‘E Kimi Atu i Tei Tau’

E OIRE rongonui oki a Damaseko i te anere mataiti mua o to tatou Tuatau Noa nei. Koropiniia e te au ngai tanu kai, kua aite te reira mei tetai ngai akapuanga no te au pouou tangata tei tae mai mei te au enua i te itinga. Kare i roa i muri ake i te matenga o Iesu Karaiti, e putuputuanga Kerititiano tetai i Damaseko. I rotopu i taua au mema ra ko te au ngati Iuda oki tei riro mai ei au pipi na Iesu i te tuatau o te Oroa o Penetekote i Ierusalema i te 33 T.N. (Angaanga 2:5, 41) Penei tetai au pipi mei Iudea mai kua neke atu ki Damaseko i te tupu mai anga te takinokinoanga i muri ake i to Setephano peiia anga ki te toka.​—Angaanga 8:1.

Penei i te tuatau 34 T.N., kua rauka i tetai Kerititiano mei Damaseko mai ko Anania te ingoa i tetai tukuanga angaanga takake roa. Kua karanga atu te Atu kiaia: “Ka tu, ka aere ki te arataa i tuatuaia ra, ko Tika ua, e te ngutuare rava o Iuda ra ka ui atu ei i tetai tangata no Tareso, ko Saula te ingoa: i na oki, te pure ra aia.”​—Angaanga 9:11.

Te mataara ko Tika te ingoa e 1.5 kiro mita te roaanga rere e kua oro na roto tikai i te ngai maata o Damaseko. Mei te au taraianga o te 19 au anere mataiti tei kapitiia mai, kua rauka ia tatou i tetai tamanako anga e eaa oki te akaraanga o te mataara i te au tuatau taito ra. I te akamanakoanga i to te reira tu, penei kua kimikimi oki a Anania no etai taime kia kiteaia te are o Iuda. Kua kiteaia mai e Anania i te reira, inara, kua taki atu tona atoroanga ki te riro anga mai a Saula e ko te apotetoro ko Paulo, e tangata tutu aere maroiroi no te tuatua meitaki.​—Angaanga 9:12-19.

Kua tono atu a Iesu i tana au pipi e kua akakite atu kia ratou kia ‘kimi atu i to reira tangata e tau’ no te tuatua meitaki. (Mataio 10:11) I te akaraanga, kua kimi tikai a Anania ia Saula. Mei ia Anania rai, kua mataora te Au Kite o Iehova i te kimi atu i te aronga tei tau e te rekareka ra me ariki te au tangata i te tuatua meitaki no te Patireia. I te kite mai anga ia ratou kua pauna katoa ia te tautaanga.​—1 Korinetia 15:58.

[Tutu i te kapi 32]

“Te arataa i tuatuaia ra, ko Tika ua” i teia tuatau nei

[Akameitakianga no te Tutu i te kapi 32]

From the book La Tierra Santa, Volume II, 1830