ravarai. Pera katoa, noatu te manganui i Marike e kua vaitata rai te takirua atu te maata i ta ratou au apinga materia i te rau ngauru mataiti e toru i topa akenei, kare ratou i mataora atu i ta ratou i matau ana, i na te aronga kite ei o te oraanga pae manako. Ko te tika, i tuatua ai tetai ripoti: “I taua taime rai, kua kake te au tareanga o te ngakau taitaia. Te tamateanga te au mapu ou ia ratou uaorai kua takitoru atu. Te tataraanga kua takirua atu te tareanga.” I roto i tetai au 50 enua tuke tuke, ko te aronga kimikimi tei apii i te pirianga i rotopu i te moni e te mataora kua tae ki te taopenga anga e kare e rauka i te moni i te oko i te mataora.

Aru mai, mei teaa ra te puapinga no te mataora te au tumu mei te oraanga kopapa meitaki, tetai akaipoipoanga merengo tikai, e tetai ngai angaanga puapinga meitaki? Ina, me te anoano tikaia ra teia au tumu nei kia mataora ai, akapeea i reira no runga i te au mirioni o te tangata kare e rekareka ra i te oraanga kopapa meitaki e te katoatoa rava o te aronga kare i rauka tetai akaipoipoanga merengo tikai? Akapeea te au tokorua akaipoipo kare e tamariki e te au tane e te au vaine katoatoa kare e ngai angaanga puapinga meitaki? Kua akakoroia ainei taua aronga pouroa ra ki tetai oraanga mataora kore? E ka ngaro ainei te mataora e manakoia ra no te aronga e rekareka ra i teianei i te oraanga kopapa meitaki e te akaipoipoanga merengo tikai me ka taui to ratou turanga?

Te Tano ra Ainei te Au Ngai e Kimi ra Tatou?

Te au tangata ravarai te inangaro ra kia mataora. Kare teia i te mea poitirere no te mea ko Tei Anga mai i te tangata kua akatakaia mai e ko “te Atua mataora,” e i angaia mai te tangata i roto i to te Atua tu. (1 Timoteo 1:11, NW; Genese 1:26, 27) No reira, e mea natura ua no te tangata kia kimi i te mataora. Inara, e manganui tei kite mai e ko te mou anga atu ki te mataora te aite ra ki te mou  anga atu ki te onetea o taatai​—e ngoie ua nga mea e rua i te ngaro ke atu.

Penei ake, paa, e te tauta pakari roa ra tetai papaki kia kitea te mataora? Kua manako katoa rai te tangata kite pakari no te pirianga tangata ko Eric Hoffer. Kua akakite aia e ko: “Te kimi anga i te mataora tetai o te au tumu maata o te mataora kore.” E mea tika roa te reira me kimi tatou i te mataora i roto i te au ngai tarevake. I taua tu ra, papu roa tatou i te rokoia e te mareka kore e te manamanata. Te tauta anga kia ona; te ropi anga kia rongonui me kore kia kiteaia mai; te aruaru anga i te au akakoroanga poritiki, pirianga tangata, me kore te pae puapinga; me kore te noo ua anga noou uaorai e te akamerengo anga viviki ua i to tetai uaorai anoano kua poka pouroa i te apai mai i te mataora. No reira rai tetai papaki i ariki ei i te manako patoi tei akakiteia e tetai tangata tata tei tuatua e: “Naringa ua ake tatou e akamutu ana i te tauta kia mataora ka rauka i reira tetai tuatau meitaki tikai no tatou”!

Puapinga tikai i reira, te tareanga tei taikuia i te akamataanga o teia atikara tei akaari katoa mai e e 4 i roto i te 10 tangata kua manako e ka tupu mai te mataora mei te rave i te meitaki e te tauturu anga i etai ke. E e 1 i roto i te au 4 ravarai tei akakite e e tuanga maata ta te akarongo e te irinakianga akonoanga i roto i te riro anga kia mataora. Te taka ua ra e, ka anoanoia tatou kia akara vaitata atu ki te ka umuumuia kia mataora tika tikai ei. Te atikara ka aru mai ka tauturu ia tatou kia rave i te reira.

[Au Tutu i te kapi 3]

Manganui te manako ra e ko te moni, te oraanga pamiri merengo tikai, me kore te ngai angaanga puapinga meitaki te taviri ki te mataora. Te akatika ra ainei koe?