Au Uianga a te Aronga Tatau

Eaa ra te au tane Iseraela i akatikaia ai kia akaipoipo i te au vaine tuikaa ke ra me kua akaue mai te Ture a Mose e auraka e akatupu i tetai pirianga akaipoipo ma te aronga ke ra?​—Deuteronomi 7:1-3; 21:10, 11.

Ko te tumu i akatikaia ai i te reira e no runga oki i te au turanga takake. Kua akaue a Iehova i te ngati Iseraela kia akapueurikiriki i te au oire e itu o te au pa enua i te enua o Kanaana, tamate anga i te au tangata katoatoa o reira. (Deuteronomi 20:15-18) I te tua o te au pa enua ke ra, ko te aronga mamaata ua tei ora mai koia oki ko te au vaine paretenia tuikaa. (Numero 31:17, 18; Deuteronomi 20:14) Ka rauka i tetai tane Iseraela i te akaipoipo i taua vaine ra, me akono anake ua aia i tetai au angaanga.

No runga i te au takainga ka umuumuia taua vaine ra kia rave, te karanga ra te Pipiria: “Ka varu ei aia i tona mimiti, ka kokoti ei i tona maikuku: E kopae oki aia i te kakau i riro mai ei aia ra, noo uaʼi i toou ra are, aue ei i tona metua tane e tona metua vaine, e kia okotai marama tikai: e muri akera, ka akaipoipo ei koe iaia, ei tane nana, e ei vaine oki aia naau.”​—Deuteronomi 21:12, 13.

Ka varu oki te paretenia tuikaa tei inangaroia e tetai Iseraela kia akaipoipo i tona katu. Te tipu anga i te rouru e akaariari anga ia no te mii me kore te taitaia. (Isaia 3:24) Ei akaraanga, i te ruti katoatoa anga te pateriareka ko Iobu i tana tamariki e te au apinga, kua tipu aia i tona rouru ei akairo no te mii anga. (Iobu 1:20) Kua akono katoa te vaine ke i tona maikuku rima, penei ‘kia tipupu tona maikuku rima ki roto mai’ e noatu ka peni ia te reira, kare tona nga rima e akaaraanga manea. (Deuteronomi 21:12, Knox) Eaa oki teia “kakau i riro mai ei aia ra” ta te vaine tuikaa ka akapae? E akonoanga oki no te au vaine o te au oire peikani te ka autu atu ia kia akamanea i roto i to ratou kakau manea roa atu. Kua rave ratou i teia ma te manakoanga kia akara mareka ia mai e to ratou aronga opu. Kia akapae ia taua kakau ra e te vaine tuikaa te mii ra.

Ka mii tetai vaine tuikaa te ka riro mai ei vaine akaipoipo na tetai tane Iseraela no tona au aronga akaperepereia tei mate no tetai marama okotai. Kua akapou takiriia te takoreanga o te au oire autuia e kua kore takiri tona au pirianga pouroa ki te pamiri e te oraanga o mua ana. Mei te mea e kua takore te vaeau Iseraela i te au tiki o tona ra au atua, kua ngaro ke atu tana au apinga akamorimori. Kua akono katoaia te marama mii ei tuatau tamaanga e i taua taime ra ka akarangatira te vaine tuikaa iaia uaorai mei te au apinga katoatoa o tana ra akonoanga akamorianga mua.

Inara, e tuke rai oki te turanga, i te tu tei matauia e te au vaine ke. I roto i teia turanga, kua akonoia teia kaveinga: “Auraka oki koe e akaipoipo ia ratou: auraka koe e oronga i taau tamaine na tana tamaiti; auraka oki koe e rave i tana tamaine na taau ra tamaiti.” (Deuteronomi 7:3) Eaa oki te tumu no teia araianga? Te karanga ra a Deuteronomi 7:4 e: “Ka riro oki ratou i te akaanga ke i taau tamaiti, kia kore e aru mai iaku, kia araara i te au atua ke ra.” No reira, te akakoroanga no te araianga, kia paruru ia te ngati Iseraela mei te akataeroanga akonoanga. Inara, ko te vaine ke i roto i te au turanga tei akatakaia ia Deuteronomi 21:10-13 kare oki i oronga mai ana i te akakokoanga. Kua mate pouroa tona au kopu tangata, e kua takoreia te au tiki tei akatutu i tona ra au atua. Kare oki ona akapirianga ma te aronga rave ra o te akonoanga pikikaa. I raro i taua au turanga ra ka akatikaia tetai Iseraela i te akaipoipo i tetai tangata ke.